1-2. Uuwanawa wuni hatu mono mo mokugandja pehala lyokupewa?

 SHO Jehova a shiti aantu, okwe ya shiti ye na egamo lyokukala ya nyanyukwa, uuna taya gandja pehala lyokupewa. (Iil. 20:35) Mbela shino osha hala okutya ihatu kala twa nyanyukwa uuna twa pewa sha? Aawe. Atuhe otwe shi mona kutya ohatu kala twa nyanyukwa uuna twa pewa omagano. Ihe nonando ongawo, ohatu kala twa nyanyukwa unene, uuna tatu gandja kuyalwe. Ihe shono oshiwanawa osho kutya Jehova okwe tu shita momukalo gwa tya ngaaka. Omolwashike tatu tile ngawo?

² Molwaashoka Jehova okwe tu shita momukalo ngoka, otatu vulu okukala twa nyanyukwa. Otatu vulu okugwedha ko kenyanyu lyetu ngele otwa kongo omikalo moka tatu vulu okugandja kuyalwe. Mbela ka shi shi tuu oshihokithi, sho Jehova e tu shiti momukalo gwa tya ngeyi! — Eps. 139:14.

3. Omolwashike Jehova ta popiwa e li “Kalunga omunyanyukwi”?

³ Omanyolo otage tu shilipaleke kutya okugandja oku na elago, onkene itashi tu kumitha sho Ombiimbeli ya yelitha kutya Jehova oku li “Kalunga omunyanyukwi.” (1 Tim. 1:11, NW) Oye gwotango a li a gandja nokapu na ngoka ha gandja e mu vule. Ngaashi omuyapostoli Paulus a ti: “Muye tse otu na omwenyo, tatu inyenge notu li po.” (Iil. 17:28) Onkee “oshipewa kehe oshiwanawa nomagano kehe ga gwana ga pwa” ohaga zi kuJehova. — Jak. 1:17.

4. Oshike tashi ke tu kwathela tu mone enyanyu olindji?

⁴ Atuhe otashi vulika tu kale twa hala okumona enyanyu ndyoka hali zi mokugandja. Enyanyu ndyoka otatu vulu oku li mona ngele otwa kala hatu landula oshiholelwa shaJehova shokugandja nehalo ewanawa. (Ef. 5:1) Moshitopolwa shika, otatu ka kundathana oshiholelwa oshiwanawa shaJehova shokugandja, notatu ka ilonga shoka tatu vulu okuninga po ngele otu uvite kutya yamwe ihaya ulike olupandu lwaashoka twe ya ningila. Omadhimbulukitho  ngoka otage ke tu kwathela tu kaleke po nokugwedha ko kenyanyu ndyoka hatu mono sho tatu gandja.

KALA HO GANDJA NGAASHI JEHOVA

5. Iinima yini Jehova he tu pe?

⁵ Omomikalo dhimwe dhini Jehova ha ulike kutya oha gandja? Natu taleni kiiholelwa tayi landula. Jehova ohe tu pe shoka twa pumbwa. Haaluhe tashi vulika tu kale tu na iinima yopamaliko, ihe otatu pandula Jehova sho oyendji yomutse he tu pe shoka twa pumbwa. Pashiholelwa, ohe shi ningitha tashi wapa, opo tu kale tu na iikulya, iizalomwa nehala lyokukala. (Eps. 4:8; Mat. 6:31-33; 1 Tim. 6:6-8) Mbela Jehova ohe tu gwanithile po owala oompumbwe dhetu, molwaashoka e uvite kutya oku na oku shi ninga? Hasho nando! Omolwashike nduno Jehova he shi tu ningile?

