1. Omapulo geni tashi vulika tu ipule uuna tatu dhiladhila kwaashihe shoka Jehova a shita?

NGELE tatu dhiladhila kwaashihe shoka Jehova a shita, otashi vulika tu kale tu uvite ngaashi omupisalomi David, ngoka a li a galikana Jehova te mu pula ta ti: “Ngele te tala kegulu ndyoka we li shiti, komwedhi noonyothi mbyoka we yi uthile omahala gayo. Omuntu omushike, sho ho mu dhimbulukwa; omushamba gwowala, u na oshimpwiyu naye?” (Eps. 8:3, 4) Ngaashi David, natse otashi vulika tu kale twa kumwa ngele otwa dhiladhila kunkene tu li aashona noonkondo okuyelekanitha negulu ndoka Jehova a shita, ihe ohe tu kaleke momadhiladhilo. Ngaashi tatu ke shi kundathana, Jehova ka li owala ha gandja eitulomo kuAdam naEva, ihe oya li wo iilyo yomuukwanegumbo we.

2. Jehova okwa li a hala Adam naEva ya ninge shike?

² Adam naEva oya li oyana yaJehova yotango yokombanda yevi, na Jehova okwa li Tate gwawo gwomegulu omunahole. Jehova okwa li a tegelela aaihokani mboka ya kale uukwanegumbo tawu shi enditha nawa. Okwa li e ya lombwele a ti: “Valathaneni, ne mu indjipale nokuudha evi alihe. Li tuleni mepangelo lyeni.” (Gen. 1:28) Jehova okwa li a hala Adam naEva ya mone aanona nokusila oshimpwiyu evi. Ando oya vulikile kuJehova nokuninga ngaashi e ya lombwele, ando yo noyana oya kala yomuukwanegumbo waKalunga sigo aluhe.

3. Omolwashike tatu vulu okutya sho Adam naEva ya li oshitopolwa shuukwanegumbo waJehova osha li shu ulike kutya Jehova okwe ya simaneka?

³ Sho Adam naEva ya li oshitopolwa shuukwanegumbo waJehova osha li shu ulike kutya Jehova okwe ya simaneka noonkondo. Ngaashi sha nyolwa mEpisalomi 8:5, David okwa li a popi kombinga yankene Jehova a shiti omuntu, a ti: “Omuntu owe mu shiti e vulike ashike [kashona kaayengeli], owe mu zaleke eadhimo  nesimano.” Odhoshili kutya Jehova ina pa aantu oonkondo, oondunge nenge iipewa ya fa mbyoka aayengeli ye na. (Eps. 103:20) Nonando ongawo, omuntu oku “vulike ashike kashona” kaayengeli. Shoka oshikumithi shili! Sho Jehova a shiti aavali yetu yotango, okwe ya pe onkalamwenyo ombwanawa lela.

4. Oshike sha ningilwa Adam naEva molwaashoka inaaya vulika kuJehova, noshike tatu ka kundathana moshitopolwa shika?

 ⁴ Shiyemateka, molwaashoka Adam naEva kaya li ya vulika kuJehova, inaya kala we oshitopolwa shuukwanegumbo we. Shoka oshe etele oluvalo lwawo omaupyakadhi ogendji, ngaashi tatu ke shi mona moshitopolwa shika. Ihe elalakano lyaJehova inali lunduluka. Okwa hala mboka haya vulika kuye ya kale oyana sigo aluhe. Tango, natu ka kundathaneni nkene Jehova u ulika nale kutya otwa simana kuye. Opo nduno otatu ka kundathana shoka tatu vulu okuninga ngashingeyi, opo tu ulike kutya otwa hala okukala oshitopolwa shuukwanegumbo we. Hugunina, otatu ka kundathana kombinga yomayambeko ngoka oyana yaJehova yokombanda yevi taya ka nyanyukilwa sigo aluhe.

