1-2. Omolwashike Jesus a li e uvite uudhigu momwenyo gwe?

MESIKU lye lyahugunina manga inaa sa, Jesus okwa li e uvite uudhigu momwenyo gwe. Okwa li e li poku ka dhipagwa momukalo omunyanyalithi kaakolokoshi. Ihe Jesus ka li owala ti ipula kombinga yeso lye. Okwa li lela e hole He, nokwa li a hala oku mu nyanyudha. Okwa li e shi kutya ngele okwa kala omudhiginini pethimbo lyuudhigu mboka wa li tawu ke mu adha, okwa li ta ka yukipalitha edhina lyaJehova. Jesus okwa li wo e hole aantu nokwa li e shi shi kutya otaya ka mona owala omwenyo gwaaluhe monakuyiwa, ngele okwa kala omudhiginini sigo omeso.

² Nonando Jesus okwa li e uvite uudhigu momwenyo gwe, okwa li e na ombili. Okwa li a lombwele aalongwa ye a ti: “Ombili yandje mwene otandi yi mu pe.” (Joh. 14:27) Okwa li e na ‘ombili yaKalunga’ nokwa ngungumana, iinima mbyoka hayi etithwa kekwatathano ewanawa ndyoka omuntu ha kala e na naJehova. Ombili ndjoka oya kwathele Jesus a kale a mbilipalelwa komwenyo nopamadhiladhilo.​— Fil. 4:6, 7.

3. Oshike tatu ka kundathana moshitopolwa shika?

³ Kapu na nando ogumwe gwomutse ta ka adhika kuudhigu mboka wa li wi idhidhimikilwa kuJesus. Nonando ongawo, aalanduli ye ayehe, otaya ka adhika komashongo. (Mat. 16:24, 25; Joh. 15:20) Omathimbo gamwe, natse otatu ki iyadha tu uvite uudhigu moomwenyo ngaashi Jesus. Oshike tatu vulu okuninga, opo kaatu kale tatu ipula unene, sigo twa kala kaatu na we ombili yopamadhiladhilo? Natu ka kundathaneni iinima itatu mbyoka Jesus a li a ningi pethimbo a li ta uvitha kombanda yevi nosho wo nkene tatu vulu oku mu holela, ngele twe ki iyadha momashongo.

4. Wu na momadhiladhilo Aatessalonika yotango 5:17, gandja iiholelwa yimwe mbyoka tayi ulike kutya Jesus okwa li a galikana olundji mesiku lye lyahugunina kombanda yevi.

⁴ Lesha 1 Aatessalonika 5:17. Jesus okwa kala ta galikana olundji mesiku lye lyahugunina kombanda yevi. Sho a ulukile aalongwa ye nkene ye na okudhimbulukwa eso lye, okwa galikanene oshikwiila nomaviinu. (1 Kor. 11:23-25) Manga inaaya za mo mehala moka ya ningile Opaasa, okwa galikana pamwe naalongwa ye. (Joh. 17:1-26) Sho e ya nayo kOndundu yOoholivi, natango okwa galikana lwiikando. (Mat. 26:36-39, 42, 44) Okwa li wo a galikana, sho e li pokusa. (Luk. 23:46) Jesus okwa li a tseyithile Jehova okupitila megalikano kehe shimwe shoka sha li sha ningwa mesiku lye lyahugunina, kombanda yevi.

5. Omolwashike aayapostoli ya li ya tyololoka?

⁵ Etompelo limwe kutya omolwashike Jesus a li a vulu okwiidhidhimikila uudhigu, olyo kutya okwa li ha galikana kuHe. Ihe uusiku mboka a si, aayapostoli ye kaya li ya dhiginine okugalikana. Oshizemo, oya tyololoka, sho ye ki iyadha memakelo. (Mat. 26:40, 41, 43, 45, 56) Uuna twi iyadha momamakelo, otatu ka kala owala aadhiginini, ngele otwa landula oshiholelwa shaJesus nokukala aluhe hatu ‘galikana.’ Otatu vulu okugalikana kombinga yashike?

