1. Atuheni otwa halela shike aakwanezimo yetu?

OMUMWAMEME gwedhina Pauline ota ti: “Okuza ngaa sho nda tameke okwiilonga oshili, onda kala nda hala tu ka kale mOparadisa naakwanezimo yandje ayehe. * Onda li nda hala unene omusamane gwandje, Wayne, nokamwanamati ketu ya wayimine ndje mokulongela Jehova.” Mbela owu na aakwanezimo mboka natango inaaya tseya Jehova nokukala ye mu hole? Otashi vulika wu ya uvitile ngaashi omumwameme Pauline a li e uvitile aakwanezimo ye.

2. Omapulo geni tatu ka kundathana moshitopolwa shika?

² Itatu vulu okuthiminika aakwanezimo yetu ya taambe ko onkundana ombwanawa, ihe otatu vulu oku ya ladhipika ya taambe ko etumwalaka lyOmbiimbeli. (2 Tim. 3:14, 15) Omolwashike tu na okuuvithila aakwanezimo yetu? Omolwashike tu na oku ya ulukila olukeno? Oshike tatu vulu okuninga, opo tu ya kwathele ya kale ye hole Jehova ngaashi tse? Aamwatate naamwameme yomegongalo lyetu, otaya vulu ngiini oku tu kwathela?

3. Shi ikolelela kuPetrus omutiyali 3:9, omolwashike tu na okuuvithila aakwanezimo yetu?

³ Masiku, Jehova ota ka hulitha po uuyuni mbuka. Mboka ya “halelela oku ka mona omwenyo gwaaluhe” (NW), oyo owala taya ka hupithwa. (Iil. 13:48) Ohatu longitha ethimbo lyetu olindji noonkondo dhetu tu uvithile aantu mboka kaatu shi miitopolwa yetu. Onkene oshi li paunshitwe tu kale twa hala aakwanezimo yetu ya longele wo Jehova pamwe natse. Tate yetu omunahole, Jehova, “ina hala, ku kale nando ogumwe ta geelwa, ihe okwa  hala, aantu ayehe ye ethe uulunde wawo.” — Lesha 2 Petrus 3:9.

4. Epuko lini tashi vulika tu ninge, uuna tatu uvithile aakwanezimo yetu?

⁴ Otu na okukala tu shi kutya opu na omukalo gwomondjila naangoka gwa puka, ngele tashi ya pokuuvitha etumwalaka lyehupitho. Nonando otashi vulika hatu uvithile nondjaalela mboka kaatu shi, otashi vulika ihaatu shi ningile aakwanezimo yetu.

5. Oshike tu na okukaleka momadhiladhilo, omanga inaatu kambadhala okuuvithila aakwanezimo yetu?

⁵ Oyendji yomutse otashi vulika tu ipe uusama, ngele otwa dhiladhila komukalo moka twa uvithila aakwanezimo yetu oshikando shotango. Omuyapostoli Paulus okwa pa Aakriste omayele, a ti: “Oohapu dheni nadhi kale aluhe oombwanawa notadhi hokitha omuntu oku mu pulakena. Kambadhaleni, mu kale aluhe mu shi, nkene mu na okuyamukula aantu.” (Kol. 4:5, 6) Otashi ka kala pandunge, ngele otwa dhimbulukwa omayele ngoka, uuna tatu popi naakwanezimo yetu. Ngele hasho, otashi vulika tu ya tondithe oshili, pehala lyoku ya kwathela ye yi taambe ko.

6-7. Gandja oshiholelwa shoka tashi ulike nkene sha pumbiwa okuyaalela kuume kopandjokana ngoka ihaa longele Jehova.

⁶ Kala wu na olukeno. Omumwameme Pauline ngoka a tumbulwa metetekelo, okwa ti: “Petameko, onda kala nda hala okupopya owala nomusamane gwandje kombinga yaKalunga noyOmbiimbeli. Katwa li nando hatu popi kombinga yiinima ‘yakwalukehe.’” Ihe omusamane gwe, Wayne, okwa li owala e shi kashona kombinga yOmbiimbeli noka li ha uvu ko shoka tashi popiwa kuPauline. Okwa li e wete omukadhi a pwila mo unene melongelokalunga lye. Okwa li e wete Pauline i itula moshinima sha nika oshiponga nokwa pukithwa.

