1. Jehova oha ndhindhilike shike maantu ye?

JEHOVA KALUNGA “okwa hokwa aantu ye.” (Eps. 149:4) Shoka kashi shi tuu shinyanyudha! Jehova oku shi omaukwatya getu omawanawa, oku shi kutya otatu vulu okukala aantu aawanawa nohe tu hilile kuye. Ngele otwa kala aadhiginini kuye, ota kala popepi natse sigo aluhe! — Joh. 6:44.

2. Omolwashike yamwe haye shi mono oshidhigu okwiitaala kutya Jehova oku ya hole?

² Yamwe otashi vulika ya tye, ‘Ondi shi kutya Jehova oku hole oshigwana she, ihe ongiini tandi vulu okukala nuushili kutya oku hole ndje pauhandimwe?’ Oshike tashi vulu okuningitha omuntu a pule epulo ndyoka? Omumwameme Oksana, * ngoka a mona iihuna noonkondo sho a li okanona, okwa ti: “Onda li nda nyanyukwa noonkondo sho nda ninginithwa e tandi tameke okukokola ondjila. Ihe konima yomimvo 15, onda tameke okudhimbulukwa iinima iiwinayi mbyoka nda li nda ningilwa sho nda li okanona. Onda thiki pehulithodhiladhilo kutya Jehova ina hokwa ndje we noinandi gwana okukala ndi holike kuye.” Yua, omumwameme omukokolindjila ngoka naye a li a piti momaupyakadhi ogendji sho a li okanona, okwa ti: “Onda li ndi iyapulile Jehova, molwaashoka onda li nda hala oku mu nyanyudha. Ihe onda kala tandi dhiladhila kutya ke na esiku a kale e hole ndje.”

3. Oshike tatu ka kundathana moshitopolwa shika?

³ Ngaashi owala aamwameme yaali aadhiginini mboka twa zi nokupopya, nangoye owu hole Jehova noonkondo, ihe otashi vulika wu kale wa limbililwa ngele Jehova oku ku hole ngaa shili. Omolwashike wa pumbwa okukala wa tompwa kutya Jehova oku na ko nasha nangoye shili? Noshike tashi vulu oku ku kwathela, uuna to dhiladhila kutya Jehova ke ku hole? Natu ka yamukuleni omapulo ngoka.

4. Omolwashike sha nika oshiponga okukala twa limbililwa ngele Jehova oku tu hole ngaa shili?

⁴ Ohole ohayi tu inyengitha tu katuke oonkatu. Ngele otwa kala twa tompwa kutya Jehova oku tu hole nohe tu ambidhidha, otashi ke tu inyengitha tu mu longele nomutima aguhe, nonando otwa taalela omashongo. Ihe ngele otwa kala twa limbililwa ngele Kalunga oku na ko ngaa sha natse shili, ‘oonkondo dhetu ohadhi kala oonshona.’ (Omayel. 24:10) Nongele otwa kala twa teka omukumo e tatu kala inatu itaala we kutya Kalunga oku tu hole, itatu ka vula okukondjitha omaponokelo gaSatana. — Ef. 6:16.

5. Oshike sha li sha ningilwa aamwatate naamwameme mboka ya li ya limbililwa ngele Kalunga oku ya hole ngaa shili?

⁵ Sho Aakriste yamwe aadhiginini yopethimbo lyetu ya tameke okukala ya limbililwa ngele oye holike ngaa shili kuJehova, eitaalo lyawo olya nkundipala. Omukuluntugongalo gumwe gwedhina James, okwa ti: “Nonando onda li handi longo moBetel nohandi tyapula uukalele negongalo lyelaka ekwiilongo moka nda li, onda kala tandi ipula ngele Jehova okwa hokwa ngaa shili iilonga mbyoka tandi mu longele. Pompito yimwe onda li nokuli tandi ipula ngele Jehova oha pulakene ngaa shili komagalikano gandje.” Omumwameme Eva, ngoka naye e li miilonga yethimbo lyu udha, okwa ti: “Onde shi ndhindhilika kutya osha nika oshiponga okukala wa limbililwa ngele Jehova oku ku hole ngaa shili, molwaashoka ohashi ku ningitha kuu kale we to longele Jehova nehwamo. Ohashi ku ningitha wo wu kale kuu na we ohokwe miinima yopambepo nohashi kutha po enyanyu lyoye lyokulongela Jehova.” Michael, ngoka e li omukokolindjila gwondjigilile nomukuluntugongalo, okwa ti: “Ngele owa kala ino itaala we kutya Kalunga oku na ko nasha nangoye, ekwatathano lyoye naye ohali nkundipala.”

