1. Oolye ya li ya kwathele pu totwe egongalo muFilippi?

SHO omuyapostoli Paulus, Silas, Lukas naTimoteus ya thiki muFilippi, oshitembukilwa shAaroma, oya adha mo aantu oyendji mboka ya li ya ulike ohokwe metumwalaka lyUukwaniilwa. Aamwatate mboka yane aadhiginini, oya kwathele pu totwe egongalo, naalongwa ayehe oya li ya tameke okugongala pamwe, tashi vulika megumbo lyomumwameme Lidia ngoka a li e hole okuyakula aantu. — Iil. 16:40.

2. Konima yokathimbo, egongalo olya ka taalela eshongo lini?

² Konima yokathimbo, egongalo ndika epe olya ka taalela eshongo. Satana okwa hwahwameke mboka ye tonde oshili, ya ye moshipala iilonga yokuuvitha mbyoka ya li tayi longwa kAakriste mboka aadhiginini. Paulus naSilas oya li ya mangwa po, ya dhengwa noongola nokutulwa mondholongo. Konima sho ya mangululwa, oya ka talela po aalongwa mboka aape noku ya tsa omukumo. Opo ihe Paulus, Silas naTimoteus oya zi mo moshilando shoka, omanga Lukas tashi vulika a thigala mo. Okuza mpono, egongalo ndyoka epe olya kala tali shi enditha ngiini? Kekwatho lyombepo yaJehova, olya tsikile okulongela Jehova nuudhiginini. (Fil. 2:12) Paulus oku na okukala a li e li nyanyukilwa!

3. Ngaashi sha popiwa mAafilippi 1:9-11, Paulus okwa li a galikana kombinga yashike?

³ Konima yomimvo omulongo lwaampono, Paulus okwa nyolele egongalo lyomuFilippi ontumwafo. Uuna to lesha ontumwafo ndjoka, oto ke shi ndhindhilika mo nuupu nkene Paulus a li e hole ooitaali ooyakwawo. Okwa nyola a ti: “Onde mu yuulukwa nohole yomuJesus Kristus.” (Fil. 1:8) Okwe ya nyolele kutya ohe ya galikanene. Okwa li a pula Jehova e ya kwathele ya kokeke ohole yawo, ya kale ye na owino yokuyoolola iinima mbyoka  yi na oshilonga, ya kale ya yela, yaa na okantongo nenge tu tye ya yande okupundukitha yalwe nokutsikila okwiimika iiyimati iiwanawa. Kapu na omalimbililo kutya natse kunena otatu vulu okumona mo uuwanawa moohapu ndhoka dhaPaulus dha za komutima. Onkene natu lesheni shoka Paulus a nyolele Aafilippi. (Lesha Aafilippi 1:9-11.) Natu ka taleni kiitsa mbyoka a popya nokukundathana nkene tatu vulu oku yi tula miilonga.

4. (a) Shi ikolelela kuJohannes gwotango 4:9, 10, Jehova okwe tu ulukila ngiini ohole ye? (b) Otu na okukala tu hole Jehova shi thike peni?

⁴ Jehova okwe tu ulukila ohole ye onenenene, sho a tumu Omwana kombanda yevi a sile oondjo dhetu. (Lesha 1 Johannes 4:9, 10.) Ohole yaKalunga yoku tu hola, ohayi tu inyengitha tu kale tu mu hole wo. (Rom. 5:8) Otu na okukala tu hole Kalunga shi thike peni? Jesus okwa li a yamukula epulo ndyoka, sho a lombwele Omufarisayi gumwe a ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mat. 22:36, 37) Otwa hala tu kale tu hole Kalunga nomutima gwetu aguhe. Otwa hala wo ohole yetu yoku mu hola, yi kale tayi koko esiku nesiku. Paulus okwa li a lombwele Aafilippi kutya naya “kokithe nokutaneka” ohole yawo. Oshike tu na okuninga, opo tu kokeke ohole yetu yokuhola Kalunga?

5. Ongiini tatu vulu okukokeka ohole yetu?

⁵ Otwa pumbwa okutseya Kalunga, opo tu kale tu mu hole. Ombiimbeli otayi ti: “Oongoka kee na ohole, oye ina tseya Kalunga, oshoka Kalunga oye ohole.” (1 Joh. 4:8) Omuyapostoli Paulus okwe shi popya kutya ohole yetu yokuhola Kalunga, otayi ka koka owala ‘moku mu tseya nomokuninga omatokolo ge na oondunge.’ (Fil. 1:9) Sho twa tameke okukonakona Ombiimbeli, otwa tameke okukala tu hole Kalunga, nonando otwa li tu shi owala kashona kombinga yomaukwatya ge omawanawa. Opo ihe, sho twa tsikile okwiilonga oshindji kombinga ye, ohole yetu yoku mu hola oya tameke okukoka. Nomolwaashono twa tala ko okukonakona Ombiimbeli pandjigilile nokutedhatedha kOohapu dhaKalunga, yi li yimwe yomiinima mbyoka ya simanenena monkalamwenyo yetu. — Fil. 2:16.

