OSHITOPOLWA SHOKUKONAKONWA 31
EIMBILO 12 Jehova, oKalunga Omunene
Jehova okwa ninga po shike, a hupithe aantu muulunde neso?
“Molwaashoka Kalunga okwa kala e hole uuyuni noonkondo, okwa gandja Omwana epona.” — JOH. 3:16.
SHOKA TATU KA ILONGA
Otatu ka tala nkene Jehova a kala noku tu kwathela tu kondjithe uulunde nankene e shi ningitha tashi wapa, opo tu ka kale twa nyanyukwa monkalamwenyo sigo aluhe, twa manguluka ko kuulunde.
1-2. (a) Uulunde oshike, nongiini tatu vulu oku wu kondjitha? (Tala wo “Uutumbulilo wa yelithwa.”) (b) Oshike tatu ka kundathana moshitopolwa shika nomiitopolwa iikwawo mbyoka yi li mOshungolangelo ndjika? (Tala wo “Omalombwelo kaaleshi” moshifo shika.)
MBELA owa hala okutseya kutya Jehova Kalunga oku ku hole shi thike peni? Oto vulu okumona eyamukulo, uuna wa ilongo kombinga yaashoka e ku ningila, opo e ku hupithe muulunde neso. Uulunde a owo omutondi omukwanyanya, ngoka itaatu vulu okusinda kutse yene. Atuheni ohatu yono esiku kehe, nohatu si molwuulunde. (Rom. 5:12) Onkundana ombwanawa oyo kutya Jehova ote ke tu hupitha muulunde neso.
2 Uule womimvo 6 000 lwaampono, Jehova Kalunga okwa kala nokukwathela aantu ya kondjithe uulunde. Omolwashike mbela? Oshoka oku ya hole. Jehova okwa kala e hole aantu okuza sho e ya shiti, nokwe ya ningila oshindji e ya kwathele ya kondjithe uulunde. Kalunga oku shi kutya uulunde otawu fala meso noina hala nando tu se. Okwa hala tu kale nomwenyo sigo aluhe. (Rom. 6:23) Shoka osho e tu halela. Moshitopolwa shika, otatu ka kundathana omapulo gatatu: (1) Jehova okwa pa aantu aalunde etegameno lini? (2) Aantu aalunde pethimbo lyOmbiimbeli oya li ya ningi po shike, opo ya kale ya hokiwa kuJehova? (3) Jesus okwa ningi po shike, a hupithe aantu aalunde?
JEHOVA OKWA PA AANTU AALUNDE ETEGAMENO LINI?
3. Oshike sha li sha ningitha Adam naEva ya yone?
3 Sho Jehova a shiti omulumentu nomukiintu gwotango, okwa li a hala ya kale ya nyanyukwa. Okwe ya pe egumbo ewanawa lyokukala, omagano gondjokana noshinakugwanithwa tashi hokitha. Oya li ye na okuudhitha evi noluvalo lwawo nokutamununa mo oshikunino shaEden, opo evi alihe li ninge oparadisa. Okwa li e ya pe oshipango shimwe. Kalunga okwa li e ya londodha kutya ngele oya hogolola owina okwaavulika koshipango she, otaya ka sa. Otu shi shoka sha li sha ningwa po. Oshishitwa shopambepo, shoka kaashi hole Kalunga nosho wo aantu, osha ningitha Adam naEva ya taaguluke oshipango shoka. Oya li ya ningi shoka omuyengeli omukolokoshi, Satana, a li a hala. Kaya li ya inekela He, ngoka a li e ya ulukile kutya oku ya hole noonkondo. Pehala lyokuvulika kuye, oya yono. Ngaashi tu shi shi, oohapu dhaJehova odha gwanithwa. Okuza sho ya yono, oya li ya adhika kiilanduliko, ngaashi uukulupe nolwanima oya si. — Gen. 1:28, 29; 2:8, 9, 16-18; 3:1-6, 17-19, 24; 5:5.
