Onda valwa mo 1934, naavali yandje oya li oontauki dha zile koSwitzerland, noya tembukile mondoolopa yedhina Timmins, yi li moOntario shaKanada, moka mwa li mu na oomina. Mo 1939, meme okwa tameke okulesha oshifo shOshungolangelo nokukala ha gongala nOonzapo dhaJehova. Ngame naamwayina yandje yahamano otwa li hatu yi pamwe nameme kokugongala. Nziya, okwa ningi Oonzapo dhaJehova.

Tate ka li a nyanyukilwa etokolo ndyoka, ihe meme okwa li e hole oshili nokwa tokola toko a kaa ze mo. Meme okwa tsikile wo okukala omudhiginini nokuli naasho iilonga yOonzapo dhaJehova ya li ya indikwa 1940 nasha. Okwa li ha ungaunga natate nesimaneko nosho wo nohole, nonando tate okwa li he mu ula omalaka. Oshiholelwa she oshiwanawa osha kwathele ndje nosho wo aamwayina yandje tu taambe ko oshili. Shinyanyudha, tate okwa ka lundulula iikala ye, nomokweendela ko kwethimbo, okwa tameke okuungaunga natse nombili.

Mo 1950, onda yi koshigongi shoshikandjo shi na oshipalanyolo, Ehangano lyaJehova tali tamunuka mo, (Theocracy’s Increase) shoka sha li sha ningilwa moNew York. Onda li nda inyengithwa ndi longe oshindji miilonga yaJehova, konima sho nda tsakanene naamwatate naamwameme okuza muuyuni awuhe, nokupulakena komapulapulo omahokithi gaamboka ya pewa oonzapo kosikola yaGilead. Onda li nda tokola toko shi vulithe nale ndi ye miilonga yokuuvitha yethimbo lya udha. Konima sho nda shuna kegumbo, onda tula mo eindilo lyokuninga omukokolindjila gwondjigilile. Aamwatate yokoshitayimbelewa shaKanada oya li ya nyolele ndje kutya onda pumbwa okuninginithwa tango. Onkee onda ninginithwa mesiku 1 Kotoba 1950. Konima yomwedhi gumwe, onda ningi  omukokolindjila gwondjigilile, nonda li nda pewa oshinakugwanithwa shandje shotango moKapuskasing. Ondoolopa ndjoka oya li yi li kokule lela naampoka handi zi.

Mo 1951, oshitayimbelewa osha li sha pula Oonzapo ndhoka hadhi popi Oshifulaanisa, ngele otadhi vulu okutembukila koshitopolwalongo shaQuebec hoka haku popiwa elaka lyOshifulaanisa. Okwa li ku na ompumbwe onene lela yaauvithi. Molwaashoka ohandi popi Oshiingilisa nOshifulaanisa, onda li nda taamba ko ehiyo ndyoka, nonda ka longela koRouyn. Kanda li ndi shi ko nando omuntu. Ngaashi nda popi metetekelo, shoka owala nda li ndi na onomola yegumbo hoka ta ndi yi. Ihe iinima ayihe oya li ya ende nawa. Tse naMarcel otwa ningi ookuume kopothingo, nonda li nda nyanyukilwa okulonga moQuebec omimvo adhihe ne. Lwanima, onda ka ninga omukokolindjila a ikalekelwa.

Manga ndi li moQuebec, onda li nda hiywa ndi ka hite ongundu onti-26 yosikola yaGilead kuuninginino waLansing, moNew York. Esiku lyoonzapo osho lya thiki mo 12 Febuluali 1956. Onda li nda ka longela koshilongo shi li muAfrika lyokUuninginino, shoka ngashingeyi hashi ithanwa Ghana. b Manga inaandi ya, onda li nda shuna koKanada uule wiiwike yontumba, ndi ka tegelele oondokumende dhandje dhi pwe.

Onda li nda tegelela oondokumende dhandje uule woomwedhi heyali moToronto. Uule woomwedhi adhihe ndhono onda kala handi zi matate Cripps, notwa tseyathana nawa nomwanakadhona, Sheila. Otwa tameke okukala tu holathane. Manga nda li tandi dhiladhila ndi mu yaleke, ombapila yandje (visa) oye ya. Ngame naSheila otwa galikana tashi zi komutima notwa tokola ngame ndi ye koshinakugwanithwa shandje. Otwa li wo twa tokola tu kale hatu nyolelathana oontumwafo nokutegelela, pamwe sikulimwe onatu ka hokane. Etokolo ndyoka kalya li epu, ihe konima otwa ka mona kutya oli li mondjila.

