AAGUNDJUKA oyendji moBetel ohaya ithana ndje: “Tate,” “Mandala” nenge “Tatekulu.” Ondi hole okwiithanwa ngawo, oshoka ondi na omimvo 89. Okwiithanwa ngawo, onde ku tala ko ku li ondjambi yandje, sho nda longela Jehova omimvo 72 miilonga yethimbo lyu udha. Omolwoonkalo ndhoka nda pita mudho sho tandi longele Kalunga, ohandi vulu okulombwela aagundjuka mboka tashi zi komutima te ti: “Inamu tyololoka nando. Iilonga mbyoka tamu longo, oyi na ondjambi.” — 2 Ondjal. 15:7.

Aavali yandje oya zi moUkraine, e taya ka tungila koKanada. Oya tula mondoolopa yedhina Rossburn, yi li moshitopolwa shaManitoba. Otwa valwa tu li 16, aamati yahetatu naakadhona yahetatu, kapu na aakwanambwiyu, ngame omutimulongo nomutine. Tate okwa li e hole Ombiimbeli nokwa kala he tu leshele mo Osoondaha kehe. Ihe okwa kala a tala ko omalongelokalunga ge li ondunge yokuyuga aantu iimaliwa. Olundji okwa li ha ningi omashendjo ta ti: “Ohandi ipula ngaa kutya olye a li ha futu Jesus, sho tu uvitha nota longo aantu?”

Aamwamememati yane naamwamemekadhona yane, oye ya moshili. Omumwamemekadhona Rose okwa kokola ondjila sigo omeso lye. Sho e li pokusa, okwa kala ta ladhipike kehe gumwe a gandje eitulomo kOohapu dhaKalunga, ta ti: “Onda hala oku mu mona muuyuni uupe.” Omumwamememati omukuluntu, Ted, okwa li ha uvitha kombinga yoheli. Osoondaha kehe okwa kala ha popi moradio, ta tsu omuthindo kutya aalunde otaya ka pya sigo aluhe momulilo ngoka ihaagu dhimi. Lwanima, okwa ningi omulongeli gwaJehova omudhiginini nomulaadhi.

MuJuni 1944, esiku limwe, sho nda zi kosikola, onda adha poshitaafula shaandjetu shokulila, okambo ke na oshipalanyolo: The Coming World Regeneration. * Onda lesha pepandja lyotango netiyali, nonda li nde ka hokwa. Sho nde ka mana ko, onda tokola nda mana kutya onda hala okulongela Jehova ngaashi Jesus.

Oshe ende ngiini okambo hono ka kale poshitaafula shaandjetu? Omumwamememati omukuluntu, Steven, okwa ti kutya paandjetu opwa li pwe ya aalumentu yaali taya “landitha” omambo nuumbo. Okwa ti: “Onda landa po kamwe, oshoka oke na owala osipenitha.” Aalumentu mboka oya galuka Osoondaha  ya landula ko. Oye tu lombwele kutya yo Oonzapo dhaJehova nohaya longitha Ombiimbeli okuyamukula omapulo ngoka aantu ye na. Otwa li twe shi hokwa, oshoka aavali yetu oye tu longa okusimaneka Ombiimbeli. Oye tu lombwele kutya masiku Oonzapo otadhi ka kala dhi na oshigongi shoshitopolwa moWinnipeg, moshilando moka mwa li hamu kala omumwamemekadhona, Elsie. Onda tokola ndi ye koshigongi.

Onda yi nokathanguthangu koWinnipeg, pu na ookilometa 320, nonda fudha po mondjila mondoolopa yedhina Kelwood, mpoka pwa li hapu kala Oonzapo mbali ndhoka dhi ile paandjetu. Sho ndi li moKelwood, onda yi kokugongala nonda mono kutya okwa tya ngiini. Onda mono wo kutya aantu ayehe kutya nduno aalumentu, aakiintu naagundjuka, oye na okukala haya uvitha egumbo negumbo ngaashi Jesus a li ha ningi.

MoWinnipeg, onda tsakanene mo naJack, omumwamememati omukuluntu kungame, ngoka naye e ya koshigongi shoshitopolwa okuza kuumbangalantu waOntario. Mesiku lyotango lyoshigongi, opwa ningwa etseyitho kutya opu na eninginitho. Ngame naJack otwa tokola tu ninginithwe poshigongi shoka. Otwa li twa tokola tu tameke okukokola ondjila nziya konima owala yokuninginithwa. Konima yoshigongi, Jack okwa yi miilonga yethimbo lyu udha. Ngame onda li ndi na omimvo 16, onkee onda shuna kosikola, ihe omumvo gwa ka landula ko, onda ningi omukokolindjila wondjigilile.