6. Oshike tu na okuninga uuna twa tameke okukala twa limbililwa ngele Kalunga oku tu hole ngaa shili?

⁶ Iimoniwa mbyoka otayi ulike nkene okudhiladhila kutya Jehova ke tu hole taku vulu okunkundipaleka uupambepo wetu. Ihe oshike twa pumbwa okuninga uuna twa tameke okukala twa limbililwa ngele Kalunga oku tu hole ngaa shili? Otu na okweetha po nzinziya okudhiladhila ngawo! Pula Jehova e ku kwathele wu pingene po “omadhiladhilo” ngoka ga puka ‘nombili yaKalunga ndjoka yi vule uunongo awuhe wopantu ndjoka tayi gamene omwenyo gwoye nomadhiladhilo goye.’ (Eps. 139:23; Fil. 4:6, 7) Dhimbulukwa wo kutya hangoye awike ho dhiladhila ngawo. Aamwatate naamwameme yalwe nayo ohaya kondjo  nomaiyuvo ga tya ngawo. Nokuli noyamwe yomaapiya yaJehova yonale oya li haya kondjo nomadhiladhilo ga tya ngaaka. Natu ka taleni shoka tatu vulu okwiilonga koshiholelwa shomuyapostoli Paulus.

7. Paulus okwa li a taalele oonkalo oondhigu dhini?

⁷ Mbela omathimbo gamwe oho kala wu uvite wa gwililwa po kiinakugwanithwa oyindji iidhigu noito vulu oku yi gwanitha po ayihe? Pompito yimwe Paulus naye osho a li u uvite ngawo. Okwa li hi ipula naamwahe ‘momagongalo agehe.’ (2 Kor. 11:23-28) Mbela owa kanitha enyanyu omolwokwaanuukolele? Paulus okwa li e na “uuwehame uunene wopalutu” nokwa li a halelela okwaaluka. (2 Kor. 12:7-10) Mbela omathimbo gamwe oho kala wa teka omukumo omolwokwaagwanenena kwoye? Paulus naye omathimbo gamwe osho a li ha kala u uvite ngawo. Okwi ipopi ye mwene kutya ye “omuntu omukweyi,” oshoka okwa li ha kala aluhe ta kondjo nokwaagwanenena kwe. — Rom. 7:21-24.

8. Oshike sha li sha kwathele Paulus i idhidhimike nonando okwa li a taalela omaupyakadhi?

⁸ Nonando Paulus okwa li e na okwiidhidhimikila omaupyakadhi agehe ngoka, okwa tsikile okulongela Jehova. Mbela oshike sha li she mu kwathele? Nonando okwa li e shi kutya ina gwanenena, okwa kala e na eitaalo lya kola mekuliloyambo. Okwa li wo e shi euvaneko lyaJesus ndyoka tali ti ‘shaa ngoka ti itaale Jesus, ota ka kala e na omwenyo gwaaluhe.’ (Joh. 3:16; Rom. 6:23) Osha yela kutya Paulus okwa li gumwe gwomwaamboka ya li ye na eitaalo mekuliloyambo. Okwa li a tompwa kutya Jehova okwi ilongekidha okudhimina po naamboka ya yona sha kwata miiti uuna yi iyele ombedhi. — Eps. 86:5.

9. Oshike tatu ilongo moohapu dhaPaulus ndhoka dhi li mAagalati 2:20?

⁹ Paulus okwa li wo i itaala kutya Kalunga oku mu hole noonkondo, sho a gandja Omwana, Kristus, a se molwe. (Lesha Aagalati 2: 20.) Ndhindhilika oohapu tadhi shilipaleke ndhoka dhi li kehulilo lyovelise ndjoka. Pehulilo lyovelise ndjoka Paulus okwa ti: ‘Omuna gwaKalunga oku hole ndje nokwa gandja omwenyo gwe molwandje.’ Paulus ka li ha dhiladhila kutya ita vulu okukala e holike kuKalunga. Paulus okwa li a dhimbulukitha Aaroma, a ti: ‘Kristus okwa si peha lyetu, manga twa li aalunde.’ (Rom. 5:8) Kapu na shoka tashi vulu oku tu topola ko kohole yaKalunga!

