1. Aapiya yaKalunga ayehe oya hala okuninga shike, nomolwashike? (Tala ethano lyokombanda.)

JESUS KRISTUS okwa lombwela aalanduli ye a ti: “Indeni ano, ka ningeni aantu ayehe aalongwa.” (Mat. 28:19) Aapiya yaKalunga ayehe aadhiginini, oya hala okwiilonga nkene taya vulu ‘okugwanitha ayihe’ miilonga yokuuvitha mbyoka ya pewa ya longe. (2 Tim. 4:5) Oshinima shilwe, iilonga mbika oya simanenena, oyi na oshilonga noya endelela shi vulithe nale. Nonando ongawo, otashi vulu okukala oshidhigu okulongitha ethimbo olindji miilonga mbyoka ngaashi twa hala.

2. Omashongo geni hage shi ningitha oshidhigu tu gwanithe po iilonga yetu yokuuvitha?

² Opu na wo iilonga yilwe ya simana, mbyoka hayi tu pula ethimbo lyetu noonkondo dhetu. Iilonga mbyoka ongaashi yokwiikongela omboloto, moka tashi vulika tu longithe ethimbo lyetu olindji, opo tu ikwathele nosho wo uukwanegumbo wetu. Otashi vulika shi kale oshidhigu kutse okusila oshimpwiyu uukwanegumbo wetu, tatu ehama, tu niwe kepolimano nenge tu na omaupyakadhi ngoka hage endele pamwe nuukulupe. Ongiini tatu vulu okugwanitha po iilonga yokuuvitha, nonando otatu ungaunga nomashongo ngoka?

3. Ngele tatu tala koohapu dhaJesus ndhoka dhi li muMateus 13:23, otatu vulu okuthika pehulithodhiladhilo lini?

³ Ngele oonkalo dhetu ohadhi tu ngambeke kaatu longithe ethimbo olindji mokulongela Jehova, inatu teka omukumo. Jesus okwa li e shi shi kutya aalanduli ye itaya ka vula okwiimika iiyimati yUukwaniilwa yi thike pamwe. (Lesha Mateus 13:23.) Jehova okwa lenga noonkondo kehe shoka hatu ningi miilonga ye nomutima gwetu aguhe, shampa owala tatu yi longo shi thike pakuvula kwetu. (Heb. 6:10-12) Nonando ongawo, otashi vulika tu kale uvite kutya onkalo yetu otayi tu pitike tu ninge oshindji. Moshitopolwa shika, otatu ka kundathaneni nkene tatu vulu okupititha komeho iilonga  yokuuvitha, nkene tatu vulu okupupaleka onkalamwenyo yetu nankene tatu vulu okuhwepopala mokuuvitha nomokulonga aantu. Ihe, okugwanitha ayihe miilonga yokuuvitha osha hala okutya ngiini?

4. Okugwanitha ayihe miilonga yokuuvitha, otashi ti shike?

⁴ Okugwanitha ayihe mokulongela Jehova, osha hala okutya, natu longe nuudhiginini miilonga yokuuvitha noyokulonga aantu ngaashi tatu vulu. Ihe inaku kwatela mo owala ethimbo ndyoka hatu longitha miilonga mbyoka. Einyengotompelo lyetu lyokuuvitha nalyo olya simana kuJehova. Ohatu longo nuudhiginini miilonga mbyoka hatu longele Jehova, * molwaashoka otu mu hole notu hole aantu ooyakwetu. (Mark. 12:30, 31; Kol. 3:23) Okulongela Jehova nomutima aguhe, otashi ti okwiigandja nokulongitha oonkondo dhetu ngaashi tatu vulu miilonga ye. Ngele otwa pandula uuthembahenda wokuuvitha, otatu ka kambadhala okuuvithila aantu oyendji onkundana ombwanawa ngaashi tatu vulu.

5-6. Gandja oshiholelwa shankene omuntu ngoka ethimbo lye lya ngambekwa, ta vulu okupititha komeho iilonga yokuuvitha.

⁵ Dhiladhila komulumentu omugundjuka ngoka e hole okudhenga oshiketala. Oku hole oku shi dhenga pompito kehe ta mono. Lwanima, okwa kala he shi dhenge momahuliloshiwike mehala lyontumba lyokulila, onga iilonga ye. Nonando ongawo, iha mono oshimaliwa sha gwana shokufuta oompumbwe dhe. Onkee ano, okwa tameke okulonga peshina mositola yiikulya, Omaandaha sigo Etitano. Nonando oha longo ethimbo olindji mositola, shoka e hole unene okudhenga oshiketala. Okwa halelela okuhwepopaleka uunkulungu we, opo a kale owala ha longo iilonga mbyoka yokudhenga oshiketala. Nonando ongawo, oha nyanyukilwa oku shi dhenga pokampito kehe ta mono.

