1, 2. (a) Omomukalo guni uuyuni mbuka tawu vulu okuyelekanithwa nokupangulwa kwomukolokoshi? (Tala kethano lyopetameko.) (b) Aantu megulu nokombanda yevi otaya ka kala yu uvite ngiini ngele uuyuni mbuka wa hanagulwa po?

“OMULUMENTU E LI POKU KA SA!” Aatonateli yondholongo osho ya li yi igidha ngawo sho omulongi gwomuyonena a nika oshiponga ta pitithwa mondholongo. Omolwashike aatonateli yondholongo ya popi ngawo? Nonando omulumentu ngoka okwa li ta monika e na uukolele, okwa pangulilwa eso nokwa li e li poku ka dhipagwa. Omulumentu ngoka okwa li a fa a sa nale. *

² Uuyuni kunena owa fa omulumentu omukolokoshi e li momukweyo ta ka dhipagwa. Uuyuni mbuka wa kolokosha owa kala nale wa hunganekwa kutya otawu ka hanagulwa po, nehanagulo lyawo oli li popepi. Ombiimbeli otayi ti: ‘Uuyuni otawu hulu po.’ (1 Joh. 2:17) Onkalelo yawo oyi li pokuhula po. Ihe nonando ongawo, opu na eyooloko enene pokati kehulilo lyuuyuni nedhipago lyomunandholongo omukolokoshi. Uuna omunadholongo a tokolelwa edhipago, aantu yamwe otashi vulika ya tye ina pangulwa pauyuuki, notashi vulika ya dhiladhile kutya ita ka dhipagwa we.  Mepingathano naashono, Omunamapangelo agehe oye a tokola shi li pauyuuki okuhanagula po uuyuni mbuka. (Deut. 32:4) Itapu ka kala omalimbililo kutya epangulo ndyoka li li pauyuuki otali ka kala inaali ningwa. Ngele uuyuni mbuka wa hanagulwa po, kehe shoka shi li megulu nokombanda yevi otashi ka zimina kutya Jehova okwe wu pangula shi li mondjila nopauyuuki. Aantu itaya ka kala tuu ya pepelelwa!

3. Iinima ine yini tatu ka kundathana mbyoka tayi ka hula po ngele Uukwaniilwa waKalunga we ya?

³ “Uuyuni” mboka ‘tawu hulu po’ owa kwatela mo shike? Owa kwatela mo iinima yomuuyuni mbyoka aantu oyendji ye yi tala ko kunena tayi kalelele, ihe otayi ka hula po. Mbela onkundana ndjino ombwinayi? Hasho nando, molwaashoka oyi li oshitopolwa sha simanenena ‘shelaka etoye lyoshilongo.’ (Mat. 24:14) Onkee ano, natu taleni kutya oshike tashi ka hula po ngele Uukwaniilwa waKalunga we ya. Otatu ka kundathana iinima ine tayi landula: aakolokoshi, omahangano guulingilingi, iilonga iiwinayi nosho wo oonkalo dhinyanyalitha. Mukehe shimwe otatu ka konakona (1) nkene iinima mbika ye tu guma ngashingeyi monkalamwenyo, (2) shoka Jehova ta ka ninga po nayo (3) nankene te ke yi pingena po naashoka oshiwanawa shili.   

