1. Ngaashi sha yelithwa mAaefeso 6:10-13, omomukalo dhingi gumwe guni gwopahole Jehova ha ulike lela kutya oku na ko nasha natse? Shi yelitha.

OMUKALO gumwe lela gwopahole Jehova ha ulike kutya oku na ko nasha natse tu li aapiya ye, omoku tu kwathela tu kondjithe aatondi yetu. Aatondi yetu unene, oSatana noompwidhuli dhe. Jehova ohe tu londodha kombinga yaatondi mboka, nohe tu pe shoka twa pumbwa, opo tu ya kondjithe. (Lesha Aaefeso 6:10-13.) Uuna tatu taamba ko ekwatho lyaJehova nokukala twe mu inekela thiluthilu, otatu vulu okupondola mokukondjitha Satana. Otatu vulu okukala tu na omukumo ngaashi ngoka gwa li gu niwe komuyapostoli Paulus. Okwa nyola a ti: “Kalunga ngele oku li kombinga yetu, olye ta tsu ondumbo natse?”​— Rom. 8:31.

2. Oshike tatu ka kundathana moshitopolwa shika?

² Tu li Aakriste yashili, ihatu gandja unene eitulomo kuSatana nokoompwidhuli. Ohatu gandja unene eitulomo kokwiilonga kombinga yaJehova nokoku mu longela. (Eps. 25:5) Nonando ongawo, otwa pumbwa okutseya iinima yimwe mbyoka Satana ha ningi. Omolwashike? Opo tu yande okupangelwa kuye. (2 Kor. 2:11) Moshitopolwa shika, otatu ka tala komukalo ngoka Satana noompwidhuli haya longitha unene, opo ya pukithe aantu. Otatu ka kundathana wo nkene tatu vulu oku ya kondjitha nomupondo.

3-4. (a) Uumpulile oshike? (b) Eitaalo muumpulile olya taandela shi thike peni?

³ Omukalo gumwe ngoka Satana noompwidhuli haya longitha unene ya pukithe aantu, uumpulile. Mboka haya kutha ombinga muumpulile ohaya ti kutya oye shi nohaya vulu okuninga iinima  mbyoka aantu itaaya vulu okutseya nokuninga. Pashiholelwa, yamwe ohaya ti kutya ohaya vulu okumona shoka tashi ka ningwa monakuyiwa, okupitila mokwaanekela. Yamwe ohaya ningi iinima ya fa taya popi noonakusa. Yamwe ohaya longitha uulodhi nenge uumpulile, nohashi vulika ya kambadhale okutikila yalwe. *

⁴ Eitaalo muumpulile olya taandela shi thike peni? Ekonakono limwe lya li lya ningwa miilongo 18 yomiitopolwa ngaashi Latin America naKaribise, olya ulike kutya omuntu gumwe gwomaantu yatatu, okwi itaala muumpulile nomuulodhi, naantu oyendji oyi itaala kutya otatu vulu okupopya noombepo dhoonakusa. Ekonakono limwe, olya li wo lya ningwa miilongo 18 yomuAfrika. Olya ulike kutya omuntu gumwe gwomaantu yaali, okwi itaala muulodhi. Kehe mpoka tu li otu na okukala twa kotokela uumpulile. Uushili owo kutya Satana ota kambadhala okupukitha “uuyuni auhe.”​— Eh. 12:9.

5. Jehova oku uvitile ngiini uumpulile?

⁵ Jehova oye “Kalunga omudhiginini” nenge tu tye Kalunga koshili. (Eps. 31:5) Mbela oku uvitile ngiini uumpulile? Oku wu tonde! Jehova okwa li a lombwele Aaisraeli a ti: “Ino yamba aamwoye omafikilondjambo kiiyambelo; ino pitika aantu yoye ya nonome nenge ya anekele, ya kale nuumpulile nenge ya lye omayuku, ya tikile nenge ya pule iihehelela, oombepo dhuumpulile nenge aathithi. Omuwa Kalunga koye oha tondo aantu mboka haa ningi iinima mbika iinyanyalithi.” (Deut. 18:10-12) Aakriste kaye li kohi yOmpango ndjoka Jehova a li a pe Aaisraeli. Nonando ongawo, otu shi shi kutya natango oku tonde uumpulile.​— Mal. 3:6.

