OSHITOPOLWA SHOKUKONAKONWA 33
EIMBILO 130 Kala ho dhimine po
Nkene egongalo hali holele omukalo moka Jehova a tala ko aayoni
“Ngele ku na ngoka a yono, nena otu na Omupopili.” — 1 JOH. 2:1.
SHOKA TATU KA ILONGA
Otatu ka ilonga iiyilongomwa ya simana nkene eyono lya kwata miiti lya li lya ungaungiwa nalyo megongalo lyomuKorinto methelemumvo lyotango.
1. Jehova okwa halela shike aantu ayehe?
JEHOVA okwa shita aantu ye na emanguluko lyokuninga omatokolo. Ohatu longitha emanguluko ndyoka esiku nesiku, uuna tatu ningi omatokolo. Etokolo ndyoka lya simanenena kehe omuntu ta vulu okuninga, olyo okwiiyapulila Jehova nokukala oshitopolwa shaanegumbo ye, mboka taye mú longele. Jehova okwa hala kehe gumwe a ninge ngawo. Omolwashike mbela? Oshoka oku hole aantu nokwe ya halela shoka sha dhenga mbanda. Okwa hala ya kale ookuume ke ya nyanyukwa noya kale nomwenyo sigo aluhe. — Deut. 30:19, 20; Gal. 6:7, 8.
2. Jehova okwa halela shike mboka inaaya itedhulula natango? (1 Joh. 2:1)
2 Jehova iha thiminike omuntu nando ogumwe e mu longele. Oha etha kehe gumwe a tokole shoka ta ka ninga. Ongiini ngele Omukriste a ninginithwa okwa teya ompango yaKalunga, e ta yono eyono lya kwata miiti? Ngele ina itedhulula, oku na okukuthwa mo megongalo. (1 Kor. 5:13) Ihe nonando ongawo, Jehova oha kala e na einekelo kutya omuyoni ota ka galukila kuye. Uushili owo kutya ndyoka olyo etompelo lya simanenena sho a gandja ekulilo li shi ningithe tashi wapa, opo aayoni mboka ya itedhulula ya dhiminwe po. (Lesha 1 Johannes 2:1.) Jehova oKalunga omunahole, ngoka ta ladhipike mboka ya yona omayono ga kwata miiti ya itedhulule. — Sak. 1:3; Rom. 2:4; Jak. 4:8.
3. Oshike tatu ka kundathana moshitopolwa shika?
3 Jehova ote tu lombwele nkene ha kala e uvitile omayono nosho wo mboka ya yona, nokwa hala tu ninge sha faathana. Oshitopolwa shika otashi ka kundathana nkene tatu vulu oku shi ninga. Sho to shi lesha, tala kutya (1) oshipotha sheyono lya kwata miiti osha li sha ungaungiwa nasho ngiini megongalo lyomuKorinto methelemumvo lyotango, (2) Paulus okwa li a gandja omayele geni sho omuyoni a itedhulula nosho wo (3) ehokololo ndika lyOmbiimbeli otali holola shike kombinga yankene Jehova ha kala e uvitile Aakriste mboka ya yona eyono lya kwata miiti.
NKENE EYONO LYA KWATA MIITI LYA LI LYA UNGAUNGIWA NALYO METHELEMUMVO LYOTANGO
4. Onkalo yini ya li ya holoka po megongalo lyomuKorinto methelemumvo lyotango? (1 Aakorinto 5:1, 2)
4 Lesha 1 Aakorinto 5:1, 2. Momukokomoko gwolweendo lwe olutitatu, Paulus okwa li a uvu onkundana tayi yemateke kombinga yegongalo lyomuKorinto, ndyoka opo lya li lya totwa po. Omumwatate gumwe megongalo okwa li hayi momilalo nomukulukadhi ngoka a hokanwa kuhe. Eihumbato lya tya ngawo, olya li tali halutha, molwaashoka “naapagani ihaa yono eyono lya tya ngaaka.” Egongalo olya li lya taamba ko eihumbato ndyoka ewinayi notashi vulika lya li tali dhiladhila kutya oshi li nawa omumwatate ngoka a kale megongalo. Otashi vulika yamwe ya li taya dhiladhila kutya otaya ulike ohenda ngaashi Jehova. Ihe Jehova iha kala e shi hokwa, uuna aapiya ye taya yono. Omolwokuyona hoka nokaapu na okusa ohoni yasha, omulumentu ngoka okwa li ta nyateke lela edhina lyegongalo. Otashi vulika wo a li ta nwetha mo Aakriste yalwe mboka ya li haya endathana naye. Paulus okwa li a lombwele egongalo li ninge shike?