6. Oshike tatu ilongo muMateus 6:25, 26?

⁶ Jehova ohe tu pe shoka twa pumbwa, molwaashoka oku tu hole. Natu taleni kOohapu dhaJesus ndhoka tadhi adhika muMateus 6:25, 26. (Lesha.) Jesus okwa longitha oshiholelwa shiinima yomeshito. Okwa li a popi kombinga yoondhila a ti: “Nando ihadhi kunu, dho ihadhi teya, dho ihadhi pungula miigandhi.” Ihe ndhindhilika shoka a popi sha landula ko sho a ti: “Ho yeni yomegulu ohe dhi palutha.” Opo nduno Jesus okwa pula a ti: “Ano hane mboka mu dhi vule?” Oshitsa oshini mbela? Jehova okwa tala ko aantu ye na ondilo ye vule iinamwenyo. Ngele Jehova oha sile oshimpwiyu iinamwenyo natse otatu vulu okukala nuushili kutya ote ke tu sila oshimpwiyu. Ngaashi owala he omuvali ha sile oshimpwiyu aanegumbo lye, Jehova naye oha sile oshimpwiyu aanegumbo lye ta inyengithwa kohole. — Eps. 145:16; Mat. 6:32.

7. Omukalo gumwe guni tatu vulu okuholela nkene Jehova ha gandja? (Tala wo ethano.)

⁷ Ngaashi Jehova natse otatu vulu okupa yalwe shoka ya pumbwa tatu inyengithwa kohole. Pashiholelwa, mbela owu shi omwiitaali omukweni ngoka e na ompumbwe yiikulya nenge yiizalomwa? Jehova ota vulu oku ku longitha wu mu pe shoka a pumbwa. Oshigwana shaJehova osha tseyikila unene okugandja, uuna pwa holoka iiponga yopaunshitwe. Pashiholelwa, pethimbo lyomukithi gwekomba gwo-COVID-19, aamwatate naamwameme oya li ya topolelathana iikulya, iizalomwa niipumbiwa yimwe naamboka ya li ye na ompumbwe. Oyendji oya li wo ya gandja omayambidhidho nehalo ewanawa kiilonga yomuuyuni awuhe, ngoka ga li ga longithwa okugandja iikwatha. Oya li ya tula miilonga oohapu dhAahebeli 13:16: “Inamu dhimbwa  okulonga uuwanawa nokukwathathana, oshoka omayambo ga tya ngeyi oga hokiwa kuKalunga.”

8. Jehova ohe tu pe oonkondo tu ninge shike? (Aafilippi 2:13)

⁸ Jehova oha gandja oonkondo. Jehova oha kala a nyanyukwa okupa aapiya ye aadhiginini oonkondo dhe oonenenene. (Lesha Aafilippi 2:13.) Mbela owa galikanene nale wu pewe oonkondo wu sinde emakelo lyontumba nenge wu idhidhimikile eshongo? Otashi vulika wo wa li wa galikana wu pewe oonkondo dha gwana, opo wu gwanithe po shoka wa li wu na okuninga esiku ndyoka. Sho egalikano lyoye lya li lya yamukulwa, owa li wa tsu kumwe nomuyapostoli Paulus sho a nyola a ti: “Ngame otandi vulu shaa shoka, oshoka Kristus ota koleke ndje.” — Fil. 4:13.

9. Ongiini tatu vulu okuholela okugandja kwaJehova? (Tala wo ethano.)

⁹ Nonando otu li aantu inaatu gwanena otatu vulu okuholela omukalo moka Jehova ha longitha oonkondo dhe nehalo ewanawa. Itatu vulu oku dhi gandja kuyalwe. Ihe otatu vulu oku dhi longitha tu ya kwathele. Pashiholelwa, otatu vulu oku ka landela aakokele, nenge mboka ihaaya vulu okuza mo megumbo iipumbiwa yawo noku ya kwathela niilonga yomegumbo. Ngele oonkalo dhetu otadhi shi pitike, otatu vulu okwiiyamba tu kwathele okwoopaleka nokukaleka Oshinyanga shUukwaniilwa monkalo ombwanawa. Ngele otwa kala hatu kwathele yalwe otashi vulu oku ya etela uuwanawa.

