1. Atuheni otu na okuninga shike?

MBELA oto ka kala ngaa wa hala wu ye methigathano ndyoka wu shi kutya edhigu, unene tuu ngele oto ehama nenge wa vulwa? Hasho nando. Nonando ongawo, omuyapostoli Paulus okwa ti kutya Aakriste ayehe oye li methigathano. (Heb. 12:1) Atuheni, kutya nduno aagundjuka nenge aakokele, tu na oonkondo nenge twa vulwa, otwa pumbwa okwiidhidhimika sigo okehulilo, ngele otwa hala tu ka mone ondjambi ndjoka Jehova e tu uvanekela. — Mat. 24:13.

2. Ngaashi sha popiwa muTimoteus omutiyali 4:7, 8, omolwashike Paulus a li e na emanguluko lyokupopya?

² Paulus okwa li ta vulu okupopya a manguluka, molwaashoka okwa li e shi pondola ‘okumatuka oshinano ashihe.’ (Lesha 2 Timoteus 4:7, 8.) Ihe Paulus okwa li ta popi kombinga yethigathano lini naanaa?

3. Ethigathano ndyoka Paulus a popi olini?

³ Omathimbo gamwe, uuna Paulus ta longo aantu iiyilongomwa ya simana, okwa li ha longitha iiholelwa yomaudhano ngoka ga li haga dhanwa muGreka shonale. (1 Kor. 9:25-27; 2 Tim. 2:5) Iikando yontumba, okwa li a faathanitha okumatuka methigathano nokukalamwenyo kwopaKriste. (1 Kor. 9:24; Gal. 2:2; Fil. 2:16) Omuntu oha tameke okuya “methigathano” ndyoka, ngele i iyapulile Jehova e ta ninginithwa. (1 Pet. 3:21) Uuna a adha kethikilo, Jehova ohe mu pe ondjambi yomwenyo gwaaluhe. — Mat. 25:31-34, 46; 2 Tim. 4:8.

4. Oshike tatu ka kundathana moshitopolwa shika?

⁴ Efaathano lini li li pokati kokumatuka oshinano oshile nokukalamwenyo kwopaKriste? Opu na omafaathano ogendji. Natu  ka taleni gatatu gomugo. Lyotango, otu na okulandula ondjila ndjoka yu uka. Etiyali, otu na okugandja eitulomo koku ka thika kethikilo. Etitatu, otu na okwiidhidhimikila omashongo ngoka tage tu adha.

5. Ondjila yini tu na okulandula, nomolwashike?

⁵ Opo aamatuki ya pewe ondjambi yawo methigathano lyokumatuka ko kwenekwene, oye na okumatuka mondjila ndjoka ya hogololwa kaaunganeki yethigathano. Sha faathana, ngele otwa hala tu ka pewe ondjambi yomwenyo gwaaluhe, otu na okulandula ondjila yopaKriste. (Iil. 20:24; 1 Pet. 2:21) Ihe Satana naalanduli ye, oya hala tu ya “holele.” (1 Pet. 4:4) Ohaye tu sheke, sho hatu landula ondjila ndjoka yu uka noyi itaala kutya ondjila yawo oyi li hwepo nohayi etele omuntu emanguluko. Ihe shoka kashi shi shoshili. — 2 Pet. 2:19.

