1. Mbela Jesus ota ka ninga shike masiku?

 OTU LI pethimbo mpoka omalunduluko omanene taga ningwa. Masiku Jesus ota ka pangula aantu ayehe. Jesus okwa li a popi kombinga yiiningwanima mbyoka tayi ka tetekela epangulo ndyoka, sho a pe aalongwa ye “endhindhiliko” lyehunganeko ‘lyokukala po kwe nolyomasiku gahugunina guuyuni mbuka.’ (Mat. 24:3) Ehunganeko ndika olya nyolwa muMateus ontopolwa 24 no-25, muMarkus ontopolwa 13 nosho wo muLukas ontopolwa 21.

2. Oshike tatu ka kundathana moshitopolwa shika, naashono otashi ke tu kwathela ngiini?

² Jesus okwa longitha omayele gatatu, tage tu pe omalondodho ngoka taga vulu oku tu kwathela. Lyotango, eyele lyoonzi niikombo, etiyali, aakadhona aagoya naakadhona aanandunge, netitatu, olyiitalenti. Eyele kehe otali tu kwathele tu uve ko nkene eihumbato lyomuntu tali ka utha kutya ota ka pangulwa ngiini. Sho tatu kundathana omayele ngano, natu ndhindhilike shoka tage tu longo nankene tatu vulu oku ga tula miilonga. Eyele ndyoka tatu ka kundathana tango, olyoonzi niikombo.

OONZI NIIKOMBO

3. Uunake Jesus ta ka tokola aantu?

³ Meyele li na ko nasha noonzi nosho wo iikombo, Jesus okwa ti kutya ota ka pangula aantu shi ikolelela kunkene yi inyenga ketumwalaka lyonkundana ombwanawa nongele oya li ngaa haya ambidhidha aamwahe aagwayekwa. (Mat. 25:31-46) Pethimbo  “lyuudhigu uunene” ote ke ya pangula manga Armagedon inee ya. (Mat. 24:21) Ngaashi owala omusita ha yoolola mo oonzi miikombo, Jesus ota ka yoolola mo mboka ya kala taya ambidhidha aalanduli ye aagwayekwa mwaamboka ya kala ihaaye shi ningi.

4. Shi ikolelela kuJesaja 11:3, 4, omolwashike tatu vulu okukala tu na uushili kutya Jesus ota ka pangula aantu pauyuuki? (Tala wo ethano lyokombanda.)

⁴ Ombiimbeli otayi ulike kutya Jesus e li omupanguli ngoka a langekwa po kuJehova, ota ka pangula pauyuuki. (Lesha Jesaja 11:3, 4.) Ota tala eihumbato, iikala nokupopya kwaantu, mwa kwatelwa nkene haya ungaunga naamwahe ye aagwayekwa. (Mat. 12:36, 37; 25:40) Jesus ota ka kala e shi mboka ya ambidhidha aamwahe aagwayekwa nosho wo iilonga yawo. a Omukalo gumwe gwa simana ngoka mboka ya fa oonzi taya vulu okwaambidhidha aamwahe yaKristus, omoku ya kwathela miilonga yokuuvitha. Mboka haye ya ambidhidha, otaya ka pangulwa ye li onga “aayuuki” noye na etegameno lyoku ka kala “nomwenyo sigo aluhe” kombanda yevi. (Mat. 25:46, Eh. 7:16, 17) Kayi shi tuu ondjambi ya dhengambanda kwaamboka aadhiginini! Ngele oya kala aadhiginini pethimbo nokonima yuudhigu uunene, otaya ka kaleka omadhina gawo “membo lyomwenyo.” — Eh. 20:15.

5. Oshike tatu ilongo meyele lyoonzi niikombo noolye taya mono mo uuwanawa?

⁵ Ulika kutya owu li omudhiginini nowu shi okwiinekelwa. Eyele lyaJesus lyoonzi niikombo olya ukithwa kwaamboka ye na etegameno lyoku ka kala nomwenyo kombanda yevi. Ohaya ulike eitaalo lyawo mokukwathela aamwahe yaKristus miilonga yokuuvitha, nokutaamba ko ewiliko ndyoka hali zi kokangundu okashona kaamwatate aagwayekwa, mboka ya hogololwa kuJesus. (Mat. 24:45) Ihe mboka ye na etegameno lyoku ka kala nomwenyo megulu, oye na wo okuvulika ketumwalaka lyelondodho, tali adhika meyele ndyoka. Omolwashike mbela? Omolwaashoka Jesus oha konenene eihumbato, iikala nokupopya kwawo. Oye na wo okukala aadhiginini. Jesus okwa li wo a popi omayele gopaali ngoka ge na omalondodho gokondandalunde, ge na ko nasha naagwayekwa. Omayele ngoka otatu ga adha wo muMateus ontopolwa 25. Natu ka kundathaneni eyele li na ko nasha naakadhona aanandunge naamboka omagoya.