10. Ongiini tatu vulu okunkondopaleka yalwe, noohapu dhetu?

¹⁰ Ino dhimbwa wo kutya shoka hatu popi oshi na oonkondo. Mbela owu shi gumwe ngoka ta ka kala a tsuwa omukumo ngele owe mu pandula, omolwiilonga ye yuudhiginini? Mbela owu shi gumwe ngoka a pumbwa ehekeleko? Ngele osho kambadhala wu mu tseyithile kutya owu na ko nasha naye. Oto vulu oku mu talela po oshipala noshipala, oku mu dhengela ongodhi nenge wu mu tumine okakalata, etumwalaka kongodhi nenge o-email. Ino ipula unene naashoka toka tya. Oohapu oofupi tadhi zi komutima otashi vulika odho naanaa omwiitaali omukweni a pumbwa, opo a kale omudhiginini esiku ndyoka nenge a kale e na omukumo noku uvite e li hwepo omolwonkalo moka e li. — Omayel. 12:25; Ef. 4:29.

11. Jehova oha longitha ngiini uunongo we?

¹¹ Jehova oha gandja uunongo. Omulongwa Jakob okwa nyola a ti: “Ihe ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” (Jak. 1:5) Oohapu ndhika otadhi ulike kutya Jehova iha ngungunine uunongo we, ihe ohe wu topolelathana nayalwe. Ndhindhilika wo kutya uuna Jehova a gandja  uunongo we ohe shi ningi, nopwaa na “omanyenyeto.” Iha kala nando a hala tu kale tu uvite nayi sho tatu mu pula ewiliko lye. Mepingathano naashono, ohe tu ladhipike tu li konge. — Omayel. 2:1-6.

12. Oompito dhini tu na dhokutopolelathana nayalwe uunongo wetu?

¹² Mbela otatu vulu okuholela Jehova mokutopolelathana nayalwe owino yetu? (Eps. 32:8) Aapiya yaJehova oye na oompito odhindji dhokutopolelathana nayalwe shoka ya ilonga. Pashiholelwa, ohatu dheula aauvithi aape. Aakuluntugongalo ohaya kwathele neidhidhimiko aayakuligongalo nosho wo aamwatate mboka ya ninginithwa ya ilonge nkene ye na okukala haya ungaunga niinakugwanithwa yawo megongalo. Aamwatate naamwameme mboka ye na owino miilonga yokutunga nokukaleka omatungo monkalo ombwanawa, ohaya dheula yalwe ya longe momatungo gehangano.

13. Sho tatu dheula yalwe, ongiini tatu vulu okuholela omukalo moka Jehova ha gandja owino ye?

¹³ Mboka haya dheula yalwe oye na okuholela omukalo moka Jehova ha gandja owino ye. Ndhindhilika kutya Jehova oha kala a nyanyukwa sho ta gandja owino ye. Sha faathana, natse ohatu topolelathana naamboka taya ilongo owino ndjoka tu na nehalo ewanawa. Ihatu ngungunine ontseyo yetu, molwaashoka twa tila kutya ngoka tatu dheula otashi vulika a ka kuthe po iinakugwanithwa yetu. Omathimbo gamwe aantu ohaya dhiladhila kutya, molwaashoka kapu na ngoka e ya dheula nayo itaya ka dheula yalwe. Tu li aapiya yaJehova inatu hala okukala tu na iikala ya tya ngawo. Pehala lyaashono, ohatu kala twa nyanyukwa okutopolelathana nayalwe owino yetu nokuninga ngaashi tatu vulu tu ya dheule. (1 Tes. 2:8) Otu na wo einekelo kutya nayo otaya vulu ‘okulonga yakwawo.’ (2 Tim. 2:1, 2) Ngele atuheni otwa topolelathana nayalwe owino yetu, otatu ka kala twa nyanyukwa pamwe naamboka hatu dheula.

