1. Okamati kamwe oku ulike ngiini kutya oke na etegameno meyumuko?

 OKAMATI kamwe kedhina Matthew oka li ke na uuvu wa kwata miiti, mboka we ka tanditha lwiikando oyindji. Sho ke na omimvo heyali, esiku limwe ko noyaandjawo oya li taya tala Opolohalama yokomwedhi yotiivii JW. Lwokuuka pehulilo lyayo, oya pulakene okavidio keimbilo taka popi kombinga yokuhambelela mboka ya yumuka. b Konima yokutala opolohalama ndjoka, Matthew okwa yi paavali ye e te ya kwata miikaha, e ta ti: “Tate nameme, omu wete? Nokuli nando ondi se otandi ka yumuka. Otamu vulu okukala mwa tegelela ndje. Otashi ka ningwa SHILI.” Dhiladhila owala nkene aavali mboka ya li ye na okukala ya nyanyukwa, sho ya mono kutya etegameno lyeyumuko olyolela kokamwanamati kawo!

2-3. Omolwashike shi li nawa tu kale hatu dhiladhila kombinga yeuvaneko lyeyumuko?

² Omathimbo nomathimbo oshi li nawa tu kaleni hatu dhiladhila keuvaneko lyomOmbiimbeli lyeyumuko ndyoka tali ka ningwa monakuyiwa. (Joh. 5:28, 29) Omolwashike mbela? Omolwaashoka katu shi kutya uunake tashi vulika tu kwatwe kuuwehame wa kwata miiti nenge tu silwe gumwe ombaadhilila. (Omuuv. 9:11; Jak. 4:13, 14) Etegameno lyeyumuko otali vulu oku tu kwathela tu idhidhimikile omashongo ngoka. (1 Tes. 4:13) Omanyolo otage tu shilipaleke kutya Tate yetu gwomegulu oku tu shi nawa noku tu hole lela. (Luk. 12:7) Jehova oku na okukala e tu shi nawa, opo e ke tu yumudhe tu na omaukwatya nomadhiladhilo ogo tuu ngoka twa li nago nale. Jehova oku tu hole noonkondo nokwe shi ninga tashi wapa tu kale nomwenyo sigo aluhe. Nokuli nando otwa si ote ke tu yumudha ngele sha pumbiwa.

³ Moshitopolwa shika, otatu ka kundathana tango kutya omolwashike tatu vulu okwiitaala euvaneko lyeyumuko. Opo nduno, otatu ka konakona ehokololo lyomOmbiimbeli ndyoka tali koleke eitaalo lyetu, moka mwa kuthwa enyolo lyenenedhiladhilo lyetu lyoshitopolwa:  “Omumwanyoko ota ka yumuka.” (Joh. 11:23) Hugunina, otatu ki ilonga nkene tatu vulu okukoleka lela etegameno lyetu meyumuko.

4. Otu na okukala twa tompwa kushike, opo tu vule okwiitala meuvaneko lyontumba? Shi thaneka.

⁴ Opo tu itaale meuvaneko lyontumba, otu na okukala twa tompwa kutya ngoka te li ningi okwa hala noku na oonkondo dhoku li gwanitha. Natu shi thaneke ngeyi: Natu tye ando egumbo lyoye olya yonagulwa nayi koshikungulu. Kuume koye gumwe okwe ya e te ku uvanekele ta ti, ‘Otandi ku kwathele okutungulula egumbo lyoye.’ Ota popi a mana mo, nangoye owu wete lela kutya okwa halelela oku ku kwathela. Ngele ye omutungi onkulungu noku na iilongitho mbyoka ya pumbiwa, oho kala wu shi kutya ota vulu oku ku kwathela. Onkee owi itaala euvaneko lye. Ongiini nduno kombinga yeuvaneko lyaKalunga lyeyumuko? Mbela okwa hala shili noku na oonkondo dhoku li gwanitha?

5-6. Omolwashike tatu vulu okukala nuushili kutya Jehova oku na ehalo lyoku ka yumudha oonakusa?