6. Oshike to ilongo koshiholelwa shaBrian?

⁶ Kehe ngoka a nwethwa mo kuuyuni waSatana, ohe ke shi mona mo nziya kutya ondjila ndjoka, inayi mu etela emanguluko, ihe uupika. (Rom. 6:16) Natu taleni koshiholelwa shaBrian. Aavali ye oya li haye mu ladhipike a landule ondjila yokukalamwenyo kwopaKriste. Ihe sho e na omimvo omulongo nasha, okwa kala e na omaipulo ngele ondjila ndjoka otayi ke mu etela ngaa enyanyu. Brian okwa li a hogolola okumatuka pamwe naamboka haya landula omithikampango dhaSatana. Ota ti: “Kanda li ndi shi ngele emanguluko ndyoka hali popiwa, otali ka fala ndje owala muupika wiinima iiwinayi. Mokweendela ko kwethimbo, onda tameke okulongitha iingangamithi, okunwa sha pitilila nokukala ndi hole iipala. Uule womimvo dha ka landula ko, onda tameke wo okulongitha iingangamithi oyindji mbyoka ya nika oshiponga, nonda li nda pikwa kuyo. . . . Onda tameke oku yi landitha, opo ndi pule komeho nonkalamwenyo yandje.” Lwanima, Brian okwa tokola okukala metsokumwe nomithikampango dhaJehova. Okwa ningi omalunduluko, e ta ninginithwa mo 2001. Ngashingeyi okwa nyanyukwa, sho a landula ondjila yokukalamwenyo kwopaKriste. *

7. Shi ikolelela kuMateus 7:13, 14, opu na oondjila mbali dhini?

⁷ Inashi simana tuu sho twa hogolola okweenda mondjila ndjoka yu uka! Satana okwa hala atuheni tu ethe po okumatuka mondjila ndjoka ya thinana notayi “fala komwenyo,” notu ye mondjila ndjoka ya mbwalangandja, ndjoka oyendji muuyuni mbuka taya ende. Ondjila ndjoka oyi holike noshipu okweenda muyo. Nonando ongawo, otayi “fala mekano.” (Lesha Mateus 7:13, 14.) Ngele otwa hala okukala mondjila yu uka nokaatu pundukithwe kusha, otu na okukala twi inekela muJehova nokupulakena kuye.

8. Ngele omumatuki okwi ihata po, oha ningi po shike?

⁸ Aamatuki methigathano lyoshinano oshile, ohaya kala ya tala mondjila ndjoka taya matuka, opo kaayi ihate po. Nonando ongawo, natango otashi vulika ya goywe po komumatuki omukwawo inaaye shi tegelela nenge ya lyate melambo e tayi ihata po. Ngele oyi ihata po, ohayi itoola po e taya pula komeho. Ohaya gandja unene eitulomo kokuthika kethikilo nokondjambi ndjoka taya ka mona, ihe hakwaashoka she ya pundukitha.

9. Ngele otwa punduka, oshike tu na okuninga?

⁹ Methigathano lyetu, otashi vulika tu punduke lwiikando, mokuninga omapuko moohapu nomiilonga. Nenge tashi vulika aamatuki ooyakwetu ya ninge omapuko ngoka tage tu uvitha nayi. Ngele osha ningwa, inashi tu kumitha. Atuheni inatu gwanenena notatu matuka mondjila ndjoka ya thinana notayi fala komwenyo. Onkee ano, otashi vulika tu “pumathane” omathimbo nomathimbo. Paulus okwe shi zimina kutya omathimbo gamwe otatu ka ‘ningathana nooyakwetu.’ (Kol. 3:13) Ihe pehala lyokugandja eitulomo kwaashoka she tu pundukitha, natu gandje eitulomo kondjambi ndjoka tatu ka mona. Ngele otwa punduka, natu itoole po e tatu tsikile okumatuka. Ngele otwa geye nokukwata onkone, e tatu tindi okuyambuka po, itatu ka thika kethikilo nokupewa ondjambi. Kakele kaashono, natse otashi vulika tu pundukithe yalwe mboka taya kambadhala okumatuka mondjila ndjoka tayi fala komwenyo gwaaluhe.

