1-2. Omomukalo guni tatu vulu okulandula oshinkoti shaJesus? Shi thaneka.

NATU tye ando oto ende pamwe nongundu yaantu mombuga ya nika oshiponga. Gumwe ngoka e shi mo nawa oye te mu kwatele komeho. Sho tamu ende, omwa landula ompadhi ye nenge tu tye oshinkoti she. Konima yethimbo owa kala kuu mu wete we. Nonando ongawo, kawa li wa tila. Pehala lyaashono, ngoye nosho wo mboka to ende pamwe nayo, omwa tsikile owala okuninga ngaashi tamu vulu mu landule ompadhi yaangoka te mu kwatele komeho.

² Tu li Aakriste yashili, natse kunena otatu ende pathaneko mombuga ya nika oshiponga, ano uuyuni mbuka wa kolokosha. Lago enene, Jehova okwe tu pa Omukwatelikomeho kaaku na we, ano Omwana, Jesus Kristus, ngoka oshinkoti she tatu vulu okulandula. (1 Pet. 2:21) Embo limwe lyuuyelele wOmbiimbeli olya ti kutya Petrus moohapu dhe ndhoka okwa faathanitha Jesus nomukwatelikomeho molweendo. Ngaashi owala aantu haye ende ya landula ompadhi yomukwatelikomeho molweendo, natse otatu vulu okulandula oshinkoti shaJesus. Natu ka kundathaneni omapulo ngaka gatatu kombinga yokulandula oshinkoti shaJesus: Okulandula oshinkoti shaJesus otashi ti shike? Omolwashike tu na oku shi ninga? Nongiini tatu vulu oku shi ninga?

3. Okulandula oshinkoti shagumwe otashi ti shike?

³ Okulandula oshinkoti shagumwe osha hala okutya shike? Omathimbo gamwe mOmbiimbeli, iitya “enda” nosho wo “oompadhi” oya longithwa yu ukitha kwaashoka omuntu gwontumba a ninga mokukalamwenyo kwe. (Gen. 6:9; Omayel. 4:26) Oshiholelwa shoka omuntu a tula po otashi vulu okufaathanithwa noshinkoti shompadhi ye sho e enda. Onkee ano, okulandula oshinkoti shagumwe otashi ti okulandula oshiholelwa she, ano oku mu holela.

4. Okulandula oshinkoti shaJesus otashi ti shike?

 ⁴ Okulandula oshinkoti shaJesus otashi ti shike nduno? Oku shi yelitha paunathangwa, otashi ti okulandula oshiholelwa she. Menyolo lyetu lyenenedhiladhilo, omuyapostoli Petrus okwa popi kondandalunde kutya Jesus okwe tu tulila po oshiholelwa oshiwanawa sheidhidhimiko, ihe nonando ongawo, opu na omikalo dhilwe odhindji moka tatu vulu okuholela Jesus. (1 Pet. 2:18-25) Odhoshili kutya kehe shoka Jesus a li a popi nokwa ningi, oshi li oshiholelwa oshiwanawa shoka tatu vulu okulandula.

5. Mbela tu li aantu inaatu gwanenena, otatu vulu ngaa shili okulandula oshiholelwa shaJesus thiluthilu? Shi yelitha.

⁵ Tu li aantu inaatu gwanenena, mbela otatu vulu ngaa shili okulandula oshiholelwa shaJesus? Eeno, otatu vulu. Dhimbulukwa kutya Petrus ina tya kutya otu na okulandula oshiholelwa sha Jesus thiluthilu, ihe okwe tu ladhipike tu ninge ngaashi tatu vulu tu “landule” ‘ondjila ndjoka Jesus a li e yi ende.’ Ngele otwa kala hatu ningi ngaashi tatu vulu tu landule oshiholelwa shaJesus, nonando inatu gwanenena, kungawo otatu vulika koohapu dhomuyapostoli Johannes ndhoka tadhi ti: ‘Kaleni nokweenda ngaashi Kristus.’ — 1 Joh. 2:6, NW.

