1. Omolwashike Aababilonia ya li ya kuminwa omuhunganeki Daniel?

 OMUHUNGANEKI Daniel okwa li omugundjuka sho Aababilonia ya li ye mu kwata po, e taye mu fala muupongekwa kokule naJerusalem. Ihe nando ongawo, okwa li a kumitha aakwanepangelo. Oya li ya “tala kombanda” kutya Daniel ke na ‘oshipo ye okwa shitika’ nokwa za megumbo lya simana. (1 Sam. 16:7) Omolwomatompelo ngono, oya li ye mu dheula a kale ha longo mombala.—Dan. 1:3, 4, 6.

2. Jehova okwa li e uvitile ngiini Daniel? (Hesekiel 14:14)

² Jehova ka li e hole Daniel molwondjelo ye, nenge molwoshinakugwanithwa shi ikalekelwa shoka a li e na mombala, ihe omolwuukwatya uuwanawa mboka a li e na. Eeno, sho Jehova a ti kutya Daniel okwa fa Noa naJob, otashi vulika Daniel a li e na owala omimvo 20 lwaampono. Onkee Jehova okwa li a tala ko Daniel e li omuyuuki ngaashi Noa naJob, mboka ye mu longela nuudhiginini omimvo odhindji. (Gen. 5:32; 6:9, 10; Job 42:16, 17; lesha Hesekiel 14:14. Jehova okwa kala e hole Daniel monkalamwenyo ye ayihe.—Dan. 10:11, 19.

3. Oshike tatu ka kundathana moshitopolwa shika?

³ Moshitopolwa shika, otatu ka kundathana omaukwatya gaali gaDaniel ngoka ga li ge mu ningitha a kale e na ondilo momeho gaJehova. Tango, otatu ka yelitha uukwatya kehe e tatu ka tala pompito mpoka a li e wu ulike. Oshitiyali, otatu ka tala kutya oshike sha li sha kwathele Daniel a kale e na omaukwatya ngoka. Lwahugunina, otatu ka kundathana nkene tatu vulu oku mu holela. Nonando oshitopolwa shika osha nyolelwa aagundjuka, atuheni otatu vulu okwiilonga sha moshiholelwa shaDaniel.

4. Daniel okwa li a u like ngiini kutya omulaadhi? Gandja oshiholelwa.

⁴ Aantu mboka aalaadhi nayo ohaya kala ye na uumbanda, ihe ihaya etha shoka shi ya imbe okulonga shoka shili mondjila. Daniel  okwa li omugundjuka omulaadhi. Natu taleni iikando iyali moka a li a ulike uulaadhi. Oshikando shotango e wu ulike, okonima yomimvo mbali lwaampono, sho Aababilonia ya hanagula po Jerusalem. Omukwaniilwa Nebukadnezzar gwaBabilon okwa li a yaguma ondjodhi kombinga yoshiyelekela oshinenenene. Okwa li a lombwele aalumentu ye aanandunge, mwa kwatelwa Daniel, ye mu fatululile ondjodhi ye naashoka tayi ti, nongele oya nyengwa ote ya dhipagitha po. (Dan. 2:3-5) Daniel okwa li e na okuninga po sha nziya, ngele hasho, aantu oyendji otaya ka sa. Okwa “yi komukwaniilwa nokwe mu indile, a pewe ethimbo lya gwana, opo a vule okufatulula ondjodhi.” (Dan. 2:16) Shoka osha li sha ulike kutya Daniel oku na uulaadhi neitaalo. Ombiimbeli inayi popya kutya Daniel okwa fatululile nale oondjodhi. Daniel okwa li a pula ookuume ke mboka ye na omadhina gOshibabilonia, Meshak, Shadrak naAbednego “ya galikane Kalunga komegulu, e ya sile ohenda noku mu pula, e ya hololele oshiholekwa shika.” (Dan. 2:18) Jehova okwa li a yamukula omagalikano ngoka. Kekwatho lyaKalunga, Daniel okwa fatulula ondjodhi yaNebukadnezzar. Daniel nookuume ke, oya li ya hupu.

