1-2. (a) Omomikalo dhini Satana a pukitha aantu? (b) Oshike tatu ka kundathana moshitopolwa shika?

SATANA, ‘he yiifundja ayihe,’ okwa kala nokupukitha aantu okuza ngaa pethimbo lyaAdam naEva. (Joh. 8:44) Yimwe yomiifundja ye, oya kwatela mo omalongo giifundja kombinga yeso nokombinga yomwenyo ihaagu si. Omikalondjigilile odhindji nosho wo iidhila, oya kankamena komalongo ngoka. Oshizemo, aamwatate naamwameme yamwe oye na “okukondjela eitaalo” lyawo, uuna gumwe gwomaandjawo nenge gwomomudhingoloko gwawo a hulitha.​— Jud. 3.

² Ngele owi iyadha momamakelo ngoka, oshike tashi vulu oku ku kwathela wu kale wa dhiginina shoka Ombiimbeli tayi longo kombinga yeso? (Ef. 6:11) Ongiini to vulu okuhekeleka nokunkondopaleka Omukriste omukweni, ngoka tashi vulika ta thiminikwa a kuthe ombinga momikalondjigilile ndhoka dhi li ompinge nehalo lyaKalunga? Oshitopolwa shika, otashi ka kundathana kombinga yankene Jehova he tu kwathele. Tango, natu ka taleni shoka Ombiimbeli tayi ti kombinga yeso.

3. Iifundja mbyoka ya popiwa tango, oye eta iizemo yini?

³ Kalunga ka li a lalakanena aantu ya kale haya si. Adam naEva oya li ye na okuvulika kuJehova, opo ya vule okukala nomwenyo sigo aluhe. Jehova okwa li e ya pe oshipango tashi ti: “Kakele komuti gwokutseya uuwanawa nuuwinayi, iiyimati yomuti ngoka ino yi lya; ngele oto shi ningi, oto si shili.” (Gen. 2:16, 17) Lwanima, Satana okwe ke etitha uupyakadhi. Okwa popi naEva okupitila meyoka, a ti: “Itamu si shili.” Shiyemateka, Eva okwi itaale iifundja mbyoka, e ta li oshiyimati. Lwanima, Adam naye okwe  shi li. (Gen. 3:4, 6) Momukalo ngoka, uulunde neso, oya taandele maantu ayehe.​— Rom. 5:12.

4-5. Satana okwa tsikile ngiini okupukitha aantu?

⁴ Adam naEva oya si, ngaashi naanaa Kalunga a ti. Ihe okufundja kwaSatana kombinga yeso, hapo owala kwa hulile mpoka. Lwanima, okwa ka tota po iifundja yilwe. Yimwe yomuyo, eitaalo kutya olutu ohalu si, ihe opu na sha mulwo hashi tsikile okukala nomwenyo, tashi vulika shi li mehala moka mu na oombepo dhoonakusa. Iifundja mbyoka oya pukitha aantu omamiliyona sigo okunena.​— 1 Tim. 4:1.

⁵ Omolwashike aantu oyendji ya pukithwa? Satana oku shi shi nkene aantu haya kala ye uvite kombinga yeso, noha longitha uuyelele mboka opo e ya pukithe. Inatu hala okusa, molwaashoka otwa shitwa negamo lyokukala nomwenyo sigo aluhe. (Omuuv. 3:11) Eso otwe li tala ko li li omutondi gwetu.​— 1 Kor. 15:26.

6-7. (a) Mbela Satana okwa pondola mokuholeka oshili kombinga yoonakusa? Shi yelitha. (b) Ombiimbeli otayi tu kwathele ngiini kaatu kale twa tila oonakusa?

