1-2. Omomukalo guni dhingi to vulu okulesha Ombiimbeli noku yi konakona? Shi thaneka.

 NATU tye ando owa hala okulanda egumbo. Oshike to ka kala wa hala okumona manga inoo ninga etokolo lyoku li landa? Mbela ethano owala tali ulike komeho yegumbo ndyono? Osha yela kutya oto ka kala wa hala okumona egumbo lyo lyene, opo wu vule okweenda mo, to tala nawa oondunda adhihe dhomeni nokutala to konenene iinima ayihe ngele oyi li ngaa nawa. Otashi vulika nokuli to ka kala wa hala okukonakona omusindilo gwegumbo wu mone kutya olya tungwa naanaa ngiini. Osha yela kutya oto ka tala nawa iinima ayihe yomegumbo ndyoka wa hala okulanda.

² Otatu vulu okuninga sha faathana uuna tatu lesha notatu konakona Ombiimbeli. Omulongwantu gumwe gwOmbiimbeli okwa li a yelekanitha etumwalaka lyOmbiimbeli “netungo eleeleka nolya tungilwa kekankameno lya kola.” Ongiini tatu vulu okutseya nawa ashihe shoka shi li mOmbiimbeli? Ngele owe yi lesha owala to endelele, otashi vulika to ka tseya owala ooshili dhopetameko, ano “iilongwa yopetameko yomOohapu dhaKalunga.” (Heb. 5:12) Onkee ano ngaashi owala wa pumbwa okuya “meni” lyegumbo ndyoka wa hala okulanda, opo wu tseye ashihe shoka shi li mo, yi konakona muule wu tseye uuyelele awuhe wayo. Omukalo gwa dhenga mbanda gwokukonakona, okumona nkene iitopolwa ya yoolokathana yetumwalaka lyayo ya kwatathana. Kambadhala okuuva ko nawa iinima mbyoka wa itaala nosho wo omatompelo ngoka ge ku ningitha wu yi itaale kutya oyoshili.

3. Omuyapostoli Paulus okwa li a ladhipike Aakriste ooyakwawo ya ninge shike, nomolwashike? (Aaefeso 3:14-19)

³ Opo tu uve ko nawa uuyelele awuhe womOohapu dhaKalunga, otu na okukonakona ooshili dhOmbiimbeli dhomuule. Omuyapostoli  Paulus okwa li a ladhipike aamwahe Aakriste ya konakone nuulaadhi Oohapu dhaKalunga, opo ya vule “okuuva ko uumbwalangandja uunene, uule wopombanda nuule womohi” woshili. Opo nduno otaya ka kala ye na “omidhi nekankameno” meitaalo lyawo. (Lesha Aaefeso 3:14-19.) Natse otwa pumbwa okuninga sha faathana. Natu ka taleni nkene tatu vulu okukonakona muule Oohapu dhaKalunga, opo tu mone uuyelele wadho awuhe shoka tawu ti.

4. Oshike tatu vulu okuninga tu hedhe popepi naJehova? Gandja iiholelwa.

⁴ Tu li Aakriste, inatu gwanenwa owala kokuuva ko omalongo gopetameko gOmbiimbeli. Otwa halelela okwiilonga iinima ‘ayihe yomuule womadhiladhilo gaKalunga’ kekwatho lyombepo ye ondjapuki. (1 Kor. 2:9, 10) Omolwashike itoo tameke nokukonakona muule iinima mbyoka tayi ku hedhitha popepi naJehova? Pashiholelwa, oto vulu okukonakona muule nkene a li a ulukile ohole aapiya ye yonale nonkene a ulika kutya oku ku hole wo. Oto vulu wo okukonakona nkene Jehova a li a hala Aaisraeli ye mu longele, e to shi yelekanitha nankene a hala Aakriste ye mu longele kunena. Nenge oto vulu okukonakona uuyelele wu na ko nasha nomahunganeko ngoka Jesus a gwanitha po pethimbo lyonkalamwenyo ye kombanda yevi.

5. Mbela opu na oshipalanyolo shoka wa hala okukonakona paumwene?

⁵ Yamwe mboka ye hole okulafulula iinima muule, oya li ya tumbula iinima yimwe mbyoka ya hala ya ka konakone mOohapu dhaKalunga. Iinima yimwe mbyoka ya popya oyi li moshimpungu “ Omaetopo giikundathanwa mbyoka to vulu okukonakona paumwene.” Oto vulu okumona enyanyu olindji mokukonakona iikundathanwa mbyoka to longitha embo Watch Tower Publications Index, nenge Embo lyokukonga uuyelele lyOonzapo dhaJehova. Okuninga ekonakonombiimbeli lyomuule otaku vulu oku ku kwathela wu koleke eitaalo lyoye noku ku kwathela wu ‘mone ontseyo yokutseya Kalunga.’ (Omayel. 2:4, 5) Ngashingeyi natu ka kundathaneni ooshili dhimwe dhOmbiimbeli dhomuule ndhoka tatu vulu okukonakona nuukeka.