⁶ Momukalo gwa faathana, otashi vulika ethimbo lyoye ndyoka ho longitha miilonga yokuuvitha li kale lya ngambekwa. Ihe iilonga mbyoka oyo wu hole okulonga. Oho kambadhala okuhwepopaleka uunkulungu woye wokuuvitha onkundana ombwanawa, opo wu adhe omitima dhaantu. Molwaashoka owu na iinakugwanithwa oyindji, otashi vulika wu ipule kutya  oto shi ende ngiini, opo wu pitithe komeho iilonga yokuuvitha.

7-8. Ongiini tatu vulu okuholela etaloko lyaJesus lyiilonga yokuuvitha?

⁷ Jesus okwe tu tulila po oshiholelwa sha dhenga mbanda shankene a li a tala ko iilonga yokuuvitha. Shoka sha li sha simanenena monkalamwenyo ye, okulombwela aantu kombinga yUukwaniilwa waKalunga. (Joh. 4:34, 35) Okwa li he ende iinano iile, opo a ka uvithile aantu oyendji ngaashi tashi vulika. Okwa li aluhe ha kongo ompito a popye naantu momagumbo gawo nakehe mpoka taya adhika. Jesus okwa kala a pititha komeho iilonga yokuuvitha onkalamwenyo ye ayihe.

⁸ Otatu vulu okuholela Jesus mokukonga oompito tu popye naantu kombinga yonkundana ombwanawa ngaashi tatu vulu, kashi na nduno mbudhi kutya uunake nopeni. Ohatu kala tu na ehalo lyokuninga omaiyambo, tu uvithile aantu. (Mark. 6:31-34; 1 Pet. 2:21) Yamwe megongalo oye li aakokolindjila yi ikalekelwa, yondjigilile nenge yopakathimbo. Yalwe oyi ilonga elaka lilwe nenge ya tembukila hoka ku na ompumbwe onene yaauvithi. Nonando ongawo, iilonga yokuuvitha ohayi longwa unene kaauvithi mboka haya longo ngaashi taya vulu. Kutya nduno ohatu longo shi thike peni, Jehova iha kala a tegelela tu longe shi thike pwaashoka itaatu vulu. Okwa hala atuhe tu nyanyukilwe iilonga yetu iiyapuki, sho tatu uvitha “onkundana ombwanaweelela ya za kuKalunga omunyanyukwi”(NW).​— 1 Tim. 1:11; Deut. 30:11.

9. (a) Paulus okwa li a pititha ngiini komeho iilonga yokuuvitha, nonando okwa li e na okulonga iilonga yokwiikongela omboloto? (b) Iilonga 28:16, 30, 31 otadhi ulike shike kombinga yetaloko lyaPaulus li na ko nasha niilonga yokuuvitha?

⁹ Omuyapostoli Paulus okwa li a pititha komeho iilonga yokuuvitha monkalamwenyo ye, nokwe tu tulila po oshiholelwa oshiwanawa. Sho a li muKorinto molweendo lwe olutiyali lwuutumwa, ka li e na oshimaliwa sha gwana, nomathimbo gamwe okwa li e na okuninga ootenda. Nonando ongawo, Paulus ka li a pititha komeho okuninga ootenda. Iilonga mbyoka okwa li he yi longo, opo i ikwathele sho ta uvithile Aakorinto onkundana ombwanawa nokaapu na oku ya “pula nando osha.” (2 Kor. 11:7) Nonando Paulus okwa li e na okulonga iilonga yokwiikongela omboloto, okwa tsikile okukala a pititha komeho iilonga yokuuvitha nokwa kala he yi longo wo mEsabati kehe. Sho onkalo ye ya hwepopala, Paulus okwa li a vulu okugandja eitulomo kiilonga yokuuvitha. Okwa kala i “ipyakidhila ethimbo alihe nokuuvithila aantu oohapu dhaKalunga nokwa tompo Aajuda kutya Jesus oye Kristus.” (Iil. 18:3-5; 2 Kor. 11:9) Lwanima, sho a ka tulwa mondholongo megumbo lye muRoma, uule womimvo mbali, okwa li a uvithile mboka ye ya oku mu talela po nokwa li wo a nyola oontumwafo. (Lesha Iilonga 28:16, 30, 31.) Paulus okwa li a tokola toko kaa ethe nando osha shi ye moshipala iilonga ye yokuuvitha. Okwa nyola a ti: “Kalunga okwe tu pe eyakulo ndika . . . , onkee itatu si uunye.” (2 Kor. 4:1) Ngaashi Paulus, nonando natse otashi vulika tu na okulongitha ethimbo olindji miilonga yokwiikongela omboloto, otatu vulu okupititha komeho iilonga yokuuvitha monkalamwenyo.