Konima yomwedhi, sho nda kala tandi ende neshina, nombautu yokuhumbata oondongelwa nosho wo nondhila, onda thiki moAccra, shaGhana. Onda li nda pewa oshinakugwanithwa shokulonga ndi li omutonateli gwoshitopolwa. Oshinakugwanithwa shoka osha li sha kwatela mo okutalela po iitopolwa ayihe  yomuGhana, moshishiindalongo Ivory Coast (ngashingeyi hashi ithanwa Côte d’Ivoire) nosho wo Togoland (ngashingeyi hashi ithanwa Togo). Olundji onda li handi hingi ohauto yoshitayimbelewa, nonda li ndi hole omalweendo ngoka.

Momahuliloshiwike, onda li handi kala ndi na iinakugwanithwa oyindji piigongi yoshikandjo. Katwa li tu na Iinyanga yIigongi. Onkee aamwatate oya li haya ningi po etala lyoombungu lya siikilwa niiyale, opo ya kale momunzile, noya igamene komutenya. Molwaashoka katwa li tu na ookila dhokutalaleka iikulya, poshigongi opwa li hapu kala pu na iinamwenyo, mbyoka tayi vulu okudhipagwa ethimbo kehe, opo aakalipo poshigongi ya lye.

Omathimbo gamwe piigongi mbyoka opwa li hapu ningwa iinima iiyolithi. Oshikando shimwe, manga omumwatate Herb Jennings, c omutumwa omukwetu, ta gandja oshipopiwa, ongombe yimwe oya gwaya mo mehala moka dha li dha tulwa. Oya tondoka ya uka pokati komutuni naapulakeni. Herb okwa mwena po, nongombe oya li ya ngwangwana lela. Ihe aamwatate yane, mboka ya li ye na oonkondo oye yi kwata noku yi humbata po ye yi ukitha mehala moka ya zi. Aapulakeni oya hakelele aamwatate mboka omake.

Momukokomoko gwoshiwike, onda li handi ulukile aantu ofilima pomikunda dhopuushiinda yi na oshipalanyolo, The New World Society in Action. Opo ndi ya ulukile, onda li handi tula elapi etokele kiiti iyali nenge ndi li tule pokati komiti mbali, opo ndi vule okuulukila aantu omathano, tandi longitha o-projector. Aantu oya li ye hole ofilima ndjoka noonkondo. Oyendji yomuyo, osho sha li oshikando shawo shotango taya tala ofilima. Oya li ya hakele omake mokule, sho ya mono aantu taya ninginithwa. Mboka ya li ya tala ofilima ndjoka oya li ya mono kutya Oonzapo dhaJehova odha hangana muuyuni awuhe.

Sho nda kala moAfrika omimvo mbali lwaampono, onda li nda tuntukwa sho nda yi koshigongi shopaigwana moNew York. Onda li nda nyanyukwa sho nda mono Sheila, ngoka a li ta longo moQuebec, e li omukokolindjila a ikalekelwa. Otwa kala hatu nyolelathana oontumwafo, ihe sho twa tsakanene poshigongi onde mu pula ndi mu hokane po, nokwa zimine. Onda li nda nyolele omumwatate Knorr, d nonde mu pula ngele Sheila ota vulu okuya kosikola yaGilead, opo tu ka uvithe pamwe naye koAfrika. Omumwatate Knorr okwa zimine. Lwanima, Sheila okwe ya koGhana. Otwa hokanene moAccra, mo 3 Kotoba 1959. Otwa li tu uvite twa yambekwa lela kuJehova, sho twa kala twe mu pititha komeho monkalamwenyo yetu.

