1. Omolwashike hatu pandula aantu mboka ye na eidhidhimiko?

 ATUHENI ohatu pandula aantu mboka ye na eidhidhimiko. Omolwashike mbela? Otwa simaneka mboka haya vulu okutegelela nopwaa na okugeya. Ohatu shi pandula uuna yalwe taye tu idhidhimikile ngele twa ningi omapuko. Ohatu pandula wo sho mboka ye tu longa Ombiimbeli ye tu idhidhimikila sho tatu kakadhala okwiilonga, okutaamba ko, nenge okutula miilonga shoka Ombiimbeli tayi longo. Shimwe ishewe, ohatu pandula sho Jehova Kalunga e tu idhidhimikila. — Rom. 2:4.

2. Omoonkalo dhini tashi vulika tu mone oshidhigu okwiidhidhimika?

² Nonando otwa lenga eidhidhimiko lyayalwe, otashi vulika ihaashi kala aluhe oshipu kutse okwiidhidhimika. Pashiholelwa, otashi vulika tu kale tatu nyengwa okukala twa ngungumana, uuna tu li momukweyo twa tegelela, unene tuu ngele otwa tokelwa. Otashi vulika tu kale twa geya, uuna yalwe taye tu piyaganeke. Omathimbo gamwe otashi vulika shi kale oshidhigu okutegelela uuyuni uupe mboka Jehova a uvaneka. Mbela owa hala okukala wu na lela eidhidhimiko? Moshitopolwa shika otatu ka kundathana kutya okukala neidhidhimiko otaku ti shike, nomolwashike kwa simana. Otatu ka tala wo kutya oshike tashi vulu oku tu kwathela tu kale tu na lela eidhidhimiko.

3. Omuntu omwiidhidhimiki oha ningi shike uuna yalwe ye mu geyitha?

³ Natu tale omikalo ne moka tatu vulu okuulika eidhidhimiko. Gwotango, omuntu ngoka e na eidhidhimiko iha geye mbala. Oha kambadhala okukala a ngungumana, uuna yalwe ye mu geyitha noihe ya shunithile uuwinayi. Uutumbulilo ‘iha geye mbala’ owa holoka oshikando shotango mOmbiimbeli, sho Jehova  a hokololwa e li ‘Kalunga omunamutimahenda, omunalukeno nomutalanteni, ihaa geye mbala noku udha esilohenda nuudhiginini.’—Eks. 34:6.

4. Omuntu ngoka hi idhidhimike ohi inyenge ngiini uuna a tegelela?

⁴ Omukalo omutiyali, omuntu ngoka omwiidhidhimiki oha vulu okutegelela a ngungumana. Ngele oshinima shontumba ohashi pula ethimbo ele, omuntu a tya ngawo oha kambadhala okukala a ngungumana nenge inaa kenyanana. (Mat. 18:26, 27) Opu na oonkalo odhindji moka twa pumbwa okutegelela twa ngungumana. Pashiholelwa, otwa pumbwa okupulakena neitulomo uuna gulwe ta popi, nokuyanda oku mu kwata melaka. (Job 36:2) Otashi vulika wo twa pumbwa eidhidhimiko, uuna tatu kwathele omukonakoni a uve ko Ombiimbeli nenge a ethe po iikala iiwinayi.

5. Omomukalo gulwe guni tatu vulu okuulika eidhidhimiko?

⁵ Omukalo omutitatu, omuntu ngoka omwiidhidhimiki iha katuka nziya manga inaa dhiladhila. Odhoshili kutya omathimbo gamwe otwa pumbwa okukatuka nziya. Nonando ongawo, uuna omuntu ngoka omwiidhidhimiki a pumbwa okumana oshilonga shoka sha simana, iha kambadhala okweendelela e shi mane. Pehala lyaashono, oha kongo ethimbo lya gwana a tale nkene te ke shi enda. Opo nduno, oha longitha ethimbo lye nawa, opo a longe oshilonga shoka.