10. Oshike tatu ilongo mAaroma 8:38, 39?

¹⁰ Lesha Aaroma 8:38, 39. Paulus okwa li lela a tompwa kutya ohole yaKalunga ihayi nyengwa kusha. Okwa nyola kutya kaku na nando osha “tashi vulu oku tu topola ko kohole yaKalunga.” Okwa li e shi kutya Jehova okwa li u ungaunga neidhidhimiko noshigwana shaIsraeli, nokwa mono  wo nkene Jehova e mu ulukile ohenda. Niitya yimwe Paulus okwa li ta ti: ‘Ngele Jehova okwa gandja Omwana a se molwandje, mbela ondi na ngaa okukala nda limbililwa ngele oku hole ndje?’ — Rom. 8:32.

11. Nonando Paulus okwa li a ningi omapuko ngoka ga popiwa muTimoteus gwotango 1:12-15, omolwashike a li a tompwa kutya Kalunga oku mu hole?

¹¹ Lesha Timoteus gwotango 1:12-15. Otashi vulika omathimbo gamwe Paulus a li ha kala u uvite nayi noonkondo uuna ta dhiladhila kiinima mbyoka a ninga manga inaa ninga Omukriste. Itashi kumitha sho i ipopi ye mwene kutya oku li omulunde ‘omunene e vule aalunde ayehe.’ Manga Paulus inaa tseya oshili, okwa li ha hepeke Aakriste nonyanya miilando oyindji, okwa li a tulitha yamwe mondholongo nokwa li ha kala a panda uuna ya tokolelwa eso. (Iil. 26:10, 11) Dhiladhila owala kunkene Paulus tashi vulika a li ha kala u uvite uuna a tsakanene nOmukriste omugundjuka ngoka aavali ye ya dhipagwa omolwe? Paulus okwa li u uvitile nayi omapuko ge, ihe okwa li e shi kutya ita vulu okulundulula onakuziwa ye. Okwa li i itaala kutya Kristus okwe mu sila, nokwa nyola a ti: “Omolwesilohenda lyaKalunga, ngame ondi li ngaashi ndi li.” (1 Kor. 15:3, 10) Shoka otashi tu longo shike? Kala wi itaala kutya Kristus okwe ku sila, opo wu kale nekwatathano lyopothingo naJehova. (Iil. 3:19) Shoka sha simana kuKalunga ooshoka tatu ningi ngashingeyi naashoka tatu ka ninga monakuyiwa, ihe hamapuko ngoka twa ninga monakuziwa kutya nduno otwa li Oonzapo dhaJehova ethimbo ndyono nenge hasho. — Jes. 1:18.

12. Ongiini oohapu ndhoka dhi li muJohannes gwotango 3:19, 20 tadhi vulu oku tu kwathela uuna tu uvite kaatu na oshilonga nenge inaatu gwana okukala tu holike?

¹² Uuna to dhiladhila kunkene Jesus a li e na okusa opo oondjo dhoye dhi dhiminwe po, otashi vulika wu tye: ‘Kandi wete nda gwana okuningilwa oshinima sha fa mpoka.’ Omolwashike tashi vulika wu kale wu uvite ngawo? Omutima gwetu inaagu gwanenena otashi vulika gu tu ningithe tu kale tu uvite inaatu gwana nenge  kaatu holike. (Lesha Johannes gwotango 3:19, 20.) Uuna twa tameke okukala tu uvite ngawo, otwa pumbwa okudhimbulukwa kutya “Kalunga oye omunene e vule eiyuvo lyetu.” Tate yetu gwomegulu oku tu hole noonkondo, noku na aluhe ehalo lyoku tu dhimina po kutya nduno momitima dhetu otu kale tu uvite ngiini. Otwa pumbwa okukala twa tompwa kutya Jehova oku tu hole. Opo tu vule oku shi ninga, otwa pumbwa okukala hatu konakona Oohapu dhe, hatu mu galikana aluhe, nokweendathana naapiya ye aadhiginini. Omolwashike okuninga iinima mbyono kwa simana noonkondo?

13. Okukonakona Oohapu dhaKalunga otaku vulu oku tu kwathela ngiini? (Tala wo oshimpungu “ Nkene Oohapu dhaKalunga ha dhi ya kwathele.”)

¹³ Kala ho konakona Oohapu dhaKalunga esiku kehe, opo wu kale wu shi omaukwatya ogendji gaJehova omawanawa. Shoka otashi ke ku kwathela wo wu mone kutya oku ku hole shi thike peni. Okutedhatedha kOohapu dhaKalunga esiku kehe, otaku ke ku kwathela wu kaleke omadhiladhilo goye nomutima gwoye ‘mondjila yu uka.’ (2 Tim. 3:16) Omukuluntugongalo gwedhina Kevin, ngoka a li ha kondjo nokukala u uvite kee na oshilonga, okwa ti: “Okulesha nokutedhatedha kEpisalomi 103 okwa kwathela ndje ndi lundulule okudhiladhila kwandje nondi mone kutya Jehova oku na ko nasha lela nangame.” Eva ngoka a popiwa metetekelo, okwa ti: “Pehulilo lyesiku kehe ohandi kongo ethimbo ndi dhiladhile kombinga yaashoka sha simana unene kuJehova. Okuninga ngawo ohaku etele ndje ombili yokomutima nohaku koleke eitaalo lyandje.”