Mo 1961, otwa li twa pewa oshinakugwanithwa shoku ka longela koKamerun. Aamwatate oya li ya pula ndje ndi kwathele mokutota po oshitayimbelewa oshipe, nonda li handi kala nda ipyakidhile noonkondo. Molwaashoka onda pewa oshinakugwanithwa shokutonatela iilonga moKamerun, onda li ndi na okwiilonga iinima oyindji. Ihe mo 1965, otwa mono kutya Sheila oku na etegelelo. Kungaye osha li oshidhigu lela okwiitaala kutya otu li pokuninga aavali. Ihe manga twa li twa tuntukwa omolwoshinakugwanithwa oshipe shoka, notwa li tatu ningi omalongekidho tu shune koKanada, opwa li pwa ningwa oshinima oshiwinayi.

Etegelelo olya gu mo. Ndohotola okwa li e tu lombwele kutya okanona hoka oka li okamati. Ngashingeyi opwa pita omimvo 50 nasha okuza sho oshinima shoka sha ningwa. Nonando oshiningwanima shoka osha li she tu nikitha oluhodhi noonkondo, katwa li twa thigi po oshinakugwanithwa shetu shoka tu hole unene.

Aamwatate moKamerun oya li taya hepekwa, molwaashoka ihaya kutha ombinga mopolotika. Onkalo oya li hayi nayipala, unene tuu ngele tashi ya pomahogololo guupresidende. Mo 13 Mei 1970 omwa ningwa oshinima shoka twa li inaatu tegelela, sho iilonga yOonzapo dhaJehova ya indikwa moKamerun. Epangelo olya kwata ko oshitayimbelewa shetu oshiwanawa oshipe, moka twa adhika owala twa kala mo uule woomwedhi ntano. Muule owala woshiwike, aatumwa ayehe oya tidhwa mo moshilongo moka, ngame naSheila twa kwatelwa mo. Osha li oshidhigu kutse okuthiga po aamwatate naamwameme, oshoka otu ya hole noonkondo, notwa li tatu ipula kutya oshike tashi ke ya ningilwa komasiku gokomeho.

Otwa kala uule woomwedhi hamano moshitayimbelewa shaFulaanisa, moka onda tsikile okuninga ngaashi tandi vulu ndi sile oshimpwiyu oompumbwe dhaamwatate moKamerun. MuDesemba 1973, otwa pewa oshinakugwanithwa oshipe tu ka longele koshitayimbelewa shaNigeria, shoka sha tameke okutonatela iilonga moKamerun. Aamwatate naamwameme moNigeria oye tu taamba ko nomutima aguhe, notwa kala twa nyanyukwa uule womimvo ndhoka twa kala hoka.

Mo 1973, otwa li tu na okuninga etokolo edhigu. Sheila okwa kwatwa kuunkundi. Esiku limwe manga tu li poshigongi shoshitopolwa moNew York, okwa tameke okulila e ta lombwele ndje ta ti: “Itandi vulu we okutsikila. Onda vulwa, nolundji ohandi kala tandi ehama.” Otwa kala tatu longo pamwe naSheila muAfrika lyokUuninginino uule womimvo dha konda po 14. Onda li ndi mu uvitile uuntsa nuunambano, omolwiilonga ye yuudhiginini, ihe otwa li tu na okuninga omalunduluko gontumba. Konima sho twa kundathana kombinga yonkalo yetu, nokugalikana twa mana mo, otwa tokola tu shune koKanada, hoka Sheila ta ka mona esiloshimpwiyu lyopaunamiti li li hwepo. Okuthiga po oshinakugwanithwa shokukala aatumwa nosho wo iilonga yethimbo lya udha osha li etokolo edhigu kutse okuninga, ndyoka inaatu ninga nando onale.

Sho nda thiki moKanada onda li nda mono iilonga pongeshefa yakuume kandje, yokulanditha oohauto mondoolopa yi li muumbangalantu waToronto. Otwa li twa hiila ehala lyokukala e tatu landa iipundi niitaafula mbyoka ya longa nale, kungawo, otwa vulu okukala tu na iinima yetu nopwaa na okulya oondjo dhasha. Katwa li twa hala okwiindumbila iinima yopamaliko, oshoka otwa li tu na einekelo kutya esiku  limwe otatu ka shuna ishewe miilonga yethimbo lya udha. Otwa li twa kumwa sho konima yethimbo efupi twa shuna miilonga yethimbo lya udha inaatu shi tegelela.

