1. Josef okwa li i iyadha meshongo lini, nokwa li i inyenge ngiini?

 JOSEF omwanamati gwaJakob okwa li memakelo edhigu. Omukulukadhi gwamwene gwe, Potifar, okwa li te mu lombwele ta ti: “Tu lale.” Ihe Josef okwa li a nukile pomutenya. Molwaashoka Potifar ka li po, kunena otashi vulika gumwe i ipule ngeyi, ‘Omolwashike Josef a tindi eyeleko ndyoka?’ Shimwe ishewe, Josef okwa li omupiya gwomegumbo ndyoka; onkee omukulukadhi ngoka okwa li ta ka ningitha onkalamwenyo ye yi kale ombwinayi noonkondo, ngele okwe mu tindi. Ihe nonando ongawo, Josef okwa tsikile okutinda omukulukadhi ngoka sho te mu thiminike a ye naye momilalo. Omolwashike? Okwa ti: “Ondi longe ngiini uuwinayi u thike mpono, ndi yone kuKalunga?” — Gen. 39:7-12.

2. Josef okwa li e shi ngiini kutya omuntu ngele ota hondele ota yono kuKalunga?

² Josef okwa li e shi ngiini kutya Kalunga okwa tala ko oluhondelo kutya “uuwinayi”? MOmpango ndjoka Aaisraeli ya li ya pewa kuJehova okupitila muMoses, omwa li mu na oshipango sha yela tashi ti: “Ino hondela.” Oshipango shoka oye ke shi pewa owala konima yomimvo 200, sho oshiningwanima shaJosef sha ningwa nale. (Eks. 20:14) Ihe Josef okwa li e shi nawa Jehova nokwa li e shi kutya ota ka kala e uvite ngiini, ngele okwa yi moluhondelo. Pashiholelwa, Josef oku na okukala a li e shi kutya Jehova okwa dhika po ondjokana yi kale owala pokati komulumentu gumwe nomukiintu gumwe. Otashi vulika wo a li a uvu nkene Jehova a li a gamene yinakulululwa Sara iikando ayihe iyali sho a li moshiponga shokunyatekwa. Shimwe ishewe, Kalunga okwa li a yi mo olunyala a gamene omukulukadhi gwaIsak, Rebeka. (Gen. 2:24; 12:14-20; 20:2-7; 26:6-11) Sho Josef a dhiladhila koonkalo ndhoka, okwe shi mono mo kutya shoka shi li mondjila naashoka sha puka oshini momeho gaKalunga. Molwaashoka Josef okwa li e hole Kalunga ke,  okwa li wo e hole omithikampango Dhe dhuuyuuki, nokwa li a tokola toko okuvulika kudho.

3. Oshike tatu ka kundathana moshitopolwa shika?

³ Mbela owu hole uuyuuki? Kapu na omalimbililo kutya owu wu hole. Ihe molwaashoka inatu gwanenena, etaloko lyuuyuni li na ko nasha nuuyuuki otali vulu oku tu nwetha mo ngele inatu kotoka. (Jes. 5:20; Rom. 12:2) Onkee otatu ka kundathana kutya uuyuuki oshike, nankene tatu ka mona mo uuwanawa ngele otwa kala tu wu hole. Otatu ka kundathana wo iinima itatu mbyoka tayi vulu oku tu kwathela tu koleke ohole yetu yokuhola omithikampango dhaJehova.

4. Edhiladhilo lini lya puka aantu oyendji ye na kombinga yuuyuuki?

⁴ Uuna aantu taya dhiladhila kombinga yomuntu omuyuuki, oyendji otashi vulika ya dhiladhile komuntu ngoka e na uuntsa, ha sheke yalwe, nenge e wete kutya ye omwaanawa e ya vule. Ihe Kalunga ke hole nando omaukwatya ngoka. Sho Jesus a li kombanda yevi, okwa li a aneke pomutenya aawiliki yomalongelokalunga yopethimbo lye mboka ya li ya tula po omithikampango dhawo yene dhaashoka shi li mondjila naashoka sha puka. (Omuuv. 7:16; Luk. 16:15) Ihe omuntu ngoka omuyuuki iha dhiladhila kutya ye oku li nawa e vule yalwe.

