1-2. Oshike twa pumbwa okuninga manga twa tegelela uuyuni uupe?

 OTWA lenga euvaneko lyaJehova lyoku ka pingena po uuyuni mbuka nuuyuni uupe wuuyuki. (2 Pet. 3:13) Nonando katu shi kutya uuyuni uupe otawu ya uunake, iinima mbyoka tu wete tayi ningwa kunena, otayi ulike kutya kaku na we ethimbo ele lya hupa ko. — Mat. 24:32-34, 36; Iil. 1:7.

² Ihe manga twa tegelela shoka shi ningwe, atuheni otwa pumbwa okukoleka eitaalo lyetu meuvaneko ndyoka, kashi na nduno mbudhi kutya moshili otwa kala mo ethimbo ele li thike peni. Omolwashike mbela? Omolwaashoka neitaalo lya kola otali vulu okunkundipala. Nokuli omuyapostoli Paulus okwa ti kutya okukala kaatu na eitaalo ‘uulunde ihaawu lwedha oku tu idhingila.’ (Heb. 12:1) Opo eitaalo lyetu kaali nkundipale, otwa pumbwa okukala hatu dhiladhila muule pandjigilile kombinga yiinima mbyoka tayi ulike kutya uuyuni uupe masiku owu li pokuya. — Heb. 11:1.

3. Oshike tatu ka kundathana moshitopolwa shika?

³ Moshitopolwa shika, otatu ka kundathana omikalo ndatu moka tatu vulu okukoleka eitaalo lyetu meuvaneko lyaJehova lyuuyuni uupe: (1) mokutedhatedha kekulilo, (2) mokudhiladhila koonkondo dhaJehova nosho wo (3) mokuninga iinima mbyoka tayi tu hedhitha popepyeelela naJehova. Otatu ka kundathana wo nkene etumwalaka ndyoka Jehova a li a pe Habakuk tali koleke eitaalo lyetu kunena. Ihe tango, natu taleni koonkalo dhimwe ndhoka tashi vulika tu li mudho ngashingeyi, ndhoka tadhi tu pula tu kale tu na eitaalo lya kola meuvaneko lyuuyuni uupe mboka tawu ya.

 OONKALO NDHOKA HADHI PULA EITAALO LYA KOLA

4. Omatokolo geni haga pula eitaalo lya kola?

⁴ Esiku kehe, ohatu ningi omatokolo ngoka haga pula eitaalo lya kola. Pashiholelwa, ohatu ningi omatokolo ge na ko nasha naamboka tatu endathana nayo, omainyanyudho, elongo, ondjokana, aanona nosho wo niilonga. Oshi li nawa tu ipule ngeyi: ‘Mbela iinima mbyoka handi tokola okuninga ohayi ulike ngaa kutya ondi shi kutya uuyuni mbuno owopakathimbo nosho wo kutya masiku otawu ka pingenwa po kuuyuni uupe waKalunga? Nenge ohandi tokola okuninga iinima mbyoka hayi ningwa kwaamboka yi itaala kutya itaya vulu okukala nomwenyo sigo aluhe?’ (Mat. 6:19, 20; Luk. 12:16-21) Otatu ka ninga omatokolo ga dhenga mbanda, ngele ohatu koleke eitaalo lyetu meuvaneko lyuuyuni uupe mboka wu li popepi.

5-6. Omolwashike tu na okukala tu na eitaalo lya kola, uuna tu li muudhigu? Shi thaneka.

⁵ Ohatu adhika wo komaupyakadhi ngoka taga pula tu kale tu na eitaalo lya kola. Otashi vulika tu adhike komahepeko, tu kwatwe komukithi gwa kwata miiti, nenge pu holoke iinima yilwe mbyoka tayi tu ningitha tu kale twa teka omukumo. Petameko, otashi vulika tu kale tu uvite kutya otatu vulu okwiidhidhimikila uupyakadhi mboka. Ihe omaupyakadhi ngaashi ngoka, olundji otashi vulika ga kale po ethimbo ele. Onkene otatu ka kala twa pumbwa eitaalo lya kola, opo tu vule oku ga idhidhimikila notu tsikile okulongela Jehova twa nyanyukwa. — Rom. 12:12; 1 Pet. 1:6, 7.

