1-2. Ngaashi sha popiwa mEpisalomi 34:8, oshike tu na okuninga tu mone kutya Jehova omwaanawa?

DHILADHILA ando wa pewa iikulya yontumba mbyoka inoo lya nale. Oto vulu okumona kutya iikulya mbyoka oya tya ngiini moku yi tala, moku yi nika, mokutseya nkene hayi telekwa nenge mokupula mboka ye yi lya nale ngele oye yi hole. Ihe opo wu mone ngele nangoye oto ke yi panda nenge hasho, owu na oku yi lola ngoye mwene.

² Otatu vulu okumona kutya Jehova omwaanawa, mokulesha Ombiimbeli niileshomwa yetu nomokuuva yalwe taya popi kombinga yiinima iiwanawa mbyoka Jehova e ya ningila. Ihe otatu ka tseya owala kutya Jehova omwaanawa shili ngele otwa “konakona” nenge twe shi lolo tse yene. (Lesha Episalomi 34:8.) Natu taleni kethaneko limwe lyankene tatu vulu oku shi ninga. Natu tye ando owa hala okuya miilonga yethimbo lyu udha. Ihe opo wu vule okwaadha elalakano ndyoka, tango owa pumbwa okukaleka onkalamwenyo yoye paunathangwa. Otashi vulika wa lesha lwiikando kombinga yeuvaneko lyaJesus kutya ngele owa pititha komeho Uukwaniilwa, Jehova ote ke ku sila oshimpwiyu, ihe ino gwanithilwa nando onale euvaneko ndyoka. (Mat. 6:33) Nonando ongawo, molwaashoka owi itaala kutya shoka Jesus u uvaneka oshi na okugwanithwa, owe etha po okulanda iinima yontumba, okulonga ethimbo lyu udha kiilonga yokwiikongela omboloto, e to tameke okulonga nuudhiginini muukalele. Sho wa ningi ngawo, owe ke shi mona kutya Jehova ohe tu sile oshimpwiyu shili nonokutya ye omwaanawa.

3. Metsokumwe nEpisalomi 16:1, 2, oolye Jehova ha ningile uuwanawa?

³ Jehova “oha ningile aantu ayehe uuwanawa,” (NW) nokuli nonaamboka kaaye mu shi. (Eps. 145:9; Mat. 5:45) Ihe mboka ye mu hole nohaye mu longele nomutima aguhe ohe ya laleke nuuyamba. (Lesha Episalomi 16:1, 2.) Natu ka taleni kiinima yimwe iiwanawa mbyoka Jehova he tu ningile.

4. Iinima iiwanawa yini Jehova ha ningile mboka haya hedha popepi naye?

 ⁴ Ohashi tu etele omauwanawa ogendji uuna tatu tula miilonga shoka Jehova te tu longo. Sho twi ilongo kombinga ye, e tatu tameke okukala tu mu hole, okwe tu kwathele tu ethe po okudhiladhila kwa puka nosho wo eihumbato ndyoka e tonde. (Kol. 1:21) Sho twe mu iyapulile e tatu ninginithwa, okwe tu pe iinima iiwanawa oyindji, ngaashi eiyuvo lya yela nosho wo uukuume wopothingo naye. — 1 Pet. 3:21.

5. Jehova ohe tu longele ngiini uuwanawa uuna tu li muukalele?

⁵ Jehova ohe tu longele uuwanawa owundji uuna tu li muukalele. Otashi vulika wu na oohoni, ngaashi oyendji yomaapiya ye. Manga inoo ninga Onzapo yaJehova, otashi vulika inoo dhiladhila nando onale wu ye kegumbo lyomuntu kuu mu shi e to mu lombwele kombinga yOmbiimbeli. Ihe ngashingeyi oho shi ningi aluhe. Jehova okwe ku kwathela nokuli wu kale ho nyanyukilwa iilonga mbyoka, nowa mona nkene e ku kwathela momikalo dhilwe. Pashiholelwa, okwe ku kwathela wu kale ho kala wa ngungumana uuna wa tsakaneke aapataneki muukalele. Okwe ku kwathele wo wu dhimbulukwe omanyolo gontumba uuna to uvithile omunegumbo ngoka tu ulike ohokwe. Shimwe ishewe, ohe ku pe oonkondo wu tsikile okuuvitha nuuna aantu inaaya hala okupulakena. — Jer. 20:7-9.