5. Shi ikolelela kOmbiimbeli, uuyuuki oshike? Gandja iiholelwa.

⁵ Uuyuki uukwatya uuwanawa. Niitya yimwe, otashi ti okuninga shoka shu uka momeho gaJehova Kalunga. MOmbiimbeli, oshitya “uuyuuki” otashi gandja edhiladhilo lyokukala metsokumwe nomithikampango dhaJehova dha dhenga mbanda. Pashiholelwa, Jehova okwa tula po ompango aanangeshefa ya kale haya longitha “oomasandjundo dhi shi kwiinekelwa.” (Deut. 25:15) Oshitya shOshihebeli sha tolokwa ‘okwiinekelwa’ otashi vulu wo okutolokwa “pauyuuki.” Onkee ano, Omukriste ngoka a hala okukala omuyuuki momeho gaJehova, oku na okukala omunashili miinima ye ayihe yopangeshefa. Omuntu omuyuuki, oku hole wo uuyuuki. Oku tonde okumona omuntu ta ungaungiwa naye kaashi li pauyuuki. Shimwe ishewe, opo a ‘longe shoka sho opalela Jehova,’ omuntu ngoka omuyuuki shili oha tala kutya Jehova okwa tala ko ngiini omatokolo ngoka a hala okuninga. — Kol. 1:10.

6. Omolwashike tatu vulu okukala tu na einekelo momithikampango dhaJehova dhaashoka shi li mondjila naashoka sha puka? (Jesaja 55:8, 9)

⁶ Ombiimbeli otayi popi kutya Jehova oye Onzo yuuyuuki. Nomolwaashoka ohi ithanwa “ondombe yuuyuuki.” (Jer. 50:7, OB-1954) E li Omushiti, Jehova oye awike ta vulu okutula po omithikampango dhaashoka shi li mondjila naashoka sha puka. Molwaashoka tse inatu gwanenena, haaluhe hatu vulu okutseya shoka shi li mondjila naashoka sha puka. Ihe molwaashoka Jehova okwa gwanenena, oku shi lela shoka shi li mondjila naashoka sha puka. (Omayel. 14:12; lesha Jesaja 55:8, 9.) Nonando ongawo, molwaashoka otwa shitwa oshifetha shaKalunga, ohatu vulu okuninga shoka ta ti kutya oshi li mondjila. (Gen. 1:27) Otu hole wo okuninga ngaaka. Ohole yetu yokuhola Tate ohayi tu inyengitha tu mu holele ngaashi tatu vulu. — Ef. 5:1.

7. Omolwashike twa pumbwa omithikampango dhi shi okwiinekelwa? Shi thaneka.

⁷ Ohatu mono uuwanawa uuna tatu vulika komithikampango dhaJehova dhaashoka shi li mondjila naashoka sha puka. Mbela owu shi kutya omolwashike? Dhiladhila owala kutya oshike tashi ka ningwa po ngele andola ombaanga kehe oye ya po nomithikampango dhayo yene dhokutala kutya iimaliwa oyi na ongushu yi thike peni nenge ngele ongeshefa kehe yokutunga ohayi landula omithikampango dhayo yene dhokumeta. Ngele shoka osho sha ningwa, otashi ka eta lela uupyakadhi. Shimwe ishewe, ngele ndohotola nenge omupangi iha landula aluhe oompango dhankene aavu ye na okupangwa, aavu yamwe otashi vulika ya se. Osha yela kutya omithikampango ndhoka dhi shi okwiinekelwa ohadhi  gamene aantu. Sha faathana, omithikampango dhaKalunga dhaashoka shi li mondjila naashoka sha puka, ohadhi tu gamene.