⁵ Jehova oku na ngaa ehalo lyoku ka yumudha oonakusa? Eeno, oku li na. Okwa li a nwetha mo aanyoli yOmbiimbeli yontumba ya nyole euvaneko lye lyeyumuko lyomonakuyiwa. (Jes. 26:19; Hos. 13:14; Eh. 20:11-13) Shimwe ishewe, uuna Jehova a ningi euvaneko, aluhe ohe li gwanitha po. (Jos. 23:14) Jehova okwa halelela shili oku ka yumudha oonakusa. Omolwashike tatu vulu okutya ngawo?

⁶ Dhiladhila kwaashoka sha li sha popiwa kutatekulululwa Job. Okwa li e shi kutya nonando oku se, Jehova okwa li ta kala a hala oku mu mona ishewe e na omwenyo. (Job 14:14, 15) Kunena, Jehova osho wo e uvitile ngaaka aalongeli ye ayehe mboka ya sa. Okwa halelela oku ke ya yumudha ye na uukolele noya nyanyukwa. Ongiini kombinga yaantu omabiliyona mboka ya sa inaaya mona ompito yokwiilonga oshili kombinga yaJehova? Kalunga ketu omunahole, okwa hala wo oku ke ya yumudha. (Iil. 24:15) Okwa hala ya ka mone ompito yokuninga ookuume ke, nokukala nomwenyo sigo aluhe kombanda yevi. (Joh. 3:16) Odhoshili kutya Jehova oku na ehalo lyoku ka yumudha oonakusa.

7-8. Omolwashike tatu vulu okukala nuushili kutya Jehova oku na oonkondo dhokuyumudha oonakusa?

⁷ Mbela Jehova oku na wo oonkondo dhokuyumudha oonakusa? Eeno, oku dhi na! Ye “Omunankondoadhihe.” (Eh. 1:8) Onkee oku na oonkondo lela dhokusinda omutondi kehe, nokuli neso. (1 Kor. 15:26) Okukala tu shi oshinima shono, ohaku tu tsu omukumo nohaku tu hekeleke. Tala koshimoniwa shomumwameme Emma Arnold. Ye noyaandjawo, oya li momashongo ga kwata miiti ngoka ga li ga makele eitaalo lyawo pethimbo lIita Iitiyali yUuyuni. Opo a hekeleke omwanakadhona ngoka a silwa aantu mboka e hole mookamba dhaNazi, Emma okwa ti: “Ngele aantu mboka ya sa itaya vulu okukala nomwenyo ishewe, nena shoka osha hala kutya omutondi gwetu eso oku na oonkondo dhi vule dhaKalunga, ihe shoka itashi vulu okukala nando shoshili.” Odhoshili kutya kapu na sha shi na oonkondo dhi vule dhaJehova. Kalunga omunankondoadhihe ngoka a shita omwenyo, ota vulu wo oku gu gandjulula kwaamboka ya sa.

⁸ Etompelo lilwe kutya omolwashike tu shi kutya Kalunga ota vulu okuyumudha oonakusa, olyo kutya iha dhimbwa sha. Oha tumbula onyothi kehe kedhina lyayo. (Jes. 40:26) Shimwe ishewe, oha dhimbulukwa mboka ya sa. (Job 14:13; Luk. 20:37, 38) Ota vulu okudhimbulukwa nuupu okanima kehe kombinga yaamboka ta ka yumudha, mwa kwatelwa eholokopo lyawo nuukwatya wawo, iimoniwa yawo yomonkalamwenyo nosho wo omadhiladhilo gawo.

9. Omolwashike wi itaala meuvaneko lyaJehova lyoku ka yumudha aasi monakuyiwa?

 ⁹ Osha yela kutya otatu vulu okwiinekela meuvaneko lyaJehova lyokuyumudha aantu monakuyiwa, molwaashoka tu shi kutya oku na ehalo noonkondo dhoku shi ninga. Tala ketompelo lilwe kutya omolwashike tatu vulu okwiitaala meuvaneko lyaKalunga lyeyumuko. Jehova okwa li a yumudha aasi. Pethimbo lyOmbiimbeli, okwa li a pe oonkondo aalumentu aadhiginini aashona, mwa kwatelwa Jesus, ya yumudhe aasi. Natu ka konakoneni ehokololo limwe lyomomayumuko ngoka Jesus a li a ningi, ndyoka lya popiwa membo lyaJohannes ontopolwa 11.

