1. Aakriste oye na okuninga shike, opo ya adhe kethikilo lyoku ka mona omwenyo gwaaluhe?

AAKRISTE oye li methigathano lyoku ka mona omwenyo gwaaluhe. Otwa pumbwa okukondja twa mana mo sigo okethikilo, kutya nduno methigathano ndika otwa ninga mo omimvo odhindji nenge opo twe ya mo. Omayele ngoka omuyapostoli Paulus a li a pe Aakriste yomuFilippi, otaga vulu wo oku tu kwathela tu ka thike kethikilo. Yamwe megongalo lyomethelemimvo lyotango, oya adhika nale haya longele Jehova omimvo odhindji, sho ya pewa ontumwafo ndjoka ya za kuPaulus. Oya kala nokulongela Jehova nuudhiginini, ihe Paulus okwa li e ya dhimbulukitha kutya oya pumbwa okwiidhidhimika nokutsikila okulongela Jehova. Okwa li a hala ya landule oshiholelwa she ‘shokumatuka ya ukilila kethikilo.’ — Fil. 3:14.

2. Omolwashike omayele ngoka Paulus a li a pe Aafilippi ga li pethimbo?

² Omayele ngoka Paulus a li a pe Aafilippi, oga li pethimbo lela. Omolwashike? Omolwaashono okuza sho egongalo lyomuFilippi lya totwa po, aamwatate naamwameme megongalo ndyoka oya kala taya hepekwa. Mo 50 E.N., Paulus naSilas oya vulika kelombwelo lya za kuKalunga ndyoka tali ti: “Taagulukila huka kuMakedonia.” Onkee ano, oya yi kuFilippi ya ka uvithe onkundana ombwanawa. (Iil. 16:9) Hoka oya tsakanene ko nomukiintu gwedhina Lidia, ngoka ‘a li gumwe gwomaapulakeni, nOmuwa e ta egulula omwenyo gwe’ a taambe ko onkundana ombwanawa. (Iil. 16:14) Nziya konima yaashono, omukiintu ngoka pamwe nuukwanegumbo we, oya ninginithwa. Ihe Ondiyapoli kaya li ye shi nyanyukilwa. Aalumentu yomoshilando oya kookololele Paulus naSilas kaapangeli yomoshilando noku ya lundila kutya otaya piyaganeke aantu. Oshizemo, Paulus naSilas oya dhengwa nokutulwa mondholongo, nokonima yethimbo oya lombwelwa ya ze mo moshilando. (Iil. 16:16-40) Mbela shoka osha li she ya teya omukumo? Aawe. Ongiini kombinga yaamwatate naamwameme yomegongalo ndyoka epe? Oya li yi idhidhimike, naashoka oshi shi okupandulwa! Kapu na omalimbililo kutya oya li ya tsuwa lela omukumo koshiholelwa oshiwanawa shaPaulus naSilas.

3. Paulus okwa li a ndhindhilike shike, nomapulo geni tatu ka kundathana?

 ³ Paulus okwa li a tokola toko kaa shune omutse miipeta. (2 Kor. 4:16) Okwa li e shi kutya opo a ka thike kethikilo, oku na okukala a gandja eitulomo kelalakano ndyoka. Oshike tatu vulu okwiilonga koshiholelwa shaPaulus? Iiholelwa yini yopethimbo lyetu tayi ulike kutya otatu vulu okwiidhidhimika, nonando otu li momashongo? Ongiini etegameno lyetu lyonakuyiwa tali vulu oku tu kwathela kaatu teke omukumo?

4. Paulus okwa kala ngiini i ipyakidhila nomoonkalo oondhigu?

⁴ Natu ka taleni nkene Paulus a li a ningi oonkambadhala, sho a nyolele Aafilippi. Okwa li a edhililwa mondholongo yomegumbo muRoma. Ka li ta vulu okuza mo a ka uvithile aantu. Nonando ongawo, okwa kala i ipyakidhila nokuuvithila mboka taye ya oku mu talela po nokunyolela omagongalo gokokule oontumwafo. Sha faathana, kunena Aakriste oyendji mboka ihaaya vulu okuza mo momagumbo, ohaya longitha ompito kehe taya mono ya uvithile mboka taye ya oku ya talela po. Ohaya nyolele wo aantu mboka hashi kala oshidhigu okutsakanena nayo, oontumwafo tadhi tsu omukumo.