10. Ongiini tatu vulu okuyanda ‘okupundukitha’ yalwe?

¹⁰ Omukalo gulwe moka tatu vulu okuyanda ‘okupundukitha’ aamatuki ooyakwetu, omokweetha ya ninge iinima momukalo gwawo, uuna tashi wapa, pehala lyoku yi ninga momukalo ngoka twa hala. (Rom. 14:13, 19-21; 1 Kor. 8:9, 13) Shoka osho sha ningitha tu kale twa yooloka ko kaamatuki yomethigathano lyo lyenelyene. Ohaya ningi ethigathano nayalwe, nomumatuki kehe oha kambadhala oye a mone ondjambi. Aamatuki mboka ohaya dhiladhila unene kuuwanawa wawo yene. Onkee ano, ohashi vulika ya kambadhale okupuma yakwawo, opo ye ya pite komeho. Mepingathano naashoka, tse itatu ningi ethigathano nooitaali ooyakwetu. (Gal. 5:26; 6:4) Elalakano lyetu okukwathela oyendji ngaashi tashi vulika, ya matuke pamwe natse sigo okethikilo noya mone ondjambi  yomwenyo gwaaluhe. Onkene ohatu kambadhala okuvulika komayele ga nwethwa mo gaPaulus, ngoka taga ti: “Lalakaneneni uuwanawa wooyakweni wo, haamboka ashike weni yene.” — Fil. 2:4.

11. Aamatuki ohaya gandja eitulomo kushike, nomolwashike?

¹¹ Pehala lyokutala owala mondjila moka taya matuka, aamatuki ohaya gandja eitulomo kokuthika kethikilo. Nonando ihaya kala ye wete ethikilo ndyoka nomeho gawo gokomutse, ohaya vulu okukala ya fa yi iwete taye li adha, nokupewa ondjambi. Okukaleka kwawo momadhiladhilo ondjambi ndjoka, ohaku ya kaleke ye na omukumo.

12. Jehova okwe tu uvanekela shike?

¹² Methigathano ndyoka tatu matuka, Jehova okwe tu uvanekela kutya ngele otwa thiki kethikilo, ote ke tu pa ondjambi yomwenyo gwaaluhe kutya nduno omegulu nenge omoparadisa kombanda yevi. Ombiimbeli oya popya kombinga yondjambi ndjoka, opo tu vule okumona nkene onkalamwenyo yetu tayi ka kala ombwanawa. Ngele otwa kala hatu dhiladhila ketegameno lyetu, otatu ka kala twa tokola toko tu idhidhimike sigo ehulilo.

13. Uuwanawa wuni tu na, mboka kaawu niwe kaamatuki yomethigathano lyo lyenelyene?

¹³ Aamatuki momaudhano ngoka ga li haga dhanwa muGreka, oya li ye na okwiidhidhimikila omaupyakadhi, ngaashi omvulwe nuuwehame. Oya li ye na owala okwiinekela medheulo lyawo nomoonkondo dhawo. Ngaashi aamatuki mboka, natse ohatu dheulwa nkene tu na okumatuka methigathano ndika tu li. Ihe ohatu mono uuwanawa mboka aamatuki yomethigathano lyo lyenelyene itaaya vulu okumona. Jehova ota vulu oku tu pa oonkondo odhindji ethimbo kehe. Ngele otwa kala twe mu inekela, oku uvaneka kutya ite ke tu dheula owala, ihe ote ke tu pa wo oonkondo. — 1 Pet. 5:10.

14. Aakorinto aatiyali 12:9, 10, otaye tu kwathele ngiini tu idhidhimikile omashongo?

¹⁴ Paulus okwa li e na okwiidhidhimikila omashongo ogendji. Kakele kokutukwa nokupatanekwa kuyalwe, omathimbo gamwe okwa li i idhidhimikile shoka i ithana kutya “okwega monyama” (OB-1954), nokwa li ha kala kee na oonkondo. (2 Kor. 12:7) Ihe pehala lyokweetha omashongo ngoka ge mu ethithe po okulongela Jehova, okwe ga tala ko ge li ompito yokwiinekela muye. (Lesha 2 Aakorinto 12:9, 10.) Jehova okwa li e mu kwathele i idhidhimikile omashongo agehe ngoka a li a tsakaneke, molwaashoka okwa li e na etaloko ewanawa.

