1. Hokolola shoka sha li sha ningwa po, sho Jesus a longo oshikumithalonga she shotango.

 KALA andola wa fa wu wete shoka sha li sha ningwa po, sho Jesus a tameke uukalele we mo 29 E.N. Jesus nayina, Maria nosho wo aalongwa ye yamwe, oya li ya hiywa koshituthihango shimwe muKana, omukunda gu li muumbangalantu waNasaret, mondoolopa moka mwa za Jesus. Maria okwa li kuume kaakwanezimo mboka ye na ohango nokwa li ta kwathele anuwa aayenda moku ya yakula. Ihe pethimbo lyoshituthi shoka, opwa li pwa holoka uupyakadhi mboka wa li tawu vulu okusitha ohoni noonkondo aakwanezimo naaihokani mboka, ano kutya omaviinu oga pu po. b Otashi vulika ga pu po, molwaashoka omwaalu gwa li ogundji noonkondo. Maria okwa yi nziya komwana e te mu lombwele ta ti: “Kaye na omaviinu.” (Joh. 2:1-3) Jesus okwa ningi po shike? Okwa ningi po oshinima inaashi monika nale, ano a longo oshikumithalonga, sho a shitukitha omeya “omaviinu omatoye.” — Joh. 2:9, 10.

2-3. (a) Iikumithalonga yini ya li ya longwa kuJesus? (b) Uuwanawa wuni tatu ka mona ngele otwa konakona iikumithalonga yaJesus?

² Jesus okwa li wo a longo iikumithalonga yilwe oyindji, pethimbo lyuukalele we. c Okwa li a longitha oonkondo dhopashikumithalonga a kwathele aantu oyendjiyendji. Pashiholelwa, mwiiyali yomiikumithalonga ye, okwa li a palutha aalumentu 5 000 nokonima yaashoka okwa li a palutha aantu 4 000, omiyalu ndhoka tashi vulika ngele odha tulwa kumwe dha konda paantu 27 000,  ngele otwa kwatele mo aakiintu naanona mboka ya li po. (Mat. 14:15-21; 15:32-38) Poompito ndhoka mbali, Jesus okwa li wo a aludha aantu oyendji mboka ya li taya ehama. (Mat. 14:14; 15:30, 31) Dhiladhila owala nkene oongundu dhaantu dha li dha kumithwa kiikumithalonga yaJesus yokwaaludha noyokupalutha aantu!

³ Otatu vulu okwiilonga oshindji miikumithalonga yaJesus kunena. Moshitopolwa shika, otatu ka kundathana iiyilongomwa mbyoka tayi koleke eitaalo lyetu, mbyoka tatu vulu okwiilonga miikumithalonga yaJesus. Opo nduno otatu ka konakona nkene tatu vulu okuholela eifupipiko nolukeno lwaJesus ndoka a li a ulike, sho a li ta longo iikumithalonga mbyoka.

4. Iikumithalonga yaJesus otayi tu longo iiyilongomwa yini kombinga ye, mbyoka tayi koleke eitaalo lyetu?

⁴ Iikumithalonga yaJesus itayi tu longo owala iiyilongomwa kombinga ye mbyoka tayi koleke eitaalo lyetu, ihe otayi tu longo wo kombinga yaHe. Shoka osho shi li ngaaka, molwaashoka Jehova oye a li Onzo yoonkondo ndhoka dhe shi ningi tashi wapa, opo yi longwe. Iilonga 10:38 otayi ti: “Kalunga okwa li e mu [Jesus] gwayekitha Ombepo Ondjapuki noonkondo. Oye okwe ende apehe, okwa longo uuwanawa nokwa aludha ayehe mboka ya li mepangelo lyOmuhindadhi, oshoka Kalunga okwa li pamwe naye.” Dhimbulukwa wo kutya iinima ayihe mbyoka Jesus a li a popi nokwa ningi, mwa kwatelwa iikumithalonga mbyoka a longo, okwa li ha dhiladhila nokuulika omaiyuvo ga fa gaHe thiluthilu. (Joh. 14:9) Tala kiiyilongomwa itatu mbyoka tatu vulu okwiilonga miikumithalonga yaJesus.