⁶ Uuna tu li muudhigu, otashi vulika tu kale tu uvite kutya uuyuni uupe waJehova itawu ya nando. Mbela shika otashi ti kutya eitaalo lyetu inali kola? Hasho nando. Tala kethaneko ndika. Uuna tu li mokufu mokati kuutalala wamemememe, otashi vulika tu kale tu uvite kutya okwenye itaku ya nando. Ihe okwenye ohaku ya. Sha faathana, uuna twa teka omukumo noonkondo, otashi vulika tu kale tu uvite kutya uuyuni uupe kawu na siku wu ye. Ihe ngele eitaalo lyetu olya kola, otu shi kutya omauvaneko gaKalunga otaga ka gwanithwa. (Eps. 94:3, 14, 15; Heb. 6:17-19) Ngele otwa kala tu na einekelo lya tya ngawo, otatu vulu okutsikila okupititha komeho okulongela Jehova monkalamwenyo yetu.

7. Otu na okuyanda okudhiladhila ngiini?

⁷ Otwa pumbwa wo okukala tu na eitaalo lya kola, opo tu vule okuuvitha. Aantu oyendji mboka hatu uvithile, ohaya kala yu uvite kutya ‘elaka etoye’ ndyoka tali popi kombinga yuuyuni uupe mboka twa tegelela, kali shi lyoshili. (Mat. 24:14; Hes. 33:32) Otu na okukala twa kotoka, kaatu kale twa limbililwa shoka Jehova te tu longo, ngaashi aantu mboka inaaya tseya Jehova. Opo shoka kaashi tu ningilwe, otu na okutsikila okukoleka eitaalo lyetu. Natu ka taleni komikalo ndatu moka tatu vulu oku shi ninga.

TEDHATEDHA KEKULILO

8-9. Okutedhatedha kekulilo ohaku koleke ngiini eitaalo lyetu?

⁸ Omukalo gumwe tatu vulu okukoleka eitaalo lyetu omokutedhatedha kekulilo. Ekulilo ohali tu shilipaleke kutya omauvaneko gaKalunga otaga ka gwanithwa. Uuna tatu dhiladhila muule kutya omolwashike ekulilo lya li lya gandjwa nosho wo kutya olya kwatela mo shike, ohatu koleke eitaalo lyetu meuvaneko ndyoka Kalunga e tu uvanekela lyomwenyo gwaaluhe muuyuni uuwanawa kutya otali ka gwanithwa shili. Omolwashike tatu vulu okutya ngawo?

⁹ Ekulilo olya li lya kwatela mo shike? Jehova okwa li a tumu Omwana omuholike, kuume ke kopothingo, okuza megulu e ye a valwe e li omuntu a gwanenena kombanda yevi. Sho Jesus a li kombanda yevi, okwa li i idhidhimikile omaudhigu agehe. Opo nduno, okwa li a mono iihuna nokusa eso tali uvitha omwenyo omutoye. Jehova ina futa tuu ofuto onene! Kalunga ketu omunahole ka li nando ta ka pitika Omwana a mone iihuna noku se, opo owala tu kale nonkalamwenyo ombwanawa uule wethimbo efupi. (Joh. 3:16; 1 Pet. 1:18, 19) Molwaashoka  Jehova okwa futa ofuto onene, ota ka shilipaleka kutya otatu ka vula okukala nomwenyo sigo aluhe muuyuni uupe.

DHILADHILA KOONKONDO DHAJEHOVA

10. Shi ikolelela kAaefeso 3:20, oshike Jehova ta vulu okuninga?

¹⁰ Omukalo omutiyali moka tatu vulu okukoleka eitaalo lyetu, omokudhiladhila koonkondo dhaJehova. Oku na oonkondo dhokugwanitha kehe shimwe shoka ha uvaneke okuninga. Odhoshili kutya aantu oyendji kunena oyu uvite kutya itatu vulu oku ka kala nomwenyo gwaaluhe muuyuni uupe. Ihe Jehova olundji oha uvaneke iinima mbyoka aantu itaatu vulu nando okuninga. Shoka ota vulu oku shi ninga, molwaashoka oye Kalunga Omunankondoadhihe. (Job 42:2; Mark. 10:27) Onkee ano, katu na nando okukala twa kumwa, uuna te tu uvanekele iinima iiwanawa. — Lesha Aaefeso 3:20.

11. Gandja oshiholelwa shimwe shomomauvaneko gaKalunga omakumithi. (Tala oshimpungu “ Omauvaneko gamwe omakumithi ngoka ga gwanithwa.”)