15. Ngele otwa holele Paulus, oshike tashi ke tu ningilwa?

¹⁵ Otashi vulika natse tu tukwe nenge tu patanekwe, omolweitaalo lyetu. Otashi vulika wo tu kale ihaatu pu pombanza nenge tu niwe komvulwe. Ihe ngele otwa holele Paulus, omashongo agehe ngoka otaga vulu oku tu pa ompito tu ambidhidhwe kuJehova pahole.

16. Oshike to vulu okuninga, nonando ku na uukolele?

¹⁶ Mbela owu li mokatemba nenge ihoo pu pombanza? Mbela oho ehama oongolo nenge ihoo mono ko nawa? Ngele osho, mbela oto vulu okumatuka pamwe naagundjuka nosho wo mboka ye na uukolele? Osho lela. Aakokele oyendji naamboka taye ehama, otaya matuka mondjila ndjoka tayi fala komwenyo gwaaluhe. Shoka ihaya vulu oku shi ninga koonkondo dhawo yene. Pehala lyaashono, ohaya pewa oonkondo kuJehova, mokupulakena kokugongala kwopaKriste okupitila mongodhi nenge oku ku tala pethimbo taku ningwa, koshikwaelektronika shontumba. Ohaya kutha ombinga miilonga yokuninga aantu aalongwa, mokuuvithila oondohotola, aapangi nosho wo aapambele.

17. Jehova oha kala e uvitile ngiini mboka kaaye na uukolele?

¹⁷ Ino etha nando okwaa na uukolele ku ku  teye omukumo, noku ku ningithe wu dhiladhila kutya ito vulu okumatuka mondjila ndjoka tayi fala komwenyo gwaaluhe. Jehova oku ku hole, omolweitaalo neidhidhimiko lyoye. Owa pumbwa ekwatho lye ngashingeyi shi vulithe nale, noite ke ku ekelahi. (Eps. 9:10) Pehala lyaashono, ota ka hedha popepi lela nangoye. Omumwameme gumwe ngoka kee na uukolele, ota ti: “Sho uukolele wandje we ende tawu nayipala, onda kala ihaandi vulu we naanaa okuuvithila yalwe. Ihe ondi shi kutya oonkambadhala dhandje nando oonshona, otadhi nyanyudha Jehova, naashoka ohashi nyanyudha ndje.” Uuna wa teka omukumo, dhimbulukwa kutya Jehova oku li pamwe nangoye. Dhiladhila koshiholelwa shaPaulus, e to dhimbulukwa oohapu dhe tadhi tsu omukumo, tadhi ti: “Ngame onda nyanyukilwa okukala muunkundi, . . . oshoka uuna ndoka ndi na uunkundi, opo mpoka ndi na oonkondo.” — 2 Kor. 12:10.

18. Eshongo lini lya kwata miiti yamwe tayi idhidhimikile?

¹⁸ Yamwe mboka taya matuka mondjila ndjoka tayi fala komwenyo, oya taalela eshongo lilwe. Otayi idhidhimikile omaupyakadhi ngoka yalwe itaaya vulu oku ga mona notashi vulika kaaye ga uvite ko. Pashiholelwa, oye niwe kepolimano nenge ya gwililwa po kiimpwiyu. Omolwashike aapiya yaJehova mbaka nayo tayi idhidhimikile eshongo lya kwata miiti? Omolwaashoka uuna omuntu a teka okwaako nenge e li mokatemba, kehe gumwe oha vulu okumona kutya uupyakadhi wuni e na notashi vulika shi mu inyengithe e mu kwathele. Ihe mboka ye na uupyakadhi wopamaiyuvo nenge wopamadhiladhilo, otashi vulika pu kale kaapu na omandhindhiliko ngoka tage shi ulike. Onkalo yawo ohayi kala ya kwata miiti ngaashi owala yaangoka a teka okwaako. Ihe molwaashoka uupyakadhi wawo ihawu vulu okumonika kuyalwe, otashi vulika kaaya ulukilwe naanaa olukeno.