UUNA YALWE IHAAYA PANDULA SHOKA TWE YA NINGILA

14. Oyendji ohayi inyenge ngiini, uuna twe ya pe sha?

¹⁴ Uuna hatu gandja nehalo ewanawa, uunene tuu kaamwatate naamwameme, olundji ohaye tu pandula. Otashi vulika ye tu nyolele okakalata nenge ya ulike kutya oye tu pandula momukalo gwontumba nogwongandi. (Kol. 3:15) Uuna ya ulike kutya oye tu pandula, ohashi tu nyanyudha natse.

15. Oshike twa pumbwa okudhimbulukwa uuna yamwe, ihaaya ulike olupandu lwaashoka twe ya ningila?

¹⁵ Uushili owo kutya, haantu ayehe ha yu ulike olupandu. Omathimbo gamwe otashi vulika tu longithe ethimbo lyetu niiniwe yetu tu kwathele yalwe, ihe konima otashi vulika tu ipule ngele omuntu ngoka twa kwathela okwa pandula ngaa shoka twe mu ningila? Ngele shoka sha ningwa, ongiini tatu vulu okuyanda okukanitha enyanyu lyetu nenge okukala twa geya? Dhimbulukwa Oohapu dhenenedhiladhilo lyoshitopolwa shika ndhoka dhi li mIilonga 20:35. Enyanyu ndyoka hatu mono ihali ya po ngele aantu oya pandula shoka twe ya ningila nenge hasho. Otatu vulu okukala hatu gandja nenyanyu, nonando yalwe ihaya pandula shoka twe ya ningila. Ngiini mbela? Natu taleni komikalo dhimwe moka tatu vulu oku shi ninga.

16. Oshike twa pumbwa okugandja eitulomo kusho uuna tatu gandja?

¹⁶ Gandja eitulomo kokuholela Jehova. Oha gandja iinima iiwanawa kuyalwe, kashi na nduno mbudhi kutya oye mu pandula nenge hasho. (Mat. 5:43-48) Jehova okwa uvaneka kutya ngele otwa kala hatu gandja ‘kaapu na okutegelela tu galulilwe sha,’ otatu ka mona “ondjambi onene.” (Luk. 6:35) Onkene ano ino kala wa teka omukumo ngele yalwe ihaye ku pandula aluhe, omolwuuwanawa mboka we ya ningila. Dhimbulukwa kutya, Jehova ote ke ku pa ondjambi, omolwiinima iiwanawa mbyoka ho ningi wu kwathele yalwe, nomolwaashoka  ho gandja nenyanyu. — Omayel. 19:17; 2 Kor. 9:7.

17. Omolwashike tu na okukala netaloko ewanawa kombinga yokugandja? (Luk. 14:12-14)

¹⁷ Oshinima oshikwawo tatu vulu okuninga tu holele Jehova okutula miilonga Lukas 14:12-14. (Lesha.) Inashi puka okuhiya aayenda megumbo lyoye nenge okugandja sha kuyalwe nehalo ewanawa, mboka taya vulu oku ku ningila oshinima sha faathana. Ongiini ngele otwa ndhindhilike kutya otashi vulika hatu gandja kuyalwe, molwaashoka twa hala ye tu galulile sha? Ngele osho, kambadhala okuninga ngaashi Jesus a ti. Otatu vulu okugandja kugumwe ngoka tu shi kutya ita vulu oku tu galulila sha. Opo nduno otatu ka kala twa nyanyukwa, molwaashoka otatu holele Jehova. Ngele ihatu kala twa tegelela tu galulilwe sha, otashi ke tu kwathela tu kaleke po enyanyu lyetu uuna yalwe ihaaye tu pandula.

