1. Omolwashike hatu gandja omatyokosha pokugongala?

 OMOLWASHIKE hatu kala pokugongala? Elalakano lyetu okutanga Jehova. (Eps. 26:12; 111:1) Shimwe ishewe, ohatu kala pokugongala, opo tu tsaathane omukumo pomathimbo ngaka omadhigu. (1 Tes. 5:11) Uuna twa ganeke iikaha yetu e tatu gandja etyokosha, kungawo ohatu ningi iinima ayihe mbyoka.

2. Oompito dhini tu na dhokugandja omatyokosha pokugongala kwetu?

² Oshiwike kehe ohatu kala tu na oompito dhokugandja omatyokosha pokugongala kwetu. Pashiholelwa, ohatu vulu okukutha ombinga pokugongala kwEkonakono lyOshungolangelo. Pokugongala kwetu kwomokati koshiwike ohashi vulika tu gandje omatyokosha kombinga yOmaliko gomOmbiimbeli, pEkonakonombiimbeli lyEgongalo nosho wo miitopolwa yilwe moka aapulakeni haya pulwa omapulo gontumba.

3. Iinima yini tashi vulika yi shi ningithe oshidhigu kutse tu gandje omatyokosha, nongiini Aahebeli 10:24, 25 taya vulu oku tu kwathela?

³ Atuhe otwa hala okutanga Jehova nokutsaathana omukumo nooitaali ooyakwetu. Ihe otashi vulika pu kale iinima yimwe mbyoka hayi shi ningi oshidhigu kutse okugandja omatyokosha. Otashi vulika tu kale twa tila okugandja etyokosha, nenge tashi vulika tu kale twa hala okugandja omatyokosha iikando oyindji, ihe omathimbo gamwe ihatu tumbulwa uuna twa ganeke. Oshike tashi vulu oku tu kwathela tu ungaunge nomashongo ngoka? Eyamukulo otatu li adha montumwafo ndjoka omuyapostoli Paulus a li a nyolele Aahebeli. Sho a popi kombinga yankene sha simana okugongala pamwe, okwa ti: ‘Otu na okugandja eitulomo kokukumagidhathana.’ (Lesha Aahebeli 10:24, 25.) Otatu ka kala kaatu na uumbanda wokuganeka, ngele otwa dhimbulukwa kutya otatu vulu okutsa yalwe omukumo netyokosha lyetu lyanathangwa ndyoka tali ulike kutya otu na eitaalo. Nongele ihatu tumbulwa  olundji, otatu vulu okukala twa nyanyukwa sho yalwe megongalo taya mono oompito dhokugandja omatyokosha. — 1 Pet. 3:8.

4. Iitsa itatu yini tatu ka kundathana moshitopolwa shika?

⁴ Moshitopolwa shika, tango otatu ka kundathana nkene tatu vulu okutsaathana omukumo megongalo eshona, moka mu na aantu aashona yokugandja omatyokosha. Opo nduno otatu ka kundathana nkene tatu vulu okutsaathana omukumo megongalo enene, moka mu na oyendji haya ganeke, opo ya gandje omatyokosha. Lwahugunina, otatu ka kundathana nkene tatu vulu okutsaathana omukumo okupitila mwaashoka tatu popi, uuna tatu gandja omatyokosha.

5. Ongiini tatu vulu okutsaathana omukumo, ngele pokugongala otu li po owala aashona?

⁵ Megongalo nenge mongundu onshona, ihamu kala aantu oyendji ya gandje omatyokosha, mboka omumwatate ngoka ta kwatele komeho ta vulu okutumbula. Omathimbo gamwe, otashi vulika a kale a pumbwa okutegelela kashona, gumwe a ganeke. Okugongala hoka otashi vulika ku monike taku sitha uunye, ko itaku tsu aantu omukumo. Oshike to vulu okuninga po? Kala wu na ehalo lyokuganeka iikando oyindji. Ngele osho wa ningi, otashi vulika wi inyengithe yalwe nayo ya kuthe ombinga olundji.

6-7. Oshike tashi vulu oku tu kwathela kaatu kale twa tila okugandja omatyokosha?