 ⁷ Omumwameme Pauline okwa zimine kutya uule wethimbo, okwa kala ta longitha ethimbo olindji mokunyanyukilwa pamwe nooitaali ooyakwawo, ngaashi kongulohi nomomahuliloshiwike. Oompito ndhoka a li ha nyanyukilwa pamwe nayo, ongaashi kokugongala, miilonga yokuuvitha nopuututhi womainyanyudho. Ota ti: “Omathimbo gamwe Wayne ka li ha adha mo omuntu megumbo, nokwa li ha kala e uvite uuwike.” Oshi shi okuuviwa ko, sho Wayne a li ha kala a yuulukwa omukadhi nokamwanamati kawo. Ka li e shi aantu mboka ya li haya kala nayo, nokwa li e wete omukadhi a pititha komeho ookuume ke. Lwanima, Wayne okwa ningile Pauline omatilitho kutya ote mu henge po. Mbela owu wete omikalo moka Pauline a li ta vulu okuyaalela omusamane gwe?

8. Shi ikolelela kuPetrus gwotango 3:1, 2, oshike hashi inyengitha unene aakwanezimo yetu?

⁸ Kala wu na eihumbato ewanawa. Olundji, aakwanezimo yetu ohayi inyengithwa unene kwaashoka hatu ningi, ihe hakwaashoka hatu popi. (Lesha 1 Petrus 3:1, 2.) Lwanima, Pauline uushili woohapu ndhoka okwe ke wu mona. Okwa ti: “Onda li ndi shi kutya Wayne oku tu hole noka li lela a hala tu hengane. Ihe omatilitho ge oga ningitha ndje ndi mone kutya onda pumbwa okutameka okutula miilonga omayele gaJehova kombinga yondjokana. Pehala lyokukala owala tandi popi unene, onda li nda pumbwa okutula po oshiholelwa oshiwanawa okupitila meihumbato lyandje.” Pauline okwa etha po okuthiminika Wayne ya kundathane kombinga yOmbiimbeli, nokwa tameke okukala ha kundathana naye kombinga yiinima yakwalukehe. Okuza mpono, Pauline okwa tameke okukala omunambili shi vulithe nale, nomwanamati okwa tameke okukala e na omikalo shi vulithe nale, naashoka Wayne okwa li e shi ndhindhilike. (Omayel. 31:18, 27, 28) Sho Wayne a  mono nkene Ombiimbeli ya kwathele uukwanegumbo we, okwa taamba ko etumwalaka lyomOohapu dhaKalunga. — 1 Kor. 7:12-14, 16.

9. Omolwashike twa pumbwa okutsikila okukwathela aakwanezimo yetu?

⁹ Tsikila okukwathela aakwanezimo yoye. Jehova okwe tu tulila po oshiholelwa. Oha “dhiginine” okupa aantu ompito ya taambe ko onkundana ombwanawa noya ka mone omwenyo gwaaluhe. (Jer. 44:4) Omuyapostoli Paulus okwa li a lombwele Timoteus a tsikile okukwathela yalwe. Omolwashike? Omolwaashoka ngele te shi ningi, okwa li te ki ihupitha nosho wo mboka taye mu pulakene. (1 Tim. 4:16) Otu hole aakwanezimo yetu, onkee otwa hala ya tseye oshili yomOohapu dhaKalunga. Oohapu niilonga yaPauline, pehulilo oya ka nwetha mo nawa yaandjawo. Ngashingeyi okwa nyanyukwa, sho taya longele Jehova pamwe nomusamane gwe. Ye nomusamane gwe Wayne oye li aakokolindjila, na Wayne omukuluntugongalo ngashingeyi.

