1. Uushili wuni tu na?

 TU LI oshigwana shaJehova, otu shi kutya oku tu hole nosho wo kutya okwa hala tu kale tu na onkalamwenyo ya dhenga mbanda. (Rom. 8:35-39) Otu shi wo lela kutya omakotampango gOmbiimbeli ohage tu etele aluhe uuwanawa, uuna twe ga tula miilonga. (Jes. 48:17, 18) Ihe ongiini nduno ngele otwa adhika komaupyakadhi ombaadhilila?

2. Omaupyakadhi geni tashi vulika ge tu adhe, notaga vulu oku tu ipulitha ngiini?

² Aapiya yaJehova atuhe otu na omaupyakadhi. Pashiholelwa, oshilyo shuukwanegumbo otashi vulu oku tu yemateka momukalo gwontumba. Otashi vulika tu na uuwehame wa kwata miiti mbono hawu vulu oku tu imba tu ninge ngaashi tatu vulu miilonga yaJehova. Otashi vulika tu adhike kiiponga yopaunshitwe. Nenge otashi vulika tu hepekwe omolweitaalo lyetu. Uuna tu li momaupyakadhi ga tya ngawo, otashi vulika tu ipule tatu ti: ‘Omolwashike shika tashi ningilwa ndje? Mbela onda ninga sha sha puka? Mbela shika otashi ulike kutya Jehova ina laleka ndje nuuyamba?’ Mbela owa li nale wu uvite ngawo? Ngele osho, ino teka omukumo. Aapiya yaJehova aadhiginini oyendji, oya kondja nomaiyuvo ga tya ngaaka. — Eps. 22:1, 2; Hab. 1:2, 3.

3. Oshike tatu vulu okwiilonga mEpisalomi 34:19?

³ Lesha Episalomi 34:19. Ndhindhilika iitsa ya simana mbyoka yi li mEpisalomi ndika: (1) Aayuuki ohaya adhika komaupyakadhi. (2) Jehova ohe tu hupitha momaupyakadhi getu. Jehova ohe tu hupitha ngiini? Omukalo gumwe omoku tu kwathela tu kale tu na etaloko li li mondjila lyonkalamwenyo muuyuni mbuka. Nonando Jehova okwe tu uvanekela kutya otatu vulu okukala nonkalamwenyo ombwanawa sho tatu mu longele, ina tya kutya itatu adhika komaupyakadhi kunena. (Jes. 66:14) Ohe tu ladhipike tu gandje  eitulomo konakuyiwa yetu, ano kethimbo ndyoka tatu ka kala tu na onkalamwenyo ndjoka a hala tu kale tu na sigo aluhe. (2 Kor. 4:16-18) Ihe ngashingeyi ohe tu kwathele tu tsikile oku mu longela esiku kehe. — Oontak. 3:22-24.

4. Oshike tatu ka kundathana moshitopolwa shika?

⁴ Natu kundathaneni shoka tatu vulu okwiilonga miiholelwa yaalongeli yaJehova aadhiginini yopethimbo lyOmbiimbeli nosho wo yopethimbo lyetu. Ngaashi tatu ke shi mona, otashi vulika tu iyadhe momaupyakadhi gombadhilila. Ihe uuna twi inekela muJehova, ote ke tu kwathela. (Eps. 55:22) Sho tatu konakona iiholelwa mbika, ipula ngeyi: ‘Mbela ando ondi inyenge ngiini, ando ongame nda li monkalo ya fa ndjika? Ongiini iiholelwa mbika tayi koleke einekelo lyandje muJehova? Iiyilongomwa yini tandi vulu okutula miilonga monkalamwenyo yandje?’