6. Eitaalo otali ke tu kwathela ngiini tu tsikile okukala tu na ombili?

⁶ Otatu vulu okugalikana kuJehova e ‘tu gwedhele eitaalo.’ (Luk. 17:5; Joh. 14:1) Otwa pumbwa eitaalo, molwaashoka Satana ota ka makela ayehe mboka haya landula Jesus. (Luk. 22:31) Eitaalo otali ke tu kwathela ngiini tu tsikile okukala tu na ombili, nonando otu adhike komashongo kepaya taku zi? Uuna twa ningi  ngaashi tatu vulu tu ungaunge neshongo lyontumba, eitaalo otali ke tu kwathela tu ethele iinima momake gaJehova. Molwaashoka otwi itaala kutya oha vulu okuungaunga niinima e tu vule, ohashi tu ningitha tu kale tu na ombili yokomwenyo noyopamadhiladhilo.​— 1 Pet. 5:6, 7.

7. Oshike wi ilongo mwaashoka sha popiwa komumwatate Robert?

⁷ Egalikano ohali tu kwathele tu kale tu na ombili yopamadhiladhilo kutya nduno otu kale momamakelo ga tya ngiini. Natu taleni koshiholelwa shatatekulu Robert, omukuluntugongalo omudhiginini, ngoka ngashingeyi e na omimvo 80 nasha. Okwa ti: “Omayele ngoka ge li mAafilippi 4:6, 7, oga kwathela ndje ndi idhidhimikile omashongo ogendji monkalamwenyo yandje. Onda li ndi na ompumbwe yoshimaliwa. Onda li wo nda kanitha uuthembahenda wandje wuukuluntugongalo.” Oshike sha kwathele omumwatate Robert a kale e na ombili yopamadhiladhilo? Okwa ti: “Ohandi galikana nziya, ngele nda tameke okwiipula unene. Ondi shi shi kutya uuna nda galikana lwiikando notashi zi komutima, ohandi kala lela ndi uvite ombili.”

8. Ngaashi sha popiwa muJohannes 8:29, omolwetompelo lilwe lini Jesus a li e na ombili yopamadhiladhilo?

⁸ Lesha Johannes 8:29. Jesus okwa li e na ombili yopamadhiladhilo, nokuli naasho a li ta hepekwa, molwaashoka okwa li e shi shi kutya ota nyanyudha He. Okwa tsikile okukala ta vulika, nomoonkalo moka sha li oshidhigu oku shi ninga. Okwa li e hole He Jehova, nokwa tsikile oku mu longela onkalamwenyo ye ayihe. Manga inee ya kombanda yevi, Jesus okwa li a longo pamwe naKalunga e li “engomba.” (Omayel. 8: 30) Nopethimbo a li kombanda yevi, okwa longo yalwe nuulaadhi kombinga yaHe. (Mat. 6:9; Joh. 5:17) Iilonga mbyoka oya li ya etele Jesus enyanyu enene.​— Joh. 4:34-36.

9. Ongiini okukala twi ipyakidhila nokuuvitha, taku vulu oku tu kwathela tu tsikile okukala nombili yokomwenyo?

⁹ Otatu vulu okuholela Jesus mokuvulika kuJehova nokukala twi “ipyakidhila aluhe niilonga yOmuwa.” (1 Kor. 15:58) Ngele otwi “ipyakidhila ethimbo alihe” miilonga yokuuvitha, itatu kala tatu ipula unene nomaupyakadhi getu. (Iil. 18:5) Pashiholelwa, mboka hatu tsakaneke miilonga yokuuvitha, olundji omaupyakadhi gawo ohaga kala ge vule getu. Nonando ngawo, ngele ya tameke okwiilonga okukala ye hole Jehova nokutula miilonga shoka tayi ilongo, onkalamwenyo yawo ohayi hwepopala nohaya kala ya nyanyukwa. Ethimbo kehe tatu mono shono tashi ningwa, ohatu kala tu shi lela kutya Jehova ote ke tu sila oshimpwiyu. Eshilipaleko ndyono ohali tu kwathele tu kale tu na ombili yokomwenyo. Omumwameme ngono onkalamwenyo ye ayihe a kala a polimana noku uvite kee na oshilonga, okwe shi mona kutya oshoshili. Okwa ti: “Ngele ndi ipyakidhila niilonga yokuuvitha, ihandi kala tandi ipula unene, nohandi kala nda nyanyukwa. Ondi wete kutya uuna tandi uvitha, ohandi kala ndi uvite ndi li popepi naJehova.”