AAKADHONA AANANDUNGE NAAMBOKA OMAGOYA

6. Ongiini aakadhona yatano ya ulike kutya aanandunge? (Mateus 25:6-10)

⁶ Meyele lyaJesus lyaakadhona, okwa popi kombinga yaakadhona omulongo mboka ya li ya ka tsakaneka ombushiki. (Mat. 25:1-4) Ayehe oya li ya halelela oku ka kala pamwe nombushiki poshituthihango shayo. Jesus okwa li a popi kutya yatano yomuyo oya li “aanandunge” nayatano yomuyo “omagoya.” Aakadhona mboka aanandunge oya li ya ilongekidha noya tonata. Oya li ya ilongekidha okutegelela ombushiki, kashi na nee mbudhi kutya ota yi thiki uusiku. Onkee oya li ya etelele oolamba dhomahooli, opo ya vule okuminikila momilema. Oya li wo ya etelele omahooli ga gwedhwa po, ya ningila ngele ombushiki oya thiki kwa toka. Onkee oya li ya ilongekidha okukaleka oolamba dhawo dha tema. (Lesha Mateus 25:6-10.) Sho ombushiki ya thiki, aakadhona aanandunge oya yi pamwe nayo koshituthihango. Momukalo gwa faathana, Aakriste aagwayekwa mboka taya ka ulika kutya oya ilongekidha okukala ya tonata naadhiginini sigo opokuya kwaKristus, ota ya ka mona ondjambi yokuya pamwe nombushiki, Jesus, mUukwaniilwa we  womegulu. b (Eh. 7:1-3) Ongiini kombinga yaakadhona yatano omagoya?

7. Oshike sha li sha ningilwa aakadhona yatano omagoya, nomolwashike?

⁷ Mepingathano naakadhona aanandunge, aakadhona yatano omagoya kaya li ya ilongekidha sho ombushiki ya thiki. Oolamba dhawo odha li dhi li pokudhima, nokaya li ya etelela omahooli ga gwedhwa po. Sho ya mono kutya ombushiki oyi li pokuthika, oya yi ya ka lande omahooli. Kaya li ya galuka pethimbo, sho ombushiki ya thiki. Ihe “aakadhona mboka ya li ya ilongekidha, oya yi pamwe nombushiki mehala moka mwa li tamu ningilwa oshituthihango, omweelo e tagu edhilwa.” (Mat. 25:10) Konima sho aakadhona omagoya ya galuka noya li ya hala okuya mo, ombushiki oya ti kuyo: “Kandi mu shi.” (Mat. 25:11, 12) Aakadhona omagoya kaya li ya ilongekidha okutegelela ombushiki kutya nduno otashi pula ethimbo li thike peni yi thike. Oshiilongomwa oshini kaagwayekwa?

8-9. Oshike aagwayekwa taya vulu okwiilonga keyele lyaakadhona omulongo? (Tala wo ethano.)

⁸ Ulika kutya owa ilongekidha nowa tonata. Jesus ina tya otaku ka kala oongundu mbali dhaagwayekwa, yimwe oya ilongekidhila ehulilo lyuuyuni mbuka, nayimwe inayi ilongekidha. Pehala lyaashono, okwa li ta yelitha shoka tashi ka ningilwa aagwayekwa ngele inaya ilongekidha okwiidhidhimika nokukala aadhiginini sigo ehulilo. Onkee ano ngele inaya ilongekidha, itaya ka mona ondjambi. (Joh. 14:3, 4) Shoka osha kwata miiti. Kutya nduno etegameno lyetu olyokuya megulu nenge olyoku ka kala kombanda yevi, atuhe otu na okugandja eitulomo kelondodho lyeyele lyaakadhona omulongo. Kehe gumwe gwomutse na kale a tonata, nokwa ilongekidha okwiidhidhimika sigo ehulilo. — Mat. 24:13.

⁹ Konima sho Jesus a popi kombinga yeyele lyaakadhona a tse omuthindo nkene sha simana okwiilongekidha nokukala twa tonata, okwa li a gandja eyele lyiitalenti. Eyele ndyoka otali tsu omuthindo nkene sha simana okulonga nuudhiginini.