14. Okugalikana otaku vulu oku tu kwathela ngiini?

¹⁴ Galikana aluhe. (1 Tes. 5:17) Ngele owa hala okupanga uukuume wa kola nagumwe, owu na aluhe okukala ho popi naye noku mu lombwela nkene wu uvite. Shoka osha faathana ngele tashi ya pekwatathano lyetu naJehova. Uuna tatu mu lombwele megalikano nkene tu uvite, tatu dhiladhila, naashoka she tu limbilika, kungawo otatu ulike kutya otwe mu inekela notashi ulike wo kutya otu shi kutya oku tu hole. (Eps. 94:17-19; 1 Joh. 5:14, 15) Omumwameme Yua, ngoka a popiwa metetekelo, okwa ti: “Uuna tandi galikana, ihandi lombwele owala Jehova shoka sha ningilwa ndje esiku ndyoka. Ohandi mu lombwele nkene ndi uvite naashoka tandi dhiladhila. Mokweendela ko kwethimbo, onda tameke okukala nda tala ko Jehova e li shili Tate ngoka e hole oyana, ihe hangaashi omuhona gwehangano lyontumba.” — Tala oshimpungu “ Mbela owe li lesha ngaa?”

15. Jehova ohu ulike ngiini kutya oku nako nasha natse pauhandimwe?

¹⁵ Endathana nookuume mboka aadhiginini. Oye li omagano ga za kuJehova. (Jak. 1:17) Tate yetu gwomegulu ohu ulike kutya oku na ko nasha natse pauhandimwe, moku tu pa aamwatate naamwameme megongalo mboka haye tu ulukile “ohole aluhe.” (Omayel. 17:17) Montumwafo ye ndjoka a nyolele Aakolossa, Paulus okwa tumbula Aakriste  yontumba mboka ya li ye mu ambidhidha, nokwe ya popi kutya oya li ‘ekwatho enene kuye.’ (Kol. 4:10, 11) Nokuli naKristus Jesus okwa li ha kala a pandula ekwatho ndyoka a li ha pewa kookuume ke kutya nduno aayengeli nenge aantu. — Luk. 22:28, 43.

16. Ookuume aadhiginini otaya vulu ngiini oku tu kwathela tu hedhe popepi naJehova?

¹⁶ Mbela oho mono ngaa uuwanawa mookuume aadhiginini mboka Jehova e ku pa ye li omagano? Okulombwela ookuume ketu ya pyokoka pambepo nkene tu uvite, itashi ti kutya eitaalo lyetu inali kola, ihe otaku vulu oku tu gamena. Ndhindhilika shoka sha popiwa komumwatate James ngoka a popiwa metetekelo. Okwa ti: “Okupanga uukuume wa kola nAakriste mboka ya pyokoka pambepo okwa kwathela ndje noonkondo. Uuna nda gwililwa po komadhiladhilo, ookuume mboka ohaya pulakene ndje neidhidhimiko nohaya lombwele ndje kutya oye hole ndje. Shoka ohashi kwathele ndje ndi mone kutya Jehova oku hole ndje noku na ko nasha nangame.” Okupanga uukuume wopothingo naamwatate naamwameme inaku simana tuu!

17-18. Otu na okupulakena kulye, nomolwashike?

¹⁷ Satana okwa hala tu ethe okukala hatu longo shoka shu uka. Okwa hala tu itaale kutya Jehova ke tu hole nosho wo kutya inatu gwana okuhupithwa Kuye. Ihe ngaashi twe shi mona, shoka kashi shi shoshili.

¹⁸ Jehova oku ku hole. Owu na ongushu momeho ge. Ngele owa kala ho vulika kuye, oto ka ‘kala mohole ye’ sigo aluhe, ngaashi Jesus. (Joh. 15:10) Onkee ano, ino pulakena kuSatana nenge wu dhiladhile kutya Jehova ke ku hole. Pehala lyaashono, pulakena kuJehova, ngoka ha kala e wete uuwanawa mboka wu li mukehe gumwe gwomutse. Kala wa tompwa kutya Jehova okwa “hokwa aantu ye,” nangoye wa kwatelwa mo!