Ngame nomumwatate Stan Nicolson, otwa tameke okukokola ondjila mondoolopa yedhina Souris, yi li moshitopolwa shaManitoba. Onda mono kutya uukokolindjila ihawu kala aluhe oshinima oshipu. Iimaliwa yetu oye ende tayi pu po, ihe otwa pula owala komeho nokuuvitha. Oshikando shimwe sho tu uvitha esiku alihe, otwa zi muukalele twa sa ondjala, ihe katwa li tu na nando epeni lyasha. Sho twe ya posheelo shegumbo, otwa li twa kumwa sho twa adha po ondjato onene yu udha iikulya. Sigo onena ndjika, katu shi kutya olye e yi tulile po. Ongulohi ndjoka, otwa lile oondja tadhi tokola elaka. Osha li ondjambi yetu, sho inaatu etha omaako getu ga tyololoke. Sho tuu twa ka thika pehulilo lyomwedhi ngono, onda li ndo ondoka inaandi shi mona nale.   

Konima yoomwedhi oonshona, otwa pulwa tu ka kokole ondjila kondoolopa yedhina Gilbert Plains, yi li ookilometa 240, kuumbangalantu waSouris. Pethimbo ndyono, kekatha lyegongalo okwa li haku kala okampungu ke na iilonga yegongalo yomwedhi kehe. Shampa iilonga ya gu pevi omwedhi gumwe, onda li handi pe egongalo oshipopiwa, tandi tsu omuthindo kutya aamwatate naamwameme oya pumbwa okuninga oshindji. Konima yokugongala, omumwameme omukokele omukokolindjila, ngoka omusamane gwe kee li moshili, okwa popi nangame ta lili ta ti: “Onda kambadhala, ihe inandi vula okuninga oshindji shi vulithe mpoka.” Opo ihe nangame onda lili, e tandi mu pe ombili.

Aamwatate aagundjuka ohaya vulu okuninga omapuko nuupu, nokonima ohaya kala tayi ili ominwe. Ngame wo onda li nda ningi epuko, ihe inandi tyololoka. Ondi ilongo mo sha momapuko gandje, e tandi pula komeho. Shaalula oshi na ondjambi.

Osha li uuthembahenda kungame okuya kOsikola yaGilead, sho ndi na omimvo 21. Otse twa li ongundu onti-14, ndjoka ya pewa oonzapo muFebuluali 1950. Oopelesenda 25 dhaantu yomongundu yetu, odha li dha tuminwa koshitopolwa shaapopi yelaka lyOshifulaanisa moQuebec, moKanada, moka Oonzapo dha li tadhi hepekwa noonkondo kaawiliki yomalongelokalunga. Ngame onda li nda tuminwa kondoolopa yedhina Val-d’Or, moka mu na omina yoshingoli, yi li moKanada. Esiku limwe, otwa ka uvitha momukunda gu li popepi naVal-Senneville, tu li ongundu. Omusita gumwe okwe tu tilitha kutya ote ke tu monitha oshiponga, ngele itatu zi mo momukunda. Omolwomatilitho ge, otwe mu tulile mo oshipotha mompangu, moka ongame nda li omuhokololithi. Omusita okwa li a futithwa. *

Osho twa kala nokuningilwa ngawo, sho tu li moQuebec. Ongeleka yaKatoolika kaRoma, oyo ya kala yi na iilyo oyindji moQuebec uule womimvo dha konda po 300. Aasita noongundu dhopapolotika,  oya kala nokuhepeka Oonzapo dhaJehova. Kasha li oshipu okwiidhidhimikila omahepeko ngoka, notwa li omwaalu omushona, ihe inatu etha tu tyololoke. Aanamitima omiwanawa moQuebec, oya li ya pulakene. Onda li ndi na uuthembahenda wokukonakona naalumentu nosho wo naakiintu, mboka konima ye ya moshili. Onda konakona nuukwanegumbo wumwe, mu na aantu omulongo. Egumbo alihe olya tameke okulongela Jehova. Uulaadhi wawo owi inyengitha yalwe ya thige po ongeleka yaKatoolika. Otwa tsikile nokuuvitha, nopehulilo otwa sindana.    

Mo 1956, onda tumwa ndi ka kwathele koHaiti. Aatumwa oyendji aape moHaiti, oya li taya nyengwa okwiilonga Oshifulaanisa, ihe aantu oya li ya pulakene. Omumwatate omutumwa, Stanley Boggus, okwa ti: “Otwa li twa kumwa, sho aantu ya kala noku tu kwathela nkene tu na okupopya.” Ngame ondi na elago, oshoka onda adhika ndi ilonga Oshifulaanisa sho ndi li moQuebec. Otwe shi mono mo nziya kutya aamwatate oyendji, ohaya popi owala elaka lyOshicreole shomoHaiti. Opo tu shi dhenge komutse tu li aatumwa, otwa li tu na okwiilonga elaka ndyoka. Otwe shi ningi, notwa mono ondjambi.