6. Edheulo ndyoka Jehova he tu pe otali ulike ngiini kutya ye omwaanawa?

⁶ Jehova ohe tu longele wo uuwanawa moku tu dheulila iilonga yokuuvitha. (Joh. 6:45) Pokugongala kwetu kwomokati koshiwike ohatu pulakene kiiholelwa yoonkundathana ya longekidhwa nawa, nohatu ladhipikwa tu ke yi longithe sho tu li muukalele. Petameko otashi vulika tu kale tu na uumbanda woku yi longitha, ihe uuna twe yi longitha ohatu mono kutya ohayi pondola shili. Pokugongala nopiigongi yoshitopolwa ohatu ladhipikwa wo tu uvithe momikalo dhilwe ndhoka tashi vulika inaatu kambadhala nale. Otashi vulika petameko tu kale twa tila oku shi ninga, ihe ngele otwe shi ningi Jehova ota ka yambeka oonkambadhala dhetu. Ngashingeyi natu ka taleni komalaleko nuuyamba ngoka Jehova te ke tu pa, ngele otwa kala twe mu inekela e tatu kambadhala omikalo dhilwe dhoku mu longela, kutya nduno onkalo yetu oya tya ngiini. Opo nduno otatu ka tala kunkene tatu vulu okutamununa mo uukalele wetu.

7. Ohatu mono omayambeko geni uuna twa tamununa mo uukalele wetu?

⁷ Ohatu hedha popepyeelela naJehova. Natu taleni koshiholelwa shomukuluntugongalo gwedhina Samuel, * ngoka e li omukokolindjila pamwe nomukadhi moKolombia. Nonando oya li taya kokola ondjila megongalo moka ya li, oya li ya hala okutamununa mo uukalele wawo, moku ka kwathela kegongalo hoka ku na ompumbwe. Opo ya adhe elalakano lyawo ndyoka, oya li ye na okuninga omalunduluko gontumba. Samuel okwa ti: “Otwa tula miilonga Mateus 6:33, e tatu etha po okulanda iinima mbyoka inaatu pumbwa. Ihe kasha li oshipu kutse okuthiga po egumbo lyetu. Olya li lye tu opalela notwa li twa mana oku li futa ko.” Sho ya tembukile kegongalo hoka ku na ompumbwe, oye ke shi mona kutya kaya li we ya pumbwa iimaliwa oyindji opo ya hupe ngaashi nale. Samuel okwa ti: “Otwa mono nkene Jehova te tu wilike nankene a yamukula omagalikano getu. Otu uvite kutya Jehova okwe tu hokwa notu uvite ohole ye momikalo odhindji moka inaatu yi mona nale.” Mbela nangoye ito vulu okutamununa mo uukalele woye momukalo gwontumba? Ngele owe shi ningi, kala nuushili kutya oto ka hedha popepyeelela naJehova note ke ku sila oshimpwiyu. — Eps. 18:25.

8. Oshike wi ilonga kwaashoka Ivan naViktoria ya popya?

⁸ Ohatu nyanyukilwa iilonga yetu. Natu ka taleni kwaashoka aaihokani yaali, Ivan naViktoria,  mboka ye li aakokolindjila moKyrgyzstan, ya popya. Oya kaleke onkalamwenyo yawo paunathangwa, opo ya vule okukwathela kehe mpoka pu na ompumbwe, ngaashi miilonga yokutunga. Ivan okwa ti: “Otwa kala hatu longo nuudhiginini iilonga kehe tatu pewa tu longe. Nonando sho hatu zimbuka ohatu kala twa vulwa, ohatu kala tu uvite ombili notwa nyanyukwa, oshoka otu shi kutya otatu longele Jehova. Okupanga uukuume nayalwe okwe tu etela enyanyu olindji nosho wo iimoniwa oyindji iiwanawa.” — Mark. 10:29, 30.

9. Omumwameme gumwe okwa tamununa mo ngiini uukalele we nonando oku li monkalo ondhigu, noshe mu etele iizemo yini?

⁹ Otatu vulu okukala twa nyanyukwa sho tatu longele Jehova nuuna tu li moonkalo oondhigu. Pashiholelwa, omuselekadhi gumwe omukokele gwedhina Mirreh, ngoka ha zi kUuninginino waAfrika, okwa li ondohotola, ihe sho a penzelwa okwa tameke okukokola ondjila. Oku na uuwehame mboka hawu shi ningi oshidhigu okweenda, onkene oha vulu owala okuuvitha egumbo negumbo uule wowili yimwe. Nonando ongawo, oha longo ethimbo olindji mokuuvitha montaneho. Oku na wo omaishunoko naakonakonimbiimbeli oyendji, noyendji yomuyo oha popi nayo okupitila mongodhi. Oshike sha li shi inyengitha Mirreh a longele Jehova nuudhiginini? Okwa ti: “Ondi hole Jehova naJesus Kristus noonkondo. Ohandi galikana wo olundji, opo Jehova a kwathele ndje ndi ninge ngaashi tandi vulu ndi mu longele.” — Mat. 22:36, 37.