10. Omolwashike twa pumbwa okukala aaidhidhimiki?

¹⁰ Kala omwiidhidhimiki. Uuna twa kaleke onkalamwenyo yetu metsokumwe nomithikampango dhaKalunga, otashi vulika shi kale oshidhigu kaakwanezimo yetu ya taambe ko omalunduluko ngoka twa ninga naashoka twi itaala. Olundji, oshinima shotango shoka haya ndhindhilike kutya ihatu kutha we ombinga musho, okudhana iituthi yomalongelokalunga nokukutha ombinga miinima yopapolitika. Aakwanezimo yamwe otashi vulika ya kale ye tu geela petameko. (Mat. 10:35, 36) Ihe inatu etha po oku ya kwathela. Ngele otwa etha po oku ya kwathela ya uve ko shoka twi itaala, otwa fa tatu ya pangula kutya inaya gwana oku ka mona omwenyo gwaaluhe. Jehova ine tu pa oshinakugwanithwa shokupangula yalwe, ihe shoka okwe shi tula miikaha yaJesus. (Joh. 5:22) Ngele otwa kala aaidhidhimiki, lwanima aakwanezimo yetu otashi vulika ya ka kale ya hala okupulakena ketumwalaka lyetu. — Tala oshimpungu “ Longitha epandja lyetu lyokointaneta wu longe aantu.”

11-13. Oshike to ilongo komukalo ngoka Alice a ungaunga naavali ye?

¹¹ Kala omunambili, ihe ino etha aakwanezimo yoye ya lundulule omatokolo goye. (Omayel. 15:2) Natu tale koshiholelwa shomumwameme Alice. Okwa li i ilongo kombinga yaJehova pethimbo a li kokule naavali ye, mboka ya li inaaya itaala muKalunga noya li lela ye hole opolitika. Okwa li e wete kutya okwa pumbwa oku ya lombwela meendelelo kombinga yiinima iiwanawa mbyoka ti ilongo. Ota ti: “Ngele owa kakadhala okulombwela aakwanezimo yoye kombinga yaashoka wi itaala, ohashi ke ya geyitha unene.” Onkee ano, omumwameme Alice okwa li a nyolele aavali ye oontumwafo, te ya pula nkene ya tala ko iinima yontumba mbyoka e wete kutya otayi ka pendutha ohokwe muyo, ngaashi kombinga yohole, noku ya lombwela shoka Ombiimbeli tayi ti. (1 Kor. 13:1-13) Okwa li e ya pandula sho ye mu putudha noku mu sila oshimpwiyu, e te ya tumine omagano. Pethimbo a kala ta talele po aavali ye, okwa kala ta kwathele yina niilonga yomegumbo. Petameko, aavali ye kaya li ye mu nyanyukilwa, sho e ya lombwele kombinga yaashoka i itaala.

¹² Uuna Alice a ka talela po aavali ye, okwa kala ha lesha Ombiimbeli pandjigilile ngaashi shito. Ota ti: “Shika osha kwathele meme a mone nkene Ombiimbeli ya simana kungame.” Mokweendela ko kwethimbo, he yaAlice okwa tokola okwiilonga sha mOmbiimbeli, opo a mone kutya omolwashike omwana a lunduluka. Okwe shi ningi wo nelalakano a mone mo shoka ta vulu okulongitha a tompe omwana kutya shoka i itaala osha puka. Alice ota ti: “Onde mu pe Ombiimbeli, nonda li nde mu nyolele mo sha.” Oshizemo? Pehala lyokugandja eitulomo kokumona mo omapuko, okwa li a gumwa noonkondo kwaashoka a lesha mOohapu dhaKalunga.

¹³ Otwa pumbwa okukala twa kola notu li aanambili, nonando otatu idhidhimikile omashongo. (1 Kor. 4:12b) Pashiholelwa, omumwameme  Alice okwa li i idhidhimikile yina ngoka a li te mu pataneke. Ota ti: “Sho nda ninginithwa, meme okwa ula ndje kutya ngame ‘omwanakadhona omwiinayi.’” Alice okwa ningi po shike? Ota ti: “Pehala lyokuyanda okupopya kombinga yelongelokalunga lyandje epe, onde mu yelithile nesimaneko kutya onda ninga Onzapo yaJehova notandi ka dhiginina etokolo lyandje. Onda kambadhala oku mu shilipaleka kutya ondi mu hole noonkondo. Atuhe otwa li twa lili, nonde mu telekele oondja tadhi tokola elaka. Okuza mpono, meme okwa tameke okuzimina kutya Ombiimbeli otayi eta ndje kondjila.”