⁶ Oshike to vulu okuninga ngele oho kala wa tila noonkondo okugandja omatyokosha? Aantu oyendji osho haya kala yu uvite ngawo. Ihe opo wu kale to gandja omatyokosha taga tsu omukumo aamwatate naamwameme, omolwashike itoo tala kutya oshike wu na okuninga, opo kuu kale wa tila, uuna to gandja omatyokosha? Ongiini to vulu oku shi ninga?

⁷ Otashi vulika shi ku kwathele ngele owe endulula omaetopo gamwe ngoka ga nyanyangidhwa mOoshungolangelo dha pita. b Pashiholelwa, ilongekidha nawa. (Omayel. 21:5) Ngele owa kala wu shi nawa uuyelele mboka tawu kundathanwa, otashi ka kala oshipu kungoye okwiiyamba wu gandje omatyokosha. Shimwe ishewe, omatyokosha goye ga ninga omafupi. (Omayel. 15:23; 17:27) Otashi vulika kuu kale wa tila ngele to gandja eyamukulo efupi. Etyokosha efupi ndyoka tashi vulika lya thikama po metumbulo limwe nenge gaali, otali vulu nokuli okuuviwa ko nuupu kaamwatate naamwameme, li vulithe etyokosha ele tali gandja uuyelele owundji. Ngele owa ningi etyokosha efupi niitya yoye mwene, oto ku ulika kutya owi ilongekidha nawa nowu uvite ko nawa shoka tashi kundathanwa.

8. Jehova okwa tala ko ngiini oonkambadhala dhetu ndhoka hatu ningi twa mana mo?

⁸ Ongiini nduno ngele owa kambadhala omaetopo agehe ngoka, ihe natango oho kala wa tila unene okugandja etyokosha limwe nenge gaali? Kala wu na uushili kutya Jehova ota ka pandula oonkambadhala ndhoka ho ningi wa mana mo. (Luk. 21:1-4) Jehova ina tegelela tu ninge shoka itaatu vulu okuninga. (Fil. 4:5) Tala kutya oshike to vulu okuninga, itulila po elalakano wu shi adhe, opo nduno galikana wu kale wu na omutima gwa ngungumana. Petameko, elalakano ndyoka otali vulu okukala okugandja etyokosha limwe efupi.

9. Omolwashike tashi vulika shi kale oshidhigu okugandja omatyokosha momagongalo omanene?

⁹ Ngele owu li megongalo mu na aauvithi oyendji, otashi vulika pu kale eshongo li ili. Otashi vulika aamwatate naamwameme oyendji ya kale hayi iyamba okugandja omatyokosha, ihe olundji iho tumbulwa. Pashiholelwa, Danielle okwa kala aluhe ha nyanyukilwa okugandja  omatyokosha pokugongala. c Okwe shi tala ko shi li oshitopolwa shokulongela Kalunga ke, omukalo moka ta vulu okuladhipika yalwe nosho wo okukoleka eitaalo lye mwaashoka Ombiimbeli tayi popi. Ihe sho a tembukile kegongalo enene, ka li ha tumbulwa olundji nomathimbo gamwe okwa li nokuli ihaa tumbulwa mokugongala akuhe. Okwa ti: “Onda li nda yemata nonda li tandi dhiladhila kutya pamwe onda kuthwa uuthembahenda wokugandja omatyokosha. Nuuna sha kala tashi ningwa lwiikando niikando, omuntu oho tameke okwiipula kutya pamwe otashi ningilwa owina.”