 IITALENTI

10. Aapiya yaali oya li ya ulike ngiini kutya aadhiginini? (Mateus 25:19-23)

¹⁰ Meyele lyiitalenti, Jesus okwa popi kombinga yaapiya yatatu. Yaali yomuyo oya li aadhiginini komuwa gwawo, nagumwe ka li omudhiginini. (Mat. 25:14-18) Aapiya yaali oya li ya ulike kutya aadhiginini mokulonga neitulomo ya indjipaleke iimaliwa yomuwa gwawo. Manga inaa ya kondje yoshilongo, okwe ya inekelele iitalenti, ano omwaalu gwiimaliwa oyindji. Aapiya mboka yaali oya li ya longo nuupenda noya longitha iimaliwa pandunge. Oshizemo osha li shini? Sho omuwa gwawo a galuka, oya li ya longa oshimaliwa oshindji shi vulithe pwaashoka a li e ya pe. Omuwa gwayo okwe ya pandula ‘noya nyanyukwa pamwe naye.’ (Lesha Mateus 25:19-23.) Ihe ongiini shi na ko nasha nomupiya omutitatu? Iimaliwa mbyoka a pewa komuwa gwe okwe yi longitha shike?

11. Oshike sha ningilwa omupiya ‘omunanyalo,’ nomolwashike?

¹¹ Omupiya omutitatu okwa pewa oshitalenti shimwe, ihe okwa li ‘omunanyalo.’ Omuwa gwe okwa li a tegelela a longithe oshitalenti she pandunge. Pehala lyaashono, okwe shi fumvike mevi. Sho omuwa gwe a galuka, okwe mu shunithile owala oshitalenti shoka a li e mu pa. Omupiya ngoka ka li e na iikala iiwanawa. Pehala lyokugandja ombili sho inaa longa nuudhiginini, okwa ti omuwa, ngoye “omulumentu ha panga nayi.” Omupiya ngoka ka li we a hokiwa komuwa gwe. Lwanima oshitalenti okwe shi kuthwa nokwa tidhwa mo megumbo lyomuwa gwe. — Mat. 25:24, 26-30.

12. Aapiya yaali aadhiginini otaya thaneke oolye kunena?

¹² Aapiya aadhiginini yaali otaya thaneke Aakriste aagwayekwa. Omuwa gwayo, Jesus, ote ya hiya ya ‘nyanyukwe pamwe naye.’ Otaya ka mona ondjambi yawo megulu, meyumuko lyotango. (Mat. 25:21, 23; Eh. 20:5b) Ihe oshiholelwa oshiwinayi shomupiya omunanyalo, oshi li elondodho kaagwayekwa. Ngiini mbela?

13-14. Oshiilongomwa shini aagwayekwa taya ilongo keyele lyiitalenti? (Tala wo ethano.)

¹³ Ulika kutya oho longo nuudhiginini nonuupenda. Ngaashi owala meyele lyaakadhona, meyele lyiitalenti Jesus kali a hala okutya  aagwayekwa otaya ka kala aananyalo. Pehala lyaashono, okwa li ta yelitha shono tashi vulu okuningwa po, ngele oya kanitha uulaadhi wawo. ‘Okwiithanwa nokuhogololwa kwawo kuKalunga itaku ka kala kwa mena omidhi muyo’ noitaya ka pitikwa okuya mUukwaniilwa womegulu. — 2 Pet. 1:10.

¹⁴ Eyele lyaJesus lyaakadhona omulongo nosho wo lyiitalenti oga ulike sha yela kutya Aakriste ayehe aagwayekwa, oye na okukala ya ilongekidha, ya tonata, haya longo nuudhiginini nosho wo nuupenda. Mbela Jesus okwa li a popi ishewe oshinima shimwe a londodhe aagwayekwa? Eeno. Elondodho ndyoka otatu li adha mwaashoka Jesus a popi muMateus 24:40, 41.

OLYE TA KA “KUTHWA PO”?

15-16. Ongiini Mateus 24:40, 41 ta kwathele aagwayekwa ya mone nkene sha simana okukala ya tonata?

¹⁵ Jesus manga inaa hokolola kombinga yomayele gatatu, okwa yelitha kombinga yepangulo lyahugunina lyaagwayekwa, ndyoka tali ka holola ngoka a hokiwa kuye. Okwa popi kombinga yaalumentu yaali taya longo mepya naakiintu yaali taya tsu poshini. Moshiholelwa kehe, aantu yaali mboka ya popiwa mo otaya monika ya fa taya longo iilonga ya faathana, ihe Jesus okwa ti kutya “gumwe ota kuthwa po, namukwawo ota thigwa po.” (Lesha Mateus 24:40, 41.) Opo ihe okwa londodha aalanduli ye a ti: “Kaleni mwa tonata, oshoka kamu shi esiku ndyoka Omuwa gweni te ya.” (Mat. 24:42) Jesus okwa li a popi oshinima sha faathana konima sho a hokolola eyele lyaakadhona. (Mat. 25:13) Mbela oohapu ndhoka odha pambathana? Osha fa shi li ngaaka. Aagwayekwa mboka aadhiginini shili, oyo owala taya ka ‘taambiwa ko’ nokufalwa kuJesus mUukwaniilwa we womegulu. — Joh. 14:3.