10. Ngaashi sha popiwa muPetrus gwotango 5:10, Jehova oha gandja shike kwaamboka haye mu longele nuudhiginini?

¹⁰ Jehova ohe tu dheula. Omumwatate Kenny, ngoka e li omukokolindjila moMauritius okwa mono kutya Jehova ohe tu dheula shili. Sho i ilongo oshili okwa thigi po ouniveesiti, e ta ninginithwa nokwa yi miilonga yethimbo lyu udha. Okwa ti: “Ohandi kambadhala okuholela omuhunganeki Jesaja, ngoka a tile: ‘Otandi yi! Tuma ndje!’” (Jes. 6:8) Kenny okwa kwathela miilonga ya yoolokathana yokutunga nomokutoloka iileshomwa yetu melaka ndyoka a yama. Okwa ti: “Onda li nda mono edheulo ndyoka lya kwathele ndje ndi gwanithe po iinakugwanithwa yandje.” Ihe ka li owala i ilongo nkene e na okulonga iilonga ye. Okwa gwedha ko a ti: “Ondi ilongo wo kutya ondi na omangambeko nosho wo omaukwatya ngoka nda pumbwa okukala ndi na, opo ndi longele Jehova nuudhiginini.” (Lesha 1 Petrus 5:10.) Mbela nangoye ito vulu okuninga omalunduluko monkalamwenyo yoye, opo Jehova e ku dheule momikalo dhontumba?

11. Oonkambadhala dhini aamwameme yamwe yokoSouth Korea ya li ya ningi, opo ya kuthe ombinga miilonga yokuuvitha, noshizemo osha li shini? (Tala ethano lyokombanda.)

¹¹ Naamboka ya longela Jehova ethimbo ele ohaya kala ya pumbwa edheulo uuna taya kambadhala okulongela Jehova momikalo dhilwe ndhoka inaaya igilila. Pethimbo lyomukithi gwo-COVID-19, aakuluntugongalo yomegongalo limwe lyomoSouth Korea oya nyola ya ti: “Yamwe mboka ya li taya dhiladhila kutya itaya vulu okuuvitha omolwokwaanuukolele, ngashingeyi ohaya uvitha taya longitha omakwatathano gopaintaneta. Aamwameme yatatu mboka ye na omimvo 80 nasha, oyi ilongo okulongitha iikwaelektronika, nongashingeyi ohaya uvitha konyala esiku kehe.” (Eps. 92:14, 15) Mbela ngoye ino hala okutamununa mo uukalele woye, opo wu mone uuwanawa waJehova? Natu taleni kiinima yimwepo mbyoka to vulu okuninga.

12. Jehova oku uvaneka okuningila shike mboka ye mu inekela?

¹² Kala wi inekela muJehova. Oku uvaneka kutya ngele otwe mu inekele e tatu mu longele nuudhiginini, ote ke tu laleka nuuyamba. (Mal. 3:10) Omumwameme gwedhina Fabiola ngoka ha zi moColombia okwa mono nkene Jehova  a gwanitha po euvaneko ndyoka. Nziya konima sho a ninginithwa okwa li a hala okukokola ondjila. Ihe okwa li e na okulonga, opo a sile oshimpwiyu omusamane gwe naanona yawo yatatu. Onkee ano, sho a penzelwa okwa kala ta galikana Jehova nomutima aguhe e mu kwathele. Okwa ti: “Olundji ohashi pula ethimbo ele opo omuntu a pewe iimaliwa ye yopenzela, ihe yandje onde yi pewa konima owala yomwedhi gumwe. Osha li owala sha fa oshikumithalonga!” Konima yoomwedhi mbali, okwa tameke okukokola ondjila. Ngashingeyi oku na omimvo 70 nasha nokwa kala ta kokola ondjila uule womimvo dha konda po 20. Momukokomoko gwethimbo ndyoka okwa kwathela aantu yahetatu ya thike poshitsa shokuninginithwa. Okwa ti: “Nonando omathimbo gamwe ihandi kala ndi na oonkondo, Jehova oha kwathele ndje kehe esiku ndi tsikile okukokola ondjila.”