10-11. Ongiini tatu vulu okuuvitha ngaashi tatu vulu, ngele uukolele wetu otawu nyangwanyangwa?

¹⁰ Ngele itatu vulu naanaa okuuvitha egumbo negumbo, omolwuukulupe nenge molwuukolele tawu nyangwanyangwa, otatu vulu natango okunyanyukilwa omikalo dhilwe dhokuuvitha. Aauvithi yomethelemimvo lyotango, oya li haya kambadhala okuuvithila aantu kehe mpoka taye ya adha. Oya li haya longitha ompito kehe taya mono, ya uvithile aantu kutya nduno egumbo negumbo, momapandaanda nenge ontukuluka, ano kehe mpoka aantu “haa kala.” (Iil. 17:17; 20:20) Ngele ihatu vulu okweenda iinano, otatu vulu okukuutumba pomahala mpoka hapu ende aantu noku ya uvithila. Nenge otashi vulika tu gandje uunzapo wontukuluka, tu nyole oontumwafo nenge tu uvithe okupitila mongodhi. Aauvithi oyendji  mboka ihaaya vulu okuuvitha egumbo negumbo, ohaya mono enyanyu enene, mokuuvitha momikalo ndhoka.

¹¹ Nonando owu na uukolele tawu nyangwanyangwa, oto vulu okulonga ngaashi to vulu miilonga yokuuvitha. Natu taleni ishewe koshiholelwa shomuyapostoli Paulus. Okwa ti: “Ngame otandi vulu shaa shoka, oshoka Kristus ota koleke ndje.” (Fil. 4:13) Paulus okwa li a pumbwa oonkondo ndhoka, sho a li te ehama pethimbo lyolweendo lwe lwumwe lwuutumwa. Okwa yelithile Aagalati a ti: “Omoluunkundi wandje wokolutu onde mu uvithile tango evaangeli.” (Gal. 4:13) Sha faathana, uunkundi woye wopalutu otawu vulu oku ku pa oompito wu uvithile yalwe onkundana ombwanawa, ngaashi oondohotola, aapangi naamboka taye ku sile oshimpwiyu moshipangelo. Oyendji yomaantu mboka ohaya kala ye li kiilonga, tashi vulika ngele aauvithi taya uvitha moshitopolwa shawo.

12. Okukaleka omeho getu “omandjolowele,” osha hala okutya shike?

¹² Jesus okwa ti: “Omeho ogo olamba yolutu. Ano omeho goye ngele omandjolowele, nena olutu lwoye aluhe olu na uuyelele.” (Mat. 6:22) Okwa li a hala okutya shike? Okwa li a hala okutya, otwa pumbwa okukala nonkalamwenyo inaayi kitakana nenge tu tye tu gandje eitulomo kelalakano ndyoka lya simana nopwaa na okupiyaganekwa kusha. Jesus okwe tu tulila po oshiholelwa shokugandja eitulomo kiilonga yokuuvitha, nokwa longa aalongwa ye ya gandje eitulomo kokulongela Jehova nokUukwaniilwa We. Ohatu holele Jesus mokukala tatu gandja eitulomo kiilonga yokuuvitha monkalamwenyo yetu, ano ‘mokukonga tangotango Oshilongo shaKalunga nuuyuuki we.’​— Mat 6:33.

13. Oshike tashi vulu oku tu kwathela tu gandje eitulomo kiilonga yokuuvitha?

 ¹³ Omukalo gumwe tagu tu kwathele tu gandje eitulomo kiilonga yokuuvitha, okukaleka onkalamwenyo yetu inaayi kitakana, opo tu longithe ethimbo olindji mokukwathela yalwe ya tseye Jehova nokukala ye mu hole. * Pashiholelwa, mbela itatu vulu okuninga omalunduluko ngele tashi ya pethimbo ndyoka hatu kala miilonga yokwiikongela omboloto, opo tu kale hatu uvitha mokati koshiwike? Mbela itatu vulu okushonopeka ethimbo ndyoka hatu longitha momainyanyudho?