¹⁶ Ulika kutya owa tonata. Omugwayekwa kehe ngoka itaa kala a tonata pambepo, ita ka gongelwa pamwe ‘naahogololwa.’ (Mat. 24:31) Aapiya yaKalunga ayehe, kutya nduno oye na etegameno lini, oye na okutala ko oohapu dhaJesus dhi li elondodho lyokukala ya tonata nokutsikila okukala aadhiginini.

17. Uuna Jehova a hogolola okugwayeka yamwe nombepo ye ondjapuki, omolwashike kaatu na okukala tatu ipula nasho?

¹⁷ Jehova otu mu shi nawa notwa inekela omukalo moka ha ungaunga niinima. Onkee ngele okwa hogolola okugwayeka aadhiginini yamwe yopethimbo lyetu, inatu pumbwa okukala tatu ipula nasho. c Natu dhimbulukwe eyele lyaJesus li na ko nasha naaniilonga, mboka ya longo okuza potundi ontimulongo nayimwe methaneko lye lyoshikunino shomandjembele. (Mat. 20:1-16) Mboka ya tameke okulonga hugunina moshikunino, oya li ya pewa ondjambi yi thike pamwe naamboka ya tameke okulonga tango. Sha faathana, kashi na nduno mbudhi kutya aagwayekwa oya hogololwa uunake, ayehe otaya ka mona ondjambi megulu, ngele oya tsikile okukala aadhiginini.

VULIKA KOMALONDODHO

18-19. Iiyilongomwa nomalondodho geni twa zi nokukundathana?

¹⁸ Mbela oshike twa ilonga moshitopolwa shika? Mboka ye na etegameno lyoku ka kala nomwenyo sigo aluhe kombanda yevi, eyele lyoonzi niikombo otali tsu omuthindo nkene sha simana ya kale aadhiginini kuJehova ngashingeyi nosho wo pethimbo lyuudhigu uunene mboka tawu ya. Pethimbo ndyoka, Jesus ota ka tokola mboka aadhiginini kutya oya gwana okukala ‘nomwenyo sigo aluhe.’ — Mat. 25:46.

¹⁹ Otwa tala wo komayele gaali, ngoka taga londodha aagwayekwa. Meyele lyaJesus lyaakadhona aanandunge nomagoya, yatano oya li ya ulike kutya aanandunge. Oya li ya ilongekidha  noya tonata, ya tegelela ombushiki, sigo ya thiki. Ihe aakadhona omagoya kaya li ya ilongekidha. Onkee ombushiki kaya li ye ya ethele mo moshituthihango shayo. Natse wo otwa pumbwa okutegelela neidhidhimiko sigo Jesus ote ya a hulithe po uuyuni mbuka, kutya nduno otashi pula ethimbo li thike peni. Methaneko lyaJesus li na ko nasha niitalenti, otwa li wo twa kundathana kombinga yaapiya yaali, mboka ya li ya longo nuudhiginini nonondjungu. Oya li ya longele omuwa gwawo nuudhiginini, nokwa li e ya hokwa. Ihe omupiya ngoka omunanyalo ka li a hokiwa. Oshiilongomwa oshini? Otwa pumbwa okukala twa ipyakidhila miilonga yaJehova sigo ehulilo. Hugunina, otwa kundathana nkene aagwayekwa ya pumbwa okutsikila okukala ya tonata, opo ya ‘ka ye pamwe’ naJesus ya ka mone ondjambi yawo yomegulu. Aagwayekwa oya tegelela nondjuulukwe, ‘okugongelwa’ ya ka kale naJesus megulu. Otaya ka kala ya fa omufuko gwaJesus pohango yonzigona. — 2 Tes. 2:1; Eh. 19:9.

20. Jehova ota ka ningila shike mboka haya vulika komalondodho ge?

²⁰ Nonando epangulo oli li popepi, inatu pumbwa okukala twa tila. Ngele otwa tsikile okukala aadhiginini, Tate yetu gwomegulu omunahole ote ke tu pa ’oonkondo kaadhi li mutse yene,’ opo ‘tu vule oku ka hupa, nokuthikama koshipala shOmuna gwomuntu.’ (2 Kor. 4:7; Luk. 21:36). Kutya nduno etegameno lyetu olyoku ka kala megulu nenge okombanda yevi, otatu ka nyanyudha Tate yetu, ngele otwa vulika komalondodho ngoka taga adhika momayele gaJesus. Molwaashoka Jehova omunahenda, omadhina getu otaga ka ‘adhika ga nyolelwa membo’ “lyomwenyo.” — Dan. 12:1; Eh. 3:5.