⁶ Nonando Satana ota ningi oonkambadhala, oshili kombinga yeso inayi holama. Pehala lyaashono, aantu oyendji ngashingeyi oye shi shi nohaya lombwele yalwe shoka Ombiimbeli tayi longo kombinga yonkalo yoonakusa netegameno lyawo. (Omuuv. 9:5, 10; Iil. 24:15) Ooshili ndhoka ohadhi tu hekeleke nohadhi tu kwathele kaatu kale twa tila nenge twa limbililwa shoka hashi ningwa po, konima ngele omuntu a si. Pashiholelwa, ihatu tila oonakusa noihatu kala twa tila kutya pamwe otaya ka ningilwa oshinima oshiwinayi. Otu shi shi kutya kaye na omwenyo noitaya vulu okweetela omuntu oshiponga. Ohaya kala ya fa ye li moomposi oondhigu. (Joh. 11:11-14) Otu shi shi wo kutya oonakusa ihaya kala ye wete ethimbo ndyoka tali piti po. Onkee ano, pethimbo aantu taya ka yumudhwa, nokuli naamboka ya sa pwa pita omimvo omathele, otaya ka kala owala ye wete pwa pita okathimbo okashuushuuka.

⁷ Mbela ito tsu kumwe nasho kutya oshili kombinga yoonakusa oya yela, ompu okuuviwa ko noyi li paushili? Oshili ndjoka oya yooloka ko thiluthilu kiifundja yaSatana, mbyoka tayi pukitha aantu. Kakele kokupukitha aantu, iifundja mbyoka otayi lundilitha wo Omushiti. Opo tu uve ko nawa uupyakadhi mboka we etithwa kuSatana, otatu ka kundathana omapulo ngaka: Ongiini iifundja yaSatana ya lundilitha Jehova? Oya ningitha ngiini aantu ya dhiladhile kutya inashi simana okwiitaala mekuliloyambo lyaKristus? Oya gwedha ko ngiini koluhodhi nokokumona iihuna kwaantu?

8. Ngaashi sha popiwa muJeremia 19:5, ongiini iifundja yaSatana kombinga yaasi hayi lundilitha Jehova?

⁸ Iifundja yaSatana kombinga yoonakusa, ohayi lundilitha Jehova. Iifundja mbyoka oya kwatela mo elongo lyiifundja ndyoka tali ti kutya oonakusa ohaya kala taya pi momulilo. Iifundja mbyoka itayi lundilitha tuu Kalunga! Ngiini mbela? Ohayi ningitha aantu yi itaale kutya Kalunga kohole, oku na onyanya ngaashi Omuhindadhi. (1 Joh. 4:8) Shoka ohashi ku uvitha ngiini? Komeho gaayihe, mbela ohashi uvitha ngiini Jehova? Otu shi shi kutya Jehova oku tonde oludhi kehe lwonyanya.​— Lesha Jeremia 19:5.

9. Iifundja yaSatana ohayi gumu ngiini eitaalo lyaantu mekuliloyambo lyaKristus, ndyoka lya popiwa muJohannes 3:16 nomo 15:13?

⁹ Iifundja yaSatana kombinga yeso, ohayi ningitha aantu kaayi itaale mekuliloyambo lyaKristus. (Mat. 20:28) Iifundja yimwe yaSatana oyo mbyoka kutya aantu oye na omwenyo ihaagu si. Ngele osho sha li ngawo, ando kehe gumwe okwa vulu okukala nomwenyo sigo aluhe. Kaleka momadhiladhilo kutya eyambo lyaKristus oli li euliko enenenene lyohole, inaali ningwa nale mondjokonona, ndyoka tali ke tu petha omwenyo gwaaluhe. (Lesha Johannes 3:16; 15:13.) Dhiladhila owala kunkene Jehova nOmwana haya kala ye uvite kombinga yomalongo ngoka taga dhinitha omagano ngoka ge na ondilo!