14. Omolwashike kaatu na nando okweetha aakwanezimo yetu ya lundulule etokolo lyetu lyokulongela Jehova?

¹⁴ Otashi vulika shi pule ethimbo aakwanezimo yetu ya uve ko nkene okulongela kwetu Jehova kwa simana kutse. Pashiholelwa, sho Alice a li a tokola okukokola ondjila pehala lyokulalakanena eithano ndyoka aavali ye ya li ye mu hogololela, osha li sha lilitha yina natango. Ihe Alice okwa kakatele owala ketokolo lye. Alice ota ti: “Ngele owa etha aakwanezimo yoye ya lundulule etokolo lyoye kombinga yoshinima shimwe, otashi vulika ya ka lundulule wo omatokolo goye galwe. Ihe ngele owa kala omunambili nowa dhiginina omatokolo goye, yamwe yomuyo otashi vulika ye ke ku pulakene.” Shoka osho Alice a li a ningi. Aavali ye ngashingeyi oye li aakokolindjila nahe oku li omukuluntugongalo.

15. Shi ikolelela kuMateus 5:14-16 nokuPetrus gwotango 2:12, ongiini “iilonga . . . iiwanawa” yayalwe tayi vulu okukwathela aakwanezimo yetu?

¹⁵ Jehova oha nanene aantu kuye, okupitila ‘miilonga iiwanawa’ yaapiya ye megongalo lyopaKriste. (Lesha Mateus 5:14-16; 1 Petrus 2:12.) Ngele kuume koye kopandjokana ke shi  Onzapo yaJehova, mbela okwa tsakanena nale niilyo yomegongalo lyeni? Omumwameme Pauline ngoka a popiwa metetekelo, okwa li a hiya aamwatate naamwameme kegumbo lye, opo omusamane gwe, Wayne, e ya tseye. Wayne ota dhimbulukwa nkene a li a kwathelwa komumwatate gumwe a mone kutya Oonzapo aantu ya tya ngiini. Ota ti: “Okwa tula mo efudho lyesiku limwe kiilonga, e te ya tu tale etanga pamwe. Shoka osha kwathele ndje ndi mone kutya ‘ye omuntu owala a fa ndje.’”

16. Omolwashike tu na okuhiya aakwanezimo yetu kokugongala?

¹⁶ Omukalo dhingi gumwe moka tatu vulu okukwathela aakwanezimo yetu, oku ya hiya ye ye ya gongale pamwe natse. (1 Kor. 14:24, 25) Oshikando shotango Wayne a yi kokugongala opEdhimbuluko, oshoka olya li lya ningwa konima yiilonga nomuule wethimbo efupi. Ota ti: “Kanda li lela ndi uvite ko oshipopiwa shoka sha gandjwa, ihe aantu oya li ya fuula ndje. Oye ya kungame, noya li ya taamba ndje ko nokuminika ndje. Onda li ndi wete kutya oye na ko nasha nangame.” Aaihokani yamwe oya kala lela taya ulukile Pauline olukeno, moku mu kwathela nomwanamati kokugongala nosho wo miilonga yokuuvitha. Onkee ano, lwanima sho Wayne a ka tokola kutya okwa pumbwa okuuva oshindji kombinga yeitaalo epe lyaPauline, okwa pula omusamane a konakone naye Ombiimbeli.

17. Katu na okwiipa uusama kombinga yashike, nomolwashike inaatu pumbwa okuteka omukumo, ngele tashi ya pokukwathela aakwanezimo yetu?

¹⁷ Otu na einekelo kutya aakwanezimo yetu ayehe, otaye ke tu wayimina mokulongela Jehova. Ihe nonando otwa ningi oonkambadhala tu ya kwathele ya ninge aapiya yaKalunga, otashi vulika kaaye ye moshili. Ngele onkalo osho yi li ngawo, katu na okwiipa uusama, omolwetokolo lyawo. Shoka sha simanenena, itatu vulu okuthiminika omuntu a taambe ko oshili. Nonando ongawo, oto vulu okwiinyengitha aakwanezimo yoye, ngele oya mono kutya owa nyanyukwa sho to longele Jehova. Ya kwatela momagalikano goye. Popya nayo nombili. Ino etha po oku ya kwathela! (Iil. 20:20) Kala wu na einekelo kutya Jehova ota ka yambeka oonkambadhala dhoye. Ngele aakwanezimo yoye oya hogolola okupulakena kungoye, otaya ka hupithwa.