10. Oshike tatu vulu okuninga, opo tu ka mone lela oompito dhokugandja etyokosha pokugongala?

¹⁰ Mbela nangoye opu na oshikando shimwe wa li wu uvite ngaashi Danielle? Ngele osho, otashi vulika wu kale wa hala okweetha po okugandja omatyokosha e to kala owala ho kala wa pulakena pokugongala. Ihe ino kambadhala okweetha po okugandja omatyokosha. Oshike to vulu okuninga? Oto vulu okukala ho ilongekidha omatyokosha gontumba wu ke ga gandje pokugongala kehe. Opo nduno, ngele owa ka kala inoo tumbulwa wu gandje etyokosha petameko lyokugongala, oto vulu natango okukala wu na oompito wu gandje etyokosha momukokomoko gwokugongala. Uuna to ilongekidhile Oshungolangelo yokukonakonwa, dhiladhila kombinga yankene okatendo kehe ka kwatathana nenenedhiladhilo lyoshitopolwa. Ngele osho wa ningi, otashi vulika wu ka kale wu na omatyokosha omawanawa, ngoka to ka vula okugandja moshitopolwa shoka tashi ka konakonwa. Shimwe ishewe, oto vulu okwiilongekidha wu ka gandje etyokosha muutendo mboka tawu popi iinima yomuule, mbyoka iidhigu okuyelitha. (1 Kor. 2:10) Omolwashike mbela? Omolwaashoka puutendo mboka, aantu owala aashona tashi vulika ya ganeke ya gandje omatyokosha. Ihe ongiini nduno ngele owa tula omaetopo agehe ngoka miilonga, ihe natango pomakugongala ogendji ino pewa natango ompito wu gandje etyokosha? Oto vulu okupopya nomumwatate ngoka ta kwatele komeho, manga okugongala inaaku tameka e to mu lombwele kutya owa hala oku ka yamukula epulo lini.

11. Aafilippi 2:4 otaye tu ladhipike tu ninge shike?

¹¹ Lesha Aafilippi 2:4. Omuyapostoli Paulus okwa li a nwethwa mo kuKalunga a ladhipike Aakriste ya lalakanene uuwanawa wayalwe. Ongiini nduno tatu vulu okutula omayele  ngoka miilonga pokugongala? Omokudhimbulukwa kutya yalwe nayo oya hala okukutha ombinga muko ngaashi tse.

12. Omukalo gumwe guni omwaanawa gwokutsa yalwe omukumo pokugongala? (Tala wo ethano.)

¹² Dhiladhila kwaashika. Uuna to popi nookuume koye, mbela oto ka kala owala to popi unene e taya kala owala ye na okampito okashona kokupopya sha? Aawe, hasho to ka ninga. Owa hala nayo ya kuthe ombinga moonkundathana. Sha faathana, pokugongala otwa hala tu pe aantu oyendji ompito ngaashi tashi vulika ya gandje omatyokosha. Nokuli omukalo gumwe gwa dhenga mbanda gwokutsa omukumo aamwatate naamwameme, omoku ya pa ompito ya popye kombinga yeitaalo lyawo. (1 Kor. 10:24) Natu taleni nkene tatu vulu oku shi ninga.

13. Ongiini tatu vulu okupa yalwe ompito nayo ya gandje etyokosha?

¹³ Oshinima shimwe osho kutya otatu vulu okugandja omatyokosha omafupi, kungawo otatu ka pa yalwe ompito nayo ya kuthe ombinga. Aakuluntugongalo naauvithi yalwe ya pyokoka, otaya vulu okutula po oshiholelwa moshinima shika. Nonando oto gandja etyokosha efupi, yanda okupopya kombinga yiitsa oyindji unene. Ngele owa popi ashihe shoka shi li mokatendo, yalwe itaya ka kala naanaa ye na oshindji okutya. Pashiholelwa, mokatendo hano, otwa pewa mo omaetopo gaali, ano okugandja omatyokosha omafupi nokuyanda okupopya iitsa oyindji unene. Ngele ongoye wa tumbulwa tango wu gandje etyokosha mokatendo hano, omolwashike itoo popi owala kombinga yoshitsa shimwe shomiitsa mbika?

14. Oshike tashi vulu oku tu kwathela tu tokole kutya iikando ingapi tatu ka ganeka? (Tala wo ethano.)

¹⁴ Longitha oondunge dhokuyoolola uuna to tokola kutya iikando ingapi to gandja omatyokosha. Ngele otwa kala tatu ganeke iikando oyindji unene, otashi vulika shi ningithe ngoka ta kwatele komeho e tu tumbule lwiikando, nokuli nando yalwe inaya mona natango ompito yokugandja omayamukulo. Shoka otashi vulu okuteya yalwe omukumo e taya kala itaaya ganeke we. — Omuuv. 3:7.

15. (a) Otu na okwiinyenga ngiini ngele inatu tumbulwa tu gandje etyokosha? (b) Oshike tashi vulu okukwathela aamwatate mboka haya kwatele komeho ya gandje ompito kaantu oyendji ya yamukule? (Tala oshimpungu “ Uuna to kwatele komeho.”)