¹¹ Tala kiinima yimwe mbyoka Jehova a li u uvanekele oshigwana she monakuziwa, ya li tayi monika ya fa itaayi wapa. Okwa li a lombwele Abraham naSara kutya otaya ka mona okanona kokamati momimvo dhawo dhuukulupe. (Gen. 17:15-17) Okwa li wo a lombwele Abraham kutya oluvalo lwe otalu ka pewa evi lyaKaanan. Pethimbo lyomimvo odhindji ndhoka oluvalo lwaAbraham, ano Aaisraeli ya li aapika muEgipiti, oshi na okukala sha li tashi monika sha fa euvaneko ndyoka itaali ka gwanithwa shili. Ihe olya ka gwanithwa. Konima yethimbo, Jehova okwa li a lombwele kuku Elisabet kutya ota ka mona okanona. Jehova okwa li wo a lombwele Maria, omukadhona gwanakatyepa kutya ota ka mona okanona kokamati hoka Jehova a li u uvaneka omimvo omayovi dha ka pita moshikunino shaEden kutya otake ke ya, neuvaneko ndyoka olya li lya gwanithwa shili! — Gen. 3:15.

12. Josua 23:14 nosho wo Jesaja 55:10, 11, otaye tu shilipaleke shike kombinga yoonkondo dhaJehova?

¹² Uuna tatu dhiladhila kombinga yomauvaneko gaJehova ngoka a ninga nankene e ga gwanitha po, ohatu shi mono kutya oku na oonkondo oonene. Shoka ohashi koleke eitaalo lyetu meuvaneko lye lyuuyuni uupe. (Lesha Josua 23:14; Jesaja 55:10, 11.) Ohashi tu ningitha tu kale twa ilongekidha nawa, opo tu kwathele yalwe ya uve ko kutya euvaneko lyaJehova lyuuyuni uupe kali shi ondjodhi yowala nenge omafekela. Jehova ye mwene okwa popya shi na ko nasha negulu epe nevi epe a ti: “Oohapu ndhika  . . . odhoshili nodhi shi okwiinekelwa.” — Eh. 21:1, 5.

NINGA IINIMA MBYOKA TAYI KU HEDHITHA POPEPYEELELA NAJEHOVA

13. Okugongala kwegongalo otaku vulu ngiini okukoleka eitaalo lyetu? Shi yelitha.

¹³ Omukalo omutitatu moka tatu vulu okukoleka eitaalo lyetu, omokuninga iinima mbyoka tayi tu hedhitha popepyeelela naJehova. Pashiholelwa, tala nkene hatu mono uuwanawa pokugongala kwegongalo. Anna, ngoka a kala miilonga yethimbo lyu udha yi ili noyi ili uule womimvo omilongo, okwa ti: “Okugongala ohaku kwathele ndje ndi kale ndi na eitaalo lya kola. Nonando omupopi oku kale kee shi omulongi omwaanawa nenge ihaa popi sha oshipe, olundji ohandi uvu po sha shoka tashi kwathele ndje ndu uve ko nawa Ombiimbeli, naashoka ohashi koleke eitaalo lyandje.” b Eitaalo lyetu otali vulu wo okukola, uuna twa pulakene komayamukulo gaamwatate naamwameme pokugongala. — Rom. 1:11, 12; 10:17.

14. Iilonga yokuuvitha ohayi koleke ngiini eitaalo lyetu?

¹⁴ Ohatu koleke wo eitaalo lyetu, uuna tatu kutha ombinga miilonga yokuuvitha. (Heb. 10:23) Barbara, ngoka a longela Jehova uule womimvo dhi vulithe po 70, okwa ti: “Onda kala handi  mono aluhe kutya iilonga yokuuvitha ohayi koleke eitaalo. Sho nda kala tandi popi nayalwe kombinga yomauvaneko gaJehova ga dhenga mbanda, eitaalo lyandje olya kolo.”

15. Ongiini ekonakonombiimbeli lyopaumwene hali koleke eitaalo lyetu? (Tala wo omathano.)

¹⁵ Opu na wo ishewe oshinima shilwe shoka hashi koleke eitaalo lyetu: ekonakonombiimbeli lyopaumwene. Susan okwe shi mona kutya ohashi mu kwathele okuninga elandulathano liinima mbyoka ta ka konakona. Okwa ti: “MOsoondaha, ohandi ilongekidhile oshitopolwa shOshungolangelo shoshiwike tashi landula ko. Omaandaha nEtiyali, ohandi ilongekidhile okugongala kwomokati koshiwike. Omanga omasiku ngoka ga thigala ko, handi ningi ekonakono lyopaumwene.” Susan ota tsikile okukoleka eitaalo lye, molwaashoka oha landula aluhe elandulathano lye. Irene, ngoka a longa uule womimvo omilongo koombelewa dhetu oonene, okwe shi mona kutya okukonakona omahunganeko gOmbiimbeli ohaku koleke eitaalo lye. Okwa ti: “Ohashi kumitha ndje okumona kutya omahunganeko gaJehova oga gwanithwa po mokanima kehe.” c

“OTASHI KA TSAKANITHWA”

