Monkalo ndjono, egongalo otali ka tala ko ondjokana ndjoka onkulu kutya oya hula, nongele omulumentu okwa hokanununa, nena otali tala ko ondjokana ompe kutya oyi li paveta. Opo tu uve ko kutya omolwashike twa thiki pehulithodhiladhilo ndyono, natu ka taleni kwaashono Jesus a ti kombinga yokuteya ondjokana nokuhokanununa.

Ngaashi sha popiwa muMateus 19:9, Jesus okwa yelitha etompelo limwe alike lyopamanyolo lyokuteya ondjokana. Okwa ti: “Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele.” Moohapu ndhika dhaJesus otatu ilongo mo kutya (1) oluhondelo olwo owala etompelo lyopamanyolo tali vulu okuningitha ondjokana yi teke, (2) omulumentu ngono ta teya ondjokana kaapu na etompelo lyopamanyolo e ta hokanununa, nena ota hondele. *

Mbela oohapu dhaJesus otadhi ti kutya omusamane ngono a yi moluhondelo e ta teya ondjokana ye okwa manguluka okuhokanununa? Hasho naanaa. Ngele kuume kopandjokana okwa hondele, kuume ngono kee na ondjo oye e na okutokola ngele ote mu dhimine po nenge hasho. Ngele ina hala oku mu dhimina po, ondjokana e tayi teka paveta, nena ayehe oya manguluka okuhokanununa.

Mepingathano naashono, kuume kopandjokana ngoka kee na ondjo, otashi vulika a kale a hala okukala mondjokana nakuume ke ngoka a hondela, onkee otashi vulika e mu lombwele kutya okwa hala oku mu dhimina po. Ongiini nduno ngele omusamane ngoka a hondele ota tindi sho omukulukadhi gwe te mu dhimine po, e tayi a ka teye ondjokana? PaMbiimbeli omulumentu ngoka ina manguluka okuhokanununa, molwaashoka omukulukadhi okwa hala oku mu dhimina po, yo ya tsikile nondjokana yawo. Ngele okwa tsikile nonkalamwenyo kaayi li pamanyolo e ta hokanununa omuntu gumwe i ili, omanga Ombiimbeli inaayi mu pitika e shi ninge, nena ota hondele. Onkee ano, ota ka ningilwa okomitiye yopampangu. — 1 Kor. 5:1, 2; 6:9, 10.

Uuna omulumentu ngono Ombiimbeli tayi ti kutya ina manguluka okuhokana a hokanununa, egongalo otali ka tala ko ngiini ondjokana ye onkulu naandjono ompe? Mbela pamanyolo ota ka talika ko ngaa natango kutya oku li mondjokana nakuume ke kopandjokana omukulu? Kuume kopandjokana ngoka kee na ondjo ota vulu ngaa natango okutokola ngele ota dhimine po nenge ita dhimine po kuume ke? Mbela egongalo oli na okutala ko mbono ye li mondjokana ndjono ompe kutya otaya hondele?

Monakuziwa, egongalo olya li lya tala ko mbono ye li mondjokana ndjoka ompe kutya otaya hondele, ngele kuume kopandjokana ngoka kee na ondjo oku li momwenyo, ye ina hokanununwa noina ya moluhondelo. Ihe Jesus ina tumbula kuume ngoka kee na ondjo sho a popi kombinga yokuteya ondjokana noyokuhokanununa. Pehala lyaashono, okwa yelitha kutya omulumentu ngono ta teya ondjokana kaapu na etompelo lyopamanyolo, e ta  hokana omukulukadhi i ili, nena ota hondele. Ngele osho shi li ngawo, nena okuteya ondjokana nokuhokanununa, hono Jesus a ti kutya okwa faathana nokuhondela, okwa hulitha po ondjokana ndjoka onkulu.

Ngele ondjokana oya hulu po shaashi ya teywa, omusamane e ta hokanununa, nena omukulukadhi ke na we uuthemba wokutokola kutya ote mu dhimine po nenge hasho. Onkee, ita pumbwa we okuninga etokolo edhigu lyokutala kutya ota dhimine po omusamane gwe ngoka omukulu nenge hasho. Shimwe ishewe, kutya nduno kuume kopandjokana ngoka kee na ondjo okwa si, okwa hokanununwa nenge okwa yi moluhondelo, ihashi lundulula nkene egongalo lya tala ko ondjokana ndjoka ompe.  *

Moshiholelwa shono twa kundathana metetekelo, omusamane okwa yi moluhondelo, e tashi etitha ondjokana yi teke. Ongiini ngele omusamane ngono inaya moluhondelo, ihe okwa teya owala ondjokana e ta hokanununa? Nenge ongiini ngele omusamane ngono ina hondela, ihe okwe ke shi ninga konima sho ondjokana ya teka nale, e ta hokanununa, nonando omukulukadhi gwe okwa li a hala oku mu dhimina po? Miiholelwa ayihe mbyono, okuteya ondjokana hono nokuhokanununa, oku li oluhondelo, nokwa hulitha po ondjokana onkulu. Ngashingeyi ondjokana ndjono ompe oya talika ko yi li paveta. Ngaashi sha popiwa mOshungolangelo yOshiingilisa yo 15 Novomba 1979, epandja 32, “ngashingeyi omusamane ngono okwe ya mondjokana ompe, onkee ita vulu we oku yi hulitha po, ye a shune komukulukadhi gwe omukulu. Ondjokana onkulu oya hula po omolwoluhondelo, sho ya teywa nosho wo sho omusamane ngoka a hokanununa.”

Euvoko lyetu ndika epe, kali na okuningitha Aakriste ya dhiladhile kutya ondjokana kayi shi we ondjapuki, nenge kutya oluhondelo kalu shi eyono lya kwata miiti. Omusamane ngono a teya ondjokana kaapu na etompelo lyopamanyolo, e ta hokanununa omukulukadhi gumwe i ili, ota ka ningilwa okomitiye yopampangu omolwoluhondelo. (Ngele omukulukadhi gwe ngoka opo a hokana Omukriste, naye ota ka ningilwa okomitiye yopampangu, sho ta hondele.) Nokuli nonando aaihokani mbono oya talika ko kutya itaya hondele, omulumentu ngono a hokanununa ita ka pewa iinakugwaniithwa megongalo uule womimvo odhindji, manga aantu kaaye uvitile ombili shoka a ninga nenge ye wete kutya inaya gwana oku mu simaneka, omolwoshinima oshiwinayi shoka a ninga. Manga aakuluntugongalo inaaye mu pa oshinakugwanithwa megongalo, oye na okutala kutya kuume ke kopandjokana omukulu, ngoka tashi vulika a kengelelwa oku li monkalo ya tya ngiini nosho wo kutya aanona aashona mboka a thigile mukwawo oye li monkalo ya tya ngiini. — Mal. 2:14-16.

Ngele otwa tala kiilanduliko ya kwata miiti mbyoka hayi zi mokuteya ondjokana kaashi li pamanyolo nokuhokanununa, oshi li pandunge Aakriste ya holele Jehova mokukala ya tala ko ondjokana ondjapuki. — Omuuv. 5:4, 5; Heb. 13:4.