¹⁵ Ngele aauvithi oyendji oya ganeke pethimbo lyekonakono, otashi vulika kaatu mone oompito odhindji ngaashi twa hala dhokugandja omatyokosha. Omathimbo gamwe, omumwatate ngoka ta kwatele komeho, otashi vulika a kale itaa vulu oku tu tumbula nandonando. Naashono otashi vulu oku tu teya omukumo, ihe inatu ninga omwenyo omwiinayi, uuna inaatu tumbulwa. — Omuuv. 7:9.

16. Ongiini tashi vulika tu tse yalwe omukumo mboka ya gandja omayamukulo?

¹⁶ Ngele ito vulu okuyamukula olundji ngaashi wa hala, omolwashike itoo pulakene nawa yalwe sho taya yamukula, e to ke ya pandula konima yokugongala omolwomayamukulo ngoka ya gandja? Aamwaho naamwanyoko otashi vulika ya ka kale ye wete kutya olupandu lwoye olwe ya tsa omukumo, ngaashi naanaa omayamukulo ngoka wa li wu na okugandja. (Omayel. 10:21) Okupandula yalwe nako oku li omukalo gulwe moka tatu vulu okutsaathana omukumo.

17. (a) Ongiini aavali taya vulu okukwathela oyana yi ilongekidhe okugandja omatyokosha taga opalele? (b) Shi ikolelela kokavidio, iitsa ine yini tayi vulu oku tu kwathela uuna tatu ilongekidha omatyokosha? (Tala wo enyolo lyopevi.)

¹⁷ Ongiini tatu vulu ishewe okutsaathana omukumo pokugongala kwetu? Ngele ngoye omuvali,  kwathela aamwoye yi ilongekidhe omatyokosha gi ikolelela komimvo dhawo. (Mat. 21:16) Omathimbo gamwe oshitopolwa shoka tashi kundathanwa megongalo otashi vulika shi kale tashi popi kombinga yiinima ya kwata miiti, ngaashi omaupyakadhi gomondjokana nenge iinima yopamikalo, ihe otashi vulika pu kale okatendo kamwe nenge uyali mboka okanona taka vulu okutya ko sha kuwo. Shimwe ishewe, kwathela aamwoye yu uve ko kutya omolwashike tashi vulika kaaya tumbulwe oshikando kehe taya ganeke. Ngele owe shi ya yelithile, otashi vulu oku ya kwathela kaaya yemate uuna yalwe oyo ya tumbulwa. — 1 Tim. 6:18. d

18. Ongiini tatu vulu okuyanda okugandja eitulomo kutse yene, uuna tatu gandja eyamukulo? (Omayeletumbulo 27:2)

¹⁸ Atuheni otatu vulu okwiilongekidha omatyokosha taga tungu, ngoka taga simanekitha Jehova notaga tsu omukumo Aakriste ooyakwetu. (Omayel. 25:11) Nonando poompito dhimwe otashi vulika tu gandje iimoniwa yetu paufupi, otu na okuyanda okupopya unene kombinga yetu yene. (Lesha Omayeletumbulo 27:2; 2 Kor. 10:18) Pehala lyaashono, ohatu kambadhala okugandja eitulomo kuJehova, kOohapu dhe nokoshigwana she. (Eh. 4:11) Odhoshili kutya ngele epulo lyokatendo kontumba otali tu pula tu popye oshimoniwa shopaumwene, oshi li nawa tu shi ninge. Oshiholelwa shimwe kombinga yaashoka, oshi li mokatendo taka landula ko.

19. (a) Oshizemo otashi ka kala shini ngele ohatu pe yalwe oompito dhokuyamukula pokugongala? (Aaroma 1:11, 12) (b) Oshike wa pandula paumwene shi na ko nasha nokuyamukula pokugongala?

¹⁹ Nonando kapu na oompango tadhi dhengele, kombinga yankene tu na okugandja omayamukulo, atuheni otatu vulu okukambadhala okutsaathana omukumo. Shika otashi vulu okukala sha kwatela mo okugandja omayamukulo lwiikando. Nenge otashi vulika tu kale twa gwanenwa koompito ndhoka twa pewa tu yamukule, nokukala twa nyanyukwa sho yalwe nayo ye na ompito yokuyamukula. Ngele otwa kala tatu gandja eitulomo kuuwanawa wayalwe megongalo, atuheni otatu ka nyanyukilwa “okutsaathana omukumo.” — Lesha Aaroma 1:11, 12.