5. Paulus okwa li a lombwele egongalo li ninge shike, nokwa li a hala okutya ngiini? (1 Aakorinto 5:13) (Tala wo ethano.)
5 Lesha 1 Aakorinto 5:13. Jehova okwa li a inyengitha Paulus a nyolele egongalo ontumwafo kutya omuyoni ngoka inaa itedhulula, na kuthwe mo megongalo. Aakriste aadhiginini oya li ye na okuungaunga naye ngiini? Paulus okwa li e ya lombwele a ti: “Inamu kwatathana” naye. Okwa li a hala okutya shike? Paulus okwa li a yelitha kutya elombwelo ndyoka olya kwatela mo ‘kaaya lye pamwe nomuntu a tya ngaaka.’ (1 Kor. 5:11) Olundji okulya pamwe nagumwe, ohashi tu fala moonkundathana oombwanawa naye. Onkene Paulus okwa li a hala okutya egongalo kali na okweendathana nomulumentu ngoka. Shono osha li tashi ka gamena egongalo kenwethomo lye ewinayi. (1 Kor. 5:5-7) Shimwe ishewe, okukala ihaaya endathana nomulumentu ngoka, osha li tashi vulu oku mu kwathela a mone kutya shoka a ninga oshiwinayi noonkondo, notashi vulika a kale a sa ohoni nokukala a hala okwiitedhulula.
Jehova okwa li a inyengitha Paulus a nyolele egongalo ontumwafo kutya omuyoni ngoka inaa itedhulula, na kuthwe mo megongalo (Tala okatendo 5)
6. Egongalo olya li lya inyenge ngiini kontumwafo yaPaulus, nomulumentu ngoka okwa li a ningi po shike?
6 Konima sho a tumine Aakriste yomuKorinto ontumwafo ye, Paulus okwa li ta dhiladhila nkene egongalo tali ka inyenga. Lwanima, Titus okwa li a lombwele Paulus onkundana ombwanawa. Egongalo olya li lya inyenge momukalo omwaanawa kontumwafo yaPaulus. (2 Kor. 7:6, 7) Olya li lya landula omalombwelo ge. Shimwe ishewe, konima yokathimbo sho Paulus a tumu ontumwafo ye, omulumentu ngoka okwa li a itedhulula. Okwa li a lundulula eihumbato lye niikala ye nokwa li a tameka okuvulika komithikampango dhaJehova dhi li pauyuuki. (2 Kor. 7:8-11) Paulus okwa li a lombwele egongalo li ninge shike?
NKENE EGONGALO LYA LI LI NA OKUUNGAUNGA NOMUYONI NGOKA A ITEDHULULA
7. Sho omulumentu ngoka a li a yona a kuthwa mo megongalo, osha eta iizemo iiwanawa yini? (2 Aakorinto 2:5-8)
7 Lesha 2 Aakorinto 2:5-8. Paulus okwa ti: “Osha gwana omuntu ngoka, sho a geelwa koyendji yomune.” Shono osha hala okutya, sho omuyoni a kuthwa mo megongalo, okwa li a mono kutya okwa pumbwa okwiitedhulula. Molwaashoka okwa li a itedhulula, kali we a pumbwa okugeelwa. — Heb. 12:11.