5. Okutala kwaashoka Paulus a popi mAafilippi 3:12-14, oshike sha li she mu kwathele a gandje eitulomo kelalakano lye?

⁵ Paulus ka li a etha a piyaganekwe kusha, kutya nduno okwaashoka a pondola monakuziwa nenge okomapuko ge gomonakuziwa. Okwa ti kutya okukala a “dhimbwa shoka shi li konima” osha li sha simana, ‘opo a adhe shoka shi li komeho ge,’ ano okuthika kethikilo. (Lesha Aafilippi 3:12-14.) Iinima yimwe yini ya li tayi vulu okupiyaganeka Paulus? Shotango, okwa li a pondola oshindji melongelokalunga lyOshijuda. Nonando ongawo, okwa li a tala ko iinima mbyoka yi li “iiyagaya yowala.” (Fil. 3:3-8) Oshitiyali, ka li a etha omadhiladhilo ge kombinga yokuhepeka Aakriste monakuziwa, ge mu ethithe po okulongela Jehova. Oshititatu, ka li ha dhiladhila kutya okwa longela Jehova sha gwana. Paulus okwa kala aluhe ha longo nuudhiginini miilonga yokuuvitha, nonando okwa li a tulwa mondholongo, a dhengwa noongola, nomamanya, a li moshiponga sheteko lyosikepa naasho a kala nondjala nonkayi. (2 Kor. 11:23-27) Nonando Paulus okwa li a pondola miinima oyindji nokupita momashongo, okwa li a tsikile okulongela Jehova. Natse natu ninge sha faathana.

6. Iinima yimwe yini ‘twa thiga konima,’ tashi vulika twa pumbwa okudhimbwa?

⁶ Ongiini tatu vulu okulandula oshiholelwa shaPaulus ‘mokudhimbwa shoka shi li konima’? Yamwe yomutse otashi vulika twa pumbwa okukondjitha eiyuvo ewinayi kombinga yomapuko ngoka twa ninga monakuziwa. Ngele osho, ongiini ngele pekonakonombiimbeli lyoye lyopaumwene owa konakona kombinga yekuliloyambo lyaKristus? Ngele otwa konakona, twa tedhatedha nokugalikana kombinga yoshikundathanwa tashi tungu, otashi vulika shi tu kwathele lela tu kale twa pepelelwa. Otashi vulika nokuli tu ethe po okukala tatu iyele aluhe ombedhi, omolwomapuko getu gomonakuziwa ngoka Jehova e tu dhimina po nale. Natu tale oshinima shilwe shoka tatu vulu okwiilonga kuPaulus. Yamwe otashi vulika ya etha po iilonga yawo mbyoka hayi futu nawa, nelalakano ya pitithe komeho Uukwaniilwa. Ngele osho, mbela itatu vulu okudhimbwa shoka twa thiga konima, mokutinda okugandja ishewe eitulomo kwaashoka twa li tu na? (Num. 11:4-6; Omuuv. 7:10) “Shoka shi li konima” nenge tu tye twa thiga konima, otashi vulika sha kwatela mo iinima mbyoka twa pondola monakuziwa nenge omashongo ngoka twa li twi idhidhimikile. Odhoshili kutya ngele otwa dhiladhila kombinga yankene Jehova e tu yambeka noku tu kwathela uule womimvo dha ka pita, otashi vulu oku tu hedhitha popepi naye. Nonando ongawo, inatu hala okudhiladhila kutya otwa longela Jehova sha gwana. — 1 Kor. 15:58.

7. Shi ikolelela kAakorinto yotango 9:24-27, oshike twa pumbwa okuninga, opo tu ka thike kethikilo lyoku ka mona omwenyo gwaaluhe? Gandja oshiholelwa.

