1, 2. (a) Ondjokana oya tameke ngiini? (b) Omulumentu nomukiintu gwotango oya dhimbulula shike mondjokana? (Tala kethano lyopetameko.)

ONDJOKANA oyi li lela oshitopolwa shonkalamwenyo. Okukala tu shi mpoka pwa tamekela ondjokana nosho wo elalakano lyayo, otashi ke tu kwathela tu kale netaloko ewanawa notu nyanyukilwe lela omalaleko nuuyamba gayo. Sho Kalunga a shiti omulumentu gwotango, Adam, okwe mu etele iinamwenyo, opo e yi luke omadhina. Ihe Adam “ini imonena omukwathi e mu opalela.” Onkee ano, Kalunga okwa kotheke Adam oomposi oondhigu, e ta kutha mo olupati lumwe muye nokwe lu shiti omukiintu e te mu eta komulumentu. (Lesha Genesis 2:20-24.) Ano ondjokana oya dhikwa po kuKalunga.

² Jesus okwe shi koleke kutya Jehova okwa ti: “Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe.” (Mat. 19:4, 5) Sho Kalunga a kutha olupati muAdam e te lu shiti omukiintu gwotango, osha ningitha aaihokani yotango ya kale ye na ekwatathano lya kola. Kapwa li elongekidho lyokuhengathana nenge lyokukala ye na ookuume kopandjokana ye vulithe pugumwe.

3. Elalakano lyasimana lyondjokana olya li lyashike?

³ Adam okwa li a nyanyukilwa omukulukadhi gwe omwaanawa ngoka konima yethimbo e mu luku Eva. Okwa li “omukwathi e mu opalela.” Oya li haya nyanyukilwa pamwe esiku kehe mokugwanitha po iinakugwanithwa yawo ye li omusamane nomukulukadhi. (Gen. 2:18) Elalakano lya simana lyondjokana olya li okuudhitha evi alihe aantu. (Gen. 1:28) Nonando aamati naakadhona oye hole aavali yawo, oye na oku ya thiga po ya ye mondjokana nokuninga omagumbo gawo. Aantu oya li ye na okuudhitha evi noku li ninga alihe oparadisa.

4. Oshike sha li sha ningilwa ondjokana yotango?

⁴ Ondjokana yotango oya li yi na omaupyakadhi, molwaashoka Adam naEva oya hogolola okulongitha nayi emanguluko lyawo mokukala inaaya vulika kuJehova. “Eyoka” ndyoka hali ithanwa Satana Ondiyapoli, olya hongolola Eva i itaale kutya ngele okwa li “komuti gwokutseya uuwanawa nuuwinayi,” otagu ke mu pa otseyo yi ikalekelwa ndjoka tayi mu kwathele a tokole kuye mwene shoka shi li mondjila naashoka sha puka. Oku ulike kutya ina simaneka omusamane gwe sho inee mu pula tango kombinga yoshinima shoka. Pehala lyokuvulika kuKalunga, Adam okwa taamba oshiyimati shoka a pewa kuEva.—Eh. 12:9; Gen. 2:9, 16, 17; 3:1-6.   

5. Oshike tatu ilongo kunkene Adam naEva ya li yi inyenge sho Jehova e ya pula kutya omolwashike inaaya vulika?

⁵ Adam sho a pulwa kuKalunga kutya omolwashike inaa vulika, okwa pe omukadhi ombedhi, a ti: “Omukiintu nguka wa pe ndje, oye a pe ndje iiyimati e tandi yi li.” Eva okwa pe eyoka ombedhi, ta ti kutya olyo lye mu pukitha. (Gen. 3:12, 13) Adam naEva oyi ipopile sho ya mono kutya inaya vulika, Jehova nokwe ya pangula. Oshiholelwa shawo kashi li tuu elondodho kutse! Opo ondjokana yi pondole, aaihokani ayehe oye na okutaamba ko oshinakugwanithwa shawo nokuvulika kuJehova.