5. Omashongo geni Jakob a li i iyadha mugo omolwaLaban? (Tala ethano lyokombanda.)

⁵ Aapiya yaJehova yopethimbo lyOmbiimbeli oya li yi iyadha momashongo ngoka ya li inaaya tegelela. Tala koshiholelwa shaJakob. Okwa li a lombwelwa kuhe a hokane gumwe gwomoyanakadhona yaLaban, ngoka a li omukwanezimo gwe ha longele Kalunga nokwa li a shilipalekwa kuJehova kutya ote ke mu yambeka noonkondo. (Gen. 28:1-4) Onkene Jakob okwa li a ningi oshinima shi li mondjila. Okwa zi mo mevi lyaKaanan e ta yi kaandjaLaban, ngono a li e na oyanakadhona yaali, Lea naRakel. Jakob okwa tameke okukala e hole omwanakadhona gwaLaban ngoka omushona, Rakel, nokwa li a zimine a longele he yaRakel, Laban, omimvo heyali manga inee mu hokana. (Gen. 29:18) Ihe iinima inayi ka enda we ngaashi Jakob a li a tegelela. Laban okwe mu kotokele, opo a hokane po omwanakadhona gwomukuluntu, Lea. Konima yoshiwike, Laban okwa pitike Jakob a hokane po Rakel, ihe ongele owala e mu longele ishewe omimvo heyali. (Gen. 29:25-27) Laban okwa li wo a ungaunga naJakob kaashi li pauyuuki, miinima yopangeshefa. Omimvo adhihe kumwe ndhoka Laban a li a ungaunga kaashi li pauyuuki naJakob 20. — Gen. 31:41, 42.

6. Omaupyakadhi galwe geni Jakob a li i idhidhimikile?

⁶ Jakob okwa li wo i idhidhimikile omaupyakadhi galwe. Okwa li e na uukwanegumbo uunene, ihe oyanamati kaya li aluhe haya tsu ya thithe. Oya li nokuli ya landitha po omumwayina Josef muupika. Oyanamati yaJakob yaali, Simeon naLevi, oya li ya sitha yaandjawo ohoni noya shekitha edhina lyaJehova. Shimwe ishewe, Rakel, omukulukadhi gwaJakob ngoka a li e hole, okwa si manga ta mono okanona kawo okatiyali. Nomolwondjala yamemememe, Jakob okwa tembukile kuEgipiti pethimbo lyuukulupe we. — Gen. 34:30; 35:16-19; 37:28; 45:9-11, 28.

7. Jehova okwa li a ulukile Jakob ngiini kutya okwe mu hokwa?

⁷ Nonando Jakob okwa kala e na omaupyakadhi agehe ngoka, okwa kala i inekela muJehova nomomauvaneko Ge. Opo nduno, Jehova oku ulukile Jakob kutya okwe mu hokwa. Pashiholelwa, nonando Laban okwa li e mu kotokele, Jehova okwa li a yambeke Jakob niiniwe oyindji. Dhiladhila wo kunkene Jakob a li e na okukala a pandula Jehova, sho e mu hanganitha ishewe naJosef, omwanamati ngoka a li ta dhiladhila kutya okwa sa nalenale. Molwaashono Jakob okwa li e na ekwatathano lyopothingo naJehova, shono osha li she mu ningitha a vule okwiidhidhimikila omaudhigu ge nomupondo. (Gen. 30:43; 32:9, 10; 46:28-30) Ngele otwa kala tu na ekwatathano lya kola naJehova, natse otatu ka vula okuungaunga nomupondo nomaudhigu ngoka hage tu adha ombaadhilila.

8. Oshike omukwaniilwa David a li a hala okuninga?

 ⁸ Omukwaniilwa David ka li ta vulu okuninga kehe shimwe a hala okuninga miilonga yaJehova. Pashiholelwa, David okwa li a hala okutungila Kalunga otempeli. Oshinima shoka okwe shi lombwele omuhunganeki Natan. Natan okwe mu yamukula a ti: “Ninga shoka wa dhiladhila, oshoka Kalunga oku ku na.” (1 Ondjal. 17:1, 2) Natu dhiladhile owala kunkene oohapu ndhoka tashi vulika dha li dha tsu David omukumo. Otashi vulika a li a tameke meendelelo okuninga omalongekidho goproyeka ndjoka onene.