6. (a) Eyooloko lini li li pokati kondungedhiladhilo nelalakano? (b) Omolwashike taku vulu okutiwa kutya elalakano lyaJehova li na ko nasha naantu nosho wo nevi otali kala “aluhe”? (Aaefeso 3:11)

⁶ Dhiladhila kwaashoka Ombiimbeli tayi ti kombinga yelalakano lyaKalunga. Pashiholelwa, natu taleni kwaashoka Ombiimbeli tayi ti kombinga yelalakano lyaKalunga. Kalunga ke na esiku a ndope okugwanitha po elalakano lye. Omolwashike mbela? Omolwaashoka uuna Jehova a tokola okuninga oshinima shontumba, iha kala owala e na omukalo gumwe awike gwokondandalunde gwoku shi gwanitha po. Ihe pehala lyaashono oha tifuka noha vulu okuninga po omalunduluko, opo a gwanithe po elalakano lye. Jehova ota vulu okuhogolola omikalo dha yoolokathana a gwanithe po elalakano lye, molwaashoka ‘iinima ayihe okwe yi shitile elalakano lye.’ (Omayel. 16:4) Niizemo yaashoka Jehova ha ningi, otayi ka kala sigo aluhe. Elalakano lyaJehova olini, nomalunduluko geni a ninga, opo e li gwanithe po?

7. Sho Adam naEva ya tukulutha uunashipotha, Jehova okwa li a lundulula ngiini omukalo gwe gwokwaadha elalakano lye? (Mateus 25:34)

⁷ Kalunga okwa li a lombwele Adam naEva elalakano lye li na ko nasha nayo kutya olini. Okwa li e ya lombwele a ti: ‘Valathaneni, ne mu indjipale nokuudha evi alihe. Li tuleni mepangelo lyeni; pangeleni iinamwenyo ayihe’ yokombanda yevi. (Gen. 1:28) Sho Adam naEva ya tukulile Jehova uunashipotha nokweetela aantu ayehe uulunde, shono kasha li she mu imbi a gwanithe po elalakano lye. Okwa lundulula omukalo moka lya li li na okugwanithwa po. Nziya nziya, Jehova okwa li a tokola okudhika po Uukwaniilwa megulu mboka tawu ka gwanitha po elalakano lye lyopetameko li na ko nasha naantu nosho wo nevi. (Lesha Mateus 25:34.) Pethimbo lye lyo opala, Jehova okwa li a tumu Omwana gwe gwosheeli omuholike kombanda yevi, a longe aantu kombinga yUukwaniilwa noku gandje omwenyo gwe e tu kulile muulunde neso. Opo nduno Jesus okwa yumuka, e ta shuna megulu a ka pangele e li Omukwaniilwa gUukwaniilwa waKalunga. Opu na nokuli oshindji okwiilonga kombinga yelalakano lyaKalunga.

8. (a) Enenedhiladhilo lyOmbiimbeli olini? (b) Ngaashi sha yelithwa mAaefeso 1:8-11, elalakano lyaJehova lya simanenena olini? (Tala ethano lyokombanda.)

⁸ Enenedhiladhilo lyOmbiimbeli olyo kutya edhina lyaJehova otali ka yapulwa, sho ta ka gwanitha po elalakano lye li na ko nasha nevi, okupitila mUukwaniilwa we mboka Kristus oye e li omupangeli gwawo. Elalakano lyaJehova itali vulu okulunduluka. Jehova oku uvaneka kutya kehe shimwe otashi ka ningwa ngaashi e shi popi. (Jes. 46:10, 11; Heb. 6:17, 18) Mokweendela ko kwethimbo, evi otali ka ninga oparadisa, moka oluvalo lwaAdam naEva lwa gwanenena nolwuyuuki talu ka ‘kala nomwenyo sigo aluhe.’ (Eps. 22:26, yelekanitha NW.) Ihe hasho owala shoka Jehova ta ka gwanitha po. Elalakano lye limwe ishewe, ota ka hanganitha iishitwa ye iinandunge yomegulu noyokombanda yevi. Opo nduno kehe gumwe ota ka kala ha vulika kuJehova e li Omupangeli gwe. (Lesha Aaefeso 1:8-11.) Mbela ino kuminwa omukalo gwa dhenga mbanda moka Jehova ha gwanitha po elalakano lye?