16. Omolwashike eshilipaleko ndyoka Jehova a li a pe Habakuk tali ti sha kutse kunena? (Aahebeli 10:36, 37)

¹⁶ Aapiya yaJehova yamwe oya kala ya tegelela ethimbo ele uuyuni mbuka wu hulithwe po. Aantu yamwe ohaya dhiladhila kutya ehulilo otali kwata unene ethimbo ele okuya. Ihe Jehova oha kala e shi kutya aapiya ye ohaya kala yu uvite ngiini. Nokuli okwa li a shilipaleke omuhunganeki Habakuk a ti: “Ethimbo lyokutsakanithwa kwemoniko inali thikana manga. Ihe ethimbo otali ya mbala, naashoka tandi shi ku ulukile, otashi ka tsakanithwa. Ngele sha fa tashi dhikala, shi tegelela ashike; otashi ka ningwa.” (Hab. 2:3) Mbela Kalunga okwa li a gandja eshilipaleko ndyoka li etele owala Habakuk uuwanawa? Nenge oohapu Dhe ndhoka otadhi  ti sha wo kutse kunena? Jehova okwa li a nwetha mo omuyapostoli Paulus a lombwele Aakriste, mboka ya tegelela nondjuulukwe uuyuni uupe, oohapu ndhoka. (Lesha Aahebeli 10:36, 37.) Odhoshili kutya otatu vulu okukala nuushili kutya nonando ehupitho ndyoka tu uvanekelwa olya fa tali dhikala, ‘otali ka tsakanithwa. Ngele lya fa tali dhikala, li tegelela ashike; otali ka ningwa.’

17. Ongiini omumwameme gumwe a li a tula miilonga omayele ngoka Jehova a pa Habakuk?

¹⁷ Aapiya yaJehova oyendji oya tula miilonga omayele ge ngoka taga ti “shi tegelela ashike.” Yamwe oya kala ya tegelela uule womimvo odhindji. Pashiholelwa, Louise, ngoka a li a tameke okulongela Jehova mo 1939, okwa ti: “Pethimbo ndyoka onda li tandi dhiladhila kutya Armageddon ote ke ya manga inaandi mana osikola. Ihe shoka ka sha li sha ningwa. Uule womimvo sho nda kala tandi lesha omahokololo gomOmbiimbeli kombinga yaantu mboka ya li ya tegelele omauvaneko gaJehova ga gwanithwe, osha kwathele ndje ndi tegelele Jehova a gwanithe omauvaneko ge. Ohandi lesha kombinga yaNoa, Abraham, Josef nayalwe mboka ya li ya tegelele ethimbo ele manga inaaya pewa ondjambi yawo kuJehova ndjoka ya li ya uvanekelwa. Molwaashoka ngame nosho wo yalwe otwa kala twa itaala kutya omauvaneko otaga ka gwanithwa, oshe tu kwathele tu kale tu na uushili kutya uuyuni uupe owu li lela popepi.” Aantu yalwe oyendji mboka ya longela Jehova ethimbo ele, nayo otaye shi zimine!

18. Ongiini okukonakona eshito taku vulu okukoleka eitaalo lyetu muuyuni uupe mboka tawu ya?

¹⁸ Odhoshili kutya uuyuni uupe inawu ya natango. Ihe dhiladhila kombinga yiinima yimwe mbyoka yi li ko kunena, ngaashi oonyothi, omiti, iinamwenyo nosho wo aantu ooyakwetu. Kapu na ngoka ta ka kala a limbililwa kutya iinima mbyoka kayi shi yolela, nonando opu na ethimbo ya li kaaya li ko. Oyi li ko sigo onena, molwaashono Jehova e yi shita. (Gen. 1:1, 26, 27) Kalunga ketu oku uvaneka wo kutya ote ke eta uuyuni uupe. Ota ka gwanitha po elalakano ndyoka. Muuyuni uupe, aantu otaya ka kala ye na omwenyo gwaaluhe nuukolele wi ihwapo. Otatu vulu okukala tu na uushili kutya uuyuni uupe otawu ya pethimbo ndyoka Kalunga a tula po. — Jes. 65:17; Eh. 21:3, 4.

19. Ongiini tatu vulu okukoleka eitaalo lyetu?

¹⁹ Ngashingeyi, longitha ompito kehe ndjoka wu na wu koleke eitaalo lyoye. Kala aluhe wu na olupandu lwekulilo. Dhiladhila koonkondo dhaJehova. Kala ho ningi iinima mbyoka tayi ku hedhitha popepyeelela naJehova. Mokuninga ngawo, oto ka kala gumwe gwomwaamboka “yi itaale noyi idhidhimike, sigo ya pewa shoka Kalunga e shi uvaneka.” — Heb. 6:11, 12; Rom. 5:5.