10. Owi ilongo mo shike mwaashoka sha popiwa komumwameme Brenda?

¹⁰ Natu ka taleni ishewe koshiholelwa shomumwameme Brenda. Ye nomwanakadhona oye na uuvu wa kwata miiti. Brenda oha kala owala mokatemba noke na lela oonkondo. Omathimbo gamwe oha uvitha egumbo negumbo ngele ta vulu, ihe olundji oha gandja uunzapo okupitila mokunyola oontumwafo. Okwa ti: “Sho nde shi taamba ko kutya uuvu wandje itawu aluka monkalelo ndjika, onda gandja eitulomo kokuuvitha. Okuuvitha ohaku kwathele ndje kaandi kale tandi ipula unene. Ohaku kwathele ndje ndi gandje eitulomo kokukwathela mboka handi uvithile moshitopolwa shetu. Ohaku dhimbulukitha ndje aluhe etegameno ndyoka ndi na lyonakuyiwa.”

11-13. (a) Aayapostoli nosho wo yalwe, oya li ya ulike ngiini kutya oye li ookuume kashili kaJesus? (b) Ookuume kaJesus oye mu ningitha a kale e uvite ngiini?

¹¹ Ethimbo alihe Jesus a kala ta uvitha nonando kasha li oshipu, aayapostoli ye aadhiginini oye shi ulike kutya yo ookuume ke kashili. Oya li ya fa kuume ngoka a popiwa mOmbiimbeli, taku ti: “Kuume omudhiginini e vule omumwayina.” (Omayel. 18:24) Ookuume ye li ngawo, Jesus okwa li e ya lenga. Pethimbo lyuukalele we, kapu na nando ogumwe gwomaamwayina aalumentu ya li ye mu itaala. (Joh. 7:3-5) Pompito yimwe, aakwanezimo ye oya li ye shi nokuli ota yi oonkwengu. (Mark. 3:21) Nonando ongawo, muusiku we wahugunina manga inaa sa, Jesus okwa li a lombwele aayapostoli a ti: “One mwa kala pamwe nangame momamakelo gandje agehe.”​— Luk. 22:28.

¹² Omathimbo nomathimbo, aayapostoli oya li ya uvitha nayi Jesus, ihe ka li a gandja eitulomo komapuko gawo. Pehala lyaashono, okwa li a mono kutya oye na eitaalo muye. (Mat. 26:40; Mark. 10:13, 14; Joh. 6:66-69) Uusiku we wahugunina manga inaa dhipagwa, Jesus okwa li a lombwele aalumentu mboka aadhiginini a ti: “Ngame otandi mu ithana ookuume kandje, oshoka iinima ayihe mbyoka nde yi uva kuTate, onde yi mu lombwela.” (Joh. 15:15) Osha yela kutya ookuume kaJesus oya li haye mu tsu omukumo noonkondo. Ekwatho ndyoka ye mu pe pethimbo a li ta uvitha, olye mu nyanyudha lela.​— Luk. 10:17, 21.

¹³ Kakele kaayapostoli, Jesus okwa li wo e na ookuume yalwe, aalumentu naakiintu, mboka ya li ye mu kwathele miilonga yokuuvitha nosho wo momikalo dhilwe. Yamwe oya li haye  mu hiya komagumbo gawo, ya lye pamwe naye. (Luk. 10:38-42; Joh. 12:1, 2) Yalwe oya li haye ende pamwe naye noku mu pa mo momaliko gawo. (Luk. 8:3) Jesus okwa li e na ookuume aawanawa, oshoka naye okwa li kuume omwaanawa. Okwa li he ya ningile iinima iiwanawa noka li a tegelela ya ninge shi thike pwaashoka itaaya vulu okuninga. Nonando Jesus okwa li a gwanenena, okwa li ha pandula ekwatho ndyoka ha pewa kookuume ke mboka inaaya gwanenena. Kapu na omalimbililo kutya oya li ye mu kwathele a kaleke po ombili ye.

14-15. Ongiini tatu vulu okwiimonena ookuume aawanawa, nongiini taya vulu oku tu kwathela?