 ⁷ Paulus okwa li e uvite ko nawa oohapu dhaJesus ndhoka tadhi ti: “Kondjeni.” (Luk. 13:23, 24) Paulus okwa li e shi kutya oku na okukondja a mana mo sigo okethikilo, ngaashi Kristus. Onkee ano, okwa yelekanitha onkalamwenyo yopaKriste naantu mboka ye li methigathano. (Lesha 1 Aakorinto 9:24-27.) Omumatuki methigathano, oha kala a gandja eitulomo koku ka thika pethikilo, noiha gandja eitulomo kusha shilwe. Pashiholelwa, mboka haya ningi ethigathano lyokumatuka moondoolopa kunena, otashi vulika ye shi ningile mondjila ya pita pokati koositola nenge kiinima yilwe mbyoka tayi vulu oku ya piyaganeka. Mbela oto dhiladhila kutya omumatuki ota ka thikama po manga a talele momakende iinima mbyoka yi li moositola? Hasho nando, ngele okwa hala okusindana! Sha faathana, methigathano lyoku ka mona omwenyo, natse wo otu na okuyanda iinima mbyoka tayi vulu oku tu piyaganeka. Ngele otwa gandja eitulomo kelalakano lyetu nokukondja twa mana mo ngaashi Paulus, otatu ka pewa ondjambi!

8. Omashongo gatatu geni tatu ka kundathana?

⁸ Ngashingeyi natu ka taleni omashongo gatatu, ngoka taga vulu oku tu teya omukumo. Omashongo ngoka ongaashi okutegelela ethimbo ele, oonkondo dhetu dhopalutu hadhi ende tadhi kana po nosho wo okwiidhidhimikila omashongo ethimbo ele. Otatu vulu okumona uuwanawa, mokutala kunkene yalwe yi idhidhimikile omashongo ngoka. — Fil. 3:17.

9. Okutegelela ethimbo ele, ohaku vulu oku tu guma ngiini?

⁹ Okutegelela ethimbo ele. Otwa tegelela nondjuulukwe iinima iiwanawa mbyoka Jehova e tu uvanekela. Pashiholelwa, sho omuhunganeki gwaJehova, Habakuk, a li a halelela Jehova a hulithe po uukolokoshi mboka wa li muJuda, okwa li a lombwelwa kuJehova kutya na kale a “tegelela ashike.” (Hab. 2:3) Uuna iinima mbyoka twa tegelela yi gwanithwe tu wete itaayi yi gwanithwa, otashi vulika shi tu teye omukumo. Otashi vulu nokuli okugombokitha omwenyo gwetu. (Omayel. 13:12) Shoka osha li sha ningilwa aamwatate naamwameme yalwe mo 1914. Momumvo  ngoka, Aakriste aagwayekwa oyendji, oya li ya tegelela okupewa ondjambi yawo yomegulu. Sho ondjambi ndjoka inaaye yi pewa momumvo ngoka, Aakriste mboka aadhiginini oya li ya tsikile ngiini okwiidhidhimika?

10. Aaihokani yamwe oya li ya vulu ngiini okutsikila okwiidhidhimikila onkalo yawo?

¹⁰ Natu taleni koshiholelwa shAakriste yaali aadhiginini, mboka ya li ya adhika keshongo ndyoka. Omumwatate Royal Spatz okwa li a ninginithwa mo 1908, sho e na omimvo 20. Okwa li e na lela einekelo kutya oku li pokupewa ondjambi ye yomegulu. Onkene mo 1911, sho a pula omuyalekwa gwe Pearl ya hokane, okwe mu lombwele a ti: “Owu shi shoka tashi ka ningwa po mo 1914. Ngele otatu hokana, onawa tu shi ninge nziya!” Sho aaihokani mboka inaaya mona ondjambi yawo yomegulu mo 1914, mbela oya li ya teka omukumo methigathano lyawo lyoku ka mona omwenyo? Aawe, oshoka oya li ya gandja unene eitulomo kokulonga ehalo lyaKalunga nuudhiginini, ihe hakondjambi. Oya li ya tokola toko neidhidhimiko okukala methigathano lyoku ka mona omwenyo. Odhoshili kutya Royal naPearl oya kala aadhiginini noyi ipyakidhila niilonga yaJehova uule womimvo, sigo ya mana oondjenda dhawo dhokombanda yevi. Osha yela kutya nangoye owa halelela okumona Jehova ta yukipalitha edhina lye nuunamapangelo we nosho wo okugwanitha po omauvaneko ge. Kala wa shilipalekwa kutya iinima ayihe mbika otayi ka gwanithwa po peuthwathimbo lyaJehova. Onkee ano, natu tsikileni okulongela Kalunga noinatu etha nando okutegelela ethimbo ele ku tu teye omukumo.