5. Opompito ishewe yini Daniel a li a pumbwa uulaadhi?

⁵ Konima sho Daniel a fatulula ondjodhi kombinga yoshiyelekela oshinenenene, opwa li ishewe pwa ningwa oshinima shimwe moka Daniel a li a pumbwa lela uulaadhi. Nebukadnezzar okwa li a yaguma ondjodhi yilwe ontilithi. Ondjodhi ndjoka oya li ya kwatela mo omuti omuleeleka. Daniel okwa yelithile omukwaniilwa shoka ondjodhi ndjoka tayi ti, okwa li wo nokuli a lombwele omukwaniilwa kutya ota ka ya oompwengu noita ka kala we omukwaniilwa uule wethimbo. (Dan. 4:25) Omukwaniilwa otashi vulika a li ta dhiladhila kutya Daniel omutondi gwe, nota vulu oku mu dhipaga. Ihe Daniel okwa ulike uulaadhi e te mu fatululile ondjodhi ndjoka.

6. Oshike tashi vulika sha li sha kwathele Daniel a kale omulaadhi?

⁶ Oshike tashi vulika sha li sha kwathele Daniel a kale omulaadhi mokukalamwenyo kwe akuhe? Daniel sho a li okanona, aavali ye oya li ye mu tulile po oshiholelwa oshiwanawa. Kapu na omalimbililo kutya oya li ya vulika komalombwelo ngoka Jehova a li a pe aavali Aaisraeli, noya longo okanona kawo Ompango yaKalunga. (Deut. 6:6-9) Daniel ka li owala e shi Iipango Omulongo, ihe okwa li wo e shi iinenenima  yomOmpango, ngaashi kutya Omuisraeli oku na okulya shike noshike kee na okulya. b (Lev. 11:4-8; Dan. 1:8, 11-13) Okwa li wo a ilongo ondjokonona yoshigwana shaKalunga noku shi shoka sha li she shi ningilwa sho inaashi vulika komithikampango dhaJehova. (Dan. 9:10, 11) Iimoniwa yomonkalamwenyo yaDaniel oye mu shilipaleke kutya Jehova naayengeli ye aanankondo otaye ke mu yambidhidha.—Dan. 2:19-24; 10:12, 18, 19.

7. Oshike ishewe sha li sha kwathele Daniel a kale omulaadhi? (Tala wo ethano.)

⁷ Daniel okwa li a konakona omanyolo gaahunganeki yaKalunga mwa kwatelwa omahunganeko gaJeremia. Okupitila mekonakono ndyoka, konima yethimbo Daniel okwa li a mono kutya okukala muupika ethimbo ele kwAajuda muBabilon masiku otaku hulu po. (Dan. 9:2) Daniel sho a mono kutya ehunganeko lyOmbiimbeli olya gwanithwa, osha yela kutya shoka osha li sha koleke einekelo lye muJehova, naamboka ye na einekelo lya kola muJehova otaya vulu okukala lela aalaadhi. (Yelekanitha Aaroma 8:31, 32, 37-39.) Shoka sha simanenena, Daniel okwa li ha galikana olundji kuHe gwomegulu. (Dan. 6:10) Okwa li a hempulula oondjo dhe kuJehova nokwe mu lombwele nkene e uvite. Daniel okwa li e mu pula ekwatho. (Dan. 9:4, 5, 19) Okwa li owala omuntu ngaashi tse, nokali a valwa nuulaadhi. Pehala lyaashono, okwa kokeke uukwatya mboka okupitila mokukonakona, mokugalikana nomokwiinekela Jehova.

8. Ongiini tatu vulu okukokeka uulaadhi wetu?

⁸ Opo tu kokeke uulaadhi otwa pumbwa okuninga shike? Aavali yetu otashi vulika ye tu ladhipike tu kale aalaadhi, ihe itaya vulu oku tu pa uukwatya mboka nokuli nonando yo oye wu na. Okukala omulaadhi osha faathana nokwiilonga uunkulungu uupe. Omukalo gumwe to vulu okukala wu na uunkulungu omokukala to tala nawanawa nkene omulongi gwoye te shi ningi, opo nduno to mu holele. Momukalo gwa faathana, ohatu ilongo okukala aalaadhi mokukala tatu tala nawa nkene yalwe haye shi ningi, nopo nduno tatu ya holele. Oshike tatu ilongo kuDaniel? Ngaashi ye, natse otwa pumbwa okukala tu shi nawa Oohapu dhaKalunga. Otu na okukala hatu popi naJehova olundji noku mu lombwela nkene tu uvite lela. Otwa pumbwa okukala twa inekela muJehova nokukala twa tompwa kutya ote ke tu kwathela aluhe. Opo nduno uuna eitaalo lyetu tali makelwa otatu ka kala aalaadhi.