6-7. Omolwashike tatu vulu okutya okulandula oshinkoti shaJesus otaku ke tu hedhitha popepi naJehova?

⁶ Okulandula oshinkoti shaJesus otashi ke tu hedhitha popepi naJehova. Omolwashike tatu tile ngawo? Etompelo lyotango, Jesus okwe tu tulila po oshiholelwa sha dhengambanda shankene tu na okwiihumbata momukalo ngoka Jehova a hokwa. (Joh. 8:29) Onkee ano, ngele otwa kala hatu landula oshiholelwa shaJesus, Jehova ota ka kala e tu hokwa. Otatu vulu wo okukala nuushili kutya Tate yetu gwomegulu ota ka hedha popepi naamboka taya kambadhala ya mana mo ya ninge ookuume ke. — Jak. 4:8.

⁷ Etompelo etiyali, Jesus okwa li ha holele He thiluthilu. Onkene Jesus okwa li ta vulu okutya: “Kehe ngoka a mono ndje, okwa mona wo Tate.” (Joh. 14:9) Otatu vulu okuholela omaukwatya  gaJesus nosho wo omikalo dhe dhokuungaunga nayalwe. Pashiholelwa, okwa li u ungaunga nolukeno nomunashilundu, a yaalele omukiintu ngoka e na uuvu wetiko lyombinzi wa kwata miiti nokwa li ha kala u uvitile uukwawo wanankali mboka ya silwa aaholike yawo. Uuna tatu holele Jesus, kungawo otatu holele wo Jehova. (Mark. 1:40, 41; 5:25-34; Joh. 11:33-35) Ngele otwa kala hatu holele omaukwatya gaJehova, uukuume wetu naye otawu ka kola.

8. Yelitha kutya omolwashike okulandula oshinkoti shaJesus taku vulu oku tu kwathela tu ‘sinde’ uuyuni.

⁸ Okulandula oshinkoti shaJesus ohaku tu kwathele tu kale tatu gandja eitulomo kokulongela Jehova. Muusiku we wahugunina kombanda yevi, Jesus okwa li a vulu okupopya ta ti: “Ngame onda sinda uuyuni.” (Joh. 16:33) Mbela okwa li a hala okutya shike? Okwa li a hala okutya ka li e etha uuyuni wu nwethe mo okudhiladhila kwe, omalalakano ge nosho wo eihumbato lye. Jesus ka li nando a dhimbwa shoka she mu etitha kombanda yevi, ano okuyapulitha edhina lyaJehova. Ongiini kombinga yetu? Muuyuni muka omu na iinima oyindji mbyoka tayi vulu oku tu imba tu gandje eitulomo kokulongela Jehova. Ihe ngele otwa kala tatu gandja eitulomo kokulonga ehalo lyaJehova ngaashi Jesus, natse otatu ka vula ‘okusinda’ uuyuni. — 1 Joh. 5:5.

9. Oshike tu na okuninga, opo tu tsikile okweenda mondjila ndjoka tayi fala komwenyo gwaaluhe?

⁹ Okulandula oshinkoti shaJesus otaku ke tu petha omwenyo gwaaluhe. Sho omulumentu gumwe omugundjuka omuyamba a pula Jesus shoka e na okuninga opo a ka mone omwenyo gwaaluhe, Jesus okwe mu yamukula a ti: ‘Ila wu landule ndje.’ (Mat. 19:16-21) Jesus okwa li a lombwele Aajuda yamwe mboka kaaya li yi itaala kutya oye Kristus, a ti: ‘Oonzi dhandje otadhi landula ndje. Ngame otandi dhi pe omwenyo gwaaluhe.’ (Joh. 10:24-29) Okwa li wo a lombwele Nikodemus, ngoka a li oshilyo shoshigongi shaatokoli nokwa li a hala okutseya oshindji kombinga yaashoka Jesus a li ta longo aantu, a ti: Ngoka “te mu itaale,” ota ka kala “e na omwenyo gwaaluhe.” (Joh. 3:16) Ohatu ulike kutya otu na eitaalo muJesus, mokutula miilonga shoka e tu longa, nomokulandula oshiholelwa she. Ngele otwe shi ningi, itatu ke etha po okweenda mondjila ndjoka tayi fala komwenyo gwaaluhe. — Mat. 7:14.

