1. Aalongelikalunga oya li ya nkondopalekwa ngiini methimbo lyonale?

 OOHAPU DHAKALUNGA olundji ohadhi popi aalumentu aadhiginini ye li aanankondo. Ihe nokuli naamboka ya li haya kala ye na oonkondo odhindji, haaluhe haya kala ye uvite ye dhi na. Pashiholelwa, omukwaniilwa David okwa li ha kala e uvite a kola, “ngaashi ondundu,” ihe poompito dhilwe okwa li ha haluka, nenge ha kala a tila. (Eps. 30:7) Ombepo yaKalunga oya li ya pe Simson oonkondo dhopalutu, ihe nando ongawo okwa li ha kala e shi kutya ngele kadhi po, ota ka kala a ‘fa aalumentu ooyakwawo.’ (Aatok. 14:5, 6; 16:17) Jehova oye a li a nkondopaleke aalumentu mboka aadhiginini.

2. Omolwashike omuyapostoli Paulus a li a popi kutya uuna e na uunkundi, opo ha kala e na oonkondo? (2 Aakorinto 12:9, 10)

² Omuyapostoli Paulus okwa li e shi zimine kutya naye okwa pumbwa oonkondo okuza kuJehova. (Lesha 2 Aakorinto 12:9, 10.) Ngaashi oyendji yomutse, Paulus naye okwa li e na uupyakadhi wuukolele. (Gal. 4:13, 14) Omathimbo gamwe osha li wo oshidhigu kuye okulonga shoka sha uka. (Rom. 7:18, 19) Poompito dhimwe, okwa li ha kala e na iimpwiyu nokwa tila kutya oshike tashi ke mu ningilwa. (2 Kor. 1:8, 9) Ihe nando ongawo, uuna Paulus a li e uvite kee na oonkondo, oha kala e uvite a nkondopalekwa. Ngiini mbela? Jehova okwa li a pe Paulus oonkondo ndhoka a li a pumbwa, opo a vule okwiidhidhimikila omashongo ge.

3. Omapulo geni tatu ka yamukula moshitopolwa shika?

³ Jehova natse oku uvaneka oku tu pa oonkondo tu idhidhimike. (1 Pet. 5:10) Ihe oonkondo ndhoka itatu vulu oku dhi mona ngele itatu ningi oonkambadhala. Natu shi thaneke ngeyi, oindjina otayi vulu okugandja oonkondo kohauto yi inyenge, ihe nando ongawo omuhingi oku na okulyata omahooli, opo yi vule okweenda. Sha faathana, Jehova naye okwi ilongekidha oku tu pa  oonkondo ndhoka twa pumbwa, ihe otu na okukatuka oonkatu ndhoka tadhi tu kwathele tu mone uuwanawa mudho. Jehova okwe tu pa shike shi tu nkondopaleke, noshike twa pumbwa, opo tu vule okumona oonkondo ndhoka? Otatu ka tseya omayamukulo gomapulo ngoka, ngele otwa konakona nkene Jehova a li a nkondopaleke aantu yatatu ya popiwa mOmbiimbeli, ano omuhunganeki Jona, Maria, yina yaJesus nosho wo omuyapostoli Paulus. Otatu ka tala wo nkene Jehova ta tsikile okunkondopaleka aapiya ye yokunena momikalo dha faathana.

4. Ongiini Jehova ta vulu oku tu pa oonkondo?

⁴ Omukalo gumwe moka tatu vulu okupewa oonkondo kuJehova, omoku mu galikana. Jehova ota ka yamukula omagalikano getu moku tu pa oonkondo dhi vule ndhoka dhopaunshitwe. (2 Kor. 4:7) Otatu vulu wo okumona oonkondo ngele ohatu lesha Oohapu dhe nokutedhatedha kwaashoka twa lesha mo. (Eps. 86:11) Etumwalaka lyaJehova ndyoka e tu nyolela mOmbiimbeli oli na “oonkondo dhokulonga sha.” (Heb. 4:12) Uuna to galikana Jehova noto lesha Oohapu dhe, oto ka mona oonkondo ndhoka wa pumbwa, opo wu vule okwiidhidhimika, wu kale wa nyanyukwa, nenge wu vule okulonga oshilonga oshidhigu. Ndhindhilika nkene Jehova a li a nkondopaleke omuhunganeki Jona.