9. Uuyelele wuni wu na ko nasha nonakuyiwa tatu vulu okwiilonga sho tatu lesha Ombiimbeli?

⁹ Natu ka taleni kehunganeko ndyoka Jehova a popya moshikunino shaEden, lya nyolwa muGenesis 3:15. b Otali ulike kiiningwanima mbyoka tayi ka gwanitha po elalakano lye, ihe iiningwanima mbyoka oya li tayi ka ningwa owala konima yomimvo omayovi. Pashiholelwa, Kalunga okwa li a lombwele Abraham kutya konima  yomapipi ogendji, mugumwe gwomoluvalo lwe, otamu ka za ngoka ta ka ninga Kristus. (Gen. 22:15-18) Opo nduno mo 33 E.N., Jesus okwa li a tsuwa moshithi shompadhi ngaashi sha hunganekwa. (Iil. 3:13-15) Ngashingeyi opu na natango omimvo dhi vulithe 1 000, opo oshiningwanima shehunganeko ndyoka shi na ko nasha nokunyanyagula omutse gwaSatana shi ningwe. (Eh. 20:7-10) Ombiimbeli oya holola oshindji kombinga yaashoka tashi ka ningwa sho uutondwe pokati kaSatana nehangano lyaJehova tawu ende wa uka poshitsa shopombanda.

10. (a) Iiningwanima yomonakuyiwa yini yi li pokuya masiku? (b) Ongiini tatu vulu okulongekidha omadhiladhilo getu nomitima dhetu? (Tala enyolo lyopevi.)

¹⁰ Dhiladhila kiiningwanima inaayi monika nale mbyoka ya hunganekwa kOmbiimbeli. Tango, iigwana otayi ka igidha kutya ‘opu na ombili negameno.’ (1 Tes. 5:2, 3) “Ohaluka,” uudhigu uunene otawu ka tameka, sho iigwana tayi ka ponokela omalongelokalunga giifundja. (Eh. 17:16) Konima yaashono, otashi vulika pu ka ningwe oshinima inaashi monika nale, ano “Omuna gwOmuntu te ya te ende kiikogo yokegulu e na oonkondo odhindji neadhimo.” (Mat. 24:30) Jesus ota ka pangula aantu, ano ta ka yoolola oonzi miikombo. (Mat. 25:31-33, 46) Pethimbo ndyoka Satana ota ka tsikila nokupataneka oshigwana shaJehova. Molwaashoka oku tonde oshigwana shaKalunga, ota ka hwahwameka iigwana yi imanga kumwe, mbyoka Ombiimbeli hayi yi ithanwa Gog gwomevi lyaMagog, yi ponokele elongelokalunga lyashili. (Hes. 38:2, 10, 11) Oshihupe shaagwayekwa otashi ka gongelwa megulu shi ka kale pamwe naKristus nomatanga ge omanankondo gomegulu, ya ka hinge iita yaArmagedon, ano mbyoka tayi ka hingwa pethimbo lyuudhigu uunene. c (Mat. 24:31; Eh. 16:14, 16) Opo nduno Elelo lyaKristus lyOmimvo Eyuvi otali ka tameka okupangela kombanda yevi. — Eh. 20:6.

11. Etegameno lyoku ka mona omwenyo gwaaluhe otali ti shike kungoye? (Tala wo ethano.)

¹¹ Ngashingeyi dhiladhila muule nkene onakuyiwa tayi ka kala. Ombiimbeli oya ti kutya Omushiti gwetu ‘okwa tula uukwaaluhe moomwenyo dhetu.’ (Omuuv. 3:11) Dhiladhila kwaashoka shika tashi ti kungoye nonkene sha guma  ekwatathano lyoye naJehova. Embo Hedha popepi naJehova, epandja 319, otali popi oohapu ndhika dhihokitha tali ti: “Konima sho tatu ka kala nomimvo omathele, omayuvi, omamiliyona nosho wo omabiliyona, otatu ka tseya oshindji shi na ko nasha naJehova Kalunga shi vulithe ngashingeyi. Otatu ka kala wo tu uvite kutya opu na iinima oyindji iikumithi mbyoka twa pumbwa okwiilonga. . . . Otashi ka kala shituntula noonkondo okukala nomwenyo sigo aluhe nokunyanyukilwa iinima yi ili noyi ili notatu ka kala tu na ompito yokuhedha aluhe popepi naJehova.” Mokweendela ko kwethimbo sho tatu tsikile okukonakona Oohapu dhaKalunga, oshike ishewe tatu ka vula okukonakona muule?