Opo tu tsikile okukwathela aamwatate, otwa pewa epitikilo kOlutuwiliki tu toloke Oshungolangelo niileshomwa yilwe melaka lyOshicreole shaHaiti. Omwaalu gwaantu mboka haya kala pokugongala, ogwa indjipala meendelelo. Mo 1950, moHaiti omwa li aauvithi 99, ihe mo 1960 omwaalu ogwa indjipala sigo opaauvithi 800. Pethimbo mpono, onda pulwa ndi ka kwathele koBetel. Mo 1961, onda li nda nyanyukwa okukwatela komeho Osikola yUukalele wUukwaniilwa. Otwa li twa dheula aakuluntugongalo ye li 40 nosho wo aakokolindjila yi ikalekelwa. Poshigongi shoshitopolwa shoka sha li ko muJanuali 1962, otwa ladhipike aamwatate moHaiti ya tamunune mo uukalele wawo. Yalwe yomuyo oya li ya langekwa po ye li aakokolindjila yi ikalekelwa. Edheulo ndyoka oya li ye li pumbwa, oshoka oya taalela omahepeko.

Mo 23 Januali 1962, konima owala yoshigongi shoshitopolwa, ngame nomumwatate omutumwa, Andrew D’Amico, otwa kwatwa po manga tu li moshitayimbelewa. Iifo yo-Awake! yo 8 Januali 1962 melaka lyOshifulaanisa, oya yi wa nayo. Miifo mbyoka omwa li oohapu dha za miifokundaneki  yOshifulaanisa tadhi ti kutya moHaiti omu na elongelokalunga lyuumpulile. Yamwe kaya li yu uvitile ombili oohapu ndhoka. Oye tu lundile kutya oshinima shoka otse twe shi nyola koshitayimbelewa. Konima yiiwike iishona, aatumwa oya tidhwa mo moHaiti. * Ihe aamwatate moshilongo mboka ya li ya dheulwa, oya pula komeho niilonga. Kunena onda nyanyukwa pamwe nayo, omolweidhidhimiko lyawo nehumokomeho lyopambepo ndyoka ya ninga. Ngashingeyi oye na Ombiimbeli yo-New World Translation of the Holy Scriptures mOshicreole shaHaiti, oshinima shoka twa li inaatu tsa ondjodhi pethimbo ndiyaka.

Konima sho nda kala omutumwa moHaiti, onda tuminwa kOrepublika yaAfrika lyoPokati. Lwanima, onda mono uuthembahenda wokukala omutonateli omweendi, nokonima onda langekwa po ndi li omutonateli gwoshitayimbelewa.

Iinyanga yUukwaniilwa pethimbo ndyono, oya li lelalela yanathangwa. Ondi ilongo okumwa omwiidhi nokukumba. Mboka taya piti po, oya li haya kala ya tala ndje nawa sho tandi ilongo iinima mbyoka. Osha ladhipike wo aamwatate moshilongo ya kuthe ombinga mokutunga nomokukaleka Iinyanga yUukwaniilwa monkalo ombwanawa. Aasita yoongeleka oye tu sheke, oshoka oongeleka dhawo odha li dhi na iipeleki, omanga dhetu kadha li dhi nasha. Shoka inashi tu sitha uunye, otwa tsikile owala nomukalo gwetu gwokukumba Iinyanga yetu. Omasheko oga hulu owala sho oshikungulu shombepo sha dhenge oshilandopangelo, Bangui. Oshikungulu osha pepe ko iipeleki kongeleka noku yi umbila mepandaanda enene ya ndonyagulwa. Iinyanga yUukwaniilwa yetu mbyoka ya kumbwa inayi ninga sha. Opo tu kale tatu tonatele iilonga yUukwaniilwa nawa, otwa tungu oshitayimbelewa negumbo lyaatumwa muule owala woomwedhi ntano. *

Iilonga yUukwaniilwa oya li yi indikwa mOrepublika yaAfrika lyoPokati mo 1976, nonda li nda tuminwa koshilandopangelo shaChad, N’Djamena. Iiyanekwa osho ya tsakanene nomutenya. Onda kongo po omumwameme Happy, omukokolindjila i ikalekelwa omulaadhi, omvalele yaKamerun. Otwa hokana mesiku 1 Apilili 1978. Momwedhi mono, iita yopashigwana oya tukuluka moshilongo, notwa matukile kuumbugantu woshilongo pamwe naantu oyendji, tu ka holame. Sho iita ya hulu, otwa galuka notwa adha egumbo lyetu lya ningwa po oombelewa oonene dhongundu yimwe yaakwiita. Iileshomwa yetu otwa adha ya yiwa nayo nosho wo ofeyi yaHappy nomagano ngoka twa pewelwe pohango. Ihe nonando ongawo, inatu tyololoka. Otwa li twa kwathelathana notwi ilongekidha okuya kehe mpoka twa pumbiwa.