5. Ongiini tatu vulu okuulukila Kalunga kutya otwe mu pandula sho e tu shita oshifetha she?

⁵ Jehova oku ulika kutya otwa simana kuye sho e tu shiti oshifetha she. (Gen. 1:26, 27) Molwaashoka otwa shitwa oshifetha shaKalunga, otatu vulu okukala tu na nokuulika omaukwatya omawanawa ogendji ga fa ge, ngaashi ohole, olukeno, uudhiginini nuuyuuki. (Eps. 86:15; 145:17) Uuna tatu kokeke omaukwatya ngoka, ohashi simanekitha Jehova nohashi ulike kutya otwe mu pandula. (1 Pet. 1:14-16) Uuna hatu ihumbata momukalo ngoka Tate yetu gwomegulu a hokwa, ohatu kala twa nyanyukwa notu uvite ombili. Shimwe ishewe, Jehova okwe tu shita hatu vulu okuholela omaukwatya ge, onkene otatu vulu okukala ngaashi aantu mboka a halela muukwanegumbo we.

6. Jehova oku ulike ngiini kutya okwa simaneka aantu sho a shiti evi?

⁶ Jehova okwe tu longekidhila ehala lyi ikalekelwa. Manga Jehova inaa shita omuntu gwotango, okwa longekidha evi, opo ku vule okukaliwa kaantu. (Job 38:4-6; Jer. 10:12) Molwaashoka Jehova omunalukeno noha gandja, kombanda yevi okwa shitila ko iinima oyindji mbyoka tatu vulu okunyanyukilwa. (Eps. 104:14, 15, 24) Pompito yimwe okwa li a kutha ethimbo a konakone eshito lye, nokwa ‘mono kutya olyo opala lela.’ (Gen. 1:10, 12, 31) Oku ulike kutya okwa simaneka aantu sho e ya ningi ‘aapangeli’ yiinima ayihe mbyoka a shita kombanda yevi. (Eps. 8:6) Oshi li elalakano lyaKalunga aantu ya nyanyukilwe okusila oshimpwiyu eshito lye sigo aluhe. Mbela oho pandula ngaa Jehova aluhe omolweuvaneko lye ndyoka?

7. Josua 24:15 otu ulike ngiini kutya aantu oye na emanguluko lyokuninga omatokolo?

⁷ Jehova okwe tu pa emanguluko lyokuninga omatokolo. Otatu vulu okutokola shoka twa hala okuninga monkalamwenyo. (Lesha Josua 24:15.) Kalunga ketu omunahole oha kala a nyanyukwa uuna twa hogolola tu mu longele. (Eps. 84:11; Omayel. 27:11) Otatu vulu okulongitha emanguluko lyetu lyokuninga omatokolo momikalo dhilwe odhindji. Natu ka taleni koshiholelwa shoka Jesus e tu tulila po.

8. Pompito yimwe Jesus okwa li a longitha ngiini emanguluko lye lyokuninga omatokolo?

⁸ Otatu vulu okuholela Jesus, mokukala hatu pititha oompumbwe dhayalwe komeho yoompumbwe dhetu. Oshikando shimwe Jesus naayapostoli ye oya li ya vulwa noonkondo, onkene oya yi kehala lyi ikalela ya ka vululukwe po. Ihe kaya li ya vulu okuvululukwa po. Ongundu yaantu oye ya mono, noya li ya halelela okulongwa kuJesus. Nonando Jesus okwa li a vulwa, ka li e wete ta piyaganekwa kuyo. Pehala  lyaashono okwa li e yu uvitile olukeno. Oshike nduno a li a ningi po? ‘Okwa tameke oku ya longa iinima oyindji.’ (Mark. 6:30-34 ) Ngele otwa kala hatu holele Jesus mokulongitha ethimbo lyetu noonkondo dhetu tu kwathele yalwe, kungawo otatu simanekitha Tate yetu gwomegulu. (Mat. 5:14-16) Ohashi ulukile wo Jehova kutya otwa hala okukala oshitopolwa shuukwanegumbo we.

