1. Nonando ondjokana olundji ohayi tameke nenyanyu, mboka taya yi mondjokana oya tegelela shike? (Tala kethano lyopetameko.)

UUNA omufuko ta ka tsakaneka ombushiki mesiku lyohango yawo iitya nomatumbulo ohayi kala ya pwa po omolwenyanyu ndyoka ye na. Pethimbo taye endelathana, ohole yawo ohayi ende tayi koko noonkondo nohaya kala yi ilongekidha okugana kutya otaya ka kala ye holathane. Odhoshili kutya ngele ya hokana omalunduluko ohaga kala ga pumbiwa, opo ya kale ya hangana mondjokana yawo. Ihe Oohapu dhaKalunga otadhi gandja omayele omawanawa kwaayehe mboka ya hala okuya mondjokana, molwaashoka Omutotipo gwondjokana okwa hala aaihokani ayehe ya kale ya nyanyukwa notaya pondola moondjokana dhawo. (Omayel. 18:22) Ihe nonando ongawo, Ombiimbeli otayi tu lombwele sha yela kutya aantu inaaya gwanenena mboka taya yi mondjokana otaya ka kala ye na ‘uudhigu mokukalamwenyo.’ (1 Kor. 7:28) Uudhigu mboka otawu vulu okushonopekwa ngiini? Oshike tashi ka kwathela oondjokana dhAakriste dhi pondole?

2. Oohole dholudhi luni ookuume kopandjakana ye na okuulukilathana?

² Ombiimbeli otayi tsu omuthindo kutya ohole oshinima sha simana. Ohole ndjoka hayi kala pokati kookuume hayi ithanwa (mOshigreka,  phi·liʹa) oya pumbiwa mondjokana. Ohole ndjoka hayi kala pokati komusamane nomukulukadhi hayi ithanwa (eʹros) ohayi nyanyudha, nohole yokuhola aanegumbo hayi ithanwa (stor·geʹ) oya simanenena uuna pwa holoka aanona. Ihe ohole ndjoka ya kankamena komithikampango, hayi ithanwa (a·gaʹpe), ohayi kwathele ondjokana yi kale tayi pondola. Omuyapostoli Paulus okwa popi kombinga yohole ndjoka, a ti: “Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.”—Ef. 5:33.

3. Ohole oyi na okukala ya kola shi thike peni mondjokana?

³ Paulus okwa ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Ef. 5:25) Uuna aalanduli yaJesus taya landula oshiholelwa she, otaya ka kala ye holathane ngaashi naanaa e ya hole. (Lesha Johannes 13:34, 35; 15:12, 13.) Ohole ndjoka hayi kala pokati kaaihokani Aakriste oyi na okukala ya kola notayi vulu nokuli okuningitha gumwe gwomuyo a kale a hala okusa peha lyamukwawo, uuna sha pumbiwa. Ihe uuna pwa holoka uupyakadhi wa kwata miiti, ookuume kopandjokana yamwe ohaya kala yu uvite kutya ohole yawo inayi kola. Kakele kaashono, ohole ndjoka hayi ithanwa a·gaʹpe “ihayi tonyala, ihe otayi itaale, tayi tegamene e tayi idhidhimike sigo okehulilo.” Ano ‘ihayi hulu po.’ (1 Kor. 13:7, 8) Ngele aaihokani aatilikalunga ohaya dhimbulukwa egano lyawo ndyoka ya ninga kutya oye na okukala ye holathane nokukala yi inekelathana, otashi ya kwathele ya kale haya tsu kumwe nomakotampango gaJehova ga dhenga mbanda. Otashi ya kwathele wo ya kale haya vulu okukandula po omaupyakadhi ngoka taga holoka mondjokana yawo.

4, 5. (a) Oshinakugwanithwa shomusamane e li omutse gwuukwanegumbo oshashike? (b) Omukulukadhi oku na okukala a tala ko ngiini omutse gwuukwanegumbo? (c) Aaihokani yamwe oya ningi omalunduluko geni?