9. David okwa li i inyenge ngiini konkundana ndjoka a lombwelwa tayi yemateke?

⁹ Nziya omuhunganeki gwaJehova okwa galukile kuDavid nonkundana tayi yemateke. “Muusiku tuu mboka,” Jehova okwa lombwele Natan kutya David haye te ke mu tungila otempeli, pehala lyaashono, gumwe gwomoyanamati oye a li te ke shi ninga. (1 Ondjal. 17:3, 4, 11, 12) David okwi inyenge ngiini, sho u uvu etumwalaka ndyoka? Okwa lundulula elalakano lye. Okwa gandja eitulomo kokugongela iimaliwa niikwaniipangitho mbyoka omwana Salomo a li ta ka kala a pumbwa okulongitha moproyeka ndjoka. — 1 Ondjal. 29:1-5.

10. Jehova okwa li a laleke David nuuyamba ngiini?

¹⁰ Nziya konima sho David a lombwelwa kuJehova kutya haye te ke mu tungila otempeli, Jehova okwa ningi ehangano naye. Jehova okwa li a uvanekele David kutya gumwe gwomoluvalo lwe ota ka lela sigo aluhe. (2 Sam. 7:16) Muuyuni uupe, dhiladhila owala nkene David ta ka kala a nyanyukwa okuuva kutya ota nyanyukilwa onkalamwenyo kohi yElelo lyOomvula Eyuvi lyaJesus, Omukwaniilwa a za moluvalo lwe mwene. Ehokololo ndika ohali tu kwathele tu mone kutya nokuli nonando otu kale itaatu vulu okuninga ashihe shoka twa hala okuningila Jehova, Kalunga ketu, otashi vulika e ke tu pe iinima yilwe iiwanawa mbyoka twa li inaatu tegelela nando.

11. Aakriste yomethelemumvo lyotango oya li ya lalekwa nuuyamba ngiini, nokuli nonando Uukwaniilwa waKalunga inawu ya pethimbo ndyono ya kala ye wu tegelela? (Iilonga 6:7)

¹¹ Aakriste yomethelemumvo lyotango oya li yu ungaunga nomaupyakadhi ngoka ya li inaaya tegelela. Pashiholelwa, oya li ya halelela Uukwaniilwa waKalunga wu ye, ihe kaya li ye shi kutya uunake tawu ke ya. (Iil. 1:6, 7) Mbela oya li ya ningi po shike? Oya kala yi ipyakidhila niilonga yokuuvitha. Sho ya li taya uvitha onkundana ombwanawa momahala ogendji, oya li ya mono nkene Jehova te ya kwathele. — Lesha Iilonga 6:7.

12. Aakriste yomethelemumvo lyotango oya li ya ningi po shike, sho muuyuni mwa li mu na ondjala onene?

¹² Pompito yimwe, ‘muuyuni awuhe omwa li mu na ondjala onene.’ (Iil. 11:28) Aakriste yomethelemumvo lyotango nayo oya li ya gumwa kondjala ndjoka. Dhiladhila owala nkene ya li taya mono iihuna omolwondjala ndjoka onene. Nokaapu na omalimbililo, omitse dhomagumbo odha li tadhi ipula kutya otadhi sile ngiini omagumbo gadho oshimpwiyu. Shimwe ishewe, ongiini kombinga yaagundjuka mbono ya li taya ningi omalongekidho ya tamunune mo uukalele wawo? Mbela otashi vulika ya li yu uvite kutya oye na okutegelela? Kashi na nduno mbudhi kutya oonkalo dhAakriste mbono odha li dha tya ngiini, oya li yi igilile onkalo ndjoka. Oya tsikile okuuvitha momukalo kehe taya vulu, noya li ya nyanyukwa okutopolelathana iiniwe yawo nooitaali ooyakwawo yomuJudea. — Iil. 11:29, 30.