4. Omomikalo dhini iilonga yaakolokoshi ye tu guma kunena?

⁴ Iilonga yaakolokoshi oye tu guma ngiini kunena? Manga omuyapostoli Paulus inaa popya kutya pethimbo lyetu otapu ka kala “omathimbo omadhigu,” okwa li a nwethwa mo a nyole ta ti: “Aakolokoshi naafudhime otaa tsikile okuza muuwanawa yu uka muuwinayi.” (2 Tim. 3:1-5, 13) Mbela owa mona nkene omahunganeko ngono taga gwanithwa? Oyendji yomutse otwa ninga iihakanwa yaalongithinkondo aakwanyanya, oohamutsemukukutu niipululu. Yamwe yomuyo aakolokoshi yi iwetikile, yalwe aafudhime nayalwe ohaya holeke shoka ya ninga e tayi iningi ya fa aayuuki. Nokuli nonando inaye tu ningila uukolokoshi paumwene, iilonga yawo oye tu guma natango. Ohashi tu ehameke koomwenyo uuna tatu uvu iilonga yawo iinyanyalithi. Omukalo moka aakolokoshi haya hepeke aanona, aakokele nosho wo aantu yalwe mboka kaaye na ngoka te ya gamene, ohagu tu ehameke. Aakolokoshi ohayu ulike ombepo ya fa yiinamwenyo noyoompwidhuli. (Jak. 3:15) Lago enene, Oohapu dhaJehova otadhi tu pe etegameno.

5. (a) Aakolokoshi oya pewa ompito yokuninga shike? (b) Aakolokoshi mboka taya tindi okulundulula iikala yawo otaya ka ningilwa shike?

⁵ Mbela Jehova ota ka ninga po shike? Ngashingeyi Jehova aakolokoshi okwe ya pa ompito ya lundulule iikala yawo. (Jes. 55:7) Nonando uuyuni mbuka owu li pokuhanagulwa po, aakolokoshi inaya tokolwa natango. Ihe ongiini ngele oya tindi okulundulula iikala yawo, e taya tsikile okuyambidhidha uuyuni mbuka ngashingeyi sigo opethimbo lyuudhigu uunene? Jehova oku uvaneka oku ya hanagula po sigo aluhe kombanda yevi. (Lesha Episalomi 37:10.) Aakolokoshi otashi vulika ya dhiladhile kutya otaya ka hupa mepangulo ndyoka. Kunena aantu oyendji ohaya holeke shoka haya ningi, nomathimbo gamwe ihaya geelwa. (Job 21:7, 9) Ihe nonando ongawo, Ombiimbeli otayi tu dhimbulukitha tayi ti: “Omeho ge oga tonatela oondjenda dhaantu, notaga tala oonkatu dhawo adhihe. Kaku na uuluudhe nenge omilema tadhi vulu okuholeka aalunde.” (Job 34:21, 22) Kapu na sha, sha holekwa Jehova Kalunga. Aafudhime itaya vulu oku mu enda mevi nokapu na uuluudhe nenge omilema tadhi vulu okwiimba Kalunga a mone shoka taya ningi. Konima yaArmagedon, otashi vulika tu ka konge aakolokoshi  mpoka haya kala, ihe itatu ke ya mona. Otaya ka kala kaaye po sigo aluhe. —  Eps. 37:12-15.

6. Oolye taya ka kala kombanda yevi ngele aakolokoshi ya hanagulwa po, nomolwashike shoka shi li onkundana ombwanawa?

⁶ Oolye taya ka kala kombanda yevi ngele aakolokoshi ya hanagulwa po? Jehova oku uvaneka euvaneko ndika linyanyudha a ti: “Aayifupipiki otaa ka thigulula evi notaa ka mona uulinawa nombili.” Konima yethimbo mepisalomi olyo tuu ndyoka omwa popiwa taku ti: “Aayuuki otaa ka thigulula evi e taa kala mo sigo aluhe.” (Eps. 37:11, 29) “Aayifupipiki” nosho wo “aayuuki” oyo oolye? Aaifupipiki oyo aantu mboka haya taamba ko elongo lyaJehova newiliko lye; aayuuki oyo aantu mboka ye hole okulonga shoka shi li mondjila koshipala shaJehova Kalunga. Muuyuni wokunena, aayuuki oyo aashona ye vulike kaakolokoshi. Ihe muuyuni uupe mboka tawu ya, otamu ka kala owala aaifupipiki naayuuki. Osha yela kutya aantu ya tya ngaaka otaya ka ninga evi oparadisa.