19. Oshike tatu ilongo moshiholelwa shaMefiboshet?

¹⁹ Ngele owu na omangambeko nowu wete kutya aantu kaye uvite ko onkalo yoye, oshiholelwa shaMefiboshet otashi vulu oku ku tsa omukumo. (2 Sam. 4:4) Okwa li oshilema, nomukwaniilwa David okwa li a ungaunga naye kaashi li pauyuuki. Mefiboshet haye mwene a li i iyetele omaupyakadhi ngoka. Nonando ongawo, ka li a teka omukumo, ihe okwa li a pandula uuwanawa mboka a ningilwa monkalamwenyo ye. Okwa li e na olupandu omolwuuwanawa mboka David e mu ningila monakuziwa. (2 Sam. 9:6-10) Sho David e mu pangula kaashi li pauyuuki, Mefiboshet okwa li a kambadhala okuuva ko ashihe shoka sha kwatelwa mo. Ka li a tula omutse kepepe omolwepuko lyaDavid. Shimwe ishewe, Mefiboshet ina pa Jehova ombedhi, omolwuuwinayi mboka a ningilwa kuDavid. Mefiboshet okwa li a ningi ngaashi ta vulu, a ambidhidhe omukwaniilwa David, ngoka  a langekwa po kuJehova. (2 Sam. 16:1-4; 19:24-30) Jehova okwa nyolitha oshiholelwa shaMefiboshet sha dhenga mbanda mOohapu dhe, omolwuuwanawa wetu. — Rom. 15:4.

20. Aamwatate naamwameme yamwe otayi idhidhimikile oonkalo dhini omolwoothina dhambanda yevi, ihe otaya vulu okukala neinekelo lini?

²⁰ Omolwoothina dhambanda yevi, aamwatate naamwameme yamwe ohaya kala ya lyalyakana noonkondo noye na oohoni, uuna ye li naantu yalwe. Otashi vulika shi kale oshidhigu kuyo okukala mongundu yaantu. Ihe kokugongala kwegongalo, piigongi yoshikandjo noyoshitopolwa ohaye ya. Ohashi kala oshidhigu kuyo okupopya naantu kaaye ya shi, ihe nonando ongawo, ohaya uvithile yalwe. Ngele nangoye osho wu li ngawo, kala wu shi kutya hangoye awike. Aamwatate oyendji oye li monkalo ya fa yoye. Dhimbulukwa kutya Jehova okwe ku hokwa, sho to mu longele nomutima aguhe. Sho inoo teka omukumo, oshi li euliko kutya ota yambeke oonkambadhala dhoye, note ku pe oonkondo ndhoka wa pumbwa. * (Fil. 4:6, 7; 1 Pet. 5:7) Ngele oto longele Jehova, nonando oto idhidhimikile uunkundi wopalutu nenge wopamadhiladhilo, kala wu shi kutya okwe ku hokwa.

21. Kekwatho lyaJehova, atuheni otatu vulu okuninga shike?

²¹ Pokati kethigathano lyokumatuka lyo lyenelyene naandyoka lya popiwa kuPaulus, opu na eyooloko. Pethimbo lyOmbiimbeli, methigathano lyo lyenelyene, omuntu owala gumwe a li ha pewa ondjambi. Mepingathano naashono, kehe gumwe ngoka ti idhidhimike sigo okethikilo methigathano lyopaKriste, ota ka pewa ondjambi yomwenyo gwaaluhe. (Joh. 3:16) Shimwe ishewe, methigathano lyo lyenelyene, aamatuki ayehe oye na okukala ya dheuka, opo ya vule oku ka mona ondjambi. Oyendji yomutse otu na omangambeko, ihe otatu idhidhimike. (2 Kor. 4:16) Kekwatho lyaJehova, atuheni otatu vulu okumatuka sigo okethikilo.