8. Omalalekonuuyamba geni mboka haya longo shoka shu uka taya ka mona?

⁸ Jehova oha laleke nuuyamba mboka haya kala metsokumwe nomithikampango dhe. Oku uvaneka a ti: “Aayuuki otaa ka thigulula evi e taa kala mo sigo aluhe.” (Eps. 37:29) Dhiladhila owala andola kutya uuyuni otawu ka kala wa tya ngiini ngele kehe gumwe oha landula omithikampango dhaJehova. Aantu otaya ka kala ya hangana, ye na ombili, noya nyanyukwa. Jehova okwa hala wu nyanyukilwe onkalamwenyo ya tya ngaaka. Onkee ano, kehe gumwe gwomutse oku na omatompelo omawanawa gokukala e hole uuyuuki! Oshike tashi vulu oku tu kwathela tu kale tu hole uukwatya mboka noonkondo? Natu ka kundathaneni iinima itatu.

9. Oshike tashi tu kwathele tu kale tu hole uuyuuki?

⁹ Oshinima 1: Kala wu hole Ngoka a tula po omithikampango dhuuyuuki. Opo tu kale tu hole uuyuuki, otu na okukala tu hole Jehova noonkondo, ngoka a tula po omithikampango dhaashoka shi li mondjila naashoka sha puka. Mpoka ngaa pu thike ohole yetu yokuhola Jehova, opo ngaa tapu ka kala pu thike okukala twa hala okuvulika komithikampango dhe dhuuyuuki. Pashiholelwa, ngele Adam naEva oya li ye hole Jehova, andola inaya yona kuye. — Gen. 3:1-6, 16-19.

10. Abraham okwa li a ningi shike, opo a uve ko nawa kutya Jehova oha dhiladhila ngiini?

¹⁰ Inatu hala nando okuninga epuko lya faathana naandyoka lya ningwa kuAdam naEva. Otatu vulu okuyanda okuninga omapuko ngele otwa tsikile okwiilonga kombinga yaJehova, okukala tu hole omaukwatya ge nosho wo okukambadhala okuuva ko nkene ha dhiladhila. Ngele otwe shi ningi, otatu ka kala tu hole Jehova shi vulithe nale. Natu taleni koshiholelwa shaAbraham. Okwa li e hole shili Jehova. Nokuli nuuna sha li oshidhigu kuye okuuva ko omatokolo gaJehova, Abraham ina tsa mo dhe. Pehala lyaashono, okwa li a kambadhala okutseya nawa Jehova. Pashiholelwa, sho a uvu kutya Jehova okwa tokola okuhanagula po Sodom naGomorra, petameko Abraham okwa li a tila kutya “Omupanguli guuyuni auhe” ota ka hanagula po aayuuki pamwe naakolokoshi. KuAbraham, oshinima shoka osha li tashi monika kaashi li pandunge, onkee okwa pula Jehova neifupipiko omapulo ga landulathana. Jehova okwa li e mu yamukula nombili. Hugunina, Abraham okwa thiki pehulithodhiladhilo kutya Jehova oha konakona omutima gwomuntu kehe noiha hanagula po omuyuuki pamwe nomukolokoshi. — Gen. 18:20-32.

