1. Uuwanawa wuni hatu mono, uuna tatu popi nkene she ende opo tu ye “moshili”?

 NGELE otwa hala okutseya nawa omumwatate nenge omumwameme, olundji ohatu mu pula tatu ti: “Oshe ende ngiini opo wu ye moshili?” Nokaapu na omalimbililo, nangoye owa pulwa epulo ndyoka lwiikando oyindji. Otu hole okuuva nkene she ende opo aamwatate naamwameme ya tseye noya kale ye hole Jehova. Otu hole wo oku ya lombwela kutya otwa lenga oshili shi thike peni. (Rom. 1:11) Oonkundathana ndhoka ohadhi tu dhimbulukitha kutya oshili oyi na ongushu shi thike peni kutse. Shoka ohashi tu kwathele ishewe tu kale twa tokola toko ‘okukala moshili,’ sha hala okutya okukala nonkalamwenyo ndjoka tayi ningitha Jehova e tu yambeke, nokukale e tu hokwa. — 3 Joh. 4.

2. Oshike tatu ka kundathana moshitopolwa shika?

² Moshitopolwa shika otatu ka kundathana omatompelo gamwe kutya omolwashike tu hole oshili. Otatu ka tala wo kunkene tatu vulu okutsikila okuulika kutya otu hole omagano ngaka ge na ongushu. Kapu na omalimbililo kutya otashi ka koleka olupandu lwetu mwaashoka Jehova e tu ningila, ano sho e tu nanene moshili. (Joh. 6:44) Otashi ke tu kwathela wo tu kale tu na lela ehalo lyokuuvithila yalwe oshili yOmbiimbeli.

3. Otu hole oshili omolwetompelo limwe lini lya simanenena?

³ Otu hole oshili omolwomatompelo ogendji. Shoka sha simanenena, otu hole Jehova Kalunga, Onzo yoshili. Sho twa konakona Oohapu dhe Ombiimbeli, ngashingeyi otu shi kutya ke shi owala Omushiti gwegulu nogwevi omunankondo, ihe oku li wo Tate  gwomegulu omunahole, ngoka e na ko nasha natse. (1 Pet. 5:7) Otu shi kutya ‘omunamutimahenda, omunalukeno nomutalanteni, iha geye mbala noku udha esilohenda nuudhiginini.’ (Eks. 34:6) Jehova oku hole uuyuuki. (Jes. 61:8) Ohashi mu uvitha nayi uuna e tu wete tatu mono iihuna. Okwi ilongekidha wo nokwa halelela shili okuhulitha po okumona iihuna akuhe pethimbo ndyoka a tula po. (Jer. 29:11) Kashi shi tuu oshinima oshiwanawa! Ndika olyo etompelo limwe kutya omolwashike tu hole Jehova noonkondo!

4-5. Omolwashike omuyapostoli Paulus a yelekanitha etegameno lyetu nohangela?

⁴ Otu hole oshili omolwetompelo lilwe ishewe lini? Oshili ohayi tu etele omauwanawa ogendji. Natu ka taleni koshiholelwa shimwe. Oshili yOmbiimbeli oya kwatela mo etegameno lyonakuyiwa. Opo a ulike kutya etegameno ndyoka oli na ongushu yi thike peni, omuyapostoli Paulus okwa nyola a ti: “Etegameno ndika lyetu olya kwata lya dhiginina oomwenyo dhetu.” (Heb. 6:19) Ngaashi owala ohangela hayi kankeke osikepa, etegameno lyetu ndyoka lya popiwa mOmbiimbeli otali vulu oku tu kwathela tu kale twa ngungumana, uuna tu li momaupyakadhi.

⁵ Movelise ndjoka Paulus okwa li ta popi kombinga yetegameno lyoku ka kala megulu ndyoka Aakriste aagwayekwa ye na. Ihe oohapu dhe otadhi longo wo nokAakriste mboka ye na etegameno lyoku ka kala nomwenyo sigo aluhe moparadisa kombanda yevi. (Joh. 3:16) Uushili owo kutya sho twa ilongo kombinga yetegameno lyomwenyo gwaaluhe, osha ningitha onkalamwenyo yetu yi kale tayi ti sha.