13. Omayambeko geni Aakriste ya li ya mono pethimbo lyondjala onene?

¹³ Omayambeko geni Aakriste ya li ya mono pethimbo lyondjala onene? Mboka ya pewa iikwatha oya li ya mono kutya Jehova ote ya kwathele. (Mat. 6:31-33) Oye na okukala ya li yu uvite ye na ekwatathano lyopothingo nooitaali ooyakwawo mboka ye ya kwathele. Naamboka ya li ya gandja omayambidhidho, nenge ya li ya gandja iikwatha momikalo dhilwe, oya li ya mono enyanyu ndyoka hali zi mokugandja. (Iil. 20:35) Jehova okwe ya laleke nuuyamba ayehe, molwaashoka oya li yi igilile oonkalo ndhoka tadhi lunduluka.

14. Oshike sha li sha ningilwa Barnabas nomuyapostoli Paulus, noshizemo osha li shini? (Iilonga 14:21, 22)

¹⁴ Aakriste yomethelemumvo lyotango olundji oya li haya hepekwa, nomathimbo gamwe otashi vulika kaya li haya kala ye shi tegelela. Tala kwaashoka  sha li sha ningilwa Barnabas nomuyapostoli Paulus sho ya li taya uvitha muListra. Petameko, aantu yomoshitopolwa shoka mboka ya li ye ya pulakene, oya li ye ya yakula nombili. Ihe konima yethimbo, aapataneki “oyi ihilile ongundu yaantu,” nenge tu tye oya hwahwameke ongundu yaantu, nayamwe yomuyo oya dhenge Paulus nomamanya e taye mu thigi e li pokusa. (Iil. 14:19) Ihe Barnabas naPaulus oya tsikile oku ka uvitha kehala lilwe. Oshizemo? Oya kwathele ‘aantu oyendji yi itaale Jesus,’ noohapu ndhoka ya popi noshiholelwa shawo osha tsu omukumo ooitaali ooyakwawo. (Lesha Iilonga 14:21, 22.) Oyendji oya li ya mono uuwanawa, molwaashono Barnabas naPaulus inaya etha po okuuvitha nonando oya li taya hepekwa. Ngele natse itatu etha po iilonga mbyoka Jehova e tu lombwela tu longe, ote ke tu yambeka.

15. Oshike tatu ilongo moshiholelwa shomumwatate A. H. Macmillan?

¹⁵ Omimvo dha tetekele omumvo 1914, oshigwana shaJehova osha li sha tegelela pu ningwe iinima yontumba. Pashiholelwa, tala komumwatate A. H. Macmillan. Ngaashi oyendji yopethimbo lye, omumwatate Macmillan naye okwa li ta dhiladhila kutya masiku ota yi megulu. Moshipopiwa she shoka a li a gandja muSeptemba 1914, okwa ti: “Oshipopiwa shika otashi vulika osho shahugunina tandi gandja.” Odhoshili kutya oshipopiwa shoka kasha li she shahugunina. Konima yethimbo omumwatate Macmillan okwa nyola a ti: “Otashi vulika yamwe yomutse twa li twe endelele okudhiladhila kutya otatu ka ya megulu nziya.” Okwa gwedha ko a ti: “Shoka twa li tu na okuninga okukala owala twa ipyakidhila niilonga yOmuwa.” Omumwatate Macmillan okwa kala i ipyakidhila. Okwa li omulaadhi miilonga yokuuvitha. Okwa li e na uuthembahenda wokutsa omukumo aamwatate mboka ya li mondholongo, molwaashoka ya tindi okuya miita. Nokwa li ha kala aluhe pokugongala nokuli nando okwa kulupa. Ongiini mbela omumwatate Macmillan a li a mono uuwanawa molwaashoka a kala i ipyakidhila nokulongela Jehova? Konima yethimbo efupi manga inaa sa mo 1966, okwa nyola a ti: “Eitaalo lyandje kali na nando esiku lya li lya nkundipala.” Mbuka kawu shi tuu uukwatya wa dhenga mbanda kutse, unene tuu ngele otwa kala tatu idhidhimikile omamakelo ethimbo ele ndyoka twa li inaatu tegelela! — Heb. 13:7.