10. Ongiini iifundja yaSatana kombinga yeso ya gwedha ko koluhodhi nokokumona iihuna kwaantu?

¹⁰ Iifundja yaSatana ohayi gwedha ko owala koluhodhi nokokumona iihuna kwaantu. Aavali mboka ya nika oluhodhi, omolweso lyomwana, otashi vulika ya lombwelwe kutya Kalunga oye a kutha po okanona kawo, tashi vulika opo ka ka ninge omuyengeli megulu. Mbela iifundja mbyoka yaSatana oye ya hekeleka nenge oya gwedha ko owala keyeme lyawo? Elongo lyiifundja lyomulilo gwoheli olya kala nokulongwa aantu, opo ku ulikwe kutya okufikila aantu kiiti mwa kwatelwa naamboka ya li haya pataneke omalongo goongeleka, inaku puka. Shi ikolelela kembo tali popi kombinga yankene aantu ya li haya pulwapulwa nokupangulwa moSpania, yamwe mboka ya li haya fikile aantu kiiti, otashi vulika ya li yi itaala kutya otaye shi ningi ya kwathele ngoka ta fikwa “a mone kutya uuna ta ka pya moheli ota ka kala e uvite ngiini,” opo shi mu ningithe i itedhulule manga inaa sa, opo kaa ka pye moheli. Miilongo oyindji, aantu oye uvite kutya oya pumbwa okugalikana oonakusa yawo, oku ya simaneka noku ya pula omayambeko. Yalwe ohaya tila okuyemateka oonakusa yawo, opo ya yande okugeelwa kuyo. Shiyemateka, omaitaalo ngoka ga kankamena kiifundja yaSatana, ihaga etele aantu ehekeleko lyashili. Pehala lyaashono, ohage ya ningitha owala ya kale ya gwililwa po nenge nokuli ya kale ya tila.

11. Omomukalo guni aakwanezimo nenge ookuume ketu mboka ya fa ye na einyengotompelo ewanawa, tashi vulika ye tu thiminike tu taaguluke shoka Ombiimbeli tayi ti?

¹¹ Ohole yokuhola Kalunga nOohapu dhe, ohayi tu kwathele tu vulike kuJehova, nokuli nuuna aakwanezimo nenge ookuume taye tu thiminike tu kuthe ombinga momikalondjigilile ndhoka kaadhi li pamanyolo kombinga yoonakusa. Otashi vulika ye tu uvithe nayi, mokupopya kutya katu hole nenge inatu simaneka nakusa. Nenge ya tye eihumbato lyetu otali ningitha nakusa a etele mboka ye na omwenyo oshiponga momukalo gwontumba. Ongiini tatu vulu okupopila oshili yopaMbiimbeli? Ndhindhilika nkene to vulu okutula miilonga omakotampango gOmbiimbeli taga landula.

12. Omikalondjigilile dhini dhi na ko nasha noonakusa kaadhi li pamanyolo?

¹² Kala wa tokola toko ‘okwiiyoolola ko’ komikalondjigilile nokomaitaalo kaage shi gopaMbiimbeli. (2 Kor. 6:17) Moshilongo shimwe, aantu oyendji oyi itaala kutya ngele omuntu a si, anuwa  oha shituka oshiluli, shoka tashi vulika shi kale po uule womasiku tashi hepeke mboka ya li haya ningi nakusa nayi. Embo limwe olya ti kutya oshiluli shoka anuwa ohashi vulika noku li shi “tyakaleke aantu moshitopolwa.” Okusiikila omasipili nomathano ganakusa megumbo, oshi li omikalondjigilile muAfrika. Etompelo? Yamwe oyi itaala kutya nakusa ke na okwiimona ye mwene! Tu li aapiya yaJehova, ihatu itaale omahokololo kehe giifundja nenge tu kuthe ombinga momikalondjigilile ndhoka hadhi humitha komeho iifundja yaSatana!​— 1 Kor. 10:21, 22.

13. Ngele ku na uushili wi ihwa po kombinga yomukalondjigilile gwontumba, oshike wu na okuninga ngaashi sha popiwa muJakob 1:5?

¹³ Ngele omukalondjigilile gwontumba otagu ku limbilike, galikana kuJehova, e ku pe oondunge. (Lesha Jakob 1:5.) Konima yaashono, ninga omapekapeko miileshomwa yetu. Ngele osha pumbiwa, konga ekwatho kaakuluntugongalo. Itaye ke ku lombwela shoka wu na okuninga, ihe otaye ke ku kwathela wu mone omakotampango gopaMbiimbeli ngaashi ngoka ga kundathanwa moshitopolwa shika. Sho to ningi ngawo, oto dheula ‘oondunge dhoye dhokunongela’ (NW), noondunge ndhoka otadhi ke ku kwathela wu vule “okuyoolola shoka shu uka nenge sha puka.”​— Heb. 5:14.