5. Oshike sha li shi inyengitha Jesus a longe iikumithalonga? (Mateus 20:30-34)

⁵ Shotango, Jesus naHe oye tu hole noonkondo. Sho Jesus a li kombanda yevi okwa li a ulukile aantu kutya oku ya hole noonkondo mokulongitha oonkondo dhe dhopashikumithalonga a kwathele mboka ya li taya mono iihuna. Pompito yimwe, aalumentu yaali aaposi oya li ye mu kugile ekwatho. (Lesha Mateus 20:30-34.) Ndhindhilika kutya Jesus okwa li e ya “sile ohenda” e te ya aludha. Oshityalonga shOshigreka shoka sha tolokwa ‘okusila ohenda’ otashi ti kutya okukala wu uvite olukeno olunene meni lyoye. Olukeno lwa tya ngaaka ndoka lu li euliko lyohole, olwa li wo lwa inyengitha Jesus a kutithe aasindjala noku aludhe omunashilundu. (Mat. 15:32; Mark. 1:41) Otatu vulu okukala nuushili kutya Jehova, Kalunga ngoka ‘omunalukeno nomunesilohenda’ nosho wo Omwana, oye tu hole noonkondo nohaya kala ye uvite nayi, uuna tatu mono iihuna. (Luk. 1:78; 1 Pet. 5:7) Oya halelela okuhulitha po omaupyakadhi agehe ngoka haga hepeke aantu.

6. Oonkondo dhini Kalunga a pa Jesus?

⁶ Oshitiyali, Kalunga okwa pa Jesus oonkondo dhokukandula po omaupyakadhi agehe gaantu. Sho Jesus a li a longo iikumithalonga, okwa li a ulike kutya ota vulu okukandula po omaupyakadhi getu agehe ngoka itaatu vulu nando okukandula po kutse yene. Pashiholelwa, oku na oonkondo dhokuhulitha po omaupyakadhi ngoka ga etithwa kuulunde mboka twa thigulula nakehe shimwe shoka hashi etithwa kuulunde, mwa kwatelwa uuwehame neso. (Mat. 9:1-6; Rom. 5:12, 18, 19) Iikumithalonga ye oye shi ulike kutya ota vulu okwaaludha omukithi “kehe” nota vulu nokuli okuyumudha oonakusa. (Mat. 4:23; Joh. 11:43, 44) Shimwe ishewe, oku na oonkondo dhokumweneka iikungulu iidhigu nokusinda oombepo dhoompwidhuli. (Mark. 4:37-39; Luk. 8:2) Shoka itashi tu tsu tuu omukumo okutseya kutya Jehova okwa gandja oonkondo ndhoka kOmwana!

7-8. (a) Iikumithalonga yaJesus otayi tu pe einekelo lini? (b) Oshikumithalonga shini wa halelela oku ka mona muuyuni uupe?

⁷ Oshititatu, otatu vulu okukala tu na einekelo thiluthilu kutya omauvaneko giinima iiwanawa  mbyoka Uukwaniilwa waKalunga tawu ka eta, otaga ka gwanithwa. Iikumithalonga mbyoka Jesus a longo, sho a li omuntu kombanda yevi, ote ke yi longa natango kombanda yevi alihe, molwaashoka oku li Omukwaniilwa gwUukwaniilwa waKalunga. Natu taleni kwaashoka tatu ka ningilwa masiku, sho Jesus ta ka lela kombanda yevi alihe. Otatu ka nyanyukilwa uukolele wu li nawa, molwaashoka ota ka kutha po omikithi adhihe nomaulema ngoka haga monitha aantu iihuna. (Jes. 33:24; 35:5, 6; Eh. 21:3, 4) Itaku ka kala we nando ondjala nenge okumonithwa iihuna kiiponga yopaunshitwe. (Jes. 25:6; Mark. 4:41) Otatu ka kala twa nyanyukwa noonkondo okuhambelela oonakusa yetu mboka ya yumuka “moombila.” (Joh. 5:28, 29) Oshikumithalonga shini wa halelelaoku ka mona tashi longwa muuyuni uupe?