⁴ Paulus okwa tsu omuthindo iinakugwanithwa yookuume kopandjokana a ti: “Aakulukadhi naya kale haya vulika kaasamane yawo ngaashi haya vulika kOmuwa. Oshoka omusamane oye omutse gwomukulukadhi, ngaashi Kristus oye omutse gwegongalo.” (Ef. 5:22, 23, NW) Elongekidho ndika itali ti kutya omukulukadhi oku vulike komusamane gwe. Otali kwathele omukulukadhi a kale ha gwanitha po iilonga mbyoka Kalunga a nunina aakulukadhi, sho a ti: “Inashi opala, omuntu i ikalele oye awike. [Adam] otandi mu shitile omukwathi e mu opalela.” (Gen. 2:18) Ngaashi naanaa Kristus e li “omutse gwegongalo” hu ulike ohole, omusamane Omukriste oku na okulongitha uukwamutse we pahole. Uuna te shi ningi, omukadhi ota kala u uvite e li megameno nota kala a mbilipalelwa, he mu ambidhidha noha vulika kuye.

⁵ Cathy ^[1] ngoka a hokanwa kuFred okwe shi zimine kutya opo ondjokana yi ende nawa owa pumbwa okuninga omalunduluko. Okwa ti: “Sho nda li inee hokanwa onda li handi kala nda manguluka nohandi ningi shaa shoka nda hala. Ondjokana oya li oshinima oshipe kungame moka nda li tandi ilongo nkene ndi na okukala handi vulika komusamane gwandje. Kasha li hashi kala aluhe oshipu, ihe sho twa kala hatu ningi iinima ngaashi Jehova a hala, oshe tu kwathele tu itseye nawa.” Omusamane gwe Fred, ota ti: “Kasha li nando oshipu kungame okuninga omatokolo. Tu li aantu inaatu gwanenena mondjokana, kashi shi oshipu okuungaunga nomashongo. Ihe okukonga ewiliko lyaJehova okupitila megalikano nokupulakena komaetopo gomukulukadhi gwandje, oshe ende tashi ningi oshipu esiku nesiku. Onda li ndu uvite lela tu li omuntu gumwe.”

6. Ongiini ohole yi li “epaya tali vulu okumangela iinima ayihe kumwe” uuna uupyakadhi wa holoka mondjokana?

⁶ Ondjokana ya kola ohayi vulu owala okukala po ngele aaihokani ihaya gandja eitulomo komaunkundi gawo. Aaihokani ohaya ‘kwathathana nohaya dhiminathana po oondjo ethimbo kehe, uuna pu na ngoka a ningathana namukwawo.’ Molwaashoka aaihokani ayehe inaya gwanenena, ohaya ningi omapuko. Ngele ga holoka  po, otaya vulu okwiilonga komapuko gawo ngoka, e taya dhiminathana po nokweetha ohole oyo yi kale “epaya tali vulu okumangela iinima ayihe kumwe.” (Kol. 3:13, 14) Noshikwawo, ‘ohole ohayi idhidhimikile ayihe noihayi dhimbulukwa uuwinayi ye u ningilwa.’ (1 Kor. 13:4, 5) Okwaauvatha oku na okukandulwa po mbala ngaashi tashi vulika. Aaihokani Aakriste oye na okuninga oonkambadhala ya kandule po uupyakadhi manga etango inaali ningina. (Ef. 4:26, 27) Otashi pula eifupipiko nomukumo okutya “ombili sho nde ku uvitha nayi,” ihe oku shi ninga otaku mu kwathele mu kandule po uupyakadhi notaku koleke ekwatathano lyeni mu li aaihokani.

7, 8. (a) Ombiimbeli otayi gandja omayele geni kaaihokani ge na ko nasha nokuya momilalo? (b) Omolwashike kehe gumwe mondjokana a pumbwa okuyaalela mukwawo?