6-7. Yvonne okwa mono uuwanawa wuni sho i ilongo oshili kombinga yonakuyiwa?

⁶ Natu taleni koshimoniwa shomumwameme Yvonne. Ina putudhwa kOonzapo dhaJehova, naasho a li okanona okwa li ha kala a tila okusa. Ota dhimbulukwa a li a lesha etumbulo limwe ndyoka kee na esiku a dhimbwe, tali ti: “Esiku lyomomasiku ono ka sa.” Okwa ti: “[Etumbulo ndyoka] olya ningitha ndje ndi lale ondangala, tandi ipula nonakuyiwa tandi ti: ‘Omolwashike ndi li kombanda yevi? Mbela elalakano lyonkalamwenyo olyo owala okuvalwa nokusa?’ Kanda li nda hala okusa.”

⁷ Konima yethimbo, sho Yvonne e na omimvo omulongo nasha, okwa tsakanene nOonzapo dhaJehova. Okwa ti: “Onda tameke okwiitaala kutya otandi vulu oku ka kala nomwenyo sigo aluhe mOparadisa kombanda yevi.” Omumwameme nguka sho i ilongo oshili ndjoka oshe mu etele uuwanawa wuni? Okwa ti: “Ihandi penduka we uusiku tandi ipula kombinga yonakuyiwa nenge yeso.” Osha yela kutya Yvonne oku hole oshili yOmbiimbeli, noku hole noonkondo okulombwela yalwe kombinga yetegameno lye lyonakuyiwa. — 1 Tim. 4:16.

8-9. (a) Meyele limwe lyaJesus, omulumentu gumwe okwa li a lenga shi thike peni uuyamba mboka a li a mono? (b) Oshili oya simana shi thike peni kungoye?

⁸ Oshili yOmbiimbeli oya kwatela mo wo onkundana ombwanawa kombinga yUukwaniilwa waKalunga. Jesus okwa yelekanitha oshili ndjoka kombinga yUukwaniilwa nuuyamba wa holekwa. Ngaashi sha popiwa muMateus 13:44, Jesus okwa ti: “Oshilongo shegulu osha fa uuyamba wa holekwa mepya. Omulumentu gumwe okwe u itsu e te u holeke. Omolwenyanyu okwa yi nokwa landitha po iinima ye ayihe e ta landa epya ndiyaka.” Ndhindhilika kutya omulumentu ngoka kali ta kongo uuyamba. Ihe sho e wu itsu, okwa li a ningi omaiyambo omanene, opo e wu imonene. Oshoshili kutya okwa li a landitha po ashihe shoka e na. Omolwashike? Omolwaashoka okwa li e shi kutya uuyamba mboka owu na ongushu noonkondo. Owa li wa simana wu vule iinima ayihe mbyoka a landitha po.

⁹ Mbela nangoye osho ho kala wu uvitile oshili ngawo? Kapu na omalimbililo kutya osho ho kala wu uvite! Otu shi kutya kapu na nando osha muuyuni mbuka tashi vulu oku yelekanithwa nenyanyu ndyoka hali zi mokulongela Jehova, netegameno lyomwenyo gwaaluhe monakuyiwa, kohi yepangelo lyUukwaniilwa waKalunga.  Uuthembahenda mboka tu na wokukala nekwatathano lyopothingo naJehova owu vule eiyambo kehe ndyoka tu na okuninga. Otwa hala okukala hatu longo “aluhe shoka she mu opalela.” — Kol. 1:10.

10-11. Oshike sha inyengitha Michael a ninge omalunduluko omanene monkalamwenyo ye?