⁸ Sho Jesus a longo iikumithalonga, okwa ulike kutya oku na eifupipiko nolukeno, ano omaukwatya ngoka natse tu na okukala tu na. Natu taleni kiiholelwa iyali. Natu tameke nehokololo li na ko nasha nohango yomuKana.

9. Jesus okwa li a ningi shike pohango yomuKana? (Johannes 2:6-10)

⁹ Lesha Johannes 2:6-10. Sho omaviinu ga pu po mohango ndjoka, mbela Jesus okwa li e na okuninga po sha? Kapu na ehunganeko lya popya kutya Mesiasa okwa li ta ka shitukitha omeya omaviinu pashikumithalonga. Ihe dhiladhila owala kutya ando ongoye andola owa kala wu uvite ngiini, ngele omaviinu oga pu po mohango yoye. Jesus otashi vulika a li e uvitile olukeno aakwanezimo mboka, unene tuu ombushiki nomufuko  nokwa li a hala kaaya se ohoni. Onkee, ngaashi sha popiwa petameko, okwa longo oshikumithalonga. Okwa shitukitha omeya goolita 390 omaviinu omatoye. Otashi vulika a shitukitha omeya goolita dhi thike mpoka omaviinu, opo gamwe ga hupe ko ga ka longithwe monakuyiwa nenge nokuli ga ka landithwe po mu ze oshimaliwa shombushiki nomufuko. Aafuko mboka kaya li tuu ya pepelelwa!

10. Uuyelele wumwe wuni wa simana tawu adhika mehokololo ndyoka li li muJohannes ontopolwa 2? (Tala wo ethano.)

¹⁰ Natu taleni kuuyelele wumwe wa simana mboka tawu adhika mehokololo lyomuJohannes ontopolwa 2. Mbela owa ndhindhilika tuu kutya Jesus ka li a udhitha iiyuma omeya? Pehala lyokuningitha yalwe ya gandje eitulomo kuye, okwa lombwele aayakuli ya udhithe iiyuma omeya. (Ovelise 6, 7) Nokonima sho Jesus a shitukitha omeya omaviinu, ina kutha mo omaviinu gamwe e ga fale komuwiliki gwoshituthi. Pehala lyaashono, okwa lombwele aayakuli oyo ye shi ninge. (Ovelise 8) Jesus ina tula omaviinu moshitenga e te shi yelutha komeho ta ti, ‘Loleni omaviinu ngaka. Ongame nde ga ningi!’

11. Oshike tatu vulu okwiilonga koshikumithalonga shaJesus?

¹¹ Oshike tatu vulu okwiilonga moshikumithalonga shaJesus shokushitukitha omeya omaviinu? Otatu ilongo mo oshiilongomwa kombinga yeifupipiko. Jesus ka li i itanga kombinga yoshikumithalonga shoka, nokuli ini itanga nando kombinga yoshinima kehe shoka a ninga. Pehala lyaashono, okwa gandja neifupipiko esimano alihe kuHe. (Joh. 5:19, 30; 8:28) Ngele otwa holele Jesus mokukala twa itala ko pandjele, itatu ki itanga kombinga yaashoka twa longa. Kashi na nduno mbudhi kutya ohatu longo iilonga yini miilonga yaJehova, inatu itangela shoka twa ninga, ihe natu itange kombinga yaKalunga ketu a dhenga mbanda, ngoka tu na uuthembahenda woku mu longela. (Jer. 9:23, 24) Natu mu pe esimano ndyoka oye a gwana oku li pewa. Itatu vulu okupondola mokulonga oshilonga kehe oshiwanawa, inaatu kwathelwa kuJehova. — 1 Kor. 1:26-31.