10. Oshike sha ningwa po sho Jesus a li ta uvitha handiyaka yomulonga gwaJordan okuza kuBetania, nokwa ningi po shike? (Johannes 11:1-3)

¹⁰ Lesha Johannes 11:1-3. Kala andola wa fa wu wete shoka sha li tashi ningwa muBetania okuuka lwopehulilo lyomumvo 32 E.N. Jesus okwa li e na ookuume kopothingo momukunda ngoka, nookuume mboka oLasarus naamwayinakadhona yaali, Maria naMarta. (Luk. 10:38-42) Ihe Lasarus okwa tameke ta alukwa, naamwayinakadhona mboka oya li ya limbililwa. Oya tumine Jesus etumwalaka ngoka a li handiyaka yomulonga gwaJordan, mpoka pwa li hapu endwa omasiku gaali okuza kuBetania. (Joh. 10:40) Shi yemateka, Lasarus okwa si lwopethimbo etumwalaka ndyoka lya thiki kuJesus. Nonando Jesus okwa li e shi kutya kuume ke ngoka okwa sa, okwa kala handiyaka yaJordan omasiku ishewe gaali, opo nduno okwi idhenge ondjila a ye kuBetania. Onkee pethimbo a ka thika momukunda moka, okwa adha Lasarus a sa uule womasiku gane. Jesus okwa tokola a ninge po sha shono sha li tashi ke etela ookuume ke uuwanawa notashi simanekitha Kalunga. — Joh. 11:4, 6, 11, 17.

11. Oshiilongomwa shini tatu ilongo kombinga yuukuume mehokololo ndika?

¹¹ Otatu ilongo mo sha mehokololo ndika kombinga yuukuume. Ndhindhilika kutya Maria naMarta sho ya tumu etumwalaka kuJesus, ina ye mu pula e ye kuBetania. Oya ti owala kutya kuume ke omuholike ota alukwa. (Joh. 11:3) Sho Lasarus a si, Jesus okwa li ta vulu oku mu yumudha nonando okwa li e li kokule naye. Ihe Jesus okwa tokola a ye kuBetania, opo a ka kale nookuume ke Maria naMarta. Mbela owu na kuume ngoka he ku kwathele nonando ino mu pula? Ngele osho, owu shi kutya oto vulu oku mu inekela e ku kwathele pethimbo ‘lyoluhepo,’ nenge tu tye lyuudhigu. (Omayel. 17:17) Ngaashi Jesus, natu kale twa fa kuume e li ngaaka kuyalwe. Ngashingeyi natu shune kehokololo ndyoka tu tale kutya oshike ishewe sha ningwa po.

12. Jesus okwa li u uvanekele Marta shike, nomolwashike Marta a li ta vulu okwiitala meuvaneko ndyoka? (Johannes 11:23-26)

¹² Lesha Johannes 11:23-26. Marta okwa uvu kutya Jesus oku li popepi naBetania. Onkee okwa endelele e ke mu tsakaneke e te mu lombwele ta ti: “Omuwa, ando owa li po, ando omumwameme ina sa.” (Joh. 11:21) Odhoshili kutya Jesus okwa li ta vulu okwaaludha Lasarus. Ihe okwa li a hala okuninga po oshinima shimwe oshindhindhilikwedhi. Okwa lombwele Marta a ti: “Omumwanyoko ota ka yumuka.” Okwa lombwele wo Marta etompelo lilwe kutya omolwashike e na okwiitaala meuvaneko ndyoka a ti: “Ongame eyumuko nomwenyo.” Eeno, Kalunga okwa pa Jesus oonkondo dhokuyumudha oonakusa. Manga inaa yumudha Lasarus, okwa li a yumudha okakadhona kamwe, konima yethimbo efupi sho ka si, nokwa li wo a yumudha omulumentu gumwe omugundjuka aniwa mesiku moka  a si. (Luk. 7:11-15; 8:49-55) Ihe mbela Jesus ota vulu ngaa okuyumudha omuntu ngoka a kala a sa uule womasiku gane, nolutu lwe olwa adhika lwa tameka okwoola?

13. Ngaashi sha popiwa muJohannes 11:32-35, Jesus okwi inyenge ngiini sho a mono Maria nayalwe taya lili? (Tala wo ethano.)