Onda tameke okwiiyamba mOolyomakaya miilonga yokutunga Oshinyanga shIigongi yoshikandjo mondoolopa yedhina Norval, moOntario, moKanada. Mokweendela ko kwethimbo, onda pulwa ndi ninge omutonateli gwOshinyanga shIigongi. Uukolele waSheila owa ende tawu hwepopala, notwa li tu uvite kutya oshinakugwanithwa shika oshipe otatu shi vulu. Onkee muJuni 1974, otwa tembukile mokafuleta hoka ka li mehala lyOshinyanga shIigongi. Otwa li twa nyanyukwa sho twa shuna ishewe miilonga yethimbo lya udha.

Shoka shi shi okupandulwa, uukolele waSheila owa tsikile nokuhwepopala. Konima yomimvo mbali, otwa zimine tu ye miilonga yuutonatelishikandjo. Oshikandjo shetu osha li moshitopolwa Manitoba, moKanada, shoka hashi talala noonkondo. Ihe nonando ongawo, uutalala mboka owa li okapulu kelume, oshoka aamwatate naamwameme oya li ye tu hole. Otwa ilongo kutya shoka sha simanenena, okutsikila okulongela Jehova kehe mpoka tu li.

Konima sho twa kala miilonga yuutonatelishikandjo uule womimvo dhontumba, otwa pulwa tu ka longe koBetel yaKanada mo 1978. Konima yethimbo efupi, onda ilongo sha shoka sha simana, ihe osha uvitha ndje nayi. Onda li nda pulwa ndi gandje oshipopiwa showili netata mOshifulaanisa pokugongala kwa ikalekelwa moshilando shedhina Montreal. Shiyemateka, aapulakeni kaya li ye shi kutya oshipopiwa shandje osha uka peni, nomumwatate gumwe gwokOshikondo shIilonga, okwa li a pe ndje omayele kombinga yoshipopiwa shoka. Uushili owo kutya ngame mwene kandi shi omupopi omunekeka. Ihe omayele ngoka nda pewa inaandi ga taamba ko. Oonkundathana dhetu inadhi enda nawa, molwaashoka onda li ndi wete omumwatate ngoka e na onyanya, noina lombwela ndje mpoka nde shi enditha nawa. Onda ningi epuko sho ndi wete inaandi pewa omayele momukalo omwaanawa, netaloko lyandje li na ko nasha nomuntu ngoka e ga pe ndje.

Konima yomasiku, omumwatate gumwe ngoka e li oshilyo shOkomitiye yoshitayimbelewa okwa popi nangame kombinga yoshinima shoka. Onda li nda zimine kutya inandi inyenga momukalo omwaanawa komayele ngoka nda li nda pewa. Onda li nda gandja ombili komumwatate ngoka a pe ndje omayele. Okwa dhimine ndje po. Oshimoniwa shoka osha li sha longo ndje nkene ndi na okukala omwiifupipiki, nokandi na esiku ndi shi dhimbwe. (Omayel. 16:18) Onda li nda galikana kuJehova iikando oyindji kombinga yoshinima shoka, nonda tokola toko kaandi tinde we, uuna tandi pewa omayele.

Ngashingeyi onda kala moBetel yaKanada uule womimvo dha konda po 40, nonda kala ndi na uuthembahenda wokulonga ndi li oshilyo shOkomitiye yOshitayimbelewa okuza mo 1985. MuFebuluali 2021, omuholike gwandje, Sheila, okwa hulitha. Eso lye ohali ehameke ndje sigo okunena, ngame kaandi na wo uukolele. Ihe okukala nda ipyakidhila miilonga yaJehova, ohashi nyanyudha ndje ‘nohandi dhimbulukwa omasiku gokukalamwenyo.’ (Omuuv. 5:20) Nonando onda li ndi iyadha momashongo ogendji monkalamwenyo yandje, enyanyu ndyoka ndi na otali vulu okuyelekwa nago. Sho nda kala nokupititha tango Jehova komeho monkalamwenyo yandje, onda mona omauwanawa ogendji nonda kala miilonga yethimbo lya udha uule womimvo 70. Otandi galikana opo aamwatate naamwameme aagundjuka nayo ya tsikile okupititha Jehova komeho, molwashoka onda tompwa kutya otaya ka tyapula onkalamwenyo ombwanawa, ndyoka hayi zi mokulongela Jehova.