14. Omomikalo dhini tatu vulu okupundukitha yalwe?

¹⁴ “Longeni ayihe nokusimanekitha Kalunga. Kotokeni, mwaa pukithe” aantu. (1 Kor. 10:31, 32) Uuna tatu tokola ngele otatu ka kutha ombinga momukalondjigilile gwontumba, otu na aluhe okudhiladhila kombinga yankene etokolo lyetu tali ka guma omaiyuvo gayalwe, unene tuu Aakriste ooyakwetu. Inatu hala tu pundukithe nando omuntu! (Mark. 9:42) Otwa hala wo okuyanda okuuvitha nayi mboka kaaye shi Oonzapo. Ohole otayi ke tu inyengitha tu popye nayo momukalo gwesimaneko, ngoka tagu simanekitha Jehova. Odhoshili kutya itatu ka nyenyeta naantu nenge tu sheke omithigululwakalo dhawo. Dhimbulukwa kutya ohole ohayi kwathele lela. Uuna tatu ungaunga nayo pahole nonesimaneko, otashi vulika nokuli tu nengeneke nomitima dhaapataneki yetu.

15-16. (a) Omolwashike shi li pandunge okulombwela yalwe kombinga yaashoka wi itaala? Gandja oshiholelwa. (b) Oohapu dhaPaulus ndhoka dhi li mAaroma 1:16, odhe tu guma ngiini?

¹⁵ Shi ulika moshitopolwa sheni kutya ngoye Onzapo yaJehova. (Jes. 43:10) Otashi vulika shi ka kale oshipu kungoye okuungaunga noonkalo ndhoka tadhi ku lolodha pamadhiladhilo, ngele yaandjeni naashiinda shoye oye shi shi kutya ngoye oho longele  Jehova Kalunga. Omumwatate Francisco gwokoMosambike, okwa ti: “Sho ngame nomukulukadhi gwandje, Carolina, twa tseya oshili, otwa lombwele yaandjetu kutya itatu ka kutha we ombinga mokugalikana oonakusa. Otwa li twa makelwa, sho omumwayinakadhona gwaCarolina a si. Oshi li omukalondjigilile gwomoshitopolwa, omudhimba gu yogwe pethimbo lyoosa. Onkee ano, omukwanezimo gwanakusa gwopopepi, okwa li e na okulala omasiku gatatu pehala mpoka pwa tilwa omeya ngoka ga yogithwa omudhimba. Omukalondjigilile ngoka ohagu ningwa, opo anuwa nakusa kee tu geele. Aakwanezimo yaCarolina oya li ya tegelela oye a ka lale mpoka pwa tilwa omeya.”

¹⁶ Francisco nomukulukadhi gwe oya ningi po shike? Francisco okwa ti: “Molwaashono otu hole Jehova notwa hala oku mu nyanyudha, otwa tindi okukutha ombinga moshinima shoka. Aakwanezimo yaCarolina oya li ya lya moonyandi. Oye tu tamaneke, omolwokwaaha simaneka oonakusa noya ti nokuli kutya itaye tu talele po we nenge ye tu kwathele. Molwaashoka otwa adhika nale twe ya yelithila kombinga yeitaalo lyetu, oshinima shoka inatu shi kundathana nayo pethimbo ya geya. Aakwanezimo yamwe oye tu popile nokuli taya ti kutya otwa adhika nale twe shi ya yelithila. Mokweendela ko kwethimbo, aakwanezimo yaCarolina oya ka ngungumana notwa li twa vulu okupanga ombili nayo. Nokuli yamwe oye ke ya kaandjetu, taya pula iileshomwa yopaMbiimbeli.” Natu kale aluhe twa tokola toko okupopila oshili kombinga yeso.​— Lesha Aaroma 1:16.