6. Shi ikolelela kuJohannes gwotango 4:11, 20, 21, ongiini tatu vulu okukokeka ohole yetu?

⁶ Ohole yaKalunga onene ndjoka e tu nine, otayi ke tu inyengitha tu kale tu hole aamwatate. (Lesha 1 Johannes 4:11, 20, 21.) Otashi vulika tu dhiladhile kutya ohole yetu yokuhola aamwatate naamwameme, otayi ke ya po owala paunshitwe. Otu shi kutya ohatu longele Jehova nohatu kambadhala okuholela omaukwatya ge omawanawa. Ohatu landula oshiholelwa shaJesus, ngoka e tu ulukile ohole onene, sho a gandja omwenyo gwe, omolwetu. Nonando ongawo, omathimbo gamwe otashi vulika tu mone oshidhigu okugwanitha po oshipango shokukala tu holathane. Natu taleni koshiholelwa shomegongalo lyomuFilippi.

7. Oshike tatu ilongo komayele ngoka Paulus a li a pe Euodia naSintike?

⁷ Euodia naSintike oya li aamwameme aalaadhi, mboka ya li haya longo “nuudhiginini” pamwe nomuyapostoli Paulus. Ihe opwa li ethimbo limwe tashi vulika kaaya li ye uvitathane, shoka sha eta etopoko pokati kawo. Paulus okwa li a nyolele egongalo moka mu na aamwameme mboka ontumwafo. Okwa tumbula omadhina gawo kondandalunde, Euodia naSintike, e te ya pe omayele ya “kambadhale okuuvathana.” (Fil. 4:2, 3) Paulus okwa li e wete sha pumbiwa a lombwele egongalo alihe ta ti: “Longeni iilonga yeni ayihe mwaa na omangungutulo nenge omaludhi.” (Fil. 2:14) Osha yela kutya omayele gokondandalunde ngoka e ya pe, kaga li owala ga kwathele aamwameme  mboka aadhiginini, ihe egongalo alihe li kale li holathane shi vulithe nale.

8. Oshike tashi vulu unene oku tu imba tu kale tu hole aamwatate, nongiini tatu vulu oku shi yanda?

⁸ Ngaashi Euodia naSintike, otashi vulika shi kale oshidhigu unene kutse tu kale nekwatathano lyopothingo nayalwe, omolwokugandja owala eitulomo komapuko gawo. Atuhe ohatu ningi omapuko esiku kehe. Ngele otwa kala tatu gandja eitulomo komapuko gayalwe, ohole yetu yoku ya hola otayi ka talala. Pashiholelwa, otashi vulika tu geye, ngele omumwatate gwontumba okwa dhimbwa okuya keopaleko lyOshinyanga shUukwaniilwa. Ongiini ngele otwa kala tatu dhiladhila komapuko galwe agehe ngoka a ninga? Otashi vulika shi tu geyithe unene, nohole yetu yoku mu hola otayi ka talala. Ngele owi iyadha monkalo ya fa ndjono, onawa wu dhiladhile kwaashika: Jehova oha mono omapuko getu nosho wo gaamwatate. Nonando ohatu ningi omapuko, natango oku tu hole nosho wo aamwatate. Omolwetompelo ndyoka, otwa pumbwa okuholela ohole yaJehova nokukala tatu gandja eitulomo komaukwatya omawanawa gaamwatate. Ngele otwa longo nuudhiginini tu kale tu hole aamwatate, otashi ka koleka uukumwe pokati ketu nayo. — Fil. 2:1, 2.

9. “Iinima mbyoka yi na oshilonga” Paulus a popi montumwafo ye kAafilippi, oya kwatela mo shike?

⁹ Ombepo ondjapuki oya li ya wilike Paulus a nyolele Aafilippi, ya kale ye na “owino yokuyoolola iinima mbyoka yi na oshilonga.” Nokunena Aakriste ayehe osho ye na okuninga. (Fil. 1:10) Iinima mbyoka oya kwatela mo okuyapulitha edhina lyaJehova, okugwanithwa po kwehalo lye, ombili nosho wo uukumwe megongalo. (Mat. 6:9, 10; Joh. 13:35) Ngele otwa kala twa lenga iinima mbika monkalamwenyo yetu, otatu ka ulika kutya otu hole Jehova.