11. Abraham okwa li a ulike ngiini kutya oku hole Jehova nokwe mu inekela?

¹¹ Abraham okwa li a gumwa lela koonkundathana ndhoka a li e na naJehova kombinga yiilando Sodom naGomorra. Kapu na omalimbililo kutya shoka osha li she mu ningitha a kale e hole He nokwe mu simaneka shi vulithe nale. Konima yomimvo, Abraham okwe ki iyadha monkalo ndjoka ya li ye shi ningitha oshidhigu a ulike kutya okwi inekela Jehova. Jehova okwa li e mu pula a yambe po omwana omuholike Isak. Ihe pethimbo ndyoka Abraham okwa adhika nale e shi nawa Kalunga, onkee ka li e Mu pula epulo lyasha. Abraham okwa yi owala a ka ninge shoka Jehova e mu pula a ninge. Ihe dhiladhila owala nkene sha li shi yemateka sho ti ilongekidhile oshilonga shoka! Abraham oku na okukala a li a dhiladhila muule kwaashoka i ilonga kombinga yaJehova. Okwa li e shi kutya Jehova ita ka ninga nando osha kaashi li pauyuuki nenge kaashi li pahole. Shi ikolelela komuyapostoli Paulus, Abraham okwa li a tompwa kutya Jehova ota vulu okuyumudha omwana omuholike, Isak. (Heb. 11:17-19) Nokuli, Jehova okwa adhikile a ninga euvaneko kutya Isak ota ka kala he yoshigwana, nonando pompito ndjoka Isak kali e na aanona. Abraham okwa li e hole Jehova, onkee okwa li e  na einekelo kutya He ota ka longa shoka shu uka. Nonando osha li oshidhigu, eitaalo oli inyengitha Abraham a vulike. — Gen. 22:1-12.

12. Ongiini tatu vulu okuholela Abraham? (Episalomi 73:28)

¹² Ongiini tatu vulu okuholela Abraham? Ngaashi ye, otwa pumbwa okutsikila okwiilonga kombinga yaJehova. Sho tatu shi ningi, otatu ka hedha popepi naye notatu ka kala tu mu hole shi vulithe nale. (Lesha Episalomi 73:28.) Eiyuvo lyetu otali ka kala lya dheuka, opo tu dhiladhile ngaashi Jehova. (Heb. 5:14) Oshizemo, ngele gumwe okwe tu yeleke tu ninge sha shapuka, otatu ka tinda. Itatu ka dhiladhila wo okuninga nando osha shoka tashi yemateke Tate notashi yono po ekwatathano lyetu naye. Ongiini ishewe tatu vulu okuulika kutya otu hole uuyuuki?

13. Ongiini tatu vulu okulalakanena uuyuuki? (Omayeletumbulo 15:9)

¹³ Oshinima 2: Kambadhala okukokeka ohole yokuhola uuyuki esiku nesiku. Ngele owa hala oontumba dhoye dhi kale dha kola, owu na okukala ho longo nuudhiginini wu kale ho idheula esiku kehe. Sha faathana, otu na wo okulonga nuudhiginini opo tu kokeke ohole yokuhola omithikampango dhaJehova dhuuyuuki. Oshinima shika kashi shi oshidhigu kutse oku shi ninga esiku kehe. Jehova oku na ondjele, noina tegelela tu ninge oshindji shi vulithe pwaashoka itaatu vulu okuninga. (Eps. 103:14) Ote tu shilipaleke kutya “ngoka ta lalakanene uuyuuki, oye e holike kOmuwa.” (Lesha Omayeletumbulo 15:9.) Ngele otwa hala okwaadha elalakano lyontumba miilonga yaJehova, ohatu kambadhala okulonga nuudhiginini tu li adhe. Shoka osha faathana nokulalakanena uuyuuki. Jehova ote ke tu kwathela neidhidhimiko tu ninge ehumokomeho kashona nakashona momukokomoko gwethimbo. — Eps. 84:5, 7.

14. ‘Ehuuyanza lyopontulo lyuuyuuki’ oshike, nomolwashike twe li pumbwa?

¹⁴ Jehova ohe tu dhimbulukitha pahole kutya uuyuuki kawu shi omukundu. (1 Joh. 5:3) Pehala lyaashono, owu li egameno, oshinima shoka twa pumbwa esiku kehe. Dhimbulukwa iikondjitho yopambepo mbyoka ya popiwa komuyapostoli Paulus. (Ef. 6:14-18) Oshikondjitho shini sha li hashi gamene omutima gomukwiita? Ehuuyanza ‘lyopontulo lyuuyuuki,’ ndyoka tali thaneke omithikampango dhaJehova dhi li pauyuuki.  Ngaashi owala ehuuyanza lyopontulo hali gamene omutima gogwenegwene, sha faathana, omithikampango dhaJehova dhuuyuuki otadhi vulu okugamena omutima gwetu gwopathaneko, ano omuntu gwetu gwomeni. Onkee ano, shilipaleka kutya miikondjitho yoye yopambepo omu na ehuuyanza lyopontulo lyuuyuuki! — Omayel. 4:23.