18. Oshike kaatu na okuninga nomolwashike?

¹⁸ Yanda okupangula omainyengotompelo gayalwe. (1 Kor. 13:7) Ngele yalwe ihaya ulike olupandu otatu vulu okwiipula ngeyi: ‘Mbela inaya pandula ngaa shili, nenge pamwe oya dhimbwa owala oku shi ninga, nenge tashi vulika ye na omatompelo galwe kutya oshike inaaye tu pandula ngaashi twa li twa tegelela?’ Yamwe otashi vulika ye tu pandula noonkondo, ihe otashi vulika oshidhigu kuyo oku tu lombwela. Yamwe otashi vulika ya sa ohoni okutaamba ko ekwatho, uunene tuu ngele monakuziwa oyo ya li haya kwathele yamwe. Ihe ngele otu hole shili aamwatate naamwameme, itatu ke ya dhiladhilila uuwinayi notatu ka tsikila okugandja nenyanyu. — Ef. 4:2.

19-20. Omolwashike eidhidhimiko lya simana, uuna tatu gandja kuyalwe? (Tala wo ethano.)

¹⁹ Kala omwiidhidhimiki. Shi na ko nasha nokugandja, Omukwaniilwa omunandunge Salomo okwa nyola a ti: “Umbila oshikwiila shoye kombanda yomeya, oshoka nge pwa piti omasiku ogendji, oto ke shi monununa.” (Omuuv. 11:1) Oohapu ndhika otadhi tu longo kutya omathimbo gamwe aantu otashi vulika ya ulike olupandu “konima yomasiku ogendji.” Natu taleni koshimoniwa shoka tashi tsu omuthindo oshili ndjoka.

²⁰ Omimvo odhindji dha ka pita, omukulukadhi  gwomutonatelishikandjo okwa li a nyolele omumwameme opo a ninginithwa, ontumwafo ya za komutima te mu ladhipike a kale omudhiginini. Konima yomimvo hetatu, omumwameme okwa li a galula ontumwafo ndjoka ta ti: “Shika ku shi shi, ihe onda hala oku ku lombwela nkene wa kwathela ndje noonkondo momimvo ndhoka dha ka pita.” Okwa ti ishewe, “owa nyolele ndje oohapu dhombili nokanda li nda dhimbwa enyolo ndyoka wa li wa tumbula.” a Konima sho a yelitha omashongo gamwe ngoka a li a taalela okwa ti: “Omathimbo gamwe onda li handi ka kala nda hala okweetha po ayihe nokweetha po okulongela Jehova. Ihe onda li aluhe handi dhimbulukwa enyolo ndyoka wa nyolela ndje nolya li lya koleke ndje ndi tsikile okukala omudhiginini.” Okwa gwedha ko a ti: “Momukokomoko gwomimvo ndhoka hetatu, kapu na shimwe shoka sha li sha tsu ndje omukumo shi vulithe ontumwafo nenyolo ndyoka wa li wa nyolele ndje.” Dhiladhila owala komukulukadhi gwomutonatelishikandjo nkene a li a nyanyukwa okumona ontumwafo ndjoka “konima yomasiku ogendji.” Natse wo otashi vulika tu mone oohapu dholupandu pwa pita ethimbo, konima sho twa ningila gumwe uuwanawa.

21. Omolwashike wa tokola toko okutsikila okuholela nkene Jehova ha gandja?

²¹ Ngaashi twa zi nokukundathana, Jehova okwe tu shita nuukwatya wa dhenga mbanda wokugandja kuyalwe. Ohatu kala twa nyanyukwa unene, ngele tatu kwathele ooitaali ooyakwetu. Ohatu kala twa nyanyukwa uuna ya ulike olupandu lwawo. Ihe nonando ongawo, kutya nduno ngoka twa pa sha okwe tu pandula nenge hasho, ohatu ka kala twa nyanyukwa oshoka otwa ninga oshinima shi li mondjila. Dhimbulukwa aluhe kutya uuna wa gandja “Omuwa ota vulu oku ku galulila shi vule shoka.” (2 Ondjal. 25:9) Kapu na siku wu gandje kuyalwe shi vulithe pwaashoka Jehova ta vulu oku ku pa. Shimwe ishewe, kapu na enyanyu enene li vule ndyoka Jehova he tu pe, uuna twa gandja. Natu kale twa tokola toko tu tsikile okuholela Tate yetu gwomegulu ngoka ha gandja nehalo ewanawa.