6. Oto yelitha ngiini Genesis 3:15?

⁶ Kakele kaashoka Satana a li a ningi muEden, Jehova okwa si oshimpwiyu, opo aantu ya kale ye na etegameno lyonakuyiwa. Shoka okwe shi popi mehunganeko lyotango lyomOmbiimbeli. (Lesha Genesis 3:15.) Ehunganeko ndyoka otali ulike kutya Satana ota ka nyanyagulwa ‘koluvalo’ ‘lwomukiintu.’ Jehova okwa pe aantu uuyelele paufupi wu na ko nasha nekwatathano lyi ikalekelwa ndyoka e na noongundu dhaayengeli aadhiginini mboka taye mu longele megulu. Omanyolo oga holola kutya Kalunga ota ka tuma gumwe gwomehangano lye lyomegulu, ndyoka lya fa omukiintu gwe, a ‘nyanyagule po’ Satana. Aantu aavuliki otaya ka nyanyukilwa shoka sha kanithwa kaantu yotango, ano etegameno lyokukala nomwenyo sigo aluhe kombanda yevi ngaashi sha li elalakano lyaKalunga lyopetameko.—Joh. 3:16.

7. (a) Oshike sha li sha ningilwa ondjokana okuza sho Adam naEva inaaya vulika? (b) Ombiimbeli oya ti kutya aasamane naakulukadhi oye na okuninga shike?

⁷ Okwaavulika kwaAdam naEva okwa guma ondjokana yawo nosho wo oondjokana adhihe ndhoka dha ka landula ko. Pashiholelwa, Eva nosho wo aakiintu yomoluvalo lwe ohaya mono uuwehame woshitheta shokuvala. Aakiintu otaya ka kala nokuyuulukwa aasamane yawo, ihe aasamane otaye ke ya pangela. Ngaashi hatu shi mono moondjokana kunena, aasamane ohayu ugaunga nayi naakulukadhi yawo. (Gen. 3:16) Ombiimbeli oya ti kutya aasamane oye na okulongitha uukwamutse wawo pahole. Oya ti wo kutya aakulukadhi oye na okuvulika kuukwamutse waasamane yawo. (Ef. 5:33) Ngele aaihokani ohaya tila Kalunga, omaupyakadhi ogendji otaya ka vula oku ga kandula po.

8. Ondjokana oya li ngiini okuza pethimbo lyaAdam sigo opethimbo lyaNoa?

⁸ Adam naEva oya mono aanona aamati naakadhona, manga uulunde nokwaagwanenena inaayi ye etela eso. (Gen. 5:4) Omwanamati gwawo gwotango, Kain, okwa hokana gumwe gwomaapambele ye. Lamek omwana gwaKain oye gwotango a popiwa a li e na aakulukadhi yaali. (Gen. 4:17, 19) Okuza kepipi lyAdam sigo opethimbo lyEyelu lyaNoa, aantu owala ashona ya li aalongeli yaJehova. Yamwe yomuyo oAbel, Enok, Noa nuukwanegumbo we. Ombiimbeli oya ti kutya pethimbo lyaNoa, “aamati aana yaKalunga oya tala aakadhona aana yaantu yo opala noya hokana mboka ye yi ihogololele.” Oshinima shika kasha li paunshitwe, onkee ano, aayengeli naantu oya vala aanona yoombinzi mbali aanankondo, hayi ithanwa Aalefule. Ombiimbeli otayi ti kutya ‘uuwinayi waantu kombanda yevi owi indjipala nomadhiladhilo gawo oga li ga pilaala ethimbo alihe.’—Gen. 6:1-5.

9. Jehova okwa li a ningile shike aakolokoshi yopethimbo lyaNoa, noshike tatu ilongo mwaashoka sha ningilwe pethimbo ndyono?