9. Omagano geni gi ikalekelwa Jehova a pa aavali?

⁹ Jehova okwa shita aantu haya vulu okumona aanona, nokwe ya pa wo oshinakugwanithwa shoku ya longa ya kale ye mu hole noye mu longele. Ngele ngoye omuvali, mbela owa pandula ngaa omagano ngaka gi ikalekelwa? Nonando aayengeli ohaya vulu okuninga iinima oyindji iikumithi, Jehova ine ya shita haya vulu okumona aanona. Onkee ano, ngele owu li omuvali, pandula Jehova omolwuuthembahenda wokumona aanona. Aavali oya pewa oshinakugwanithwa sha simana ‘shokuputudha aanona noku ya kumagidha paukriste.’ (Ef. 6:4; Deut. 6:5-7; Eps. 127:3) Opo ehangano lyaJehova li kwathele aavali, olya nyanyangidha po iilongitho oyindji ya kankamena kOmbiimbeli mbyoka tayi vulu oku ya kwathela, ngaashi iileshomwa, uuvidio, omusika nosho wo iitopolwa yokepandja lyetu lyokointaneta. Osha yela kutya Tate yetu gwomegulu nosho wo Omwana oye hole aanona yetu. (Luk. 18:15-17) Jehova oha kala e shi hokwa uuna aavali ye mu inekela nohaya ningi ngaashi taya vulu ya sile oshimpwiyu oyana. Kungawo otaya ka kwathela wo oyana ya kale ye na etegameno lyokukala oshitopolwa shuukwanegumbo waJehova sigo aluhe.

10-11. Oshike shoka Jehova a ninga tashi wapa okupitila mekuliloyambo?

¹⁰ Jehova okwe tu pa Omwana omuholike, opo tu vule okukala ishewe oshitopolwa shuukwanegumbo we. Ngaashi sha popiwa  mokatendo 4, sho Adam naEva ya yono, yo nosho wo oluvalo lwawo inaya vula we okutsikila okukala oshitopolwa shuukwanegumbo waJehova. (Rom. 5:12) Adam naEva oya yonene owina, onkene oshu uka sho Jehova inee ya pitika ya tsikile okukala oshitopolwa shuukwanegumbo we. Ihe ongiini kombinga yoyana? Jehova okwa tula po elongekidho lyopahole, opo mboka haya vulika kuye ya vule okukala oshitopolwa shuukwanegumbo we. Shoka okwe shi ningi tashi wapa okupitila mekuliloyambo lyOmwana awike, Jesus Kristus. (Joh. 3:16; Rom. 5:19) Omolwekuliloyambo lyaJesus Kristus, aantu 144 000 aadhiginini otaye ende taya hogololwa ya ninge oyana yaJehova yi ikalekelwa. — Rom. 8:15-17; Eh. 14:1.

¹¹ Shimwe ishewe, aantu yalwe omamiliyona mboka aadhiginini otaya longo ehalo lyaJehova noye na etegameno lyoku ka kala oshitopolwa shuukwanegumbo waKalunga konima yemakelo lyahugunina pehulilo lyomimvo eyuvi. (Eps. 25:14; Rom. 8:20, 21) Molwaashoka oye na etegameno ndyoka, ohayi ithana Jehova, Omushiti gwawo, “Tate.” (Mat. 6:9) Mboka ya yumudhwa nayo otaya ka pewa ompito yi ilonge kombinga yaJehova. Mboka taya ka vulika kewiliko lye, mokweendela ko kwethimbo otaya ka kala oshitopolwa shuukwanegumbo we.

12. Epulo lini tatu ka yamukula ngashingeyi?

¹² Ngaashi twe shi mono, Jehova okwa kala nokuulika kutya okwa simaneka aantu. Okwa hogolola nale aagwayekwa ya kale oyana, nokwa pa wo mboka ‘yomongundu onene’ etegameno lyoku ka kala oyana muuyuni uupe. (Eh. 7:9) Oshike tatu vulu okuninga ngashingeyi, tu ulukile Jehova kutya otwa hala okukala oshitopolwa shuukwanegumbo we sigo aluhe?

