Jesus naalongwa ye oya li ya pewa uusama kaatondi yawo, molwaashoka haya li niikaha inaayi yogwa. Ompango yaMoses oya li ya yelitha kutya oshike tashi vulu okunyateka omuntu. Pashiholelwa, oya li ya popi iinima ngaashi okuguma omuntu a nika oshidhila, omuntu e na omukithi gwoshilundu nosho wo okuguma omudhimba nenge oshiinamwenyo sha sa. Oya li wo ya gandja omalombwelo gankene omuntu ngoka a nyata ta vulu okukala a yogoka. Oga li ga kwatela mo okugandja eyambo, okwiiyoga nenge okwiishashamina omeya.—Lev., ontop. 11-15; Num., ontop. 19.

Aalongi Aajuda mompango oya li ya gwedha mo iinima yawo yene. Embo limwe olya ti kutya aalongi Aajuda mompango oya gwedha mo oompango odhindji dhi na ko nasha naashoka tashi vulu okunyateka omuntu nankene ta vulu okunyateka yalwe. Oya li ya tula po oompango dhi na ko nasha niinima mbyoka hayi longithwa tayi vulu okunyateka omuntu naambyoka ya li itaayi mu nyateke. Oya li wo ya tula po omilandu ndhoka aantu ya li ye na okulandula, opo ya kale ya yogoka.

Aapataneki yaJesus oya li ye mu pula ya ti: “Omolwashike ano aalongwa yoye ihaa dhiginine omithigululwakalo dhaakulu yonale, sho haa li niikaha inaayi yogwa?” (Markus. 7:5) Aatondi mboka kaya li taya popile shili uuyogoki. Oya li ya tula po omulandu kutya omuntu okwa li e na okutilwa omeya kiikaha manga inaa tameka okulya. Embo ndyoka lya popiwa metetekelo olya gwedha ko lya ti: “Oya li wo haya kundathana kutya iikwatelwa yini yi na okulongithwa okutila omeya koonyala, omeya geni ge na okulongithwa, olye e na oku shi ninga nosho wo kutya iikaha oyi na okutilwa omeya ge thike peni.”

Jesus okwa li a tala ko ngiini oompango ndhoka dha li dha tulwa po kaantu? Okwa li a lombwele aawiliki yelongelokalunga lyOshijuda yomethelemimvo lyotango a ti: “Jesaja okwe mu hunganekele dha tsa omoluufudhime weni, ngaashi a nyola: ‘Aantu mbaka ohaa simaneke ndje owala noohapu dhomokana, ihe omitima dhawo odhi li kokule nangame [Jehova]. Okulongela ndje kwawo osima yowala, oshoka otaa longo omalongo gopaipango yaantu.’ ‘Otamu etha oshipango shaKalunga e tamu dhiginine omalongo gaantu.’”—Markus 7:6-8.