⁷ Ombimbeli otayi gandja omayele omawanawa ngoka taga vulu okukwathela aaihokani ya kale ye na etaloko ewanawa li na ko nasha nomilalo. (Lesha 1 Aakorinto 7:3-5.) Okuyaalela omaiyuvo gakuume koye kopandjokana nosho wo oompumbwe dhe okwa simanenena. Ngele omusamane ihu ungaunga nomukadhi nohenda, otashi vulika shi kale oshidhigu kuye okunyanyukilwa omilalo. Aasamane oya lombwelwa ya ‘kale noondunge’ naakulukadhi yawo. (1 Pet. 3:7, OB-1954). Aaihokani kaye na okukala haya thiminikilathana okuya momilalo, ihe oye na oku shi ninga pompito ndjoka tayi ya opalele ayehe. Olundji omahalo gopamilalo gomusamane ohage ya mbala ge vule gomukulukadhi, nomolwaashono e na okuyaalela omayiuvo gomukadhi.

⁸ Ombiimbeli inayi gandja oompango dhokondandalunde kombinga yankene omusamane nomukadhi ye na okuulukilathana ohole nosho wo kutya oye na oku shi ninga shi thike peni. Ihe oya tumbula omikalo dhokuulukilathana ohole. (Ondjimb. 1:2; 2:6) Aaihokani Aakriste oye na okukala haya yaalelathana.

9. Omolwashike okukala twa hala okuya momilalo nagumwe ngoka kee shi kuume ketu kopandjokana kwiindikwa?

⁹ Ngele ohole yetu yokuhola Jehova nosho wo yalwe oya kola, itatu ke etha nando osha shi yone po ondjokana yetu. Oondjokana dhimwe odha teka po, molwaashoka kuume kopandjokana gumwe a pikwa komathano giipala. Otwa pumbwa okukondjitha iikala kehe iiwinayi mbyoka tayi tu ningitha tu kale twa hala okuya momilalo naantu mboka kaaye shi ookuume ketu kopandjokana. Otwa pumbwa wo okuyanda kehe shimwe shoka tashi tu monikitha twa fa tatu dhana nomaiyuvo gagulwe ngoka kee shi kuume ketu kopandjokana. Uuna tu shi kutya Kalunga oku shi omadhiladhilo getu agehe noonkantu kehe tatu katuka, otatu ka kala twa hala oku mu nyanyudha nokukala twa yogoka.—Lesha. Mateus 5:27, 28; Aahebeli 4:13.

10, 11. (a) Ehengathano olyi indjipala shi thike peni? (b) Ombiimbeli otayi ti shike kombinga yetopoko? (c) Oshike tashi kwathele aaihokani kaaya topoke?

¹⁰ Uuna omaupyakadhi ga kwata miiti ga holoka mondjokana ohashi vulika ga ningithe kuume kopandjokana gumwe nenge ayehe ya topoke nenge ya hengathane. Miilongo yimwe, oondjokana dhi vulithe petata ohadhi teka. Oshinima shika ihashi ningwa naanaa apuhe momagongalo gopaKriste, ihe nonando ongaaka, moondjokana odhindji dhaapiya yaKalunga ohamu holoka omaupyakadhi ga kwata miiti.

¹¹ Ombiimbeli otayi gandja omalombwelo taga ti: “Omukiintu ina henga po omulumentu gwe. Ngele ote shi ningi, oku na okukala itaa yi we moondjokana nenge a hangane ishewe nomulumentu gwe. Omulumentu ina henga po nando omukadhi.” (1 Kor. 7:10, 11) Etopoko kali na okutalwa ko oshinima shanathangwa. Nonando ohali monika lya fa olyo ekandulopo lyomaupyakadhi ga kwata miiti mondjokana, olundji ohali eta owala omaupyakadhi ogendji. Konima sho Jesus e endulula shoka sha popiwa kuKalunga kutya omulumentu oku na okuthiga po he nayina e ta kwatathana nomukadhi, okwa ti: “Shono  Kalunga e shi tula kumwe, inashi kuthwa kumwe komuntu.” (Mat. 19:3-6; Gen. 2:24) Shoka otashi ti wo kutya omusamane nenge omukulukadhi ke na ‘okukutha kumwe shoka Kalunga e shi tula kumwe.’ Jehova okwa tala ko ondjokana yi li oshinima shoka tashi kalelele. (1 Kor. 7:39) Okudhimbulukwa kutya atuheni otu na oku ki ihokolola kuKalunga otashi ki inyengitha aaihokani ya ninge oonkambadhala dha mana mo ya kandule po nziya uupyakadhi wawo manga inaawu kwata miiti.