16. Eshongo lini omumwatate Herbert Jennings nomukadhi ya li yi iyadha mulyo ndyoka ya li inaaya tegelela? (Jakob 4:14)

¹⁶ Oyendji yomoshigwana shaJehova otaya kondjo nomauvu ngoka ge ya adha ombaadhilila. Pashiholelwa, mehokololo lyondjokonona yonkalamwenyo ye, omumwatate Herbert Jennings b okwa hokolola nkene ye nomukadhi ya li ya tyapula oshinakugwanithwa shawo shuutumwa moGhana. Ihe mokweendela ko kwethimbo, omumwatate ngoka okwa li a monika uuvu wa kwata miiti wopamadhiladhilo. Omumwatate Jennings okwa totha muJakob 4:14 ta yelitha kutya shoka osho nduno haku tiwa “‘ongula’ ku shi wo kutya oshike tashi ke ku adha.” (Lesha.) Okwa nyola a ti: “Otwa li tu na okutaamba ko onkalo ndjoka yi li ngaashi yi li, e tatu ningi omalongekidho tu ze mo moGhana nokuthiga po ookuume kopothingo e tatu galukile koKanada, [omolwepango lyopaunamiti].” Jehova okwa li a kwathele omumwatate Jennings nomukadhi ya tsikile oku mu longela, nonando oya li meshongo ndyoka.

17. Ongiini oshiholelwa shomumwatate Jennings sha kwathele ooitaali ooyakwawo?

 ¹⁷ Iinima yi li paushili mbyoka omumwatate Jennings a popya mondjokonona yonkalamwenyo ye, oya kwathela yalwe noonkondo. Omumwameme gumwe okwa nyola a ti: “Inandi gumwa nando onale koshitopolwa ngaashi shika nda li tandi lesha. . . . Sho nda lesha nkene omumwatate Jennings a etha po oshinakugwanithwa she opo e ki isile oshimpwiyu omolwuuvu we, osha kwathele ndje ndi kale ndi na etaloko li li pandjele lyonkalo yandje.” Sha faathana, omumwatate gumwe okwa nyola a ti: “Konima yokukala omukuluntugongalo uule womimvo omulongo, onda li ndi na okweetha po uukuluntugongalo omolwuuwehame wopamadhiladhilo. Onda li ndi uvite kutya ihandi vulu okuninga iinima oyindji, naashoka osha ningitha ndje opo ndi kale nda polimana noonkondo e tandi kala ihaandi vulu we okulesha omahokololo taga popi kombinga yondjokonona yonkalamwenyo. . . . Ihe eidhidhimiko lyomumwatate Jennings olya li lya tsu ndje omukumo.” Shika otashi tu dhimbulukitha kutya uuna tatu idhidhimikile omaupyakadhi ngoka twa li inaatu tegelela, otatu vulu okutsa yalwe omukumo. Nokuli nuuna monkalamwenyo yetu tamu ningwa iinima mbyoka twa li inaatu tegelela, otatu vulu okukala natango tu li oshiholelwa oshiwanawa sheitaalo nosheidhidhimiko. — 1 Pet. 5:9.

18. Ngaashi tashi ulikwa momathano ngoka goshinima sha ningwa shili, oshike to ilongo koshiholelwa shomuselekadhi gumwe gwokoNigeria?