⁹ Jehova okwa ti kutya ote ke eta eyelu pethimbo lyaNoa, opo a hanagule po aakolokoshi. Pethimbo ndyoka aantu oya li yi ipyakidhila niinima yonkalamwenyo, ngaashi okuhokana. Kaya li ye na ko nasha naashoka “Noa, omuuvithi guuyuuki” a li te ya lombwele kombinga yehanagulo ndyoka lya li pokuya. (2 Pet. 2:5) Jesus okwa yelekanitha oonkalo dhopethimbo ndyoka naandhoka dhopethimbo lyetu. (Lesha Mateus 24:37-39.) Kunena aantu oyendji inaya hala okupulakena konkundana ombwanawa yUukwaniilwa, ndjoka tayi uvithwa muuyuni awuhe yi ningile iigwana ayihe uunzapo manga uuyuni mbuka wa kolokosha inaawu hulithwa po. Katu na nando okweetha iinima, ngaashi ondjokana nokuputudha aanona oyo yi kale iinima ya simanenena e tatu dhimbwa kutya esiku lyaJehova oli li popepi.

10. (a) Momaputuko ogendji aantu oya li ya thowela shike? (b) Abraham naSara oya tula po oshiholelwa oshiwanawa shini mondjokana yawo?

¹⁰ Nonando Noa noyanamati yatatu, kehe gumwe okwa li owala e na omukulukadhi gumwe, aantu yopethimbo lyawo oya li haya hokana ombanda. Momaputuko ogendji, oluhondelo olwa li kehe pamwe, nokuli nomomalongelokalunga. Sho Abram (Abraham) nomukadhi Sarai (Sara) ya vulika kuJehova e taya yi kuKaanana, oshilando shoka osha li shu udha aantu ihaaya simaneke ondjokana. Jehova okwa li a tseyitha kutya Sodom naGomorra otashi ka hananagulwa po, molwaashoka aantu yamo oya li ya thowela oluhondelo. Abraham okwa li a sile nawa oshimpwiyu aanegumbo lye, na Sara okwa li a tula po oshiholelwa oshiwanawa shokuvulika kuukwamutse womusamane gwe. (Lesha 1 Petrus 3:3-6.) Abraham okwa li a si oshimpwiyu, opo omwana Isak a hokane omukiintu ngoka ha longele Jehova. Isak naye osho a li a ningile omwana Jakob, ngoka oyanamati ya ka ninga oohekulululwa yomazimo 12 gaIsraeli.

11. Ompango yaMoses oya li ya gamene ngiini Aaisraeli?

¹¹ Konima yethimbo Jehova okwa ningi ehangano noshigwana shaIsraeli. Pethimbo lyonale Ompango yaMoses oya li ya wilike Aaisraeli kaaya hokane ombanda. Oya li wo ya gamene Aaisraeli kaaya hokane naantu yomomalongelokalunga giifundja. (Lesha Deuteronomium 7:3, 4.) Ngele uupyakadhi wa kwata miiti wa holoka mondjokana, olundji owa li hawu ungaungwa nawo kaakuluntugongalo. Aantu mboka kaaye shi aainekelwa,  ye na uukodhi noye na omalimbililo, oya li hayu ungaungwa nayo momukalo omwaanawa. Ehengathano olya li lya pitikwa, ihe olya li lyi na ongamba. Omulumentu okwa li ta vulu okuhenga po omukudhi ngele “a mono muye ombedhi yasha.” (Deut. 24:1) “Ombedhi” ndjoka inayi popiwa kutya oyashike, ihe ite mu henge po owala molwuupuko wanathangwa.—Lev. 19:18.

12, 13. (a) Aasamane yamwe oya li haya ungaunga ngiini naakulukadhi yawo pethimbo lyaMaleaki? (b) Kunena ngele omuntu ngoka a ninginithwa okwa yi moluhondelo nakuume kopandjokana gwamukwawo, iilanduliko ohayi kala yini?

¹² Pethimbo lyomupolofeti Maleaki, aasamane oyendji Aajuda oya li haya henge po aakulukadhi yawo miineya. Aasamane mboka oya li haye etha po aakulukadhi yawo mboka ya za nayo kuugundjuka, e taya hokana aakiintu aagundjuka nenge nokuli aakiintu aapagani. Sho Jesus a li kombanda yevi, aalumentu Aajuda oya li natango haya henge po aakulukadhi yawo miineya “omolwoshinima kehe.” (Mat. 19:3) Jehova oku tonde eteyo lyoondjokana.—Lesha Maleaki 2:13-16.