5. Omolwashike omuhunganeki Jona a li a pumbwa oonkondo?

⁵ Omuhunganeki Jona okwa li a pumbwa oonkondo. Okwa li a fadhuka po oshinakugwanithwa oshidhigu shoka Jehova a li e mu pa. Oshilanduliko, okonyala a kanithile omwenyo gwe moshikungulu oshidhigu, nokwa li a tula oomwenyo dhaamboka a li nayo mosikepa moshiponga. Sho aanasikepa ye mu umbile mefuta okwa ninwa po kohi onene. Jona okwa li mehala etilithi, ano mela lyohi onene. Mbela sho to dhiladhila Jona okwa li e uvite ngiini? Mbela okwa li ta dhiladhila kutya ota sile mo? Mbela otashi vulika a li ta dhiladhila kutya Jehova okwe mu ekelahi? Jona otashi vulika a li a tila noonkondo.

6. Shi ikolelela kuJona 2:1, 2, 7, oshike sha li sha nkondopaleke Jona sho a li mela lyohi?

⁶ Jona okwa li a ningi po shike sho e li oye awike mela lyohi? Okwa galikana Jehova. (Lesha Jona 2:1, 2, 7.) Nonando Jona okwa li inaa vulika kuJehova, okwa iyele ombedhi nokwa kala e na eitaalo kutya Jehova ota ka pulakena komagalikano ge. Jona okwa li wo ha tedhatedha kombinga yomanyolo ngoka a lesha monakuziwa. Omolwashike tatu tile ngawo? Megalikano lye ndyoka tali adhika muJona ontopolwa 2, omwa longithwa omautumbulilo ogendji ga faathana noohapu ndhoka tadhi adhika mOmapisalomi. (Pashiholelwa, yelekanitha Jona 2:2, 5 nEpisalomi 69:1; 86:7.) Osha yela kutya Jona okwa li e shi omanyolo ngoka nawa. Naasho a kala ta tedhatedha kugo, oge mu shilipaleke kutya Jehova ote ke mu kwathela. Jehova okwa hupitha Jona nokwa kala a ilongekidha okulonga oshilonga shoka Jehova a li te ke mu pa. — Jona 2:10–3:4.

7-8. Omumwatate gwokoTaiwan okwa li a mono ngiini oonkondo pethimbo a li momaupyakadhi?

⁷ Oshiholelwa shaJona otashi vulu oku tu kwathela uuna twa taalela omamakelo gi ili nogi ili. Pashiholelwa, omumwatate Zhiming, gwokoTaiwan, b ota hepekwa kuuvu wa kwata miiti. Shimwe ishewe, yaandjawo ohaya ungaunga naye nonyanya omolweitaalo lye. Jehova ohe mu nkondopaleke okupitila megalikano nomokukonakona. Okwa ti: “Omathimbo gamwe ohandi kala ndi uvite nda gwililwa po nayi noitandi vulu okukala nda ngungumana ndi vule okuninga ekonakono lyandje lyopaumwene.” Shono kasha li she mu teya omukumo. Okwa ti: “Tango ohandi galikana kuJehova nopo nduno tandi tula ko uumbako wandje komakutsi e tandi pulakene omaimbilo gUukwaniilwa. Omathimbo gamwe ohandi ga imbi nokuli pevi, sigo oosho  nda ngungumana. Opo ihe tandi tameke okukonakona.”

⁸ Ekonakono lyopaumwene olya li lya nkondopaleke Zhiming a idhidhimikile oonkalo oondhigu. Pashiholelwa, sho a tandwa etando enene, omupangi gumwe okwa li e mu lombwele kutya okwa pumbwa okutulwa ombinzi, molwaashoka oosele dhe dhombinzi ontiligane odha gwa pevi. Ongulohi ya tetekela etando lye, Zhiming okwa li a lesha kombinga yomumwameme gumwe ngoka a tandwa etando lya fa lye. Omumwameme ngoka oosele dhe dhombinzi ontiligane odha li nokuli dha gwa pevi nayi dhi vule dhaZhiming. Nonando okwa li a tindi okutulwa ombinzi okwa aluka. Oshimoniwa shoka osha li sha nkondopaleka Zhiming a kale omudhiginini kuJehova.