¹³ Lesha Johannes 11:32-35. Kala andola wa fa wu wete shoka sha ka ningwa po. Maria, omumwayinakadhona gulwe gwaLasarus, okwa yi a ka tsakaneke Jesus. Okwa endulula shoka sha li sha popiwa komumwayinakadhona Marta a ti: “Omuwa, ando owa li po, ando omumwameme ina sa.” Maria nosho wo yalwe, oya li lela ya nika oluhodhi. Sho Jesus e ya mono noku ya uva taya lili, okwa hendwa komwenyo. Molwaashono okwa li e uvitile noonkondo ookuume ke olukeno, okwa lili. Oku shi kutya aantu ohaya kala ya yemata noonkondo, uuna gumwe ngoka ye hole a si. Onkee okwa halelela oku ka kutha po osheetithi shokulila kwawo.

14. Oshike tatu vulu okwiilonga kombinga yaJehova shi na ko nasha nankene Jesus a li i inyenge sho Maria a li ta lili?

¹⁴ Omukalo moka Jesus a li i inyenge sho Maria a li ta lili, otagu tu longo kutya Jehova oKalunga omunalukeno. Omolwashike tatu vulu okutya ngawo? Ngaashi twe shi mono moshitopolwa sha tetekele, Jesus oha dhiladhila thiluthilu a fa He, noha kala e uvite ngaashi ye. (Joh. 12:45) Onkee, uuna tatu lesha kutya Jesus okwa li e uvitile olukeno noonkondo ookuume mboka ya nika oluhodhi nokuli e ta lili, otatu vulu okuthika pehulithodhiladhilo kutya Jehova naye oha kala e tu uvitile olukeno, uuna tatu lili omolwoluhodhi. (Eps. 56:8) Mbela shoka ihashi ku ningitha wu kale wa hala okuhedha popepi lela naKalunga ketu omunalukeno?

15. Ngaashi sha popiwa muJohannes 11:41-44, oshike sha li sha ningwa po pombila yaLasarus. (Tala wo ethano.)

¹⁵ Lesha Johannes 11:41-44. Jesus okwa thiki pombila yaLasarus, e ta pula emanya ndyoka lya li lya siikilwa po li kuthwe po. Marta okwe shi tindi, a ti kutya olutu lwaLasarus olu na okukala talu nika. Jesus okwe mu yamukula a ti: “Inandi ku lombwela kutya ngele owi itaala, oto ka mona eadhimo lyaKalunga?” (Joh. 11:39, 40) Jesus okwa tala pombanda, e ta galikana montaneho. Okwa li a hala okugandja esimano alihe kuJehova, mwaashoka a li ta ka ninga po. Opo nduno,  Jesus okwi igidha a ti: “Lasarus, za mo!” Lasarus okwa zi mo mombila. Jesus okwa ningi oshinima shimwe shoka aantu yamwe ya li taya dhiladhila kutya itashi wapa.

16. Ehokololo ndyoka li li muJohannes ontopolwa 11, ohali koleke ngiini eitaalo lyetu metegameno lyeyumuko?

¹⁶ Ehokololo ndyoka li li muJohannes ontopolwa 11, ohali koleke eitaalo lyetu metegameno lyeyumuko. Ngiini mbela? Dhimbulukwa euvaneko ndyoka Jesus a lombwele Marta, a ti: “Omumwanyoko ota ka yumuka.” (Joh. 11:23) Ngaashi He, Jesus oku na ehalo noonkondo dhokugwanitha po euvaneko ndyoka. Sho a lili otashi ulike kutya okwa halelela oku ka yumudha aantu mboka ya sa, noku ka kutha po eyeme ndyoka aantu haya kala ye na, uuna ya silwa. Shimwe ishewe, pompito mpono sho Lasarus a zi mo mombila, Jesus okwa li ishewe e shi ulike kutya oku na oonkondo dhokuyumudha aasi. Natango, dhiladhila kombinga yaashoka Jesus a lombwele ishewe Marta, a ti: “Inandi ku lombwela kutya ngele owi itaala, oto ka mona eadhimo lyaKalunga?” (Joh. 11:40) Otu na omatompelo omawanawa gokwiitaala kutya Kalunga ota ka gwanitha po euvaneko lye lyokuyumudha oonakusa. Ihe oshike tatu vulu okuninga, opo etegameno ndika li kale lyolelalela kutse?