¹³ Kunena okwaanuudhiginini kukuume kopandjokana inaku pitikwa mokati koshigwana shaJehova. Ihe natu tye nduno omusamane nenge omukulukadhi a ninginithwa okwa yi moluhondelo e ta hengana, opo a hokane nenge a hokanwe kwaangoka a yi naye moluhondelo. Omuntu ngoka ngele ini iyela ombedhi, oku na okukondwa, opo egongalo li kalekwe lya yela. (1 Kor. 5:11-13) Manga inaa galulilwa megongalo, oku na ‘okwiimika iiyimati mbyoka tayi holola kutya okwi itedhulula’ shili. (Luk. 3:8; 2 Kor. 2:5-10) Inapu tulwa ethimbo lyokondandalunde ndyoka li na okupita po, opo omuntu a galulilwe megonga. Ihe okwaanuudhiginini hoka haku holoka po omathimbo gamwe mokati kaamboka haye endathana noshigwana shaJehova, oku na okuyandwa. Otashi vulika shi kuthe ethimbo ele, omvula nenge oomvula odhindji, opo ngoka a yona u ulike kutya okwiiyela ombedhi shili. Nonando omuntu ngoka okwa galulilwa megongalo natango ‘ota ka thikama koshipala shaKalunga, a pangulwe kuye.’—Rom. 14:10-12; Tala Oshungolangelo (yOshiingilisa) yo 15 Novomba 1979, ep. 31-32.

14. Elalakano lyOmpango olya li lyashike?

¹⁴ Aaisraeli oya kala taya wilikwa kOmpango yaMoses uule womimvo 1 500. Ompango oya li ya kwathele oshigwana shaKalunga shi kaleke momadhiladhilo omithikampango ndhoka tadhi vulu oku shi kwathela shu ungaunge nomaupyakadhi gomomagumbo noya kala omuputudhi gwawo sigo Mesiasa e ya. (Gal. 3:23, 24) Sho Jesus a si, ompango oya hulu, na Kalunga okwa ningi po elongekidho epe. (Heb. 8:6) Onkee ano, iinima mbyoka ya li ya pitikwa kOmpango yaMoses, kaya li we ya pitikilwa Aakriste.

15. (a) Omithikampango dhondjokana ndhoka tadhi popilwa megongalo lyopaKriste odhini? (b) Omukriste oku na okudhiladhila iinima yini manga inaa tokola okuhenga po kuume ke kopandjokana?

¹⁵ Jesus okwa li a yamukula epulo ndyoka lya pulwa kAafarisayi a ti kutya mOmpango yaMoses omwa li mwa pitikwa ehengathano, nonando “hasho sha li ngaaka petameko.” (Mat. 19:6-8) Jesus oku ulike kutya omithikampango dhaKalunga ndhoka dha tulilwe po moshikunino shaEden, dhi na ko nasha nondjokana odho dhi na okulandulwa momagongalo gopaKriste. (1 Tim. 3:2, 12) Molwaashoka aaihokani oye li “omuntu gumwe,” oye na okwiimanga kumwe, e taye etha ohole yaKalunga noyawo yene yi ya hanganithe. Omuntu ina pitikwa we a ye mondjokana nagulwe ngele okwa henge po paveta kuume ke kopandjoka nokaapu na etompelo  lyokuya moluhondelo. (Mat. 19:9) Osha yela kutya omuntu ota vulu okudhimina po kuume ke kopandjokana ngoka i iyela ombedhi, ngaashi omupolopfeti Hosea a li a dhimine po omukulukadhi gwe, Gomer, ngoka a li a yi moluhondelo. Sha faathana, Jehova okwa li a sile ohenda Aaisraeli mboka ya li yi iyela ombedhi sho ya longele iikalunga. (Hos. 3:1-5) Oshikwawo, ngele owu shi kutya kuume koye kopandjokana okwa ya moluhondelo e to tsikile okukala ho yi pamwe naye momilalo, nena otashi ulike kutya owe mu dhimina po nowu na ehalo okutsikila nondjokana yeni. Ano mwaashono etompelo lyopamanyolo lyokwiihenga nokuya mondjokana nagulwe itali longo we.