4. Omolwashike Jehova e tonde uulunde, nohe tu kwathele tu wu kondjithe? (Aaroma 8:20, 21)
4 Jehova okwa nyolitha mOmbiimbeli ehokololo ndyoka tali yemateke, omolwuuwanawa wetu. Otali tu kwathele tu mone kutya omolwashike e tonde uulunde noonkondo. Uulunde ohawu tu topola ko kuTate yetu nohawu fala meso. (Jes. 59:2) Nomolwaashoka Satana, oshishitwa oshinashipotha shoka sha etitha uupyakadhi awuhe mboka, shi hole uulunde notashi tsikile oku wu humitha komeho. Otashi vulika a li ta dhiladhila kutya okwa ya elalakano lyaJehova moshipala, sho a pukitha Adam naEva. Ihe ka li e shi kutya Jehova omunahole shi thike peni. Kalunga ka li a lundulula nando elalakano lye li na ko nasha noluvalo lwaAdam naEva. Molwaashoka oku hole aantu, okwa ningi elongekidho nziya, opo ya kale ye na etegameno. (Lesha Aaroma 8:20, 21.) Jehova okwa li e shi kutya yamwe yomoluvalo lwaAdam naEva otaya ka kala ye mu hole, notaya ka konga ekwatho lye ya kondjithe uulunde. E li He nOmushiti gwawo, okwa li e shi ningitha tashi wapa ya mangululwe muulunde, noya hedhe popepi naye. Jehova okwa li e na okuninga po shike, opo shoka shi vule okuningwa?
5. Jehova okwa li a pe aantu etegameno lini, nziya konima sho Adam naEva ya yono? (Genesis 3:15)
5 Lesha Genesis 3:15. Okupitila mehunganeko ndyoka, Jehova okwa pe aantu etegameno, sho a popi kutya ota ka hanagula po Satana. Kalunga okwa hunganeke kombinga ‘yoluvalo’ ndoka talu ka hupitha aantu. Konima yethimbo, oluvalo otalu ka nyanyagula po Satana nokuhulitha po uuwinayi awuhe, mboka a li a etitha moshikunino shaEden. (1 Joh. 3:8) Ihe manga shoka inaashi ningwa, oluvalo ndoka olwa li talu ka mona iihuna. Satana ote ke lu tsa moshithi e talu si, naashono osha li tashi ka ehameka Jehova noonkondo. Ihe uuwehame mboka owa li tawu ka kala owala wopokathimbo, molwaashoka otawu ke shi ningitha tashi wapa, opo aantu oyendji ya hupithwe muulunde neso.
AANTU AALUNDE PETHIMBO LYOMBIIMBELI OYA LI YA NINGI PO SHIKE, OPO YA KALE YA HOKIWA KUJEHOVA?
6. Aalumentu mboka ya li ye na eitaalo ngaashi Abel naNoa, oya li ya ningi shike, opo ya hedhe popepi naJehova?
6 Uule womathelemimvo ogendji ga ka landula ko, Jehova okwa kala nokuholola kashona nakashona nkene aantu aalunde taya vulu okuhedha popepi naye. Abel, omwanamati omutiyali gwaAdam naEva, oye a li omuntu gwotango a ulike kutya oku na eitaalo muJehova, konima yuunashipotha womuEden. Molwaashoka Abel okwa li e hole Jehova nokwa li a hala oku mu nyanyudha nokuhedha popepi naye, okwa li e mu yambele eyambo. Abel okwa li omusita gwoonzi, onkee okwa kutha oonzigona dhimwe dhe, e te dhi dhipaga e dhi yambele Jehova. Mbela Jehova okwa li a inyenge ngiini? Okwa li a ‘hokwa Abel neyambo lye.’ (Gen. 4:4) Jehova okwa li wo a ulike kutya okwa hokwa omayambo ngoka ga li haga gandjwa kaapiya ye, mboka ye mu hole noye mu inekela, ngaashi Noa. (Gen. 8:20, 21) Sho Jehova a taamba ko omayambo ngoka, okwa ulike kutya okwa hokwa aantu aalunde notaya vulu okuhedha popepi naye. b
7. Oshike tatu ilongo kuAbraham, sho a li a hala okuyamba po omwanamati?
7 Jehova okwa li a pula Abraham, omulumentu ngoka e na eitaalo, a yambe po omwana Isak, oshinima shoka sha li oshidhigu okuninga. Shono oshi na okukala sha li oshidhigu noonkondo kuAbraham notashi ehameke. Nonando ongawo, Abraham okwa vulika kuJehova. Ihe Kalunga ka li e mu pitike a dhipage omwana. Nonando ongawo, oshiholelwa shoka otashi longo aantu ayehe mboka ye na eitaalo, oshiilongomwa sha simana. Jehova okwa li e na ehalo lyokuyamba po Omwana omuholike, oshoka oku hole aantu noonkondo. — Gen. 22:1-18.