9. Ngele oho kala wu uvite wa gwililwa, oshike to vulu okuninga? (Tala wo omathano.)

⁹ Uuna wu li memakelo, mbela oho kala wu uvite wa gwililwa po noonkondo e to kala itoo vulu okugalikana kuJehova? Nenge oho kala wu uvite kuu na oonkondo dhokukonakona? Dhimbulukwa kutya Jehova oku uvite ko thiluthilu onkalo yoye. Nokuli nonando egalikano lyoye efupi, kala wu shi kutya Jehova ota vulu oku ku pa shoka wa pumbwa. (Ef. 3:20) Ngele uuwehame woye wopalutu nenge wopamadhiladhilo ohawu shi ningi oshidhigu kungoye okukonakona, kambadhala okukala ho pulakene kelesho lyOmbiimbeli nenge kiileshomwa mbyoka ya kankamena kOmbiimbeli ya kwatwa momawi. Oto vulu wo okupulakena omaimbilo getu nenge wu tale uuvidio kepandja lyetu jw.org. Jehova ote ke ku nkondopaleka ngele owa kala nokukonga omayamukulo mOmbiimbeli nosho miinima yilwe mbyoka e tu pa.

10. Ongiini aamwatate naamwameme taya vulu oku tu nkondopaleka?

¹⁰ Jehova ota vulu okulongitha aamwatate naamwameme ye tu nkondopaleke. Otaya vulu okukala ‘ekwatho enene kutse,’ uuna twa taalela omamakelo nenge tatu nyengwa koshinakugwanithwa shetu oshidhigu. (Kol. 4:10, 11) Otwa pumbwa ookuume, unene tuu ye tu kwathele moluhepo nenge momathimbo omadhigu. (Omayel. 17:17) Uuna tu uvite kaatu na oonkondo, aamwatate naamwameme otaya vulu oku tu kwathela palutu, pamadhiladhilo nosho wo pambepo. Natu ka kundathaneni nkene Maria, yina yaJesus, a li a nkondopalekwa kuyalwe.

11. Omolwashike Maria a li a pumbwa oonkondo?

 ¹¹ Maria okwa li a pumbwa oonkondo, opo a vule okulonga ehalo lyaJehova. Oku na okukala a li a gwililwa po konima sho a li a pewa oshinakugwanithwa oshidhigu komuyengeli Gabriel. Okwa li e na okuninga etegelelo omanga inaa hokanwa. Ka li e na owino yokuputudha aanona, ihe okwa li e na okusila oshimpwiyu okamati hoka ka li taka ka ninga Mesiasa. Osha li oshidhigu kuye okulombwela Josef kutya oku li metegelelo, molwaashoka ina ya nando onale momilalo. — Luk. 1:26-33.

12. Shi ikolelela kuLukas 1:39-45, Maria okwa li a mono ngiini oonkondo ndhoka a li a pumbwa?

¹² Maria okwa li a mono ngiini oonkondo okugwanitha po oshinakugwanithwa shoka sha ikalekelwa noshinene? Okwa li a kongo ekwatho kuyalwe. Pashiholelwa, okwa li a pula Gabriel e mu pe uuyelele wa gwedhwa po wu na ko nasha noshinakugwanithwa shoka. (Luk. 1:34) Nziya konima yaashono, okwa yi ‘koshilando shomuJudea shi li koondundu,’ a ka talele po omupambele gwe, Elisabet. Etalelopo ndyono olya li ewanawa. Elisabet okwa li a pandula Jehova nokwa li a nwethwa mo kuJehova a lombwele Maria ehunganeko tali tsu omukumo, kombinga yokamwanamati hoka inaaka valwa natango. (Lesha Lukas 1:39-45.) Maria okwa ti kutya Jehova “okwa longo iilongankondo.” (Luk. 1:46-51) Jehova okwa li a nkondopaleke Maria okupitila muGabriel naElisabet.