6. (a) Satana oha longitha ngiini uumpulile a ehameke aantu? (b) Shi ikolelela kOmuuvithi 9:5, oshili kombinga yonkalo yoonakusa oyini?

⁶ Jehova ohe tu londodha kaatu longithe uumpulile, molwaashoka oku shi shi kutya Satana owo ha longitha, opo a ehameke aantu. Satana oha longitha uumpulile a humithe komeho iifundja, mwa kwatela mbyoka tayi ti kutya oonakusa oye na mpoka ye li ye na omwenyo. (Lesha Omuuvithi 9:5.) Satana oha longitha wo uumpulile, opo a kaleke aantu ya tila noku ya pilamenitha Jehova. Elalakano lye, okuningitha aantu mboka haya longitha uumpulile, yi itaale moombepo dhuuwinayi pehala lyokwiitaala muJehova.

7. Jehova ohe tu lombwele shike?

⁷ Ngaashi sha popiwa petameko, Jehova ohe tu lombwele shoka twa pumbwa okutseya, opo tu yande okupukithwa kuSatana nokoompwidhuli. Natu ka taleni kiinima yimwe mbyoka tatu vulu okuninga, opo tu vule okukondjitha Satana noompwidhuli.

8. (a) Omomukalo guni unene tatu vulu okukondjitha oombepo dhuuwinayi? (b) Episalomi 146:4, oya aneka pomutenya ngiini iifundja yaSatana kombinga yoonakusa?

⁸ Lesha nokutedhatedha kOohapu dhaKalunga. Ngoka ogwo unene omukalo tagu vulu oku tu kwathela tu yande iifundja mbyoka hayi humithwa komeho koombepo dhuuwinayi. Oohapu dhaKalunga odha fa egongamwele li na omayego, ndyoka tali vulu okwaaneka pomutenya iifundja mbyoka tayi humithwa komeho kuSatana. (Ef. 6:17) Pashiholelwa, Oohapu dhaKalunga odha aneka pomutenya iifundja mbyoka tayi ti kutya oonakusa ohaya vulu okupopya  naanamwenyo. (Lesha Episalomi 146:4.) Ohadhi tu dhimbulukitha wo kutya Jehova oye awike ha vulu okuhunganeka kombinga yaashoka tashi ka ningwa monakuyiwa. (Jes. 45:21; 46:10) Ngele otwa kala hatu lesha Oohapu dhaKalunga nokutedhatedha kudho pandjigilile, otatu ka vula okutinda nokutonda iifundja mbyoka oombepo dhuuwinayi dha hala tu itaale.

9. Omikalondjigilile dhini dhuumpulile tu na okuyanda?

⁹ Yanda kehe shoka shi na ekwatathano nuumpulile. Tu li Aakriste yashili, ihatu kutha nando ombinga muumpulile. Pashiholelwa, ihatu ka pula kaathithi nenge tu kambadhale tu popye naasi. Ngaashi sha kundathanwa moshitopolwa sha zi ko, ohatu yanda omikalondjigilile dhi na ko nasha nomafumviko, ndhoka dha kankamena keitaalo ndyoka tali ti kutya aasi oye na mpoka ye li ye na omwenyo. Ihatu anekele, opo ando tu tseye shoka tashi ka ningwa monakuyiwa. (Jes. 8:19) Otu shi kutya iinima ayihe mbyoka ya kwatathana nuumpulile, oya nika lela oshiponga notayi vulu oku tu ningitha tu kale tu na ekwatathano naSatana nonoompwidhuli.

10-11. (a) Yamwe mboka ya li ko methelemimvo lyotango, oya ningi po shike, sho yi ilongo oshili? (b) Shi ikolelela kAakorinto yotango 10:21, omolwashike tu na okulandula oshiholelwa shAakriste yomethelemimvo lyotango, nongiini tatu vulu oku shi ninga?

¹⁰ Ekelahi kehe shoka shi na ekwatathano nuulodhi. Methelemimvo lyotango, aantu yamwe mboka ya li haya kala muEfeso, oya li haya kutha ombinga muumpulile. Sho yi ilongo oshili, oya katuka onkatu ya kwata miiti. Ombiimbeli otayi ti: “Oyendji yomwaamboka ya li haa longitha uumpulile, oye eta omambo gawo agehe taga popi uumpulile e taye ga fike po montaneho yaantu ayehe.” (Iil. 19:19) Aantu mboka oya ningi ngaashi taya vulu, ya kondjithe oombepo dhuuwinayi. Omambo gawo guumpulile, oga li gondilo. Pehala lyoku ga gandja po kuyalwe nenge ye ga landithe po, oye ga fike po. Oya li ya hala okunyanyudha Jehova pehala lyokwiipula niimaliwa oyindji mbyoka ya ya momambo ngoka.