¹⁰ Oyendji yomutse otwa ninga omaiyambo omanene, opo tu kale twa hokiwa kuJehova. Yamwe otwa etha po omaithano ga dhenga mbanda muuyuni. Yamwe otwa etha po okulalakanena omaliko. Omanga yamwe ya lundulula thiluthilu onkalamwenyo yawo, sho yi ilongo kombinga yaJehova. Shoka osho Michael a ningi. Ina putudhwa kOonzapo dhaJehova. Sho a li omulumentu omugundjuka, okwa li a dheulilwa okarate. Okwa ti: “Osha li sha simana kungame okwi ikaleka nda kindja. Omathimbo gamwe onda li handi kala ndi uvite kutya kapu na ngoka ta vulu okudhenga ndje.” Ihe sho a tameke okukonakona Ombiimbeli, Michael okwi ilongo kutya Jehova okwa tala ko ngiini elongithonkondo. (Eps. 11:5) Okwa popi kombinga yaaihokani Oonzapo mboka ya konakona naye a ti: “Kapu na nando esiku ya lombwelele ndje ndi ethe po okarate. Ihe oya li owala ya tsikile okulonga ndje oshili yOmbiimbeli.”

¹¹ Sho Michael a tsikile okwiilonga kombinga yaJehova, ohole ye yoku Mu hola oya tsikile okukoka. Okwa li unene a inyengithwa kunkene Jehova ha ungaunga nolukeno naalongeli Ye. Mokweendela ko kwethimbo, Michael okwe shi mono mo kutya okwa pumbwa okuninga elunduluko ndyoka tali ka lundulula onkalamwenyo ye ayihe. Okwa ti: “Onda li ndi shi kutya okweetha po okarate, osho oshinima oshidhigu shoka nda li inaandi ninga nando onale. Ihe onda li ndi shi kutya otashi ka nyanyudha Jehova, nonda li nda tompwa kutya oku mu longela okwo kwa dhenga mbanda ku vule kehe shimwe shoka tandi etha po.” Michael okwa li e shi kutya oshili ndjoka a mona oyi na lela ongushu, nomolwaashoka okwa li e na ehalo lyokuninga omalunduluko omanene monkalamwenyo ye. — Jak. 1:25.

12-13. Oshili yOmbiimbeli oya kwathele ngiini Mayli?

¹² Ombiimbeli otayi yelekanitha oshili nolamba tayi minikile momilema, opo tu mone kutya oshili oya simana shi thike peni. (Eps. 119:105; Ef. 5:8) Mayli, gwokoAzarbaijan okwa pandula noonkondo ekwatho ndyoka a mona mOohapu dhaKalunga. Okwa putukila muukwanegumbo mu na aavali ye li momalongelokalunga ga yoolokathana. He okwa li Omumoslema, omanga yina okwa li Omujuda. Okwa ti: “Nonando inandi ipula nale ngele Kalunga oko e li, opwa li pu na iinima yimwe ya limbilika ndje. Onda li handi ipula kutya ‘Omolwashike Kalunga a shita aantu, nonelalakano lyashike omuntu e na okumona iihuna okukalamwenyo kwe akuhe ye ta ka pya ishewe moheli sigo aluhe?’ Molwaashoka aantu oya li haya ti kutya kehe shimwe tashi ningwa ehalo lyaKalunga, onda li handi ipula tandi ti, ‘Omolwashike Kalunga ta pangele aantu ihe oha kala ishewe a nyanyukwa okukala e ya tala sho taya mono iihuna?’”

¹³ Mayli okwa tsikile okukonga omayamukulo gomapulo ge. Mokweendela ko kwethimbo, okwa taamba ko ekonakonombiimbeli nokwa ningi Onzapo yaJehova. Okwa ti: “Oshili ndjoka yi li mOmbiimbeli oya kwathela ndje ndi lundulule etaloko lyandje li na ko nasha nonkalamwenyo, naashoka oshe etela ndje enyanyu. Omayelitho ge li paushili ngoka nda mono mOohapu dhaKalunga oge etela ndje ombili.” Ngaashi Mayli, atuheni ohatu tanga Jehova, ‘Kalunga ngoka e tu ithana mo momilema, tu ye muuyelele we uukumithi.’ — 1 Pet. 2:9.

14. Oshike tatu vulu okuninga, opo tu kale tu hole oshili noonkondo? (Tala wo oshimpungu, “ Iinima yilwe mbyoka tatu vulu oku yi yelekanitha noshili yOmbiimbeli.”)