¹⁴ Ookuume aawanawa otaye ke tu kwathela tu kale aadhiginini kuJehova. Omukalo dhingi ngoka tagu tu kwathele tu mone ookuume aawanawa, omokukala tu li ookuume aawanawa. (Mat. 7:12) Pashiholelwa, Ombiimbeli otayi tu ladhipike tu longithe ethimbo lyetu noonkondo dhetu tu kwathele yalwe, unene tuu “oohepele.” (Ef. 4:28) Mbela ito vulu okutala kutya olye to vulu okukwathela megongalo lyeni? Mbela ito vulu okukwathela moku ka landela sha omuuvithi ngoka ihaa vulu okuza mo megumbo? Mbela ito vulu okupa uukwanegumbo mboka kaawu na oshimaliwa, iikulya? Ngele owu shi okulongitha o-jw.org nosho wo o-JW Library, mbela ito vulu okukwathela yalwe megongalo lyeni ya kale haye dhi longitha? Ohatu mono enyanyu enene, ngele otwa kala twa gandja eitulomo kokukwathela yalwe.​— Iil. 20:35.

¹⁵ Ookuume ketu otaye ke tu ambidhidha, uuna tu li momashongo notaye ke tu kwathela tu kaleke po ombili yetu yokomwenyo. Ngaashi owala Elihu a li a pulakene kuJob sho te mu lombwele uupyakadhi we, ookuume ketu nayo ohaye tu kwathele moku tu pulakena neidhidhimiko,  sho tatu ya lombwele omaupyakadhi getu. (Job 32:4) Katu na okutegelela ye tu ningile omatokolo, ihe otashi ka kala pandunge ngele otwa pulakene komayele gawo ngoka taye tu pe, ga kankamena kOmbiimbeli. (Omayel 15:22) Ngaashi owala omukwaniilwa David a li a taamba ko neifupipiko ekwatho lyookuume ke, natse otu na okukala tu na iikala ya fa ye, ngele ookuume ketu taye tu kwathele. (2Sam 17:27-29) Odhoshili kutya ookuume aawanawa ya tya ngawo, oye li omagano ga za kuJehova.​— Jak 1:17.

16. Shi ikolelela kAafilippi 4:6, 7, omomukalo owala guni tatu vulu okukala tu na ombili? Shi yelitha.

¹⁶ Lesha Aafilippi 4:6, 7. Omolwashike Jehova e tu lombwela kutya otatu vulu okukala tu na ombili ndjoka he tu pe okupitila “muKristus Jesus”? Omolwaashoka otatu vulu owala okukala tu na ombili yopamadhiladhilo noyokomwenyo, ngele otu uvite ko notu na eitaalo monkandangala ndjoka Jesus ta gwanitha po. Pashiholelwa, atuheni otatu vulu okudhiminwa po, omolwekuliloyambo lyaJesus. (1 Joh. 2:12) Shoka itashi tu hekeleke tuu! E li Omukwaniilwa gwUukwaniilwa waKalunga, Jesus ota ka kutha po okumona iihuna akuhe hoka Satana nuuyuni we ye tu etela. (Jes. 65:17; 1 Joh. 3:8; Eh. 21:3, 4) Ndyoka kali shi tuu etegameno ewanawa! Nonando otu shi kutya Jesus okwe tu pa oshinakugwanithwa oshidhigu, oku li pamwe natse note tu ambidhidha momasiku ngaka gahugunina. (Mat. 28:19, 20) Shoka otashi tu tsu lela omukumo. Ehekeleko, etegameno nosho wo etsomukumo, oyo yimwe yomiinima mbyoka hayi tu kwathele tu tsikile okukala tu na ombili yopamadhiladhilo.

17. (a) Ongiini Omukriste ta vulu okukaleka po ombili ye? (b) Ngaashi sha uvanekwa muJohannes 16:33, otatu ka vula okuninga shike?

¹⁷ Ongiini nduno to vulu okukaleka po ombili yoye yopamadhiladhilo, uuna wa gwililwa po komaupyakadhi? Oto vulu oku shi ninga mokuholela iinima mbyoka Jesus a li a ningi. Tango, galikana nokutsikila oku shi ninga. Oshitiyali, vulika kuJehova nokuuvitha nuulaadhi nokuli nuuna oshidhigu oku shi ninga. Oshititatu, konga ekwatho kookuume koye, uuna wu li momamakelo. Opo nduno, ombili yaKalunga otayi ka gamena omutima gwoye nomadhiladho goye. Ngaashi Jesus, nangoye oto ka sinda emakelo kehe.​— Lesha Johannes 16:33.