10. Oshike tu na okuninga, opo tu ‘tseye’ Jesus nawanawa?

¹⁰ Manga inaatu tameka okulandula oshinkoti shaJesus, tango otu na oku mu tseya. (Lesha Johannes 17:3.) ‘Okutseya’ Jesus oku li oshinima shoka tu na okutsikila okuninga onkalamwenyo yetu ayihe. Otwa pumbwa oku mu tseya nawanawa, ano omaukwatya ge, nkene ha dhiladhila nosho sho wo omithikampango dhe. Kutya nduno moshili otwa kala mo ethimbo li thike peni, otwa pumbwa okutsikila okutseya Jehova nOmwana.

11. Omavaangeli gane oga popya kombinga yashike?

¹¹ Opo Jehova e tu kwathele tu tseye Omwana, mOohapu dhe okwa kwatela mo Omavaangeli gane, ngoka ga popya kombinga yonkalamwenyo yaJesus nuukalele we. Omavaangeli ngoka oga holola  shoka Jesus a li a popi, a ningi nankene a li ha tala ko iinima. Omambo ngoka gane otage tu kwathele tu “konakone nuukeka” oshiholelwa shaJesus. (Heb. 12:3, NW) Mugo omwa popiwa ondjila ndjoka Jesus a li e yi ende. Onkee ano, uuna tatu ga konakona otatu vulu okutseya Jesus nawanawa, nokungawo otatu ka vula okulandula oshinkoti she.

12. Oshike tatu vulu okuninga, opo tu mone mo uuwanawa pakuudha uuna tatu konakona Omavaangeli?

¹² Ngele otwa hala okumona mo uuwanawa mOmavaangeli pakuudha, otu na okuninga oshindji kaashi shi owala oku ga lesha. Otwa pumbwa okukutha ethimbo tu ga konakone nuukeka nosho wo okutedhatedha muule kombinga yaashoka twa lesha. (Yelekanitha Josua 1:8.) Natu ka kundathaneni omaetopo gaali ngoka taga vulu oku tu kwathela tu kale hatu tedhatedha kwaashoka tatu lesha mOmavaangeli, noku shi tula miilonga.

13. Ongiini to vulu okumwenyopaleka omahokololo gOmomavaangeli?

¹³ Shotango, mwenyopaleka omahokololo gOmomavaangeli. Kala ho kala ando wa fa wu wete shoka tashi ningwa po nowu shi uvite. Opo wu vule oku shi ninga, ninga omapekapeko miileshomwa mbyoka ehangano lyaJehova lye tu longekidhila. Konakona enenedhiladhilo lyaashoka to konakona, ano iiningwanima mbyoka ye shi tetekela nosho wo mbyoka ya ka landula ko. Konga uuyelele wa gwedhwa po, mboka tawu popi kombinga yonakuziwa yomuntu nenge yehala ndyoka lya popiwa mehokololo ndyoka to lesha. Yelekanitha ehokololo ndyoka to konakona mOmbiimbeli nehokololo lilwe tali popi oshinima sha faathana. Omathimbo gamwe Evaangeli lyontumba ohali kala lya kwatela mo uuyelele wa simana mboka inaawu popiwa mEvaangeli ekwawo.

14-15. Oshike tatu vulu okuninga, opo tu tule miilonga shoka twi ilonga momahokololo kombinga yaJesus mOmavaangeli?

¹⁴ Oshitiyali, tula miilonga shoka to lesha mOmavaangeli. (Joh. 13:17) Konima yokukonakona ehokololo lyomEvaangeli ndyoka, ipula to ti: ‘Oshike mbela tandi ilongo mehokololo ndika, shoka tandi vulu okutula miilonga monkalamwenyo yandje? Ongiini tandi vulu okulongitha uuyelele mbuka nda mona mo ndi kwathele gumwe?’ Kambadhala okutala kutya uuyelele mboka  wa mona mo otawu opalele lye, e to kongo ethimbo tali opalele wu wu mu lombwele.