7. Iilonga yomahangano guulingilingi oye tu guma ngiini kunena?

⁷ Iilonga yomahangano guulingilingi oye tu guma ngiini kunena? Uuwinayi owundji mboka wa longwa muuyuni mbuka, owa longwa komahangano, ihe hakaantu pauhandimwe. Pashiholelwa, dhiladhila owala komahangano gopalongelokalunga ngoka haga pukitha aantu omamiliyona moku ya longa kutya Kalunga okwa tya ngiini, kutya Ombiimbeli kayi shi okwiinekelwa, kutya evi naantu otayi ka kala ya tya ngiini nosho wo iinima yilwe oyindji. Nenge ongiini kombinga yomapangelo ngoka haga ambidhidha iita, ge hole elongithonkondo lyopamihoko, haga thindile kongudhi oohepele naamboka kaaye na omupopili, ge hole okupewa oombumbo noge na okatongotongo? Ongiini kombinga yomahangano ge na olwiho ngono taga yono po omundhingoloko, taga longitha nayi oonzo dhopaunshitwe notaga nyokoma aantu? Kapu na omalimbililo kutya omahangano guulingilingi ogo taga yemateke aantu kunena muuyuni.

8. Ombiimbeli otayi ti kutya oshike tashi ka ningilwa omahangano ngoka taga monika ga fa ogo shikwetepo kaantu oyendji kunena?

⁸ Jehova ota ka ninga po shike? Uudhigu uunene otawu ka tameka ngele omapangelo gopapolotika ga pilukile omahangano gopalongelokalunga giifundja ngoka ge li ohonda, hagi ithwanwa Babiloni oshinene. (Eh. 17:1, 2, 16; 18:1-4) Omahangano gopalongelokalunga ngoka otaga ka hanagulwa po thiluthilu. Ihe ongiini kombinga yomahangano galwe agehe guulingilingi? Ombiimbeli ohayi longitha uutumbulilo oondundu noontuntu okuthaneka omahangano ogendji ngoka taga monika ga fa ogo shikwetepo kaantu oyendji kunena. (Lesha Ehololo 6:14.) Oohapu dhaKalunga odha popya kutya omapangelo nomahangano agehe ngoka gi ikolelela kugo otaga ka kuthwa po pomahala gago. Uudhigu uunene otawu ka adha oshitsa shawo shopombanda sho omapangelo agehe guuyuni mbuka uukulu taga ka hanagulwa po pamwe naamboka ya gama kombinga yago mokukondjitha Uukwaniilwa waKalunga. (Jer. 25:31-33) Konima yaashono, omahangano guulingilingi itaga ka kala po we nando.

9. Omolwashike tatu vulu okukala nuushili kutya evi epe otali ka kala lyu unganekwa nawa?

⁹ Oshike tashi ka pingena po omahangano guulingilingi? Mbela konima yaArmagedon otapu ka kala ngaa ehangano lyasha? Ombiimbeli otayi tu lombwele tayi ti: “Tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.” (2 Pet. 3:13) Egulu nevi ekulu, omahangano guulingilingi naantu mboka ye li kohi yago, otayi ka hanagulwa po. Oshike tashi ke ga pingena po? Uutumbulilo “egulu epe nevi epe” otawu ti kutya  otapu ka kala epangelo epe nosho wo evi epe, mbyoka yi li kohi yepangelo lyaKalunga. Uukwaniilwa waKalunga mboka tawu pangelwa kuJesus Kristus otawu ka ulika thiluthilu uukwatya waJehova Kalunga, ngoka e li Kalunga kelandulathano. (1 Kor. 14:33) Onkee ano, ‘evi epe’ otali ka kala lyu unganekwa. Otapu ka kala aalumentu ye li nawa mboka taya tonatele iinima. (Eps. 45:16) Otaya ka wilikwa kuJesus naapangeli pamwe naye 144 000. Dhiladhila owala kethimbo ndyono sho omapangelo guulingilingi taga ka pingenwa po kepangelo limwe alike kaali na uulingilingi.