14. Omalunduluko geni aaihokani yamwe ya ningi, opo ya longithe ethimbo olindji nokugandja eitulomo kiilonga yokuuvitha?

¹⁴ Shoka osho omukuluntugongalo gwedhina Elias nanekulu lye, ya ningi. Omumwatate Elias okwa ti: “Katwa li tatu vulu okukokola ondjila pethimbo ndyoka, ihe otwa li tu na oku shi ninga pethimbo lilwe. Onkee mokweendela ko kwethimbo, otwa tameke okulongitha ethimbo lyetu olindji miilonga yokuuvitha kashona nakashona. Pashiholelwa, otwa tameke ihaatu longitha we oshimaliwa oshindji, ihaatu longitha ethimbo olindji momainyanyudho notwa li twa pula aahona yetu kaatu kale hatu longo ethimbo olindji. Oshizemo, otwa tameke okukala hatu uvitha kongulohi, hatu ningi omakonakonombiimbeli ogendji nokuuvitha pamwe negongalo mokati koshiwike, lwaali momwedhi. Otwa kala lela tatu shi tyapula!”

15-16. Metsokumwe naTimoteus gwotango 4:13, 15, ongiini tatu vulu okutsikila okuhwepopala miilonga yetu yokuuvitha? (Tala wo oshimpungu: “ Omalalakano ngoka taga kwathele ndje ndi longe ngaashi tandi vulu miilonga yokuuvitha.”)

¹⁵ Omukalo gulwe tatu vulu okuuvitha ngaashi tatu vulu, omokuhwepopaleka uunkulungu wetu  wokuuvithila yalwe. Aantu miilonga yimwe ohaya tsikile okudheulwa nokulongwa, opo ontseyo yawo nuunkulungu wawo yi hwepopale. Aauvithi yUukwaniilwa nayo osho haya kwathelwa ngaaka. Otwa pumbwa okutsikila okwiilonga nkene tu na okuuvithila yalwe nawanawa.​— Omayel 1:5; lesha 1 Timoteus 4:13, 15.

¹⁶ Ongiini nduno tatu vulu okutsikila okuninga ehumokomeho miilonga yokuuvitha? Omokupulakena nawa komalombwelo ngoka haga gandjwa pokugongala kwOnkalamwenyo yopaKriste niilonga yokuuvitha. Pokugongala mpoka ohatu pewa po edheulo lya simana, ndyoka hali tu kwathele tu tsikile okuhwepopaleka omikalo dhetu dhokuuvitha. Pashiholelwa, ngele omunashipundi ota gandja omayele kwaamboka ya kutha ombinga mosikola, otatu vulu okundhindhilika iinima mbyoka tayi vulu oku tu kwathela tu hwepopale mokuuvitha. Otatu vulu okutula miilonga omayele ngoka, sho tatu ka uvithila yalwe onkundana ombwanawa. Otatu vulu okupula ekwatho komutonateli gwongundu yetu yiilonga yomomapya nenge tu longe naye. Otatu vulu wo okupula ekwatho nenge okuuvitha pamwe nomuuvithi ngoka a pyokoka, nomukokolindjila nenge nomutonatelishikandjo. Sho tatu tameke okukala twa pyokoka mokulongitha Iilongitho yokulonga aantu, otatu ka kala hatu nyanyukilwa iilonga yetu yokuuvitha noyokulonga yalwe shi vulithe nale.

17. Oto ka mona uuwanawa wuni, ngele owa ningi ngaashi to vulu miilonga yokuuvitha?

¹⁷ Kashi shi tuu uuthembahenda uunene, sho Jehova e tu pitika tu kale “aalongi pamwe” naye! (1 Kor. 3:9) Ngele owu na “owino yokuyoolola iinima mbyoka yi na oshilonga” nowa gandja eitulomo miilonga yaJehova, oto ke ‘mu longela nenyanyu.’ (Fil. 1:10; Eps. 100:2) Wu li omulongeli gwaKalunga, oto vulu okukala wu na omukumo kutya ote ke ku pa oonkondo ndhoka wa pumbwa, wu gwanithe po iilonga yoye yokuuvitha kutya nduno owu kale wu na omashongo nenge omangambeko geni. (2 Kor. 4:1, 7; 6:4) Kutya nduno onkalo yoye otayi ku pitike wu longe ethimbo eshona nenge olindji miilonga yokuuvitha, oto vulu “okwiitangela” nenge tu tye wu kale wa nyanyukwa, sho to longo iilonga mbyoka nomutima gwoye aguhe. (Gal. 6:4) Ngele owa longo ngaashi to vulu miilonga yokuuvitha, oto ka ulika kutya owu hole Jehova nosho wo aantu ooyakweni. “Ngele to shi ningi, oto ihupitha nosho wo mboka taye ku pulakene.”​— 1 Tim. 4:16.