¹⁴ Mbika iiholelwa owala yimwe po mbyoka tayi ulike kutya oshili oya simana. Nokaapu na omalimbililo otashi vulika wu shi po yilwe oyindji. Omolwashike itoo shi konakona paumwene wu mone omatompelo galwe kutya omolwashike  tu na okukala tu hole oshili? Ngele otwa tsikile okukala tu hole oshili, otatu ka mona po omikalo odhindji moka tatu vulu okuulika kutya otu yi hole.

15. Omomukalo gumwe guni tatu vulu okuulika kutya otu hole oshili?

¹⁵ Otatu vulu okuulika kutya otu hole oshili mokukala hatu konakona Ombiimbeli niileshomwa ya kankamena kOmbiimbeli pandjigilile. Kutya nduno moshili otwa kala mo ethimbo li thike peni, oha pu kala aluhe iinima oyindji mbyoka tu na okwiilonga. Oshungolangelo yotango yokukonakonwa oya ti: “Oshili oya fa ongala onshona ombwanawa ndjoka ya mena mombuga noyi li mokati komawu ngoka ge yi thininika kaayi koke nawa. Ngele owe yi mono, oto ka ninga oonkambadhala wu yi gamene, nongele owa hala yi ninge po yoye, owu na oku yi kutha po. . . . Ino kala owala wa gwanenwa kongala yimwe, ndjoka tayi faathanithwa noshili. . . . Ihe tsikila oku dhi konga odhindji.” Okukonakona Ombiimbeli kashi shi oshinima oshipu, ihe ohaku tu etele uuwanawa owundji.

16. Omukalo guni gwokukonakona ho mono kutya ohagu ku kwathele wu uve ko nawa? (Omayeletumbulo 2:4-6)

¹⁶ Haatuhe tu hole okulesha nokukonakona.  Ihe Jehova ote tu lombwele tu tsikile ‘okukonga’ notu tsikile ‘okushilila,’ opo tu uve ko nawa oshili yomuule yOmbiimbeli. (Lesha Omayeletumbulo 2:4-6.) Ngele otwa ningi oonkambadhala ndhoka, otatu ka mona uuwanawa. Corey okwa popi kombinga yekonakono lye lyopaumwene a ti kutya oha gandja eitulomo kovelise yimwe poshikando. Okwa yelitha a ti: “Ohandi lesha enyolo kehe lyopevi, oovelise ndhoka dha pamba ovelise yontumba, nohandi ningi omapekapeko ga gwedhwa po. . . . Ohandi tseya iinima oyindji sho tandi longitha omukalo nguka!” Kutya nduno ohatu longitha omukalo ngoka nenge gulwe, ohatu ulike kutya otwa lenga oshili yOmbiimbeli, uuna hatu itulile po ethimbo nokuninga oonkambadhala tu yi konakone. — Eps. 1:1-3.

17. Okukala metsokumwe noshili osha hala okutya ngiini? (Jakob 1:25)

¹⁷ Odhoshili kutya inashi gwana owala okukonakona oshili yOmbiimbeli. Opo tu mone mo lela uuwanawa muyo, otu na okukala metsokumwe noshili, sha hala okutya otu na okutula miilonga shoka tatu ilongo. Ngele osho twa ningi, oshili opo owala tayi ke tu etela enyanyu lyashili. (Lesha Jakob 1:25.) Ongiini tatu vulu okushilipaleka kutya otu li metsokumwe noshili? Omumwatate gumwe okwa gandja omaetopo tu ikonakone paumwene, tu mone mpoka tatu shi enditha nawa naampoka twa pumbwa okuninga omalunduluko. Omuyapostoli Paulus okwa ti: “Natu humeni owala komeho nondjila naanaa ndjoka twe ende nayo sigo oompaka.” — Fil. 3:16.

18. Omolwashike hatu ningi ngaashi tatu vulu, opo tu ‘kale moshili’?

¹⁸ Dhiladhila owala komauwanawa ngoka haga zi mokuninga ngaashi tatu vulu opo tu ‘kale moshili’! Onkalamwenyo yetu ihayi hwepopala owala, ihe ohatu nyanyudha wo Jehova nosho wo ooitaali ooyakwetu. (Omayel. 27:11; 3 Joh. 4) Ngaka ogo omatompelo ga dhenga mbanda gokukala tu hole oshili noku yi tula miilonga monkalamwenyo yetu!