12. Omomukalo gulwe guni tatu vulu okuholela eifupipiko lyaJesus? Shi thaneka.

¹² Tala komukalo gulwe moka tatu vulu okuholela eifupipiko lyaJesus. Dhiladhila konkalo ndjika: Omukuluntugongalo gumwe okwa longitha ethimbo olindji okukwathela omuyakuligongalo omugundjuka, sho ti ilongekidha oshipopiwa she shotango shomontaneho. Oshizemo, omumwatate ngoka omugundjuka okwa gandja oshipopiwa tashi tungu, negongalo olya li lye shi nyanyukilwa. Konima yokugongala, gumwe okwe ya komukuluntugongalo ngoka e ta ti: ‘Omumwatate ntumba yangandi okwa gandja oshipopiwa oshiwanawa kaaku na we.’ Mbela omukuluntugongalo ngoka okwa pumbwa okupopya ta ti: ‘Eeno, ihe onda longitha ethimbo olindji oku mu kwathela’? Nenge otashi vulika a popye neifupipiko ta ti: ‘Eeno, okwe shi gandja nawa. Ondi mu uvitile uuntsa’? Ngele tse aaifupipiki, itatu ki itangela iinima iiwanawa mbyoka twa ningila yalwe. Otatu ka kala tu uvitile ombili okutseya kutya Jehova oku wete nokwa lenga shoka tatu ningi. (Yelekanitha Mateus 6:2-4; Heb. 13:16) Odhoshili kutya ohatu nyanyudha Jehova, uuna tatu holele eifupipiko lyaJesus. — 1 Pet. 5:6.

13. Jesus okwa li a mono shike popepi noshilando Nain, nokwa ningi po shike? (Lukas 7:11-15)

¹³ Lesha Lukas 7:11-15. Dhiladhila kwaashoka tashi vulika sha li sha ningwa po, sho Jesus e li metifa lyuukalele we. Okwa li ta yi kuNain, oshilando shaGalilea shi li popepi naShunem, moka omuhunganeki Elisa a li a yumudha okamwanamati komukulukadhi gumwe, omimvo 900 lwaampono dha ka pita. (2 Aak. 4:32-37) Sho Jesus a thiki popepi nomweelo gwoshilando, okwa mono aantu ya inda omudhimba taya zi moshilando Nain, ya uka kefumviko.  Onkalo ndjoka oya li yi yemateka, molwaashoka omuselekadhi gumwe okwa a li a silwa omwanamati epona. Ihe omukulukadhi ngoka a nika oluhodhi ka li oye awike; okwa li pamwe nongundu onene yaantu yomoshilando shoka. Jesus okwe ya kankeke nokwa ningi po oshinima oshindhindhilikwedhi omolwomukulukadhi ngoka a nika oluhodhi, mokuyumudha omwanamati. Eyumuko ndika olyo lyotango lyomomayumuko gatatu ngoka ga nyolwa kondandalunde mOmavaangeli.

14. Uuyelele wumwe wuni wa simana wu li mehokololo ndyoka li li muLukas ontopolwa 7? (Tala wo ethano.)

¹⁴ Tala kuuyelele wumwe wa simana mboka wu li mehokololo ndyoka li li muLukas ontopolwa 7. Owa ndhindhilika tuu kutya Jesus okwa “mono” omuselekadhi ta lili, opo nduno “okwe mu uvitile olukeno?” (Ovelise 13) Otashi vulika Jesus a mono omukulukadhi ngoka ta lili, sho ta ende pooha dhomudhimba gwomwanamati gwe, opo nduno okwe mu uvile olukeno. Ina uvila owala olukeno omukulukadhi ngoka; ihe okwe li mu ulukile wo. Nokaapu na omalimbililo, oku na okukala a li a popi naye newi tali hekeleke, a ti: “Ino lila we.” Opo nduno okwa ningi po oshinima shimwe. Okwa yumudha omwanamati gwe ‘e te mu gandja kuye.’ — Ovelise 14, 15.