11-12. Omolwashike twa pumbwa okutsikila okulongela Jehova, nonando oonkondo dhetu otadhi ende tadhi kana po? Gandja oshiholelwa.

¹¹ Oonkondo dhetu dhopalutu, ohadhi ende tadhi kana po. Omumatuki oha kala a pumbwa oonkondo odhindji, opo a vule okumatuka, ihe ngoye hadho wa pumbwa, opo ando wu tsikile okukala nekwatathano lya kola naJehova. Uushili owo kutya oyendji mboka kaaye na we naanaa oonkondo, natango oye na omukumo gwokutsikila okulongela Jehova ngaashi taya vulu. (2 Kor. 4:16) Pashiholelwa, sho omumwatate Arthur Secord * a li e na omimvo 88, okwa adhika nale a longa moBetel uule womimvo 55, nuukolele we owa li tawu nyangwanyangwa. Esiku limwe, omupangi gumwe okwa yi puye mpoka a lala, opo e mu kwathele. Okwe mu tala nolukeno, e ta ti: “Omumwatate Secord, owa longa oshindji miilonga yaJehova.” Omumwatate Arthur Secord ka li a gandja eitulomo kwaashoka a pondola monakuziwa. Onkee ano, okwa tala omupangi, nokwi imemeha e te mu yamukula ta ti: “Eeno, shoka oshoshili. Ihe shoka twa longa nale hasho sha simanenena. Shoka sha simanenena okukala aadhiginini ngashingeyi.”

¹² Otashi vulika wa longela Jehova uule womimvo odhindji, ihe ngashingeyi owe shi mona  kutya omolwuukolele woye tawu nyangwanyangwa, oshidhigu okulonga oshindji miilonga yaJehova ngaashi nale. Ngele osho, ino teka omukumo. Kala wu na uushili kutya Jehova okwa lenga iilonga yoye yuudhiginini yomonakuziwa. (Heb. 6:10) Dhimbulukwa kutya shoka twa ninga miilonga yaJehova, hasho hashi ulike kutya otu mu hole shi thike peni. Pehala lyaashono, ohatu ulike kutya otu mu hole shi thike peni, uuna tu na etaloko ewanawa nokuninga ngaashi tatu vulu. (Kol. 3:23) Jehova oku shi omangambeko getu noihe tu pula tu ninge oshindji shi vulithe poonkondo dhetu. — Mark. 12:43, 44.

13. Oshimoniwa shomumwatate Anatoly nomukadhi Lidiya, otashi vulu ngiini oku tu kwathela tu tsikile okulongela Jehova, nonando otwa taalela omashongo ogendji?

¹³ Okwiidhidhimikila omashongo ethimbo ele. Aapiya yaJehova yamwe oya kala nokwiidhidhimikila omashongo nomahepeko uule womimvo. Pashiholelwa, omumwatate Anatoly Melnik * okwa li owala e na omimvo 12, sho he a mangwa po nokutulwa mondholongo e ta tuminwa koSiberia muupongekwa. Okuza paandjawo moMoldova sigo okoSiberia, opwa li pu na oshinano shookilometa 7 000. Konima yomumvo, Anatoly, yina nosho wo aavali yayina, oya tuminwa wo muupongekwa koSiberia. Mokweendela ko kwethimbo, oya li ya vulu okukala haya yi kokugongala momukunda gulwe, ihe opwa li oshinano shookilometa 30, haya ende molumi nokwiidhidhimikila uutalala wamemememe. Lwanima, omumwatate Melnik okwa ka kala mondholongo uule womimvo ndatu, nokwa li a thigi po omukadhi Lidiya nokamwanakadhona kawo komumvo gumwe. Nonando Anatoly nuukwanegumbo we oya kala taya idhidhimikile omashongo uule womimvo, oya tsikile okulongela Jehova nuudhiginini. Ngashingeyi omumwatate Anatoly oku na omimvo 82 noku li oshilyo shOkomitiye yOshitayimbelewa muAsia lyoPokati. Ngaashi omumwatate Anatoly nanekulu lye, Lidiya, natu ninge ngaashi tatu vulu miilonga yaJehova nokutsikila okwiidhidhimika, ngaashi twa kala noku shi ninga. — Gal. 6:9.