16. Jesus okwa popi shike kombinga yaamboka inaaya ya mondjokana?

¹⁶ Jesus okwa popi kutya mokati kAakriste kamu na ompango tayi popile ehengathano kakele ngele omuntu a yi moluhondelo. Okwa popi wo kombinga ‘yaamboka ya pewa omagano’ gokwiikalela. Okwa gwedhako a ti: “Oongoka ta vulu oku dhi taamba, ne dhi taambe.” (Mat. 19:10-12) Aantu oyendji oya hogolola okukala inaaya ya mondjokana, opo ya longele Jehova itaaya piyaganekwa kusha. Mboka taye shi ningi otaya pandulwa.

17. Oshike tashi vulu okukwathela Omukriste a tokole ngele ota yi mondjokana?

¹⁷ Kashi na nduno mbudhi kutya owa hala okwiikalela nenge owa hala okuya mondjokana, shono ehogololo lyomuntu mwene. Omuntu oye mwene ta tokola ngele ota vulu ngaa shili okwiikalela. Omuyapostoli Paulus okwa popile muuwanawa mboka inaaya ya mondjokana, ihe okwa ti wo: “Omoluuhalu woluhondelo omulumentu kehe oku na okukala e na omukiintu gwe mwene, nomukiintu kehe oku na okukala e na omulumentu gwe mwene.” Okwa gwedha ko a ti: “Ihe ngele itamu shi vulu, indeni moondjokana, oshoka okuya moondjokana okuhwepo ku vule okuhepekwa kehalo.” Okuya mondjokana otaku vulu okukwathela omuntu a yande okwiidhanena kiilyo yoluvalo nenge kaa ye moluhondelo. Kaleke kaashono, tango omuntu owu na okutala ngele owa gwana tuu shili okuya mondjokana. Paulus okwa ti ishewe: “Kombinga yayaali ya adhika ya yalekathana e taa tokola, yi idhilike oondjokana, otandi ti: Omumati ngele ita vulu okwiidhidhimika, nena naa hokane. Ngele taa hokana, itaa yono.” (1 Kor. 7:2, 9, 36; 1 Tim. 4:1-3) Nonando ongawo, omuntu ke na okuthiminikwa komahalo gomuugundjuka a hokane nenge a hokanwe. Otashi vulika inaa koka natango nokutaamba ko iinakugwanithwa yomondjokana.

18, 19. (a) Aakriste oye na okuya moondjokana naantu yeni? (b) Otatu ka kundathana shike moshitopolwa tashi landula?

¹⁸ Aalumentu owala naakiintu mboka yi iyapulila Jehova noye mu hole nomutima aguhe, ye na okuya moondjokana dhopaKriste. Oye na wo okukala ye holathane lela e taya kala ya hangana mondjokana yawo. Jehova ote ke ya yambeka, molwaashoka ya landula omayele ‘gokuhokana paukriste.’ (1 Kor. 7:39) Ngele ya hokana, otaye ke shi zimina lela kutya Ombiimbeli otayi gandja omayele omawanawa ngoka taga kwathele ondjokana yawo yi pondole.

¹⁹ Moshitopolwa tashi landula otatu ka kundathana iitsa yopaMbiimbeli mbyoka tayi vulu okukwathela aaihokani Aakriste ya vule okukondjitha omashongo ‘momasiku ngaka gahugunina,’ (NW) moka aalumentu naakiintu oyendji ye na iikala mbyoka itaayi ya kwathele ya pondole moondjokana dhawo. (2 Tim. 3:1-5) Jehova okwe tu lombwele mOohapu dhe dhi na ondilo shoka twa pumbwa, opo tu pondole notu kale twa nyanyukwa mondjokana sho tatu tsikile okweenda pamwe noshigwana she mondjila ndjoka tayi fala komwenyo gwaaluhe.—Mat. 7:13, 14.