12. Oshike tashi vulu okuningitha aaihokani ya dhiladhile okutopoka?

¹² Okukala wa tegelela oshindji kukuume koye kopandjokana otaku vulu okweetitha omaupyakadhi ga kwata miiti mondjokana. Yamwe oondjokana dhawo ihadhi ke enda ngaashi ya li ya tegelela, naashoka ohashi ya yemateke nenge shi ya geyithe. Uupyakadhi wumwe otawu vulu okuholoka mondjokana omolweputuko nomaukwatya ga yoolokathana gaaihokani. Aaihokani otashi vulika ya kale kaayu uvitathane shi na ko nasha niimaliwa, nooyinamweno nosho wo nokuputudha okanona. Ihe nonando ongaaka, otashi pandulwa sho aaihokani Aakriste oyendji haya kandula po nombili omaupyakadhi moondjokana dhawo, molwaashoka ohaye etha ya wilikwe kuKalunga.

13. Aaihokani otaya vulu okutopoka omolwomatompelo omawanawa geni?

¹³ Otashi vulika pu na omatompelo omawanawa ngoka taga ningitha aaihokani ya topoke. Oonkalo dha kwata miiti, ngaashi okwaasila oshimpwiyu aanegumbo, ehepeko lyopalutu lya kwata miiti nuuna uupambepo womuntu wu li moshiponga, oyo yimwe yomiinima mbyoka hayi ningitha aaihokani ya topoke. Aaihokani Aakriste mboka ye na omaupyakadhi ga kwata miiti oye na okukonga ekwatho kaakuluntugongalo. Aamwatate mbaka ye na owino otaya vulu okukwathela aaihokani ya tule miilonga omayele gomOohapu dhaKalunga. Uuna aaihokani taya kambadhala okukandula po omaupyakadhi ge na ko nasha nondjokana, oye na wo okupula ombepo yaJehova yi ya kwathele ya tule miilonga omakotampango gOmbiimbeli noyi imike iiyimati yombepo.—Gal. 5:22, 23. ^[2]

14. Ombiimbeli otayi ti ngiini kombinga yAakriste mboka ye na ookuume kopandjokana ihaaya longele Jehova?

¹⁴ Poompito dhimwe, Omukriste otashi vulika a hokanwa komuntu ngoka ihaa longele Jehova. Monkalo ndjoka, Ombiimbeli otayi gandja omatompelo omawanawa kutya omolwashike ye na okutsikila nondjokana yawo. (Lesha 1 Aakorinto 7:12-14.) Kuume kopandjokana ngoka kee shi omwiitaali ota ka ‘taambwa kuKalunga,’ molwaashoka e li mondjokana nomwiitaali. Aanona yawo nayo ohaya talika ko ‘aayapuki’ noye li kohi yegameno lyaKalunga. Paulus okwa ladhipike Aakriste a ti: “Meme ngoye omukriste, oto shi tseya ngiini kutya ito vulu okuhupitha omulumentu gwoye? Tate ngoye omukriste, oto shi tseya ngiini kutya ito vulu okuhupitha omukiintu gwoye?” (1 Kor. 7:16) Konyala megongalo kehe lyOonzapo dhaJehova oto adha mo aamwatate nosho wo aamwameme mboka ookuume kawo kopandjokana kaaye li moshili. Ookuume mboka kaaye li moshili otaya vulu ‘okuhupithwa’ omolwaaholike yawo.