6. Omuntu ngoka omwiidhidhimiki ohi inyenge ngiini, uuna e li muupyakadhi?

⁶ Omukalo omutine, omuntu ngoka omwiidhidhimiki oha kambadhala okwiidhidhimikila omaupyakadhi. Odhoshili kutya inashi puka okuhololela kuume koye kopothingo nkene wu uvitile uupyakadhi mboka wu li muwo. Nonando ongawo, omuntu ngoka omwiidhidhimiki ota ka dhiladhila kiinima mbyoka iiwanawa monkalamwenyo ye, nota ka ninga ngaashi ta vulu a tsikile okulongela Jehova a  nyanyukwa. (Kol. 1:11) Tu li aapiya yaJehova, otwa pumbwa okukala tu na eidhidhimiko moonkalo adhihe. Omolwashike mbela? Natu ka kundathaneni omatompelo gamwe.

7. Shi ikolelela kuJakob 5:7, 8, omolwashike eidhidhimiko lya simana? (Tala wo ethano.)

⁷ Otwa pumbwa okukala tu na eidhidhimiko, opo tu ka hupithwe. Ngaashi aapiya yaJehova aadhiginini yonale, natse otwa pumbwa okutegelela neidhidhimiko Kalunga a gwanithe po omauvaneko ge. (Heb. 6:11, 12) Ombiimbeli oya yelekanitha onkalo yetu nomunepya. (Lesha Jakob 5:7, 8.) Omunepya oha longo nuudhiginini a kune nokutekela oombuto dhe, ihe iha kala e shi kutya otadhi ka mena uunake. Onkee oha tegelele neidhidhimiko e na einekelo kutya ota ka teya. Sha faathana, otu na okulonga nuudhiginini tu kale aalanduli yaJesus, nonando ‘inatu tseya kutya esiku olini Omuwa gwetu te ya.’ (Mat. 24:42) Otatu tegelele neidhidhimiko tu na einekelo kutya Jehova ota ka gwanitha po omauvaneko ge pethimbo lye lyo opala. Ngele otwa kala kaatu na eidhidhimiko, otashi vulika tu ka vulwe okutegelela, e tatu tameke okutalala. Otashi vulika wo tu tameke okugandja eitulomo kiinima mbyoka tayi tu etele enyanyu lyopokathimbo. Ihe ngele otwa kala aaidhidhimiki, otatu ka hupithwa. — Mika 7:7; Mat. 24:13.

8. Eidhidhimiko ohali tu kwathele ngiini uuna tatu ungaunga nayalwe? (Aakolossa 3:12, 13)

⁸ Eidhidhimiko ohali tu kwathele ngele tatu ungaunga nayalwe. Ohali tu kwathele tu pulakene neitulomo uuna yalwe taya popi. (Jak. 1:19) Ohali humitha wo komeho ombili. Ngele otu li aaidhidhimiki, uuna twa gwililwa po itatu ka popya oshinima shoka tashi vulu okuyemateka gulwe. Itatu ka geya mbala uuna gumwe a popya oshinima shoka tashi vulu oku tu ehameka. Pehala lyoku mu shunithila uuwinayi, otatu ka tsikila oku mu ‘dhimina po.’—Lesha Aakolossa 3:12, 13.

9. Eidhidhimiko ohali tu kwathele ngiini uuna twa pumbwa okuninga omatokolo? (Omayeletumbulo 21:5)

⁹ Eidhidhimiko ohali tu kwathele wo tu ninge omatokolo gopandunge. Pehala lyokuninga omatokolo meendelelo nopwaa na okudhiladhila, otatu ka konga ethimbo tu ninge omapekapeko notu talulule shoka tashi opalele. (Lesha Omayeletumbulo 21:5.) Pashiholelwa, ngele otatu kongo iilonga, otashi vulika tu kale tu na egamo lyokutaamba ko iilonga mbyoka tayi ka ya moshipala okulongela kwetu Jehova. Ihe ngele otu na eidhidhimiko, otatu ka kutha ethimbo tu tale kutya iilonga mbyoka oyi li peni, oowili dhi thike peni tatu ka longa notayi ka guma ngiini yaandjetu nosho wo ekwatathano lyetu naJehova. Ngele otu li aaidhidhimiki, otatu vulu okuyanda okuninga omatokolo inaaga dhiladhilwa nawa.