9. Uuwanawa wuni hatu mono mokukala aalaadhi?

⁹ Ohatu mono uuwanawa mokukala aalaadhi momikalo odhindji. Natu taleni koshiholelwa shaBen. Okwa hita osikola moNdowishi moka kehe gumwe inaa itaala meshito noku uvite kutya ehokololo lyOmbiimbeli li na ko nasha neshito kali shi lyoshili. Esiku limwe Ben okwa li a pewa ompito a thikame komeho mongundu yawo noku yelithe kutya omolwashike a itaala kutya omwenyo ogwa shitwa. Okwa li e shi yelitha nuulaadhi. Oshizemo? Ben okwa ti: “Omulongi okwa li a pulakene nuukeka, nokwa ningi ookopi dhuuyelele mboka nda li tandi longitha okufatulula shoka nda itaala, e ta pe okopi yimwe omulongwa kehe gwomongundu yetu.” Aanasikola yomongundu yaBen oya li yi inyenge ngiini? Ben okwa ti: “Oyendji yomuyo oya li ya pulakene kwaashoka tandi popi noya ti kutya oya simaneka ndje.” Ngaashi oshimoniwa shaBen tashi shi ulike, aantu mboka aalaadhi ohaya simanekwa kuyalwe. Otashi vulika wo ya nanene aanamitima omiwanawa kuJehova. Odhoshili kutya otu na omatompelo omawanawa okukokeka uulaadhi.

10. Uudhiginini oshike?

¹⁰ Oshitya shOshihebeli shoka sha tolokwa mOmbiimbeli “uudhiginini” nenge “ohole yi na uudhiginini,” otashi popi kombinga yuudhiginini nenge yohole ndjoka Kalunga ha ulukile ookuume ke. Oshitya osho tuu shono ohashi longithwa wo okupopya ohole ndjoka aapiya yaKalunga ye na. (2 Sam. 9:6,7) Uudhiginini wetu otawu vulu okukala wa kola ethimbo kehe. Natu taleni nkene shino sha li sha ningilwa Daniel.

11. Daniel okwa li a taalela emakelo tali pula uudhiginini muukokele we? (Tala ethano lyokombanda.)

¹¹ Uudhiginini waDaniel kuJehova owa li wa makelwa monkalamwenyo ye ayihe. Ihe okwa li a adhika kemakelo limwe enenenene sho e na omimvo 90 nasha. Pethimbo ndyono, Babilon osha li sha kwatwa ko kAamedia nAapersia nosha li tashi pangelwa komukwaniilwa Darius. Omalenga gomukwaniilwa Darius kaga li ge hole naanaa Daniel noinaga simaneka Kalunga ke. Onkee oga ningi po ompangela ga dhipagithe Daniel. Oga li ga shainitha omukwaniilwa ompango ndjoka tayi ka tala ngele Daniel ota kala ngaa omudhiginini kuKalunga nenge okomukwaniilwa. Shoka Daniel a li e na okuninga, opo a ulike uudhiginini we komukwaniilwa noku ihumbate ngaashi yalwe, okweetha po owala okugalikana kuJehova uule womasiku 30. Ihe Daniel okwa tindi okukala kee shi omudhiginini kuJehova. Oshilanduliko, okwa li a umbilwa mekololo lyoonime. Ihe Jehova okwa li a futu Daniel omolwuudhiginini we, moku mu hupitha momakana goonime. (Dan. 6:12-15, 20-22) Ongiini mbela tatu vulu okukokeka uudhiginini wa tya ngawo ihaawu tengauka kuJehova, mboka wa li wa ulikwa kuDaniel?