¹⁵ Natu ka taleni koshiholelwa shimwe shankene tatu vulu okutula miilonga omaetopo ngoka gaali. Otatu ka kundathana ehokololo lyomuselekadhi ohepele, ngoka Jesus a li a mono motempeli.

16. Hokolola oshiningwanima shoka sha popiwa muMarkus 12:41.

¹⁶ Mwenyopaleka ehokololo ndyoka to lesha. (Lesha Markus 12:41.) Kala wa fa wu wete shoka sha li tashi ningwa po. Esiku 11 Nisan 33 E.N., noku na owala omasiku omashona Jesus a dhipagwe. Esiku alihe Jesus okwa kala ta longo aantu motempeli. Aakwatelikomeho yomalongelokalunga oya kala noku mu pataneka lwiikando. Petameko, yamwe yomuyo oya li nokuli ye mu pula kutya iikumithalonga ye ohe yi longo koonkondo dhalye. Yalwe oya li ya kambadhala oku mu pula omapulo ngoka taya dhiladhila kutya ita ka vula oku ga yamukula. (Mark. 11:27-33; 12:13-34) Ngashingeyi Jesus okwa yi kehala lilwe motempeli. Hoka, tashi vulika kehala ndyoka hali ithanwa Ehale lyaakiintu, oku wete iiketha yokutula omayambidhidho mbyoka yi li popepi nekuma lyehale. Okwa kuutumba, e ta tameke okutala aantu sho taya tula mo omayambidhidho gawo. Oku wete aayamba oyendji taya tula mo iimaliwa iikukutu oyindji. Otashi vulika e li popepi niiketha mbyoka, noku uvite sho iimaliwa yawo tayi gwile mo.

17. Hokolola shoka sha li sha ningwa komukiintu ohepele ngoka a popiwa muMarkus 12:42.

¹⁷ Lesha Markus 12:42. Konima yokathimbo, Jesus okwa mono omukiintu gumwe. Omukiintu ngoka ‘omuselekadhi nokwa hepa.’ (Luk. 21:2) Onkalamwenyo ondhigu kuye noonkondo notashi vulika he shi mono oshidhigu okumona iipumbiwa yonkalamwenyo. Nonando ongawo, okwa yi pushimwe shomiiketha yomayambidhidho, e ta tula mo nekoto uupeni uyali, mboka tashi vulika kaawa li nokuli wa ningi ekudhilo lyasha sho wa gwile moshiketha. Jesus oku shi kutya okwa tula mo iimaliwa yi thike peni, ano uupeni uyali, mboka kaawa naanaa wu na ongushu pethimbo ndyono. Uupeni mboka uyali kawa li nokuli wa gwana okulanda enza limwe, okadhila hoka ka li ke na ombiliha kuudhila awuhe pethimbo ndyoka.

18. Shi ikolelela kuMarkus 12:43, 44, Jesus okwa li a ti shike kombinga yomayambidhidho gomuselekadhi?

¹⁸ Lesha Markus 12:43, 44. Jesus okwa li a kuminwa lela omukiintu nguka. Onkene okwi ithana aalongwa ye, ye ye kuye nokwe ya lombwele kombinga yomuselekadhi ngoka, a ti: “Omuselekadhi nguka ohepele okwa tula mo oshindji moshiketha shiimaliwa e vule ayehe mboka ya tula mo.” Opo nduno okwe ya yelithile a ti: “Ayehe mboka [unene tuu aayamba] oya tula mo ya kutha muuyamba wawo, ihe omuselekadhi moluhepo lwe okwa tula mo ashihe shoka a li e na.” Sho omuselekadhi ngoka omudhiginini a gandja po uumaliwa we mboka owo awuke a li e na esiku ndyoka, kungawo okwa tula einekelo lye muJehova kutya ote ke mu sila oshimpwiyu. — Eps. 26:3.