 ¹¹ Ongiini tatu vulu okulandula oshiholelwa shAakriste yomethelemimvo lyotango? Otashi ka kala pandunge tu ekelehi ashihe shoka sha kwatathana nuulodhi. Shika osha kwatela mo iiketi, iigegeti niinima yilwe mbyoka aantu haya zala nenge ye na, opo aniwa yi igamene koombepo dhuuwinayi.​— Lesha 1 Aakorinto 10:21.

12. Omapulo geni tu na okwiipula kombinga yomainyanyudho getu?

¹² Konakona nawa omainyanyudho goye. Ipula to ti: ‘Mbela ohandi lesha omambo, iifo nenge iitopolwa yontumba kointaneta kombinga yuulodhi? Ongiini kombinga yoomusika ndhoka handi pulakene, yoomuvi nosho wo yaashoka handi tala kotiivi nenge uudhano wuuvidio mboka handi dhana? Mbela opu na shimwe shomiinima mbyoka handi nyanyukilwa sha kwatela mo uumpulile? Mbela osha kwatela mo iishitukila hayi thipi aantu ombinzi, omidhimba aniwa dha mwenyopalekwa nenge iinima kaayi na oonkondo dhaa shi dhopaunshitwe? Mbela ohayi ulike kutya uumpulile, okutikila nenge okuloga, oyi li iinima inaayi nika oshiponga?’ Odhoshili kutya hamainyanyudho agehe ngoka ga kwatela mo omahokololo giinima mbyoka inaayi ningwa shili, ga kwatela mo uumpulile. Uuna to konakona omainyanyudho goye, tokola toko okuhogolola ngoka tage ke ku kwathela wu ikaleke kokule nakehe shoka Jehova e tonde. Otwa hala okuninga ngaashi tatu vulu tu kale tu “na eiyuvo lya yela” koshipala shaKalunga.​— Iil. 24:16. *

13. Otwa hala okuyanda okuninga shike?

¹³ Yanda okupopya omahokololo kombinga yoompwidhuli. Shi na ko nasha naashoka, otwa  hala okulandula oshiholelwa shoka twa tulilwa po kuJesus. (1 Pet. 2:21) Manga Jesus inee ya kombanda yevi, okwa li megulu nokwa kala e shi oshindji kombinga yaSatana noompwidhuli. Ihe ina kala ha popi omahokololo kombinga yaashoka oombepo dhuuwinayi dha ninga. Jesus okwa li a hala okulonga aantu kombinga yaJehova, ihe hayaSatana. Otatu vulu okuholela Jesus, mokukala itaatu taandelitha omahokololo kombinga yoompwidhuli. Onkee ano, ohatu ulike moohapu dhetu kutya otu na ‘iitya iiwanawa komitima,’ ano oshili.​— Eps. 45:1.

14-15. (a) Omolwashike kaatu na okukala twa tila oombepo dhuuwinayi? (b) Uumbangi wuni tawu ulike kutya Jehova oha gamene aapiya ye kunena?

¹⁴ Ino kala wa tila oombepo dhuuwinayi. Muuyuni mbuka, otashi vulika iinima iiwinayi yi tu ningilwe. Otashi vulika tu adhike ombaadhilila kiiponga, kuuwehame nenge nokuli keso. Ihe inatu dhiladhila kutya otwe yi etelwa koombepo dhuuwinayi. Ombiimbeli otayi yelitha kutya ‘ethimbo niiningwanima inaayi tegelelwa,’ otayi vulu okwaadha kehe gumwe. (Omuuv. 9:11, yelekanitha NW) Shi na ko nasha noompwidhuli, Jehova okwe shi ulika kutya oku na oonkondo e dhi vule kokulekule. Pashiholelwa, Kalunga ka li a etha Satana a dhipage Job. (Job 2:6) Pethimbo lyaMoses, Jehova okwa li a ulike kutya oku na oonkondo dhi vule dhoompulile dhomuEgipiti. (Eks. 8:18; 9:11) Jesus okwa li a nkondopalekwa kuJehova a vule okuumba mo Satana noompwidhuli megulu. Masiku, otaya ka umbilwa molumbogo lwomuule, moka itaaya ka vula okweetela aantu oshiponga.​— Eh. 12:9; 20:2, 3.