12. Daniel okwa li a ulike ngiini uudhiginini ihaawu tengauka kuJehova?

¹² Ngaashi sha tumbulwa metetekelo, opo tu kale aadhiginini kuJehova otu na okukala tu mu hole, nohole ya tsa kesipa. Daniel okwa kala omudhiginini kuJehova, molwaashoka okwa kala e hole noonkondo He gwomegulu. Kapu na omalimbililo kutya Daniel okwa kala e na ohole ndjoka ya kola yokuhola Jehova, molwaashoka okwa kala ha dhiladhila kombinga yomaukwatya gaJehova nonkene he ga ulike. (Dan. 9:4) Daniel okwa kala wo ha tedhatedha nolupandu kombinga yiinima ayihe iiwanawa mbyoka Jehova e mu ningila nosho wo oshigwana she.—Dan. 2:20-23; 9:15, 16.

13. (a) Aagundjuka ohaya kala ya taalela emakelo li na ko nasha nuudhiginini lini? Gandja oshiholelwa. (Tala wo ethano.) (b) Ngaashi sha ulikwa mokavidio, otashi vulika ando wi inyenge ngiini uuna yalwe ya pula ngele Oonzapo dhaJehova ohadhi ambidhidha ngaa mboka haya lalakanene okuhumitha komeho uushenge?

 ¹³ Ngaashi Daniel, aagundjuka yetu oye li mokati kaantu mboka inaaya simaneke Jehova nomithikampango dhe. Aantu ya tya ngaaka oye tonde kehe gumwe ngoka e hole Kalunga. Yamwe ohaya kambadhala nokuli oku hinda aagundjuka, opo ye ya ethithe po uudhiginini wawo kuJehova. Pashiholelwa, tala shoka sha li sha ningilwa omugundjuka gwedhina Graeme, ngoka a kala moAustralia. Okwa li a taalelwa konkalo ondhigu sho a li kosikola yopombanda. Omulongi gwawo okwa li a pula aalongwa yomongundu ye kutya otaye ki inyenga ngiini ngele kuume kawo okwe ya tompo ya itaale muushenge. Omulongi okwa ti kutya aalongwa ayehe mboka taya ambidhidha edhiladhilo lyakuume kawo li na ko nasha nuushenge naya game kombinga yimwe; omanga mboka inaaye li hokwa taya gama kombinga yilwe. Graeme okwa ti: “Ongundu ayihe kakele kandje nOnzapo yilwe, oya thikama kombinga ndjoka tayi ambidhidha uushenge.” Shoka sha li sha ningwa po, osha makele uudhiginini waGraeme kuJehova. Okwa ti: “Uule wowili ayihe, aalongwa yalwe nomulongi oya kala taye tu sheke notaye tuku. Onda li nda ningi ngaashi tandi vulu ndi popile eitaalo lyandje nda ngungumana nomomukalo omwaanawa, ihe inaya pulakena kwaashoka tandi popi.” Mbela Graeme okwa li e uvite ngiini? Okwa ti: “Kandi hole okutukwa, ihe onda nyanyukwa noonkondo sho nda vula okupopila eitaalo lyandje nokukala omudhiginini kuJehova.” c

14. Omomukalo gumwe guni tatu vulu okukokeka uudhiginini ihaawu tengauka kuJehova?

¹⁴ Otatu vulu okukokeka uudhiginini ihaawu tengauka kuJehova, ngele otwa kala tu mu hole noonkondo ngaashi Daniel. Ohole ya tya ngaaka otatu vulu oku yi kokeka mokwiilonga omaukwatya gaJehova. Pashiholelwa, otatu vulu okukonakona iinima mbyoka a shita. (Rom. 1:20) Ngele owa hala okukoleka ohole yoye nokusimaneka Jehova, oto vulu okulesha iitopolwa iifupi yi li kohi yokapalanyolo “Was It Designed?” nenge wu tale uuvidio. Oto vulu wo okutala uuyelele muumbo Was Life Created? nosho wo Omapulo gatano ga simanenena — nkene iinima yi na omwenyo ye ya po. Tala shoka omumwameme omugundjuka gwokoDanish, gwedhina Esther, a ti kombinga yiileshomwa mbyoka. Uumbo mboka itawu ku lombwele shoka wu na okwiitaala, ihe otawu popi owala kombinga yiinima yoshili nokweetha wu ninge etokolo.” Ben, ngoka a popiwa metetekelo okwa ti: “Uuyelele mboka otawu koleke eitaalo. Osha li shu ulukile ndje kutya Kalunga oye a shita omwenyo.” Ngele owa konakona uuyelele mboka otashi vulika to ka tsa kumwe nOmbiimbeli ndyoka tayi ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe.”—Eh. 4:11. d