Konima yomimvo mbali, iilonga yetu mOrepublika yaAfrika lyoPokati oya pitikwa paveta. Otwa galukile ko, e tatu yi miilonga yuuyendi. Egumbo lyetu olya li okambesa moka mu na ombete hayi tonywa, ongoma yomeya yoolita 200, okakila nokasiga wo kohaasa. Osha li oshidhigu okweenda mOrepublika yaAfrika lyoPokati. Oshikando shimwe manga tatu ka talela po, otwa li twa hadhwa pooboloka dhomoondjila dhi li 117.

Olundji uupyu owa li hawu londo sigo opoograte 50. Piigongi yoshikandjo osha li hashi kala oshidhigu okumona omeya ga gwana aantu ya ninginithilwe mo. Onkee ano, aamwatate oya li haya fulu momilonga dha kukuta sigo ya adha omeya ga gwana. Olundji aantu oya li haya ninginithilwa mondoloma ya tetwa.

Momumvo 1980, otwa tuminwa koNigeria. Otwa kala tatu kwathele uule womimvo mbali netata mokutunga oshitayimbelewa. Aamwatate oya landa etungo lyoondunda mbali dha londathana, ndyoka lya li ompungulilo nale, nolya li lya pumbwa okuningwa nawa. Ongula yimwe onda londo pombanda yetungo, opo ndi kwathele nokukumuna po ombinga yimwe. Sho etango li li poku ka pa oyana, onda londuluka ko. Shaashi ekuma olya li lya kumunwa mpeya naampeya, sho tandi londuluka onda lyata mombepo, e tandi gu ko. Onda li nda mona oshiponga, ihe sho ndohotola a minikile ndje nokukonakona ndje, okwa lombwele Happy ta ti: “Ino tila. Oothipa dhe  dhimwe odho dha tokoka, ihe ota kala nawa muule woshiwike shimwe lwaampono.”

Mo 1986, otwa ka longa koIvory coast, tu li aatonateli aayendi. Osho twe ki iyadha tu li moshilongo shopuushiinda, Burkina Faso. Inandi tsa nale ondjodhi kutya esiku limwe, onatu ki iyadhe hatu zi moBurkina Faso.

MoKanada onda zi mo mo 1956, ihe onda galukile mo nde ya koBetel konima yomimvo 47, mo 2003, tu li nomukulukadhi gwandje, Happy. Uukwashigwana wetu owaKanada, ihe otwa li tu uvite kutya tse oyomuAfrika.

Mo 2007, mepipi lyomimvo 79, otwa tuminwa ishewe koAfrika. Otwa pulwa tu ka yakule koBurkina Faso, hoka nda kala ndi li oshilyo shOkomitiye yomoshilongo. Konima yethimbo, ombelewa yetu oya kala tayi tonatelwa koshitayimbelewa shaBenin. MuAuguste 2013, otwa pulwa tu ka longe koBetel moBenin.

Nonando omimvo odha ya, sigo onena ondi hole iilonga yokuuvitha. Omolwekwatho lyaakuluntugongalo nanekulu lyandje, omimvo ndatu opo dha piti, onda li nda nyanyukwa okutala aakonakonimbiimbeli yandje yaali taya ninginithwa, Gédéon naFrégis. Aamwatate mboka otaya longele Jehova nuudhiginini.

Ngashingeyi ngame nanekulu lyandje, otwa tuminwa koshitayimbelewa shaSouth Afrika, hoka tandi silwa oshimpwiyu nawa paunamiti. South Afrika osho oshilongo oshitiheyali moAfrika, moka nda mona uuthembahenda wokulongela Jehova. Otwa li twa mono ishewe eyambeko limwe muKotoba 2017, sho twa kala peyapulo lyoombelewa dhetu oonene moWarwick, moNew York. Oshiningwanima shika itatu shi dhimbiwa nando.

Embo 1944 Yearbook epandja 255, olya ti: “Otatu ladhipike ayehe mboka yi idhidhimikila iilonga yethimbo lyu udha omimvo odhindji, tatu ti: ‘Ikoleleleni ne inamu tyololoka nando, oshoka iilonga mbyoka tamu longo, oyi na ondjambi.’ — 2 Ondjal. 15:7.” Ngame naHappy otwa tokola tu vulike keladhipiko ndyoka nokutsa yalwe omukumo ya ninge sha faathana.