15. Ongiini to vulu okuzala ehuuyanza lyopontulo lyuuyuuki?

¹⁵ Ongiini to vulu okuzala ehuuyanza lyopontulo lyuuyuki? Oto vulu oku shi ninga mokudhiladhila komithikampango dhaKalunga uuna to ningi omatokolo esiku kehe. Pashiholelwa, uuna to ningi etokolo kutya oshike wa hala okupopya kombinga yasho, omusika yini wa hala okupulakena, omainyanyudho geni wa hala okutala, nenge omambo geni wa hala okulesha, tango ipula ngeyi: ‘Momutima gwandje onda hala okutula mo shike? Mbela oshinima shika Jehova okwe shi hokwa ngaa? Nenge otashi humitha komeho omilalo dha nyata, elongithonkondo, uufukedhi nokwiihola mwene, iinima mbyoka Jehova e yi tala ko kutya oya puka?’ (Fil. 4:8) Ngele omatokolo ngoka ho ningi oge li metsokumwe nehalo lyaJehova, kungawo oho pitike omithikampango dhe dhopauyuuki dhi gamene omutima gwoye.

16-17. Jesaja 48:18 ote tu shilipaleke ngiini kutya otatu vulu okukala metsokumwe nomithikampango dhaJehova sigo aluhe?

¹⁶ Mbela oho kala to ipula ngele oto vulu ngaa okutsikila okukala metsokumwe nomithikampango dhaJehova dhi li pauyuuki esiku nesiku, omumvo nomumvo? Tala kethaneko ndyoka Jehova a longitha, tali adhika muJesaja 48:18. (Lesha.) Jehova oku uvaneka kutya uuyuuki wetu otawu vulu okukala “wa fa omakuthikuthi gomefuta.” Dhiladhila andola wa thikama kooha dhefuta wa tala omakuthikuthi sho tagi idhenge komunkulo gwefuta. Sho wu wete omakuthikuthi ngoka taga kunguluka nawa, mbela oho kala to ipula kutya esiku limwe ona ga ka mwene? Aawe! Owu shi kutya omakuthikuthi ngoka oga kala nokwiidhenga komunkulo gwefuta omimvo omayuvi, na osho taga tsikile okukala taga ningi ngaaka.

¹⁷ Uuyuuki woye otawu vulu oku yelekanithwa nomakuthikuthi gomefuta. Ngiini mbela? Uuna to ningi etokolo lyontumba, tango tala kutya Jehova okwa hala wu ninge shike. E to shi ningi. Kutya nduno oto ningi etokolo edhigu lya fa peni, Ho omunahole ota kala aluhe noku ku kwathela wu tsikile okuninga shoka shi li mondjila esiku kehe. — Jes. 40:29-31.

18. Omolwashike tu na okuyanda okupangula yalwe shi ikolelela komithikampango dhetu yene?

¹⁸ Oshinima 3: Etha Jehova oye a tokole ngele shoka yalwe taya ningi oshi li mondjila nenge osha puka. Nonando ohatu kambadhala okukala metsokumwe nomithikampango dhaJehova dhuuyuuki, otu na okuyanda okupangula yalwe nokutameka okukala tu iwete aayuuki. Pehala lyokudhina yalwe twa fa tu wete kutya otse tu na uuthemba woku ya pangula shi ikolelela komithikampango dhetu yene, natu shi kaleke momadhiladhilo kutya Jehova oye “Omupanguli guuyuni auhe.” (Gen. 18:25) Jehova ine tu pa uuthemba wokupangula yalwe. Nokuli Jesus okwe tu pa oshipango tashi ti: “Inamu pangula yakweni, opo Kalunga kee mu pangule.” — Mat. 7:1. *