15. Omomukalo gumwe guni tatu vulu okukokeka uukuume wetu naJehova?

¹⁵ Omukalo gumwe tatu vulu okukokeka ohole yetu, omokukonakona nawa onkalamwenyo yOmwana, Jesus. Omumwameme omugundjuka, gwedhina Samira, ngoka a kala moNdowishi, shoka okwe shi ninga. Okwa ti: “Onda tseya nawa Jehova okupitila muJesus.” Sho Samira a li okanona okwa li ha nyengwa okuuva ko kutya Jehova ota vulu okukala e na omaiyuvo. Ihe okwa li a vulu okuuva ko nkene Jesus e uvite. Okwa gwedha ko a ti: “Ondi hole Jesus, molwaashoka  omunyanyukwi noku hole aanona.” Sho a ilongo kombinga yaJesus okwa kala e na ekwatathano lya kola naJehova. Omolwashike mbela? Okwa ti: “Onde ende tandi uvu ko kutya Jesus oha holele thiluthilu He. Oya faathana thiluthilu. Onda li nda tseya kutya ndika olyo limwe lyomomatompelo kutya omolwashike Jehova a tumu Jesus kevi, e shi ninge tashi wapa kaantu ya tseye nawa Jehova.” (Joh. 14:9) Ngele owa hala okukoleka ekwatathano lyoye naJehova, omolwashike itoo kutha ethimbo wu ilonge ashihe shoka to vulu okwiilonga kombinga yaJesus? Ngele owe shi ningi, ohole yoye yokuhola Jehova nuudhiginini woye otawu ka koka.

16. Ongiini tatu ka mona uuwanawa mokukala aadhiginini? (Episalomi 18:25; Mika 6:8)

¹⁶ Mboka aadhiginini olundji ohaya kala ye na ekwatathano lyopothingo naamboka aadhiginini kuyo. (Rut 1:14-17) Shimwe ishewe, aantu mboka aadhiginini kuJehova oye na etompelo lyokukala ye na ombili yokomutima noya gwanenwa. Omolwashike mbela? Omolwaashoka Jehova oku uvaneka okukala omudhiginini kwaamboka aadhiginini kuye. (Lesha Episalomi 18:25; Mika 6:8.) Dhiladhila kwaashika. Nonando tse aashona okwiiyelekanitha nOmushiti gwetu Omunankondoawike, okwa uvaneka kutya ota kala e tu hole aluhe. Ngele otwa kala tu na ekwatathano lyopothingo naJehova, omashongo, omapataneko, nokuli neso itali vulu oku tu topola ko kuye. (Dan. 12:13; Luk. 20:37, 38; Rom. 8:38, 39) Inashi simana tuu sho hatu holele Daniel nokukala aadhiginini kuJehova!

17-18. Oshike ishewe tatu vulu okwiilonga kuDaniel?

¹⁷ Moshitopolwa shika, otwa konakona owala kombinga yomaukwatya gaali gaDaniel. Ihe opu na oshindji shoka tatu vulu okwiilonga kombinga ye. Pashiholelwa, Jehova okwa li a ulukile Daniel omamoniko ogendji nokwe mu yagumitha oondjodhi nokwa li wo e mu pe uunkulungu wokufatulula omatumwalaka gopahunganeko. Ogendji gomomahunganeko ngoka oga gwanithwa nale. Galwe otaga gandja uuyelele kombinga yiiningwanima yomonakuyiwa mbyoka tayi ka guma omuntu kehe kombanda yevi.

¹⁸ Moshitopolwa tashi landula, otatu ka kundathana kombinga yomahunganeko gaali ngoka taga adhika membo lyaDaniel. Ngele otwe ga uvu ko otashi ke tu kwathela atuhe, aagundjuka naakokele tu ninge omatokolo ge li pandunge ngashingeyi. Omahunganeko ngoka otaga vulu wo okukoleka uudhiginini wetu, opo tu vule okwiilongekidhila omashongo ngoka ge li komeho.