12. Ongiini tatu vulu okunongonona egulu? Gandja oshiholelwa.

¹² Oohapu dhaKalunga odhe tu ulukila kashona nkene okukala po kwaJehova ku li, sho e li ‘mokombandambanda.’ (Jes. 33:5, OB-1954) Ombiimbeli oya popya iinima oyindji iikumithi shi na ko nasha naJehova nosho wo oshitopolwa shehangano lye shomegulu. (Jes. 6:1-4; Dan. 7:9, 10; Eh. 4:1-6) Pashiholelwa, otatu vulu okulesha kombinga yiinima iikumithi mbyoka Hesekiel a li a mono, sho egulu lye ‘eguluka nokwa mono emoniko lyaKalunga.’ — Hes. 1:1.

13. Oshike Jesus ta ningi megulu, ngaashi sha popiwa Aahebeli 4:14-16?

¹³ Dhiladhila wo kwaashoka Jesus ta longo megulu e li Omukwaniilwa gwetu nosho wo Omuyambi Omukuluntu omunalukeno. Okupitila muye otatu vulu okuya “koshipangelapundi shesilohenda” shaKalunga okupitila megalikano, tatu pula e tu silohenda noku tu kwathele “pethimbo lyo opala.” (Lesha Aahebeli 4:14-16.) Esiku kehe otwa pumbwa okudhiladhila kwaashoka Jehova naJesus ye tu ningila nokwaashoka taye tu ningile ngashingeyi okuza megulu. Ohole yawo oyi na okuguma omitima dhetu noku tu ningitha tu kale aalaadhi mokulongela Kalunga. — 2 Kor. 5:14, 15.

14. Iinima yini tatu vulu okuninga tu ulike kutya otwa pandula Jehova naJesus? (Tala wo omathano.)

 ¹⁴ Gumwe gwomomikalo dha dhenga mbanda moka hatu ulike kutya otwa pandula Kalunga ketu nosho wo Omwana, omokukwathela yalwe ya ninge Oonzapo dhaJehova nosho wo aalongwa yaJesus. (Mat. 28:19, 20) Shono osho omuyapostoli Paulus a li a ningi mokupandula Kalunga naKristus mwaashihe shoka ye mu ningile. Paulus oku shi kutya Jehova okwa hala “aantu ayehe ya hupithwe noya tse oshili.” (1 Tim. 2:3, 4) Okwa li a longo nuudhiginini miilonga yokuuvitha, opo a kwathele aantu oyendji ngaashi ta vulu, a “hupithe yamwe yomuyo momukalo kehe tagu vulika.” — 1 Kor. 9:22, 23.

15. Shi ikolelela kEpisalomi 1:2, oshike tashi ke tu nyanyudha?

¹⁵ Oshu uka sho omupisalomi ta hokolola omuntu ngoka omunyanyukwi noha pondola e li ngoka ha “nyanyukilwa okuvulika kompango yOmuwa nohe yi nyanyukilwa omutenya nuusiku.” (Eps. 1:1-3) Omutoloki gwOmbiimbeli Joseph Rotherham, okwa popi kombinga yenyolo ndyoka membo lye Studies in the Psalms, a ti kutya omuntu oku na okukala a hala okunyanyukilwa “okuwilikwa kOohapu dhaKalunga moku dhi konakona, mokukonga uuyelele mudho nomokulongitha ethimbo lya gwana a dhiladhile kombinga yaashoka a lesha mo.” Okwa gwedha ko a ti kutya “ngele opwa piti esiku omuntu inoo lesha Ombiimbeli, esiku ndyoka owe li hepitha noina mona mo uunongo noondunge.” Oto vulu okumona enyanyu mokukonakona Ombiimbeli, ngele owa konakona uuyelele wayo awuhe nokutala kutya owa kwatathana ngiini. Kashi nyanyudha tuu okukonakona Oohapu dhaKalunga nuukeka!

16. Oshike tatu ka kundathana moshitopolwa tashi landula?

¹⁶ Ooshili oombwanawa ndhoka Jehova Kalunga he tu longo mOohapu dhe, kadhi shi oondhigu okuuviwa ko. Moshitopolwa tashi landula, otatu ka konakona oshili yimwe yomuule yi na ko nasha notempeli yaJehova yopambepo, ndjoka Paulus a li a popi montumwafo ye ndjoka a nyolele Aakriste Aahebeli. Ano okukonakona Oohapu dhaKalunga, naku ku etele enyanyu enene.