8. Oshike tatu ilongo komayambo ogendji giinamwenyo, ngoka ga popiwa mOmpango? (Levitikus 4:27-29; 17:11)
8 Omathelemimvo ga ka landula ko, sho Jehova a gandja Ompango kAaisraeli, okwe ya lombwele ya gandje omayambo giinamwenyo, opo oondjo dhawo dhi dhimwe po. (Lesha Levitikus 4:27-29; 17:11.) Omayambo ngoka oga li taga thaneke eyambo enene, ndyono Jehova a li ta ka gandja, a hupithe aantu muulunde. Kalunga okwa li a nwetha mo aahunganeki ya yelithe kombinga yoluvalo lwuuvanekwa, ndoka lu li Omwana gwaKalunga ikalekelwa, kutya otalu ka mona iihuna notalu ka dhipagwa. Okwa li ta ka dhipagwa ngaashi onzi yeyambo. (Jes. 53:1-12) Dhiladhila kwaashika: Jehova okwa li ta ka ninga elongekidho, opo Omwana omuholike a ka yambwe po, a hupithe aantu muulunde neso, nangoye wa kwatelwa mo.
JESUS OKWA LI A NINGI PO SHIKE?
9. Johannes Omuninginithi okwa li a popi shike kombinga yaJesus? (Aahebeli 9:22; 10:1-4, 12)
9 Methelemumvo lyotango, omupiya gwaKalunga Johannes Omuninginithi, sho a mono Jesus gwokuNasaret, okwa popi a ti: “Taleni, Onzigona yaKalunga ndjoka tayi kutha po oondjo dhuuyuni!” (Joh. 1:29) Oohapu ndhoka odha ulike kutya Jesus oye a li oluvalo lwa ikalekelwa, ndoka Kalunga a uvaneka. Jesus okwa li ta ka yamba po omwenyo gwe. Kungawo, aantu aalunde oya li ye na etegameno lyoku ka hupithwa thiluthilu muulunde. — Lesha Aahebeli 9:22; 10:1-4, 12.
10. Jesus okwa ulike ngiini kutya okwa “endela” aalunde?
10 Jesus okwa li a gandja eitulomo kaantu, mboka ya li ya lolodhwa kuulunde, nokwe ya hiya ya ninge aalanduli ye. Okwa li e shi kutya uulunde owo wa etele aantu uuwehame. Onkee okwa kwathele aalumentu naakiintu mboka ya li ye shiwike ye li aalongi yuulunde. Okwa popi ta longitha ethaneko a ti: “Mboka ye na uukolele inaya pumbwa omupangi, ihe oomboka taya ehama.” Okwa gwedha ko a ti: “Inandi endela aayuuki, ihe aalunde.” (Mat. 9:12, 13) Shono osho naanaa Jesus a li a ningi. Okwa li a dhimine po nehalo ewanawa, omukiintu ngoka a yogo oompadhi dhe nomahodhi ge. (Luk. 7:37-50) Okwa li a longo omukiintu Omusamaria pondungu, oshili ya simana, nonando okwa li e shi kutya omukiintu ngoka oku na onkalamwenyo inaayi yogoka. (Joh. 4:7, 17-19, 25, 26) Kalunga okwa pa Jesus oonkondo dhokuhulitha po eso ndyoka hali etithwa kuulunde. Ngiini mbela? Jesus okwa li a yumudha aantu, aalumentu naakiintu, aanona naakuluntu. — Mat. 11:5.
11. Omolwashike aalunde ya li ya mangulukila Jesus?
11 Itashi kumitha sho nokuli naantu mboka ya li ya pwila muulunde omutse nothingo, ya li ya mangulukila Jesus. Okwa li e ya ulukile ohenda nuukwawo wanankali. Oya li haya kala ya manguluka okupopya naye. (Luk. 15:1, 2) Jesus okwa li e ya pandula noku ya pa ondjambi sho ya ulike eitaalo muye. (Luk. 19:1-10) Jesus okwa li a ulukile aantu kutya He omunahenda. (Joh. 14:9) Okwa li a ulike moohapu nomiilonga kutya He, ngoka omunalukeno nomunahenda, oku hole aantu nokwa hala okukwathela kehe gumwe gwomuyo a kondjithe uulunde. Jesus okwa li a kwathele aantu ya ethe po uulunde, ya lundulule omikalo dhawo noye mu landule. — Luk. 5:27, 28.