17. Oshike tashi vulu oku tu kwathela tu kale kuume kashili kOmukriste ngoka a silwa?

¹⁷ Uuna Omukriste omukwetu a silwa, otu na okuninga ngaashi tatu vulu tu kale ‘kuume kashili, nomumwayina ngoka a valwa, opo a kwathe moluhepo.’ (Omayel. 17:17) Ongiini tatu vulu okukala “kuume” kashili, unene tuu ngele omumwatate nenge omumwameme ngoka a silwa, ota thiminikwa a kuthe ombinga momikalondjigilile ndhoka kaadhi li pamanyolo? Natu ka taleni komakotampango gaali gopaMbiimbeli, ngoka taga vulu oku tu kwathela tu hekeleke nakusilwa.

18. Omolwashike Jesus a li a lili, notatu ilongo ko shike koshiholelwa she?

¹⁸ “Lileni pamwe naamboka taa lili.” (Rom. 12:15) Otashi vulika tu mone oshidhigu kutya natu  lombwele shike ngoka a silwa. Omathimbo gamwe okulila pamwe nayo, ohaku ya ningitha lela ya mone kutya otu na ko nasha nayo. Sho kuume kaJesus, Lasarus, a si, Maria, Marta nosho wo yalwe oya lili, omolwomuholike gwawo ngoka. Konima yomasiku gane sho Jesus e ya kuyo, naye wo “okwa lili,” nonando okwa li e shi shi kutya ota ka yumudha Lasarus. (Joh. 11:17, 33-35) Jesus sho a lili, okwa ulike kutya He okwa li e uvite ngiini kombinga yeso ndyoka. Sho aakwanezimo ya mono Jesus ta lili, oya mono kutya Jesus oku ya hole, naashoka osha hekeleke Maria naMarta. Sha faathana, uuna aamwatate ya mono kutya otu ya hole notu ya nine olukeno, ohaya mono kutya kaye li oyo ayeke, ihe oye li pamwe nookuume mboka ye na ko nasha nayo nohaye ya ambidhidha.

19. Uuna tatu hekeleke Omukriste omukwetu ngoka a silwa, omomikalo dhini tatu vulu okutula miilonga Omuuvithi 3:7?

¹⁹ “Ethimbo lyokumwena, nethimbo lyokupopya.” (Omuuv. 3:7) Omukalo gumwe tatu vulu okuhekeleka Omukriste omukwetu ngoka a silwa, okukala twa pulakena kuye nawa. Mu etha a popye nkene e uvite, ngoye ino uvithwa nayi ‘koohapu dhe ndhoka inaadhi dhiladhilwa nawa.’ (Job 6:2, 3) Otashi vulika a kale a gwililwa po, molwaashoka ta thiminikwa kaakwanezimo mboka kaaye shi Oonzapo. Onkee ano, galikana pamwe naye. Galikana ‘kuNgoka ha uvu omagalikano’ e mu pe oonkondo noku dhiladhile shoka shi li mondjila. (Eps. 65:2) Ngele ompito otayi shi pitike, lesheni Ombiimbeli pamwe. Nenge wu leshe oshitopolwa tashi opalele miileshomwa yetu, ngaashi ondjokonona yomuntu tayi tsu omukumo.

20. Oshike tatu ka kundathana moshitopolwa tashi landula?

²⁰ Katu na tuu uuthembahenda uunene, sho tu shi oshili kombinga yoonakusa nosho wo etegameno ekumithi lyonakuyiwa yawo! (Joh. 5:28, 29) Onkene, natu popile oshili yOmbiimbeli nuulaadhi moohapu nomiilonga, noku yi lombwela yalwe pompito kehe. Moshitopolwa tashi landula, otatu ka tala komukalo gumwe ngoka Satana ha longitha, ano uumpulile, opo a keelele aantu kaaya tseye oshili. Otatu ka tala kutya omolwashike twa pumbwa okuyanda okuninga iinima yimwe nokukutha ombinga momainyanyudho ngoka ga kwatathana nomwigo ngoka hagu longithwa koompwidhuli.