15, 16. (a) Ombiimbeli otayi gandja omayele geni kAakriste mboka ye na ookuume kopandjokana kaaye shi aapiya yaJehova? (b) Mbela kuume kopandjokana ngoka Omukriste oku na okuninga shike ngele kuume kopandjokana ‘ngoka kee shi omwiitaali, okwa hala oku mu henga po’?

¹⁵ Omuyapostoli Petrus okwa ladhipike aakulukadhi Aakriste ya kale haya vulika kaasamane yawo, ‘opo aalumentu mboka inaa itaala oohapu dhaKalunga, ya falwe meitaalo komikalo dhawo. Itaa pumbwa oku shi ninga noohapu, oshoka oyo otaa ka mona, nkene omikalo dhawo dha yogoka nonkene haya simaneke Kalunga.’ Eihumbato lyomukulukadhi otali vulu okweeta omusamene gwe melongelokalunga lyashili shi vulithe oohapu dhomokana. Ombiimbeli otayi ti: ‘Eopalo lyombepo yi na ombili noya ngungumana, olyo ndyoka li na oshilonga oshinene koshipala shaKalunga.’—1 Pet. 3:1-4.

¹⁶ Ongiini ngele kuume kopandjokana ngoka kee shi omwiitaali okwa tokola mu topoke? Ombiimbeli otayi ti: “Ngoka kee shi omwiitaali, ngele okwa hala okuhenga po mukwawo ngoka omukriste, ne shi ninge. Miinima ya tya ngeyi  omunandjokana omukriste, omulumentu nenge omukiintu, okwa manguluka okuhogolola; oshoka Kalunga okwe mu ithanene okukalamwenyo ku na ombili.” (1 Kor. 7:15) Nonando etopoko otashi vulika li ete po ombili, Ombiimbeli itayi ti kutya kuume kopandjokana Omukriste okwa manguluka okuya ishewe nagulwe mondjokana. Ihe ke na okukondjitha kuume ke kopandjokana ngoka kee shi Omukriste ya tsikile nondjokana. Konima yethimbo, kuume kopandjokana ngoka kee shi omwiitaali otashi vulika a galuke, opo ya tsikile nondjokana yawo. Monakuyiwa kuume ngoka kee shi omwiitaali otashi vulika a ka ninge omulongeli gwaJehova.

17. Aaihokani Aakriste oye na okupititha shike komeho?

¹⁷ Molwaashoka otu li lela ‘momasiku gahugunina,’ (NW) otwa taalela ‘omathimbo omadhigu.’ (2 Tim. 3:1-5) Ihe ngele otwa kala twa kola pambepo otashi ke tu kwathela lela tu sinde omanwethomo omawinayi guuyuni mbuka. Paulus okwa ti: ‘Ethimbo lyokukalamwenyo kwetu olyo efupi. Mboka ya hokana, naa kale ya fa inaaya hokana. Mboka taa lalakanene iinima yomuuyuni mbuka, naa kale ya fa inaayi itula muyo.’ (1 Kor. 7:29-31) Paulus ka li ta lombwele aaihokani ye ethe po iinakugwanithwa yawo yomondjokana. Ihe mokutala kethimbo efupi ndyoka lya li lya hupa ko, oya li ya pumbwa okupititha komeho iinima yopambepo.—Mat. 6:33.

18. Omolwashike Aakriste taya vulu okukala ya nyanyukwa notaya pondola mondjokana yawo?

¹⁸ Nonando otu li methimbo edhigu noonkondo moka oondjokana odhindji itaadhi ende nawa, otashi wapa tu kale twa nyanyukwa notatu pondola moondjokana dhetu. Aaihokani Aakriste mboka haye endathana noshigwana shaJehova, ohaya tula miilonga omayele gOmbiimbeli nohaye etha ombepo ondjapuki yaJehova yi ya wilike. Uuna taye shi ningi, otaya simaneke “shono Kalunga e shi tula kumwe.”—Mark. 10:9.