12. Jesus okwa longo aantu shike kombinga yeso lye?
12 Jesus okwa li e shi kutya oshike ta ka ningilwa. Okwa li a lombwele aalanduli ye lwiikando kutya ota ka gwaalekwa nota ka alelwa komuti gwomahepeko. (Mat. 17:22; 20:18, 19) Okwa li e shi kutya eyambo lye otali ka kutha po oondjo dhuuyuni, ngaashi sha hunganekwa kuJohannes nosho wo kaahunganeki yalwe. Jesus okwa li a longo aantu kutya konima yeyambo lye, ota ka “nanena aantu yomaludhi agehe” kuye. (Joh. 12:32) Aantu aalunde otaya vulu owala okunyanyudha Jehova, ngele oya taamba ko Jesus e li Omuwa gwawo nokulandula oshinkoti she. Ngele oya ningi ngawo, otaya ka “mangululwa muulunde.” (Rom. 6:14, 18, 22; Joh. 8:32) Onkee ano Jesus okwa li e na uulaadhi nehalo lyokusa eso enyanyalithi, opo tu hupithwe. — Joh. 10:17, 18.
13. Yelitha nkene sha ende Jesus a se, neso lye otali tu longo shike kombinga yaJehova Kalunga? (Tala wo ethano.)
13 Jesus okwa li a gwaalekwa, a kwatwa po, a tukwa, a lundilwa, a shekwa, a pangulwa nokwaalelwa komuti. Aakwiita oye mu fala kehala hoka a li ta ka dhipagelwa noku mu mbambangela komuti noomboha. Jesus okwa li a idhidhimikile uuwehame mboka, ihe opu na gumwe ngoka a li e uvite uuwehame noonkondo. Omuntu ngoka oJehova Kalunga. Ihe ina ya mo olunyala, pehala lyaashono okwa etha omwana a dhipagwe, nonando okwa li e na oonkondo dhoku keelela kaa dhipagwe. Ngele Jehova okwa li e hole Omwana noonkondo, omolwashike mbela a li a etha a mone iihuna nokusa? Oshoka oku tu hole. Jesus okwa ti: “Molwaashoka Kalunga okwa kala e hole uuyuni noonkondo, okwa gandja Omwana epona, opo kehe ngoka ta ulike kutya oku na eitaalo muye kaa hanagulwe po, ihe a ka mone omwenyo gwaaluhe.” — Joh. 3:16.
Jehova okwa li a piti muuwehame kaawu shi okuyelekwa, sho a pitike Omwana a hepekwe noku dhipagwe, opo e tu mangulule muulunde neso (Tala okatendo 13)
14. Eyambo lyaJesus otali tu longo shike?
14 Eyambo lyaJesus otali ulike kutya Jehova oku hole oluvalo lwaAdam naEva. Otali ulike wo kutya Jehova oku ku hole noonkondo. Okwa li a ningi oshindji, a yambe po Omwana omuholike nokwiidhidhimikila uuwehame uunene, kaawu shi okuyelekwa nasha, opo e ku hupithe muulunde neso. (1 Joh. 4:9, 10) Eeno, okwa hala okukwathela kehe gumwe gwomutse a kondjithe uulunde noku wu sinda.
15. Oshike twa pumbwa okuninga, opo tu mone mo uuwanawa momagano gaKalunga gekuliloyambo lyaJesus?
15 Omagano gaKalunga gekuliloyambo lyOmwana epona, oge shi ningitha tashi wapa, opo oondjo dhetu dhi dhimwe po. Ihe opo Kalunga e tu dhimine po, otwa pumbwa okuninga po sha. Oshike twa pumbwa okuninga? Johannes Omuninginithi naJesus Kristus, oye tu pa eyamukulo, sho ya ti: “Itedhululeni, oshoka Uukwaniilwa womegulu owa hedha popepi.” (Mat. 3:1, 2; 4:17) Ngele otwa hala shili okukondjitha uulunde nokuhedha popepi naTate yetu omunahole, otwa pumbwa okwiitedhulula. Mbela oshike sha kwatelwa mo mokwiitedhulula, nohaku tu kwathele ngiini tu kondjithe egamo lyokuyona? Epulo ndyoka otali ka yamukulwa moshitopolwa tashi landula.
EIMBILO 18 Otu na olupandu omolwekulilo
a UUTUMBULILO WA YELITHWA: MOmbiimbeli, oshitya “uulunde” otashi vulu oku ukithwa kiilonga ya puka, okulonga shoka kaashi li metsokumwe nomithikampango dhaJehova dhopamikalo. Ihe oshitya “uulunde” otashi vulu wo okuukithwa kokwaagwanenena nenge kuulunde mboka twa thigulula kuAdam. Ohatu si, omolwuulunde mboka twa thigulula.
b Jehova okwa li ha taamba ko omayambo gaantu aadhiginini yopethimbo lyonale, molwaashoka okwa li e shi kutya monakuyiwa ota ka gandja Jesus Kristus e li eyambo, a hupithe aantu muulunde neso. — Rom. 3:25.