13-14. Iiholelwa yini tayi vulu oku tu kwathela tu kale twi inekela muJehova nokutamununa mo uukalele wetu?

¹³ Ilonga sha kiiholelwa yaamboka ya kala yi inekela muJehova. MOmbiimbeli omu udha iiholelwa oyindji yaamboka ya kala taya longele Jehova nuudhiginini. Olundji oyo tango ya li ye na okukatuka onkatu, opo Jehova e ya yambeke. Pashiholelwa, Jehova okwa li owala a yambeke Abraham konima sho a tembuka mo moshilongo shaandjawo, ‘nonando ka li e shi mpoka ta yi.’ (Heb. 11:8) Jakob naye okwa li owala a mono elalekonuuyamba li ikalekelwa konima sho a kondjo nomuyengeli. (Gen. 32:24-30) Sho oshigwana shaIsraeli sha li pokuya mEvi lyEuvaneko, osha li owala sha vulu okutaaguluka omulonga gwaJordan, konima sho aayambi ya lyata momeya. — Jos. 3:14-16.

¹⁴ Oto vulu wo okwiilonga sha kiiholelwa yaapiya yaJehova yopethimbo lyetu, mboka ya kala  yi inekela muJehova noku mu longela nuudhiginini. Pashiholelwa, omumwatate Payton nomukadhi Diana, oya kala ye hole okulesha kombinga yaamwatate naamwameme mboka ya kala taya longele Jehova nuudhiginini, ngaashi mboka haya popiwa miitopolwa ya pambathana yi na oshipalanyolo “Oyi igandja nehalo ewanawa.” * Payton okwa ti: “Uuna tatu lesha iiholelwa mbyoka, ohatu kala twa fa twa tala omuntu ta li iikulya iiwanawa. Sho twa kala tatu lesha oshindji kombinga yawo, oshe tu ningitha tu kale twa hala ‘okulola nkene Jehova omwaanawa.’” Konima yethimbo Payton naDiana oya tembukile hoka ku na ompumbwe onene yaauvithi. Mbela nangoye iitopolwa mbyoka owe yi lesha? Mbela owa tala ngaa nale okavidio Oku ka uvithila kiitopolwa yokokule yomuAustralia nosho wo Witnessing in Isolated Territory, Ireland, mboka wu li kepandja lyetu, jw.org? Uuyelele mboka otawu vulu oku ku kwathela wu mone omikalo dhilwe moka to vulu okutamununa mo uukalele woye.

15. Ookuume aawanawa otaya vulu ngiini oku tu kwathela?

¹⁵ Hogolola ookuume aawanawa. Ohatu kala unene twa hala okulya iikulya mbyoka inaatu lya nale, uuna hatu kala naantu mboka ye hole oku yi lya. Sha faathana, ngele ohatu kala nooitaali mboka ya pititha komeho okulongela Jehova, natse otatu ka kala twa hala okukonga omikalo moka tatu vulu okutamununa mo uukalele wetu. Omumwatate gwedhina Kent nomukadhi Veronica oya mono uushili waashoka. Kent okwa ti: “Ookuume naakwanezimo yetu oye tu ladhipike tu kambadhale omikalo dhilwe dhokuuvitha. Otwa mono kutya okukala nooitaali mboka ya pititha Uukwaniilwa komeho, oshe tu kwathela tu kale twa halelela okulongela Jehova momikalo dhilwe.” Kent naVeronica ngashingeyi oye li aakokolindjila yi ikalekelwa moSerbia.

16. Ngaashi shu ulikwa meyele lyaJesus ndyoka li li muLukas 12:16-21, omolwashike twa pumbwa okukala hatu ningi omaiyambo?