¹⁸ Iinima ya nika oshiponga, ngaashi omukithi gwekomba gwo-COVID-19, ogwa guma Oonzapo dhaJehova odhindji. Pashiholelwa, omuselekadhi gumwe gwokoNigeria, okwa li owala e na uukulya uushona nokamaliwa okashona. Ongula yimwe, okamwanakadhona oke mu pula kutya otaya ka lya shike, ngele ya teleke po okakopi kamwe kolwishi hoka oko owala ya li ye na. Omumwameme okwa lombwele okamwanakadhona kutya kaye na nando othilinga nenge iikulya ya hupa po, ihe oye na okuholela omuselekadhi gwokuSarefat, ano kutya otaya teleke po owala iikulya mbyoka ye na po e taya inekele thiluthilu muJehova. (1 Aak. 17:8-16) Ihe nokuli manga inaaya tameka okudhiladhila kombinga yaashoka taya ka lya omwiha esiku ndyoka, oya etelwa iikulya ya za kooitaali ooyakwawo. Iikulya mbyoka oya li ya gwana iiwike yi vulithe pwiiyali. Omumwameme ngoka okwa ti kutya ka li e shi wo, ngele Jehova okwa li a pulakena lelalela  kwaashoka a li ta lombwele okamwanakadhona. Osha yela kutya uuna twa inekela muJehova, omaupyakadhi ngoka hage tu adha ombaadhilila monkalamwenyo otaga vulu oku tu hedhitha popepyeelela naye. — 1 Pet. 5:6, 7.

19. Ehepeko lini omumwatate Aleksey Yershov a li i idhidhimikile?

¹⁹ Omimvo opo dha piti, aamwatate naamwameme oyendji oya kala nokwiidhidhimikila omahepeko ngoka tashi vulika ya li inaaya tegelela. Tala koshimoniwa shomumwatate Aleksey Yershov ngoka a kala moRusia. Oshigwana shaJehova moshitopolwa shoka osha li sha nyanyukilwa emanguluko lyontumba pethimbo omumwatate Yershov a ninginithwa mo 1994. Ihe konima yomimvo, onkalo moRusia oya lunduluka. Momumvo 2020, egumbo lyomumwatate Yershov olya ponokelwa e tali hadhagulwa, niiniwe ye oyindji oya yiwa nayo. Konima yoomwedhi dhontumba, epangelo moshilongo shoka olye mu patululile iipotha. Shoka sha pimbilike ishewe onkalo, iipotha mbyoka oya li ya kankamena kokavidio hoka ka kwatwa komuntu ngoka a kala uule wu vulithe pomvula yimwe, ti iningitha a fa e na ohokwe mokukonakona Ombiimbeli. Shoka kashi shi tuu oshiwinayi noonkondo!

20. Omumwatate Yershov okwa koleke ngiini ekwatathano lye naJehova?

²⁰ Omahepeko ngoka ga li ga ningilwa omumwatate Yershov oge etitha ngaa uuwanawa washa? Eeno. Ekwatathano lye naJehova ngashingeyi olya kola shi vulithe nale. Okwa ti: “Ngame nanekulu lyandje ohatu galikana olundji shi vulithe nale. Onde shi ndhindhilika kutya kanda li tandi vulu okwiidhidhimikila onkalo ndjoka nokaapu na ekwatho lyaJehova.” Okwa gwedha ko a ti: “Ekonakonombiimbeli lyopaumwene olya kwathela ndje ndi kondjithe etekomukumo. Ohandi tedhatedha kiiholelwa yaapiya yaJehova aadhiginini yomonakuziwa. MOmbiimbeli omu na omahokololo ogendji taga tsu omuthindo nkene sha simana okukala twa ngungumana nokwiinekela muJehova.”

21. Oshike twa ilongo moshitopolwa shika?

²¹ Oshike twa ilongo moshitopolwa shika? Omathimbo gamwe ohatu iyadha momaupyakadhi ngoka twa li inaatu tegelela muuyuni mbuka. Nokuli nonando ongawo, Jehova oha kwathele aluhe aapiya ye uuna ye mu inekela. Ngaashi sha popiwa menenedhiladhilo lyoshitopolwa shika, “omuyuuki ota tsakanekwa kuudhigu owundji, ihe Omuwa ote mu hupitha muwo.” (Eps. 34:19) Natu tsikileni okugandja eitulomo koonkondo dhaJehova dhoku tu kwathela, ihe hakomaudhigu getu. Opo nduno ngaashi omuyapostoli Paulus, otatu vulu okutya: “Ngame otandi vulu shaa shoka, oshoka [Kalunga] ota koleke ndje.” — Fil. 4:13.