14. Paulus okwa li a mono kutya okwa pumbwa okuninga shike, opo a adhe elalakano lye?

¹⁴ Paulus okwa li e na omukumo kutya ota ka adha elalakano lye. E li Omukriste omugwayekwa, okwa li e na einekelo kutya ota ka mona ‘ondjambi yomwenyo gwomegulu, ngoka Kalunga e mu ithanena.’ Nonando ongawo, okwa li a mono kutya opo a ka mone ondjambi ndjoka, oku na ‘okumatuka.’ (Fil. 3:14) Paulus okwa li a longitha eyelekanitho lihokitha, a kwathele Aafilippi ya tsikile okugandja eitulomo kelalakano lyawo.

15. Paulus okwa longitha ngiini oshiholelwa kombinga yuukwashigwana, a ladhipike Aakriste yomuFilippi ya tsikile ‘okumatuka’?

 ¹⁵ Paulus okwa li a dhimbulukitha Aafilippi kombinga yuukwashigwana wawo womegulu. (Fil. 3:20) Omolwashike ya li ye na okudhimbulukwa uukwashigwana mboka? Omolwaashoka pethimbo ndyoka, aantu oya li ya lenga uukwashigwana waRoma. * Nonando ongawo, Aakriste aagwayekwa oya li ye na uukwashigwana wa simanenena, mboka wa li tawu ke ya etela omauwanawa ga dhenga mbanda. Onkene uukwashigwana waRoma kawa li wu na lela ongushu. Omolwetompelo ndyoka, Paulus okwa li a ladhipike Aafilippi a ti: “Omikalo dheni nadhi kale dho opalathana nevaangeli lyaKristus.” (Fil. 1:27) Kunena, Aakriste aagwayekwa oya tula po oshiholelwa oshiwanawa, sho taya matuka ya ka adhe elalakano lyawo lyoku ka mona omwenyo gwaaluhe megulu.

16. Shi ikolelela kAafilippi 4:6, 7, oshike twa pumbwa okutsikila okuninga, kutya nduno otu na etegameno lyomegulu nenge olyokombanda yevi?

¹⁶ Natu gandje eitulomo kelalakano lyetu, kutya nduno otu na etegameno lyoku ka kala nomwenyo gwaaluhe megulu nenge omoparadisa kombanda yevi. Kutya nduno otu li monkalo yini, inatu gandja eitulomo kiinima mbyoka twa thiga konima nenge sha shilwe shoka tashi vulu oku tu imba tu longele Jehova. (Fil. 3:16) Otashi vulika twa kala nokutegelela ethimbo ele tu mone omauvaneko gaJehova ga gwanithwe nenge twa kulupa nokatu na we naanaa oonkondo. Otashi vulika twa kala nokwiidhidhimikila omashongo nomahepeko uule womimvo odhindji. Kutya nduno onkalo yetu oyini, ‘inatu kala tu na nando oshimpwiyu shasha.’ Pehala lyaashono, natu tseyithile Kalunga oompumbwe dhetu momagalikano, note ke tu pa ombili ye ndjoka yi vule uunongo awuhe wopantu. — Lesha Aafilippi 4:6, 7.

17. Oshike tatu ka kundathana moshitopolwa tashi landula?

¹⁷ Ngaashi naanaa omumatuki ha kambadhala ngaashi ta vulu methigathano, natse natu gandje lela eitulomo kelalakano lyetu lyoku ka mona omwenyo gwaaluhe. Kutya nduno otu li monkalo yini nokatu na naanaa oonkondo, natu ninge ngaashi tatu vulu nokutsikila okukala twa tala kondjambi. Oshike tu na okuninga, opo tu idhidhimikile okukala mondjila ndjoka ya uka? Oshitopolwa tashi landula, otashi ke tu kwathela tu itulile po omalalakano ga simana notu kale tu na “owino yokuyoolola iinima mbyoka yi na oshilonga.” — Fil. 1:9, 10.