¹⁵ Otu wete uumbangi owundji mboka tawu ulike kutya Jehova oha gamene aapiya ye kunena. Dhiladhila kwaashika: Ohatu uvitha nohatu longo aantu oshili muuyuni awuhe. (Mat. 28:19, 20) Iilonga mbyoka ohayi tu kwathele tu aneke pomutenya iilonga iiwinayi yOmuhindadhi. Odhoshili kutya andola Satana okwa li e na oonkondo dhokukeelela iilonga yetu kaayi ye komeho, ando okwe shi ninga. Onkene inatu pumbwa okukala twa tila oombepo dhuuwinayi. Otu shi kutya “Omuwa ota tonatele uuyuni auhe, a nkondopaleke mboka ye na omitima dhe mu inekela.” (2 Ondjal. 16:9) Ngele otu li aadhiginini kuJehova, oompwidhuli itadhi vulu oku tu etela oshiponga tashi kalelele.

16-17. Gandja oshiholelwa shoka tashi ulike kutya ohashi pula lela uulaadhi, opo omuntu a kondjithe oombepo dhuuwinayi.

¹⁶ Ohashi pula uulaadhi okukondjitha oombepo dhuuwinayi, unene tuu ngele ookuume naakwanezimo yetu otaye tu pataneke. Ihe Jehova oha yambeke mboka haya ulike uulaadhi. Natu tale koshiholelwa shomumwameme Erica, gwokoGhana. Okwa adhika e na omimvo 21, sho a zimine okukonakona Ombiimbeli. Molwaashoka he okwa li omusita ngoka ompulile, Erica okwa li a tegelelwa a kuthe ombinga momukalondjigilile ngoka gwa kwatathana nuumpulile, ngoka gwa kwatela mo okulya onyama ya yambelwa iikalunga yahe. Sho Erica a tindi, yaandjawo oya li ye shi tala ko kutya ina simaneka iikalunga mbyoka. Oya li yi itaala kutya iikalunga mbyoka, otayi ke ya geela moku ya etela uuwehame wopalutu nowopamadhiladhilo.

¹⁷ YaandjaErica oya li ya kambadhala oku mu thiminika a kuthe ombinga moshinima shoka, ihe okwa ndjiki oonyala mevi, nonando oshe mu pula a tembuke mo megumbo. Oonzapo dhimwe odhe mu edhilile. Momukalo ngoka, Jehova okwa li a yambeke Erica nuukwanegumbo uupe, ano ooitaali ooyakwawo mboka ya kala ya fa aamwayina. (Mark. 10:29, 30) Nonando aakwanezimo ye oye mu iteka nokufika po iinima ye, Erica okwa kala omudhiginini kuJehova sigo a ninginithwa. Oku li ngashingeyi omukokolindjila gwondjigilile. Iha kala a tila oompwidhuli. Erica okwa popi kombinga yaantu yaandjawo a ti: “Ohandi galikana kehe esiku yaandjetu ya ka mone omayambeko ngoka haga zi mokutseya Jehova nemanguluko ndyoka hali zi mokulongela Kalunga ketu omunahole.”

18. Omayambeko geni hatu mono mokukala twi inekela muJehova?

¹⁸ Haatuhe eitaalo lyetu tali ka makelwa momukalo ngoka. Nonando ongawo, atuheni otwa pumbwa okukondjitha oombepo dhuuwinayi nokukala twi inekela muJehova. Ngele otwe shi ningi, otatu ka mona omayambeko ogendji notatu ka yanda okupukithwa kiifundja yaSatana. Shimwe ishewe, itatu ka etha uumbanda wokutila oompwidhuli wu tu ethithe po okulongela Jehova. Shoka sha dhenga mbanda, otatu ka koleka ekwatathano lyetu naJehova. Omulongwa Jakob okwa nyola a ti: “Vulikeni ano kuKalunga. Kondjitheni Satana, ye note mu yi ontuku. Hedheni kuKalunga, ye nota hedha kune.”​— Jak. 4:7, 8.