19. Oshiilongomwa sha simana shini tatu vulu okwiilonga moohapu dhaJesus kombinga yomuselekadhi ohepele?

¹⁹ Tula miilonga shoka wi ilonga mehokololo ndyoka. Ipula to ti, ‘Oshike tandi vulu okwiilonga moohapu dhaJesus kombinga yomuselekadhi ohepele?’ Dhiladhila kombinga yomuselekadhi ngoka. Kapu na omalimbililo kutya okwa li a hala okupa Jehova oshindji shi vulithe pwaashoka a gandja. Ihe okwa ningi ngaashi ta vulu, nokwa pe Jehova ashihe shoka a li e na. Jesus okwa li e shi kutya Jehova okwa li a pandula noonkondo omayambidhidho gomuselekadhi ngoka. Oshiilongomwa sha simana kutse osho shika: Ohashi nyanyudha Jehova noonkondo uuna tatu mu pe shoka sha dhenga mbanda, ano oku mu longela kwetu nomwenyo gwetu aguhe ngaashi tatu vulu. (Mat. 22:37; Kol. 3:23) Jehova oha kala a nyanyukwa uuna e wete tatu ningi ngaashi tatu vulu tu mu longele. Otatu vulu okutula miilonga shoka twa zi nokukundathana, mokukala hatu kutha ombinga miilonga yokuuvitha nokukala pomakugongala.

20. Ongiini to vulu okutula miilonga shoka wi ilonga mehokololo lyomuselekadhi? Gandja oshiholelwa.

 ²⁰ Omomukalo guni ishewe to vulu okutula miilonga shoka wi ilonga mehokololo lyomuselekadhi ohepele? Ndhindhilika mboka tashi vulika ya pumbwa okushilipalekwa kutya Jehova okwa hokwa oonkambadhala ndhoka haya ningi ye mu longele. Pashiholelwa, mbela owu shi omumwameme omukokele ngoka tashi vulika ha kala u uvite a teka omukumo, nenge ha kala u uvite kee na we oshilonga molwaashoka kee na we uukolele nenge oonkondo dhokulonga oshindji muukalele ngaashi a li ha ningi nale? Nenge mbela owu shi omumwatate gumwe ngoka e na uuvu woshinamenena wa kwata miiti, noha kala a teka omukumo molwaashoka ihaa vulu we okukala kehe pokugongala? Kwathela aantu ya tya ngaaka, moku ya lombwela ‘oohapu oombwanawa tadhi tungu.’ (Ef. 4:29) Ya tsa omukumo niiyilongomwa mbyoka wi ilonga mehokololo lyomuselekadhi ohepele. Oohapu dhoye tadhi tsu omukumo otadhi vulu oku ya shilipaleka kutya Jehova okwa hokwa oonkambadhala ndhoka haya ningi ye mu longele. (Omayel. 15:23; 1 Tes. 5:11) Uuna ho pandula yalwe sho haya ningi ngaashi taya vulu ya longele Jehova, kungawo oto holele Jesus.

21. Owa tokola toko okuninga shike?

²¹ Inatu pandula tuu sho omahokololo gomOmavaangeli ge tu hololela uuyelele owundji kombinga yonkalamwenyo yaJesus, nohage tu kwathele tu mu holele mokulandula oshinkoti she! Otashi ka kala lela shi li nawa, ngele otwa kala hatu kutha ethimbo tu konakone Omavaangeli, uuna tatu ningi ekonakono lyetu lyopaumwene nenge pElongelokalunga lyetu lyuukwanegumbo. Natu dhimbulukwe kutya opo tu mone mo uuwanawa pakuudha mokukonakona omahokololo gomOmavaangeli, otwa pumbwa oku ga mwenyopaleka noku ga tula miilonga. Kakele kokuholela shoka Jesus a li a ningi, otwa pumbwa wo okupulakena kwaashoka a li a popi. Moshitopolwa tashi landula, otatu ka kundathana shoka tatu vulu okwiilonga moohapu dhaJesus dhahugunina manga inaa sa.