13. Oshike sha li sha ningwa po sho omumwameme gumwe a pula aamwatate ekwatho?

¹³ Ngaashi Maria, nangoye oto vulu okunkondopalekwa kaamwatate naamwameme. Dasuri, omumwameme gwokoBolivia, okwa li a pumbwa oonkondo dha tya ngawo. Sho he a li a monika omukithi gwa kwata miiti, Dasuri okwa li e na ehalo okukala te mu sile oshimpwiyu. (1 Tim. 5:4) Shoka kasha li aluhe oshipu kuye. Okwa ti: “Iikando oyindji onda li handi kala ndi uvite itaandi vulu okutsikila.” Mbela okwa li a kongo ekwatho? Petameko ka li a pula yalwe ye mu kwathele. Okwa yelitha a ti: “Kanda li nda hala okuvulitha aamwatate naamwameme. Ondi ipula nda ti: ‘Jehova oye ta ka pa ndje ekwatho ndyoka nda pumbwa.’ Opo nduno onda ndhindhilike kutya ngele otandi iyoolola ko kuyalwe, nena otandi kambadhala okukandula po omaupyakadhi gandje ongame awike.” (Omayel. 18:1) Dasuri okwa tokola okunyolela yamwe yomookuume ke e te ya yelithile uupyakadhi we. Okwa ti: “Kandi na iitya nomatumbulo okuhokolola nkene nda li nda nkondopalekwa kAakriste ooyakwetu. Oya li ya etele ndje iikulya koshipangelo nokuleshela ndje oovelise mOmbiimbeli tadhi hekeleke ndje. Kashi shi tuu oshiwanawa okukala tu uvite kutya katu li otse atuke! Otu li oshitopolwa shuukwanegumbo waJehova uunene, ano uukwanegumbo mboka wu na ehalo oku tu kwathela, okulila pamwe natse noku tu ladhipika uuna tatu mono iihuna, tu tsikile okulongela Jehova pamwe nawo.

14. Omolwashike tu na okukala hatu taamba ko ekwatho lyaakuluntugongalo?

¹⁴ Omukalo gumwe Jehova he tu nkondopaleke, okupitila maakuluntugongalo. Oye li omagano ngoka ha longitha e tu nkondopaleke notu kale twa pepelelwa. (Jes. 32:1, 2) Onkee ano uuna wu uvite wa gwililwa po, lombwela aakuluntugongalo kutya omolwashike wu uvite wa gwililwa po. Uuna taye ku pe ekwatho, li taamba ko nolupandu. Jehova ota vulu oku ku nkondopaleka okupitila muyo.

15. Etegameno lini Aakriste ayehe ye na?

¹⁵ Etegameno lyetu lya kankamena kOmbiimbeli otali vulu oku tu nkondopaleka. (Rom. 4:3, 18-20) Tu li Aakriste, otu na etegameno lya dhenga mbanda lyoku ka kala moparadisa ombwanawa kombanda yevi, nenge mUukwaniilwa womegulu. Etegameno lyetu ohali tu kwathele tu idhidhimikile omamakelo, tu uvithe onkundana ombwanawa notu gwanithe po  iinakugwanithwa ya yoolokathana megongalo. (1 Tes. 1:3) Etegameno olyo tuu ndyono olya li lya nkondopaleke omuyapostoli Paulus.

16. Omolwashike omuyapostoli Paulus a li a pumbwa oonkondo?

¹⁶ Paulus okwa li a pumbwa okunkondopalekwa. Montumwafo ye ndjoka a nyolele Aakorinto, okwi iyelekanitha noshiyuma shevi inaashi kola. Okwa li e li ‘muudhigu owundji,’ e li “momalimbililo,” e na “aatondi oyendji” nokwa “hepekwa unene.” Omwenyo gwe nago ogwa li nokuli moshiponga. (2 Kor. 4:8-10) Oohapu ndhoka Paulus okwa li e dhi nyola pethimbo lyolweendo lwe olutitatu lwuutumwa. Nokonima yokunyola oohapu ndhoka okwa li a taalelwa koonkalo odhindji oondhigu. Okwa li ta ka ponokelwa koongundu dhaantu, ta kwatwa po, a yi moshiponga shetekosikepa nokwa li a tulwa mondholongo.