13. Oshike tatu vulu okuninga, opo tu kale oshitopolwa shuukwanegumbo waKalunga? (Mark. 12:30)

¹³ Ulika kutya owu hole Jehova moku mu longela nomutima gwoye aguhe. (Lesha Markus  12:30.) Miinima ayihe mbyoka twa pewa kuKalunga, oku mu longela oko omagano ga dhenga mbanda. Ohatu ulukile Jehova kutya otu mu hole ‘mokuvulika kiipango ye.’ (1 Joh. 5:3) Shimwe shomiipango mbyoka Jehova a hala tu vulike kuyo, ooshoka Jesus e tu lombwela tu kale hatu dhiginine, ano okuninga aantu aalongwa noku ya ninginitha. (Mat. 28:19) Okwe tu lombwela wo tu kale tu holathane. (Joh. 13:35) Jehova ota ka taamba ko ayehe mboka haya vulika kiipango ye ya kale oshitopolwa shuukwanegumbo we. — Eps. 15:1, 2.

14. Ongiini tatu vulu okuulukila yalwe ohole? (Mateus 9:36-38; Aaroma 12:10)

¹⁴ Ulika kutya owu hole yalwe. Ohole oyo uukwatya waJehova wa tongomana. (1 Joh. 4:8) Jehova okwe tu ulukile ohole ye manga nokuli kaatwa li tu mu shi. (1 Joh. 4:9, 10) Ohatu mu holele uuna tatu ulukile yalwe ohole. (Ef. 5:1) Omukalo gumwe dhingi tatu vulu okuulukila aantu ohole, omoku ya kwathela yi ilonge kombinga yaJehova manga pu na natango ethimbo. (Lesha Mateus 9:36-38.) Uuna tatu shi ningi, kungawo otatu ya pe ompito nayo ya kale ye na etegameno lyokukala oshitopolwa shuukwanegumbo waKalunga. Konima ngele omuntu a ninginithwa, otu na okutsikila okukala tu mu hole notwe mu simaneka. (1 Joh. 4:20, 21) Shoka osha kwatela mo shike? Okukala twe mu inekela. Pashiholelwa, uuna a ningi epuko, itatu ka dhiladhila kutya okwe li ninga molwaashoka i ihole. Pehala lyaashono otatu ku ulika kutya otwe mu simaneka, moku mu tala ko e tu vule. — Lesha Aaroma 12:10; Fil. 2:3.

15. Oolye tu na okuulukila ohenda nolukeno?

¹⁵ Ulukila aantu ayehe ohenda nolukeno. Ngele otwa hala okukala yamwe yomwaamboka tayi ki ithana Jehova Tate gwawo sigo aluhe, otu na okutula miilonga Oohapu dhaKalunga monkalamwenyo yetu. Pashiholelwa, Jesus okwe tu longa kutya otu na okuulukila aantu ayehe ohenda nolukeno, nokuli naatondi yetu. (Luk. 6:32-36) Otashi vulika omathimbo gamwe tu mone oshidhigu oku shi ninga. Ngele osho, otwa pumbwa okwiilonga okudhiladhila nokukatuka ngaashi Jesus. Ngele otwa kala hatu ningi ngaashi tatu vulu tu vulike kuJehova notu holele Jesus, kungawo otatu ulukile Tate yetu gwomegulu kutya otwa hala okukala oshitopolwa shuukwanegumbo we sigo aluhe.

16. Ongiini tatu vulu okugamena edhina lyuukwanegumbo waJehova?

¹⁶ Gamena edhina lyuukwanegumbo waJehova. Megumbo, olundji okanona kokamati ohaka holele shoka omumwayinamati omukuluntu ha ningi. Ngele omumwayinamati omukuluntu oha tula miilonga omakotampango gOmbiimbeli, nena oha kala oshiholelwa oshiwanawa kuko. Ngele okwa tameke okukala ha ningi iinima iiwinayi, nako otashi vulika ka tameke oku yi ninga. Osha faathana wo nomuukwanegumbo waJehova. Ngele Omukriste gumwe omudhiginini okwa ningi omushunimonima nenge a tameke okukala e na eihumbato lya nyata, Aakriste yamwe nayo otashi vulika ya kale ya hala oku mu wayimina nenge ye mu holele. Mboka haye shi ningi ohaya nyateke edhina lyuukwanegumbo waJehova. (1 Tes. 4:3-8) Otwa pumbwa okuyanda okulandula iiholelwa iiwinayi nokatu na okupitika nando osha shi teye po ekwatathano lyetu naTate yetu gwomegulu omunahole.