10. Oshike tu na okuninga, opo tu kale twa talika ko twa yela?

¹⁰ Paulus okwa ti wo kutya otu na okukala twa “yela.” Shika itashi ti kutya otu na okukala twa gwanenena. Itatu vulu okukala twa yela ngaashi Jehova Kalunga. Ihe Jehova ote ke tu tala ko twa yela, ngele otwa kambadhala okukokeka ohole yetu nongele otwa kala tu na owino yokuyoolola iinima mbyoka yi na oshilonga. Omukalo gumwe moka tatu vulu okuulika ohole, omokukambadhala ngaashi tatu vulu kaatu pundukithe yalwe.

11. Omolwashike tu na okuyanda okupundukitha yalwe?

¹¹ Elombwelo lyokuyanda okupundukitha yalwe, oli li lela elondodho. Omomukalo guni tashi vulika tu pundukithe yalwe? Okupitila momainyanyudho ngoka tatu hogolola, momukalo gwetu gwokuzala nenge nokuli niilonga yetu yokwiikongela omboloto. Shoka hatu ningi, otashi vulika shi kale inaashi puka musho shene. Ihe osha nika oshiponga, ngele shoka tatu hogolola otashi piyaganeke eiyuvo lyayalwe noku ya pundukitha. Jesus okwa ti kutya ngoka ta pundukitha gumwe gwomoonzi dhe, okwa gwana a mangelwe emanya edhigudhigu mothingo nokuumbilwa muule wefuta. — Mat. 18:6.

12. Oshike tatu ilongo koshiholelwa shaaihokani aakokolindjila?

¹² Ndhindhilika nkene aaihokani yamwe aakokolindjila ya tula miilonga elondodho ndyoka lyaJesus. Oya li megongalo limwe naaihokani yamwe opo ya adhika ya ninginithwa, mboka ya putudhwa kaavali ye na oshipango. Aaihokani mbaka aape oya li yi itaala kutya Aakriste kaye na oku ka tala oomuvi, nonando odha yogoka. Oya li ya kumwa lela, sho ya uvu kutya aaihokani aakokolindjila oya li ya ka tala omuvi. Konima yaashono, aaihokani aakokolindjila oya etha po oku ka tala oomuvi, sigo aalongwa aape mboka ya vulu okudheula eiyuvo lyawo, ya kale  ye shi okuyoolola shoka shi li mondjila naashoka sha puka. (Heb. 5:14) Sho aaihokani mbaka ya lalakanene uuwanawa waaihokani mboka aape, kungawo oye shi ulike kutya kaye ya hole owala moohapu, ihe nomiilonga. — Rom. 14:19-21; 1 Joh. 3:18.

13. Omomukalo guni tatu vulu okunwetha mo omuntu a yone?

¹³ Omukalo gulwe tatu vulu okupundukitha omuntu, oku mu nwetha mo a yone. Shoka otashi vulu okuningwa ngiini? Natu taleni koshiholelwa tashi landula. Konima sho omukonakonimbiimbeli gumwe a kala ta kondjo nuunkundi wokukala a pikwa komalovu uule womimvo, pehulilo okwa ka vula oku wu sinda. Okwe shi ndhindhilike kutya oku na oku ga kala kokule thiluthilu. Okwa ningi ehumokomeho meendelelo, e ta ninginithwa. Lwanima, omumwatate gumwe okwe mu hiya kokatuthi, nokwa li te mu ladhipike a taambe oshikunwa shoalkoholi ta ti: “Ngoye Omukriste ngashingeyi; owu na ombepo yaJehova. Oshiyimati shimwe shombepo, eipangelo. Ngele owa kala wu na eipangelo, oto ka vula okunwa omalovu pandjele.” Ando omumwatate ngoka opo a ninginithwa okwa pulakenene komayele ngoka ga puka, andola inashi mu etela tuu iilanduliko iiwinayi!

14. Okugongala kwopaKriste ohaku tu kwathele ngiini tu tule miilonga omayele ngoka ge li mAafilippi 1:10?

¹⁴ Okugongala kwetu kwopaKriste ohaku tu kwathele tu tule miilonga omayele ngoka ge li mAafilippi 1:10, momikalo odhindji. Gwotango, shoka hatu ilongo pokugongala, ohashi tu ulukile shoka Jehova a tala ko sha simanenena. Omutiyali, ohatu ilongo nkene tu na okutula miilonga shoka tatu ilongo, opo tu kale twa  yela momeho gaJehova. Omutitatu, ohatu longwa tu kale tu ‘holathane nokulongelathana uuwanawa.’ (Heb. 10:24, 25) Uuna aamwatate taya tsikile oku tu tsa omukumo, ohole yetu yoku ya hola noyokuhola Kalunga, ohayi koko. Ngele otwa kala tu hole Kalunga naamwatate nomutima gwetu aguhe, otatu ka ninga ngaashi tatu vulu tu yande okupundukitha ooitaali ooyakwetu.