10. Ongiini Omukriste ta vulu okukokeka eidhidhimiko nokukala e li na?

¹⁰ Galikana wu kale wu na eidhidhimiko. Eidhidhimiko oli li oshiimati shombepo. (Gal. 5:22, 23) Onkee otatu vulu okupula Jehova ombepo ondjapuki e tu kwathele tu kokeke uukwatya mboka. Ngele otwa taalela onkalo ndjoka tayi yeleke eidhidhimiko lyetu natu ‘tsikile okupula’ ombepo ondjapuki yi tu kwathele tu kale aaidhidhimiki. (Luk. 11:9, 13) Otatu vulu wo okupula Jehova ekwatho tu kale hatu tala ko iinima ngaashi ye he yi tala ko. Konima yokugalikana otwa pumbwa okuninga ngaashi tatu vulu esiku kehe tu kale aaidhidhimiki. Ngele otwa tsikile okukala hatu galikana tu kale tu na eidhidhimiko, Jehova ote ke tu kwathela nonando katwa li tu li na nale.

11-12. Jehova okwa kala nokuulika ngiini eidhidhimiko?

 ¹¹ Tedhatedha kiiholelwa yomOmbiimbeli. MOmbiimbeli omu na iiholelwa oyindji yaantu mboka ya li aaidhidhimiki. Ngele otwa kala hatu tedhatedha kiiholelwa mbyoka, otatu ki ilonga nkene tatu vulu okuulika uukwatya mboka. Manga inaatu kundathana yimwe yomuyo, natu ka taleni manga koshiholelwa sha dhenga mbanda shaJehova, sheidhidhimiko.

¹² Moshikunino shaEden, Satana okwa li a lundile Jehova, mokuningitha Eva a kale e na omalimbililo, ngele Jehova oku li ngaa shili omupangeli omunahole nomuyuuki. Pehala lyokuhanagula po nziya omulundili ngoka, Jehova okwa li a ulike uukwatya weidhidhimiko nosho wo eipangelo, molwaashoka oku shi kutya otashi ka pula ethimbo, opo a gandje uumbangi kutya epangelo lye olyo lya dhengambanda. Omanga a tegelela okwa kala ta idhidhimikile omalundilo kombinga yedhina lye. Shimwe ishewe, Jehova okwa kala a tegelela neidhidhimiko, opo aantu oyendji ya mone ompito yoku ka mona omwenyo gwaaluhe. (2 Pet. 3:9, 15) Oshizemo, aantu oyendjiyendji oyi ilonga kombinga ye. Ngele otwa gandja eitulomo kuuwanawa mboka hawu zi meidhidhimiko lyaJehova, otashi ka kala oshipu kutse okutegelela ethimbo ndyoka ta ka eta ehulilo.

13. Jesus okwa li a holele ngiini uukwatya waHe weidhidhimiko? (Tala wo ethano.)

¹³ Jesus okwa li a holele eidhidhimiko lyaHe thiluthilu nokuli naasho a li kombanda yevi. Kasha li aluhe hashi kala oshipu kuye okuulika uukwatya weidhidhimiko, unene tuu ngele tashi ya paalongimpango aaniihelele nosho wo Aafarisayi. (Joh. 8:25-27) Ihe ngaashi He, Jesus ka li ha geye mbala. Ka li a shunithile aantu uuwinayi sho ya li ye mu tuku nenge ye mu hindi. (1 Pet. 2:23) Okwa li a idhidhimikile  omashongo nopwaa na okungongota. Nomolwaashono Ombiimbeli tayi tu lombwele tayi ti: ‘Dhiladhileni kuJesus ngoka a li a idhidhimikile aantu aalunde mboka ya li ye mu kondjitha.’ (Heb. 12:2, 3, yelekanitha NW.) Kekwatho lyaJehova, natse otatu vulu okwiidhidhimikila eshongo kehe ndyoka tali tu adha.