17. Metsokumwe nAakorinto aatiyali 4:16-18, oshike sha li sha nkondopaleke Paulus a idhidhimikile omaupyakadhi?

¹⁷ Paulus okwa li a mono oonkondo dhokwiidhidhimika mokukala ta gandja eitulomo ketegameno lye. (Lesha 2 Aakorinto 4:16-18.) Okwa li a lombwele Aakorinto kutya nokuli nonando olutu lwe lwopanyama olwa yonuuka po, itashi ke mu teya omukumo. Okwa li a gandja eitulomo konakuyiwa ye. Etegameno lye lyoku ka kala nomwenyo sigo aluhe megulu, olya li lye mu ‘etele eadhimo enenenene lyaa shi kuyelekwa,’ e ta kala ta vulu okwiidhidhimikila uudhigu kehe. Paulus okwa li a tedhatedha ketegameno ndyoka, noshizemo okwa li a ‘ningwa omupe esiku kehe.’

18. Ongiini etegameno lya li lya nkondopaleke Tihomir nuukwanegumbo we?

¹⁸ Omumwatate, Tihomir, gwomoBulgaria, okwa li a nkondopalekwa ketegameno lye. Omimvo opo dha zi ko, omumwayinamati omushona, Zdravko, okwa li a sile moshiponga. Oshizemo, Tihomir okwa kala ta hepekwa koluhodhi olunene. Sho ye noyaandjawo ya dhiladhila kombinga yeyumuko, oshe ya hekeleke. Okwa yelitha a ti: “Pashiholelwa, otwa li twa kundathana kombinga yaampoka tatu ka tsakanena naZdravko, iikulya mbyoka tatu ke mu telekela, oolye taya ka hiywa kokatuthi hoka tatu ke mu ningila sho a yumuka noshike tatu ke mu lombwela kombinga  yomasiku gahugunina. Tihomir okwa ti kutya okukala taya gandja eitulomo ketegameno lyawo lyonakuyiwa, okwa nkondopaleke uukwanegumbo we wu kale tawu idhidhimikile oluhodhi ndoka nokukala wa tegelela ethimbo ndyoka Jehova ta ka yumudha omumwayinamati.

19. Oshike to vulu okuninga wu koleke etegameno lyoye li na ko nasha nonakuyiwa? (Tala wo ethano.)

¹⁹ Ongiini to vulu okukoleka etegameno lyoye lyonakuyiwa? Pashiholelwa, ngele owu na etegameno lyoku ka kala nomwenyo sigo aluhe kombanda yevi, lesha omanyolo ngoka taga popi kombinga yOparadisa nokutedhatedha kugo. (Jes. 25:8; 32:16-18) Dhiladhila muule kunkene onkalamwenyo tayi ka kala muuyuni uupe. Dhiladhila ando wu li mo, kombinga yaamboka to ka mona, yaashoka to ka uva nankene to ka kala wu uvite. Opo shi ku kwathele wu mone nkene Oparadisa tayi ka kala ya tya, tala kethano miileshomwa yetu, nenge wu tale uuvidio wu li molupe lwomusika, ngaashi Otwa tegelela uuyuni uupe, Oparadisa oyi li popepi, nenge Uuna itaapu ka kala we omaupyakadhi. Ngele otwa tsikile nokukonga ethimbo lyokudhiladhila kombinga yetegameno lyuuyuni uupe, omaupyakadhi getu otaga ka kala ‘gopokathimbo notage ke tu etela eadhimo.’ (2 Kor. 4:17) Etegameno ndyoka Jehova e tu pa otali vulu oku tu kwathela tu idhidhimikile omaupyakadhi.

20. Ongiini to vulu okumona oonkondo, nokuli nuuna wu uvite kuu dhi na?

²⁰ Nokuli nuuna tu uvite kaatu na oonkondo, ‘Kalunga ote ke tu pa esindano.’ (Eps. 108:13) Jehova okwe ku pa nale shoka wa pumbwa, opo wu vule okumona oonkondo puye. Onkee ano uuna wa pumbwa ekwatho, opo wu vule okugwanitha po oshinakugwanithwa shoye, wu idhidhimikile omamakelo, nenge wu kale wa nyanyukwa, galikana Jehova wa mana mo nokukonga ewiliko kuye okupitila megalikano lyopaumwene. Taamba ko etsomukumo ndyoka to pewa kaamwatate naamwameme. Kala ho kongo aluhe ethimbo lyokudhiladhila kombinga yetegameno lyoye li na ko nasha nonakuyiwa. Opo nduno oonkondo ndhoka tadhi ‘zi mesindano lyoonkondo dhaKalunga, otadhi ku koleke, opo wu vule okwiidhidhimikila ashihe shoka tashi ku adha.’ — Kol. 1:11.