15. Okukala tu “udha iiyimati iiwanawa”, otashi ti shike?

¹⁵ Paulus okwa li a galikana neitulomo Aafilippi ya kale ya “udha iiyimati iiwanawa.” (Fil. 1:11) Odhoshili kutya “iiyimati iiwanawa” mbyoka oya li ya kwatela mo ohole yawo yokuhola Kalunga noshigwana she. Oya li wo ya kwatela mo okulombwela yalwe kombinga yeitaalo lyawo muJesus noyetegameno lyawo ewanawa. MAafilippi 2:15 omwa longithwa wo uutumbulilo ‘okwaadhima ngashika oonyothi tadhi adhima pombanda kegulu.’ Uutumbulilo mboka otawu opalele, molwaashoka Jesus okwa ithana aalanduli ye “uuyelele wuuyuni.” (Mat. 5:14-16) Okwa lombwele wo aalanduli ye ya “ninge aantu . . . aalongwa” nokwa ti kutya otaya ka ‘ninga oonzapo miilongo ayihe yokombanda yevi.’ (Mat. 28:18-20; Iil. 1:8) Ohatu imike “iiyimati iiwanawa,” uuna tatu longo ngaashi tatu vulu miilonga mbika ya simanenena.

16. Aafilippi 1:12-14 otadhi ulike ngiini kutya otatu vulu okwaadhima ngashika oonyothi, nonando otu li moonkalo oondhigu? (Tala ethano lyokombanda.)

¹⁶ Nonando onkalo yetu oyi kale ya tya ngiini, otatu vulu okwaadhima ngashika oonyothi. Poompito dhimwe, oonkalo ndhoka hadhi monika dha fa tadhi yi moshipala iilonga yetu, ohadhi tu egululile ompito yokuuvitha. Pashiholelwa, omuyapostoli Paulus okwa li mondholongo yomegumbo muRoma, pethimbo a nyolele Aafilippi ontumwafo. Nonando Paulus okwa li mondholongo, shoka inashi mu imba a uvithile mboka haye mu tonatele naamboka  taye ya oku mu talela po. Paulus okwa kala ta uvitha nuulaadhi moonkalo ndhoka, naashoka osha li sha tsu aamwatate omukumo ya ‘uvithe nuulaadhi yaa na uumbanda.’ — Lesha Aafilippi 1:12-14; 4:22.

17. Gandja oshiholelwa shokunena kombinga yokuuvitha moonkalo oondhigu.

¹⁷ Aamwatate naamwameme oyendji, oye na ompito yokuholela uulaadhi waPaulus. Nonando oye li miilongo moka itaaya vulu okuuvitha ya manguluka nenge okuuvitha egumbo negumbo, ohaya kongo oompito ya uvithe onkundana ombwanawa. (Mat. 10:16-20) Mushimwe shomiilongo mbyoka, omutonatelishikandjo okwa li a ladhipike omuuvithi kehe a uvithile aantu yomoshitopolwa shawo, mwa kwatelwa aakwanezimo ye, aashiinda, aanasikola pamwe naye, aaniilonga pamwe naye nookuume ke. Muule womimvo mbali, omagongalo oga indjipala noonkondo. Otashi vulika moshilongo shetu iilonga yetu inaayi indikwa. Nonando ongawo, otatu vulu okwiilonga sha sha simana kaamwatate naamwameme mboka haya longo nuudhiginini. Oshini? Okukala aluhe hatu kongo oompito tu kuthe ombinga miilonga yokuuvitha, tu na einekelo kutya Jehova ote ke tu pa oonkondo tu sinde eshongo kehe tatu tsakaneke. — Fil. 2:13.

18. Otu na okukala twa tokola toko okuninga shike?

¹⁸ Unene tuu pethimbo ndika, otu na okukala twa tokola toko tu tule miilonga omayele ga nwethwa mo, ngoka taga adhika montumwafo ndjoka Paulus a li a nyolele Aafilippi. Natu kale tu na owino yokuyoolola iinima mbyoka yi na oshilonga, twa yela momeho gaKalunga, hatu yanda okupundukitha yalwe nokukala twa udha iiyimati iiwanawa. Ngele tatu shi ningi, ohole yetu otayi ka koka, notatu ka simanekitha Tate yetu omunahole, Jehova.