19. Josef okwa li a ulike ngiini kutya oku na einekelo kutya Jehova oye owala e na uuthemba wokupangula?

¹⁹ Natu ka taleni ishewe koshiholelwa shomulumentu omuyuuki, Josef. Okwa li a yanda okupangula yalwe, nonando okwa li a ungaungiwa naye nayi. Aamwayina oya li ye mu ponokele e taye mu landitha po muupika, e taya itaalitha he kutya Josef okwa sa. Konima yomimvo, Josef okwa hangana ishewe naantu yaandjawo. Pethimbo ndyoka, Josef okwa li omupangeli omunankondo, onkee okwa li ta vulu okupangula aamwayina  nonyanya noku ya shunithila uuwinayi. Aamwayina yaJosef oya li ya tila kutya pamwe osho naanaa ta ka ninga, nonando oya li yu uvitile lela nayi shoka ya ninga. Ihe Josef okwa li e ya shilipaleke a ti: “Inamu tila. Kandi li peha lyaKalunga.” (Gen. 37:18-20, 27, 28, 31-35; 50:15-21) Josef okwa li e shi taamba ko neifupipiko kutya Jehova oye owala e na uuthemba wokupangula aamwayina.

20-21. Ongiini tatu vulu okuyanda okukala twi itala ko aayuuki?

²⁰ Ngaashi Josef, ohatu etha Jehova oye a pangule aantu. Pashiholelwa, ihatu tengeneke kutya otu shi shoka hashi inyengitha aamwatate naamwameme ya ninge iinima yontumba. Ihatu vulu okulesha omitima; ‘Omuwa oye owala ha konakona oombepo.’ (Omayel. 16:2) Oku hole aantu yomaludhi agehe, yomomaputuko agehe noyomihoko adhihe. Shimwe ishewe, Jehova ohe tu ladhipike ‘tu egulule omitima dhetu.’ (2 Kor. 6:13) Onkee ohatu tsikile okukala tu hole aamwatate naamwameme, ihe katu na oku ya pangula.

²¹ Shoka osha hala wo okutya katu na okupangula aantu mboka kaaye shi Oonzapo dhaJehova. (1 Tim. 2:3, 4) Mbela oto ka pangula ngaa omukwanezimo gwoye, ngoka kee li meitaalo lyoye to ti, “Omuntu ngoka ke na esiku e ye moshili”? Aawe. Ngele osho wa ningi nena oto ulike uuntsa nowu iwete wu li omuyuuki. Jehova ota tsikile natango okupa “aantu ayehe shaa mpoka ye li” ompito yokwiitedhulula. (Iil. 17:30) Dhimbulukwa aluhe kutya Jehova okwa tala ko aantu mboka haya dhiladhila kutya yo aayuuki ye vule yakwawo kutya kaye shi aayuuki.

22. Omolwashike wa tokola toko okukala wu hole uuyuuki?

²² Ohole yetu yokuhola omithikampango dhaJehova dhi li pauyuuki otayi ke tu etela enyanyu notayi ke tu kwathela tu kale oshiholelwa oshiwanawa kuyalwe, opo ya vule okukala ye tu hole nokukala ye hole Kalunga shi vulithe nale. Inatu etha po okukala ‘twa sa ondjala nenota lyuuyuuki.’ (Mat. 5:6) Kala wa shilipalekwa kutya Jehova oku wete oonkambadhala ndhoka to ningi noha kala a nyanyukwa aluhe sho to kambadhala okulonga shoka shi li mondjila. Sho aantu muuyuni mbuka taya ende taya nayipala mokukala kaaye shi aayuuki, oshinima shoka nashi ku hekeleke! Dhimbulukwa aluhe kutya ‘Omuwa oku hole aayuuki.’ — Eps. 146:8.