14. Oshike tatu ilongo keidhidhimiko lyaAbraham? (Aahebeli 6:15) (Tala wo ethano.)

¹⁴ Ongiini ngele shoka twa kala twa tegelela shi ningwe kombinga yehulilo inashi ningwa natango? Otashi vulika twa li twa tegelela ehulilo ando li kale lye ya nale. Notashi vulika tu kale twa tila kutya itatu ka adhika tu li momwenyo sho ehulilo tali ya. Oshike tashi vulu oku tu kwathela tu tsikile okutegelela neidhidhimiko? Natu ka taleni koshiholelwa shaAbraham. Sho a li e na omimvo 75 kee e na natango okanona, Jehova okwa li e mu uvanekele ta ti: “Otandi ke ku pa oluvalo olwindji.” (Gen. 12:1-4) Mbela Abraham okwa li a mono sho euvaneko ndyoka tali gwanithwa? Ine li mona naanaa. Konima sho a taaguluka omulonga gwaEufrat nokonima sho a kala a tegelela uule womimvo 25, okwa mono nkene okamwanamati, Isak, ka valwa pashikumithalonga, nokonima yomimvo dhilwe 60, aatekulu, Esau naJakob oya valwa. (Lesha Aahebeli 6:15.) Ihe Abraham ina mona nando oluvalo lwe talu indjipala naasho talu thigulula Evi lyEuvaneko. Nando ongawo, omulumentu ngoka omudhiginini okwa li e na ekwatathano lyopothingo nOmushiti gwe. (Jak. 2:23) Sho Abraham ta ka yumudhwa, ota ka kala a nyanyukwa okutseya kutya eidhidhimiko lye, olya etela aantu yomiigwana ayihe omalaleko nuuyamba. (Gen. 22:18) Shono otashi tu longo shike? Otashi vulika kaatu mone omauvaneko gaJehova taga gwanithwa ngashingeyi. Nonando ongawo, ngele otu na  eidhidhimiko ngaashi Abraham, otatu vulu okukala tu na uushili kutya Jehova ote ke tu pa ondjambi ngashingeyi nosho wo muuyuni we uupe mboka e tu uvanekela.—Mark. 10:29, 30.

15. Oshike tatu vulu okukonakona pekonakonombiimbeli lyetu lyopaumwene?

¹⁵ MOmbiimbeli omu na iiholelwa yaantu yalwe oyendji mboka ya li aaidhidhimiki. (Jak. 5:10) Otashi ka kala oshiwanawa ngele owa kongo ethimbo wu konakone nowu ninge omapekapeko kombinga yawo. b Pashiholelwa, nonando David okwa li a gwayekwa sho a li omushona lela, a ka ninge omukwaniilwa gwaIsrael gwomonakuyiwa, okwa li e na okutegelela ethimbo nuule manga inaa ninga omukwaniilwa. Simeon naHanna oya li ya longele Jehova nuudhiginini omanga ya tegelela Mesiasa omuuvanekwa. (Luk. 2:25, 36-38) Sho to konakona omahokololo ngoka, kambadhala wu konge omayamukulo komapulo taga landula: ‘Oshike sha li sha kwathele omuntu nguka a kale omwiidhidhimiki? Uuwanawa wuni a mona sho a kala omwiidhidhimiki? Ongiini tandi vulu oku mu holela?’ Oto vulu wo okumona uuwanawa mokwiilonga kombinga yaamboka ya li kaaye shi aaidhidhimiki. (1 Sam. 13:8-14) Oto vulu okwiipula to ti: ‘Oshike sha li she ya ningitha ya kale kaaye na eidhidhimiko? Oya li ya mono iilanduliko yini?’

16. Uuwanawa wumwe wuni hatu mono uuna tu na eidhidhimiko?

¹⁶ Uuwanawa mboka hawu zi mokukala omwiidhidhimiki. Ngele otu li aaidhidhimiki, ohatu kala tu na ombili notwa ngungumana. Kungawo, eidhidhimiko otali vulu okuhwepopaleka uukolele wetu wopalutu nowopamadhiladhilo. Ngele ohatu idhidhimikile yalwe, ohatu kala tu na ekwatathano ewanawa nayo. Ohatu kala wo tu na uukumwe megongalo. Nuuna gumwe a ungaunga natse nayi, onkalo itayi ka nayipala, molwaashoka ihatu geye mbala. (Eps. 37:8; Omayel. 14:29) Ihe komeho gaayihe, ngele otu li aaidhidhimiki, otatu holele Tate yetu gwomegulu nohatu hedha popepyeelela naye.

17. Otu na okukala twa tokola toko okuninga shike?

¹⁷ Eidhidhimiko uukwatya mboka hawu tu etele uuwanawa. Nonando omathimbo gamwe otashi vulika tu kale tu wete oshidhigu okukala aaidhidhimiki, kekwatho lyaJehova, otatu vulu okutsikila okukokeka uukwatya mboka. Omanga twa tegelela uuyuni uupe, otatu vulu okukala neinekelo kutya, ‘Omuwa ota tonatele mbo haa vulika kuye, mboka haa tegelele esilohenda lye.’ (Eps. 33:18) Onkee ano atuheni natu kaleni twa tokola toko okukala aaidhidhimiki.