17. Oshike tu na okudhimbulukwa, uuna tatu lesha omahokololo mOmbiimbeli kombinga yeyumuko?

¹⁷ Lesha kombinga yomayumuko ngoka ga ningwa nale nokutedhatedha kugo. MOmbiimbeli omu na omahokololo gahetatu taga popi kombinga yaantu mboka ya li ya yumudhwa ya kale ye na omwenyo kombanda yevi. c Omolwashike itoo konakona nuukeka ehokololo kehe lyomugo? Sho to shi ningi, dhimbulukwa kutya aantu mboka ya popiwa mo oya li yolela, ano aalumentu, aakiintu nosho wo aanona. Konga mo iiyilongomwa mbyoka to vulu okwiilonga mo. Dhiladhila kombinga yankene oshiholelwa kehe tashi ulike kutya Kalunga oku na ehalo nosho wo oonkondo dhokuyumudha oonakusa. Shilipaleka  kutya oho dhiladhila muule kombinga yeyumuko lyaJesus, ndyoka olyo eyumuko lya simanenena inaali ningwa nando onale. Dhimbulukwa kutya Jesus sho a yumudhwa okwa li a monika kaantu omathele, naashoka otashi tu pe etompelo ewanawa lyokukala tu na eitaalo. — 1 Kor. 15:3-6, 20-22.

18. Ongiini to vulu okulongitha nawa omaimbilo getu ngono taga popi kombinga yetegameno lyeyumuko? (Tala wo enyolo lyopevi.)

¹⁸ Kala ho longitha nawa ‘oondjimbo oondjapuki dhopambepo’ ndhoka tadhi popi kombinga yeyumuko. d (Ef. 5:19) Omaimbilo ngoka ohaga ningitha eyumuko li kale lyolela kutse, nohaga koleke eitaalo lyetu metegameno ndika lya dhenga mbanda. Kaleni hamu ga pulakene, hamu iyenditha po pugo, opo mu kale mu shi oku ga imba nawa nokukundathana eityo lyiitya yago pelongelokalunga lyeni lyuukwanegumbo. Iitya mbyoka yi ilonga momutse nokukala ho dhiladhila muule kombinga yayo, opo yi koleke eitaalo lyoye noyi gume omutima gwoye. Opo nduno, ngele owe ki iyadha meshongo tali tula omwenyo gwoye moshiponga, nenge wa silwa gumwe ngoka wu hole, ombepo yaJehova otayi ke ku kwathela wu dhimbulukwe omaimbilo ngoka, notage ke ku hekeleka noku ku tsa omukumo.

19. Oshike tatu vulu okuthaneka momadhiladhilo getu kombinga yeyumuko? (Tala oshimpungu, “ Oto ke ya pula shike?”)

¹⁹ Thaneka momadhiladhilo goye. Jehova okwe tu shita hatu vulu okukala twa fa tu iwete tse yene tu li muuyuni uupe. Omumwameme gumwe okwa yelitha a ti: “Onda longitha ethimbo olindji noonkondo okukala nda fa ndi iwete ndi li muuyuni uupe, tandi nika oongala dhomOparadisa.” Kala ando wu wete to tsakanene naalumentu naakiintu aadhiginini yopethimbo lyOmbiimbeli. Olye wa hala oku ka tsakanena naye? Omapulo geni to ke mu pula? Kala ishewe wa fa wu wete wa hangana noonakusa yoye aaholike sho ya yumuka. Dhiladhila kwaashoka to ka popya nayo tangotango, kunkene to ke ya papatela, nonkene to ka kala wa nyanyukwa oku ya mona.

20. Otu na okukala twa tokola toko okuninga shike?

²⁰ Inatu pandula tuu Jehova noonkondo omolweuvaneko lyeyumuko ndyoka e tu pa! Otatu vulu okukala tu na uushili kutya euvaneko ndyoka otali ka gwanithwa po shili, molwaashoka Jehova oku na lela ehalo noonkondo dhoku li gwanitha po. Onkee natu kaleni twa tokola toko okukoleka eitaalo lyetu metegameno ndika lya dhenga mbanda. Ngele osho twa ningi, otatu ka hedha popepyeelela naKalunga ngoka u uvanekela kehe gumwe gwomutse ta ti: ‘Aaholike yoye otaya ka yumuka!’