10. Iilonga yini iiwinayi hayi longwa unene momudhingoloko gweni, noye ku guma ngiini noyaandjeni?

¹⁰ Iilonga iiwinayi oye tu guma ngiini kunena? Otu li muuyuni wu udha iilonga iiwinayi. Okwaanuuyogoki wopamikalo, okwaanoshili nelongithonkondo oyi indjipala noonkondo. Olundji aavali ohaya kambadhala okugamena oyana kaalongi yomiyonena. Omainyanyudho guuyuni ohaga ningitha iinima mbyoka iiwinayi yi kale tayi hokitha. Ohaga shekitha omithikampango dhaJehova dhaashoka shi li mondjila naashoka sha puka. (Jes. 5:20) Aakriste yashili ihaya tsu kumwe neihumbato ndyoka ewinayi. Ohaya ningi oonkambadhala ya gamene uudhiginini wawo muuyuni mbuka tawu humitha komeho okwaasimaneka omithikampango dhaJehova.

11. Oshike tatu ilongo kwaashoka Jehova a li a ningile Sodom naGomorra?

¹¹ Jehova ota ka ningila shike iilonga iiwinayi? Tala kwaashoka a li a ningile Sodom naGomorra omolwiilonga iiwinayi mbyoka ya li hayi longwa mo. (Lesha 2 Petrus 2:6-8.) Omulumentu omuyuuki Lot naanegumbo lye oya li ya lulililwa kiilonga ayihe iiwinayi mbyoka ya li tayi longwa momundhingoloko gwawo. Sho Jehova a hanagula po omudhingoloko gwawo, okwa ningi oshindji kaashi shi owala okuhulitha po iilonga iiwinayi. Shoka okwe shi ningi opo “u ulukile aakeenakonasha naKalunga shoka taa ka ningwa.” Ngaashi owala Jehova a li a hulitha po iilonga iiwinayi pethimbo ndiya, osho wo te ke yi hulitha po pethimbo lyetu sho ta ka hulitha po uuyuni mbuka.

12. Iilonga yimwe yini wa hala oku ka longa ngele uuyuni mbuka uukulu wa hanagulwa po?

¹² Oshike tashi ka pingena po iilonga iiwinayi? Eviparadisa otali ka kala lyu udha iilonga yinyanyudha. Dhiladhila kiilonga mbyoka tatu ka longa yokuninga evi oparadisa nenge okwiitungila omagumbo nosho wo okutungila aaholike yetu. Dhiladhila kuuthembahenda mboka tu na woku ka hambelela aantu omamiliyona mboka taya ka yumuka noku ya kwathela yi ilonge oondjila dhaJehova nonkene a kala tu ungaunga naantu. (Jes. 65:21, 22; Iil. 24:15) Onkalamwenyo yetu otayi ka kala yu udha iilonga mbyoka tayi ke tu etela enyanyu notayi ka simanekitha Jehova.

13. Okwaavulika kwaSatana nokwaAdam naEva okwe etitha oonkalo dhinyanyalitha dhini kunena?

¹³ Oonkalo dhinyanyalitha odhe tu guma ngiini? Aakolokoshi, omahangano guulingilingi niilonga iiwinayi ayihe ohayi etitha oonkalo dhinyanyalitha kombanda yevi. Olye gwomutse ta vulu kutya ina gumwa kiita, koluhepo, kokatongo nenge kuuwehame neso? Oonkalo ndhoka odhe tu guma atuheni. Oonkalo ndhoka odhe etithwa kaantu yatatu, Satana, Adam naEva sho inaaya vulika kuJehova. Kapu na nando ogumwe gwomutse ta vulu okuyanda oonkalo ndhika dha vundakana dhe etithwa kokwaavulika kwawo.