15. Oshike tatu vulu okwiilonga koshikumithalonga shaJesus?

¹⁵ Oshike tatu vulu okwiilonga moshikumithalonga shaJesus shokuyumudha omwanamati gwomuselekadhi? Otatu ilongo mo kutya otwa pumbwa okuulukila olukeno mboka ya nika oluhodhi. Odhoshili kutya ihatu vulu okuyumudha aasi, ngaashi Jesus a li a ningi. Ihe ngaashi Jesus, otatu vulu okuulukila mboka ya nika oluhodhi olukeno moku ya nongonona. Otatu vulu oku ya ulukila olukeno mokupopya nomokuninga iinima tu ya kwathele notu ya hekeleke. d (Omayel. 17:17; 2 Kor. 1:3, 4; 1 Pet. 3:8) Nokuli noohapu dhanathangwa nosho wo oku ya longela uulonga uushona, otawu vulu oku ya tsa omukumo noku ya hekeleka noonkondo.

16. Ngaashi tashi ulikwa methano ndyoka lyeuliko lyoshinima sha ningwa shili, oshike to ilongo moshimoniwa shomukulukadhi ngoka opo a li a silwa okamwanakadhona?

¹⁶ Tala koshimoniwa shika. Omimvo dhontumba dha ka pita, manga taya imbi eimbilo lyontumba  pokugongala, omumwameme gumwe okwa ndhindhilike omukulukadhi ngoka a li popepi naye ta lili. Eimbilo olya li tali popi kombinga yetegameno lyeyumuko, nomukulukadhi ngoka opo a adhika a silwa okamwanakadhona. Sho e shi ndhindhilike, omumwameme okwa endelele nokwa yi komukulukadhi ngoka, e te mu kwata komapepe nokwiimba eimbilo ndyoka pamwe naye sigo lya pu ko. Omukulukadhi ngoka lwanima okwa ti: “Onda li ndi uvite ndi holike kaamwatate naamwameme.” Okwa li lela a pandula sho a yile kokugongala esiku ndyoka. Okwa gwedha ko a ti: “KOshinyanga shUukwaniilwa, oko hatu ka mona ekwatho.” Otatu vulu okukala nuushili kutya Jehova oha ndhindhilike nokwa lenga iinima ya nathangwa mbyoka hatu ningi, tu ulukile olukeno mboka ya nika oluhodhi noya “kanitha etegameno.”  — Eps. 34:18.

17. Oshike twa ilongo moshitopolwa shika?

¹⁷ Otatu vulu okutsuwa omukumo noonkondo, uuna twa konakona omahokololo gomOmbiimbeli taga popi kombinga yiikumithalonga yaJesus. Omahokololo ngoka ohage tu longo kutya Jehova naJesus oye tu hole noonkondo nosho wo kutya Jesus oku na oonkondo dhokuhulitha po omaupyakadhi agehe gaantu, notatu vulu okukala tu na omukumo thiluthilu momauvaneko omawanawa ngoka taga ka gwanithwa masiku, sho Uukwaniilwa waKalunga tawu ka pangela kombanda yevi. Sho to konakona omahokololo ngoka, tedhatedha komikalo moka to vulu okuholela uukwatya waJesus. Omolwashike itoo itulile po ekonakono lyopaumwene nenge Elongelokalunga lyUukwanegumbo lyokukonakona owala iikumithalonga yaJesus? Tala kutya iiyilongomwa yini to vulu okwiilonga momahokololo ngoka, e to ka lombwela yalwe shoka wi ilongo mo. Oto ka vula okuninga oonkundathana odhindji tadhi tungu nayalwe, uuna wa ningi ngaaka. — Rom. 1:11, 12.

18. Oshike tatu ka kundathana moshitopolwa tashi landula?

¹⁸ Okuuka pehulilo lyuukalele we, Jesus okwa li a longo oshikumithalonga she oshititatu, sho osho shahugunina shomomayumuko ge ngoka ga nyolwa mOmbiimbeli. Ihe eyumuko ndika olya li lya yooloka ko komakwawo, molwaashoka olya li lyakuume ke, nolya li tali monika lya fa itaali vulu okuningwa. Iiyilongomwa yini tatu vulu okwiilonga mehokololo lyEvaangeli kombinga yoshikumithalonga shoka? Nongiini tatu vulu okukoleka eitaalo lyetu metegameno lyeyumuko? Oshitopolwa tashi landula otashi ka yamukula omapulo ngoka.