¹⁶ Ninga omaiyambo wu longele Jehova. Inatu pumbwa okweetha po iinima ayihe mbyoka tu hole, opo ando tu kale twa hokiwa kuJehova. (Omuuv. 5:19, 20) Nonando ongawo, katu na okukakadhala okulonga oshindji miilonga yaJehova, molwaashoka owala inaatu hala okuyamba po iinima yimwepo mbyoka tu hole. Ngele otwa ningi ngawo otatu ka ninga epuko lya fa lyomulumentu ngoka a popiwa meyele lyaJesus. Omulumentu ngoka okwa li a longo nuudhiginini i ikongele omaliko ogendji, ihe ka li e na ko nasha nokulongela Kalunga. (Lesha Lukas 12:16-21.) Omumwatate gwedhina Christian, ngoka ha zi koFulaanisa, okwa ti: “Kanda li lela tandi longitha ethimbo lyandje noonkondo dhandje ndi longele Jehova nondi kale pamwe nuukwanegumbo wandje.” Ye nomukadhi oya tokola ya kokole ondjila. Ihe opo ya vule oku shi ninga, oya li ya pumbwa okweetha po iilonga yawo. Oya tameke ongeshefa yokwoopaleka, opo yi ikwathele noyi ilongo okukala ya gwanenwa kwaashoka ye na. Mbela oya nyanyukwa ngaa sho ya ningi omaiyambo agehe ngoka ya kokole ondjila? Christian okwa ti: “Ngashingeyi ohatu nyanyukilwa iilonga yokuuvitha shi vulithe nale nohatu kala twa nyanyukwa okumona aakonakonimbiimbeli yetu nosho wo mboka yu ulika ohokwe tayi ilongo kombinga yaJehova.”

17. Oshike tashi vulu oku tu imba tu longithe omikalo dhilwe dhokuuvitha?

¹⁷ Kambadhala okuuvitha momikalo dhilwe. (Iil. 17:16, 17; 20:20, 21) Omumwameme omukokolindjila gwedhina Shirley gwokoAmerika, okwa li e na okulundulula omukalo moka hu uvitha pethimbo ndika lyomukithi gwo-COVID-19. Petameko okwa li a tila okuuvitha okupitila mongodhi. Ihe sho a mono edheulo pethimbo lyetalelopo lyomutonatelishikandjo, okwa tameke okukala hu uvitha okupitila mongodhi pandjigilile. Okwa ti: “Petameko onda li handi kala nda  tila, ihe ngashingeyi ohandi nyanyukilwa okuuvitha momukalo nguka. Ngashingeyi ohatu uvithile aantu oyendji shi vulithe pethimbo ndyoka twa li hatu uvitha egumbo negumbo!”

18. Uuna tatu kambadhala okulonga oshindji muukalele, oshike tashi vulu oku tu kwathela ngele opwa holoka uupyakadhi?

¹⁸ Itulila po elalakano, e to kambadhala oku li adha. Uuna twa adhika kuupyakadhi wontumba, ohatu galikana Jehova e tu kwathele nohatu dhiladhila nawa kombinga yankene tatu vulu okuungaunga nawo. (Omayel. 3:21) Sonia, omukokolindjila ngoka ha zi moEuropa noha kwathele mongundu yelaka lyOshiromany, okwa ti: “Ondi hole okunyola omalalakano gandje pombapila e tandi yi tula mpoka tandi vulu okukala ndi yi wete nuupu. Pokataafula kandje ondi na po ethano li na oondjila mbali dhu uka koombinga dha yoolokathana. Uuna nda pumbwa okuninga etokolo, ohandi tala koondjila ndhoka mbali e tandi dhiladhila kutya etokolo ndyoka tandi ningi otali ka kwathela ndje ngaa ndi adhe elalakano lyandje nenge otali ka imba ndje owala.” Sonia oha kambadhala okukala e na etaloko ewanawa li na ko nasha nomaupyakadhi ge. Okwa ti: “Uuna pwa holoka uupyakadhi wontumba ohandi hogolola ngele otandi ke wu tala ko wa fa ekuma ndyoka tali imbi ndje ndi adhe elalakano lyandje nenge onga ontopa ndjoka tayi kwathele ndje ndi li adhe.”

19. Ongiini tatu vulu okuulukila Jehova kutya otwa pandula ashihe shoka he tu ningile?

¹⁹ Jehova ohe tu yambeke momikalo odhindji. Otatu vulu oku mu ulukila kutya otwa pandula ashihe shoka he tu ningile, mokuninga ashihe shoka tatu vulu tu mu simanekithe. (Heb. 13:15) Shoka otatu vulu oku shi ninga mokukambadhala okutamununa mo uukalele wetu tu mu longele momikalo dhi ili nodhi ili. Ngele otwe shi ningi, Jehova ote ke tu yambeka shi vulithe nale. Esiku kehe, natu kale hatu kongo oompito tu “mone nkene Omuwa omwaanawa.” Kungawo otatu ka kala tu uvite ngaashi Jesus, sho a ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” — Joh. 4:34.