17. Oshike tu na okuyanda, nomolwashike?

¹⁷ Inekela muJehova pehala lyokwiinekela miinima yopamaliko. Jehova oku uvaneka kutya ote ke tu kwathela tu kale tu na iikulya, omizalo nosho wo ehala lyokukala, ngele otwa kala twa pititha Uukwaniilwa we komeho, nokukala hatu vulika komithikampango dhe dhi li pauyuuki. (Eps. 55:22; Mat. 6:33) Tu na shoka momadhiladhilo, otu na okuyanda okudhiladhila kutya iinima yopamaliko yomuuyuni mbuka otayi ke tu etela egameno nenyanyu tali kalelele. Otu shi kutya okulonga ehalo lyaJehova oko owala taku vulu oku tu etela ombili yashili. (Fil. 4:6, 7) Nonando  otu kale tu na iimaliwa yokulanda iinima oyindji, otwa pumbwa okutala ngele otu na ngaa shili ethimbo noonkondo tu yi sile oshimpwiyu. Mbela otashi vulika tu tameke okukala tu hole unene iinima yetu yopamaliko? Otu na okudhimbulukwa kutya Kalunga okwa tegelela tu kale twa pititha komeho iilonga mbyoka e tu pa. Ano katu na okupitika nando osha shi tu piyaganeke. Inatu hala okukala twa fa omulumentu omugundjuka ngoka a li a pewa ompito yokulongela Jehova nokwa li wo ta vulu okukala e na etegameno lyokukala gumwe gwomoyana, ihe okwe yi tindi, molwaashoka owala a li a hokwa unene eliko ndyoka a li e na. — Mark. 10:17-22.

18. Aantu mboka haya vulika kuKalunga otaya ka nyanyukilwa omayambeko geni?

¹⁸ Jehova ote ku ulika kutya okwa simaneka noonkondo aantu mboka haya vulika kuye, sho te ke ya pa uuthembahenda wokukala ye mu hole noku mu longela sigo aluhe. Mboka ye na etegameno lyoku ka kala nomwenyo sigo aluhe kombanda yevi, otaya ka nyanyukilwa wo okusila oshimpwiyu evi ndyoka Jehova a shita li kale ehala lyawo lyokukala. Masiku evi naashihe shoka shi li ko otayi ka ninga iipe uuna Uukwaniilwa waKalunga wa tameke okupangela kombanda yevi. Jesus ota ka hulitha po omaupyakadhi agehe ngoka ge etithwa kokwaavulika kwaAdam naEva. Jehova ota ka yumudha aantu omamiliyona noku ya pa ompito yokukala nomwenyo sigo aluhe meviparadisa. (Luk. 23:42, 43) Sho mboka haya longele Jehova taye ke enda yu uka megwaneneno, kehe gumwe gwomuyo ota ka ‘zala eadhimo nesimano’ ndyoka David a nyola kombinga yalyo. — Eps. 8:5.

19. Oshike tu na okukaleka momadhiladhilo?

¹⁹ Ngele ngoye ‘ogwomongundu onene,’ owu na etegameno ewanawa. Kalunga oku ku hole nokwa hala wu kale oshitopolwa shuukwanegumbo we. Onkee ano, ninga ashihe shoka to vulu wu mu nyanyudhe. Esiku kehe kaleka omauvaneko gaKalunga momadhiladhilo nomomutima gwoye. Kala wa pandula uuthembahenda wokulongela Tate yetu gwomegulu omunahole, e to kala wa lenga etegameno lyoku ke mu tanga sigo aluhe!