14. Jehova ota ka ninga po shike shi na ko nasha noonkalo dhinyanyalitha? Gandja oshiholelwa.

¹⁴ Jehova ota ka ninga po shike shi na ko nasha noonkalo dhinyanyalitha? Dhiladhila kiita. Jehova oku uvaneka kutya ote ke yi hulitha po  thiluthilu. (Lesha Episalomi 46:8, 9.) Ongiini kombinga yuuwehame? Ote ke wu hulitha po. (Jes. 33:24) Ongiini kombinga yeso? Jehova ote ke li hanagula po sigo aluhe. (Jes. 25:8) Ota ka hulitha po oluhepo. (Eps. 72:12-16) Ota ka ninga wo sha faathana noonkalo dhilwe dhinyanyalitha ndhoka tadhi ningitha onkalamwenyo ondhigu kunena. Jehova ota ka hulitha po “ombepo” ombwinayi yuuyuni mbuka, ombepo yaSatana noompwidhuli dhe ndjoka yi li apuhe muuyuni. —  Ef. 2:2.

15. Iinima yimwe yini itaayi ka kala po we nando konima yaArmagedon?

¹⁵ Dhiladhila ando muuyuni kaamu na iita, uuwehame nenge eso. Dhiladhila owala kaapu na we omatangakwiita, oondhila dhiita, iilwitho nenge omadhimbuluko gaamboka ya sila miita. Itatu ka kala twa pumbwa iipangelo, oondohotola, aapangi, omahangano omakwashilipaleki, ookila dhomidhimba, omahangano gokulongekidha omafumviko, aalongekidhi yomafumviko nomayendo. Ngele iimbuluma ya hulithwa po, itatu ka kala twa pumbwa omahangano goosekuliti, ooalarma, aapolisi, omakumba niipatululo. Dhiladhila sho itaapu ka kala we iimpwiyu mbyoka hayi piyaganeke omadhiladhilo getu nomitima dhetu.

16, 17. (a) Mboka taya ka hupa puArmagedon otaya ka kala yu uvite ngiini? Shi thaneka. (b) Ongiini tatu vulu okukala nuushili kutya otatu ka hupa ngele uuyuni mbuka uukulu wa hanagulwa po?

¹⁶ Onkalamwenyo otayi ka kala ya tya ngiini uuna oonkalo dhinikitha oluhodhi dha hulu po? Kashi shi oshipu oku shi dhiladhila. Molwaashoka otwa kala mo ethimbo ele muuyuni mbuka, otashi vulika nokuli ihaatu ipula we noonkalo oondhigu ndhoka tatu iyadha mudho. Shino otatu vulu oku shi yelekanitha naantu mboka haya kala popepi nosasiona yomashina ndjoka hayi kala yi ipyakidhila, otashi vulika ya kale ihaaya uvu we naanaa ekudhilo ndyoka hali kala po. Oshikwawo, aantu mboka haya kala popepi noondoloma dhiiyagaya hadhi nika otashi vulika ya kale ihaaya uvuwe ezimba. Ngele Jehova okwa kutha po oonkalo adhihe dhinikitha oluhodhi, itatu ka kala tuu twa pepelelwa!

¹⁷ Oshike tashi ka pingena po omaupyakadhi ngoka tu na ngashingeyi? Eyamukulo otali adhika mEpisalomi 37:11 ndjoka tayi ti: “Otaa ka mona uulinawa nombili.” Mbela oohapu ndhono inadhi guma omutima gwoye? Shoka osho Jehova e ku halela. Onkee ano, ninga oonkambadhala dha mana mo, opo wu kale popepi lela naJehova Kalunga nehanagano lye pethimbo ndika edhigu lyomasiku gahugunina. Kala wa lenga etegameno lyoye, tedhatedha kulyo, li ninga oshinima shoshili momadhiladhilo goye nomomutima gwoye e to li tseyithile wo yalwe. (1 Tim. 4:15, 16; 1 Pet. 3:15) Ngele owa ningi ngawo, oto vulu okukala nuushili kutya ito ka hanagulwa po pamwe nuuyuni mbuka wa kulupa. Ihe oto ka kala nomwenyo sigo aluhe kombanda yevi wa nyanyukwa.