8. Paulus okwa li a lombwele egongalo li ninge shike?
8 Molwaashoka omulumentu ngoka okwa li a itedhulula, Paulus okwa li a lombwele aakuluntugongalo ye mu ethe a galukile megongalo. Okwa li wo e ya lombwele kutya naya ‘dhimine po nokuhekeleka’ omumwatate ngoka a yona, ‘noya kale ye mu hole.’ Paulus okwa li a hala ya shilipaleke omulumentu ngoka a itedhulula kutya oye mu dhimina po shili noye mu hole, okupitila moohapu, meihumbato nomiilonga yawo. Kungawo, otaye ke shi ulika kutya oye mu taamba ko sho a galukile megongalo.
9. Omolwashike tashi vulika sha li oshidhigu kuyamwe, okudhimina po omuyoni ngoka a itedhulula?
9 Mbela osha li oshidhigu kuyamwe megongalo okutaamba ko omuyoni ngoka a itedhulula? Ombiimbeli inayi shi popya, ihe otashi vulika, oshoka iikala ye oya li ya etele egongalo alihe uupyakadhi notashi vulika sha li sha sitha oohandimwe ohoni. Onkene otashi vulika yamwe ya li ye uvite kutya kashi li pauyuuki, omulumentu ngoka a galulilwe megongalo e li omumwatate, ngele oyo ya kala taya longo nuudhiginini ya kale ya yogoka pamikalo. (Yelekanitha Lukas 15:28-30.) Ihe omolwashike nduno sha li sha simana, egongalo li ulukile ohole omumwatate ngoka a itedhulula?
10-11. Oshike sha li tashi vulu okuningwa po, andola aakuluntugongalo oya tindile okudhimina po omuyoni ngoka a itedhulula?
10 Dhiladhila owala shoka sha li tashi vulu okuningwa po, ngele aakuluntugongalo oya tindile okweetha omulumentu ngoka a itedhulula a galukile megongalo, nenge sho a galuka egongalo olya tindi oku mu ulukila ohole. Andola otashi vulika a “thindilwe pevi koluhodhi.” Otashi vulika a kale e uvite kutya ita vulu we okulongela Jehova. Otashi vulika wo a ethe po okukambadhala okuhedha popepi naJehova.
11 Shimwe ishewe, andola aamwatate naamwameme oya tindile okudhimina po omulumentu ngoka a itedhulula, ando oya tula ekwatathano lyawo naJehova moshiponga. Omolwashike mbela? Omolwaashoka kungawo, itaya holele Jehova ngoka ha dhimine po aayoni mboka ya itedhulula. Pehala lyaashono, otaya holele Satana, ngoka omukwanyanya noke na ohenda. Kungawo, oya li taya ka etha Satana e ya longithe ya teye omukumo omulumentu ngoka, kaa longele Jehova. — 2 Kor. 2:10, 11; Ef. 4:27.
12. Egongalo olya li lya holele ngiini Jehova?
12 Egongalo lyomuKorinto olya li lya inyenge ngiini, li holele Jehova, ihe haSatana? Olya li lya landula omukalo gwaJehova gwokuungaunga naayoni mboka ya itedhulula. Ndhindhilika shoka aanyoli yamwe yOmbiimbeli ya popi kombinga yaJehova. David okwa ti kutya Jehova ‘omunalukeno noha dhimine po.’ (Eps. 86:5) Mika okwa nyola a ti: “Kaku na kalunga kalwe e ku fa, Omuwa; ongoye to dhimi po omayono.” (Mika 7:18) Jesaja okwa ti: “Omukeenakalunga ne ethe oondjila dhe, nomukolokoshi omadhiladhilo ge. Na galukile kOmuwa Kalunga ketu, ngoka te mu sile ohenda e te mu kuthile po.” — Jes. 55:7.
13. Omolwashike sha li shi li mondjila okugalulila megongalo omulumentu ngoka a itedhulula? (Tala oshimpungu “ Uunake omulumentu gwomuKorinto a li a galulilwa megongalo?”)
13 Opo egongalo lyomuKorinto li holele Jehova, olya li li na okutaamba ko ishewe omulumentu ngoka a itedhulula, noku mu shilipaleka kutya oli mu hole. Sho lya landula omayele gaPaulus ge na ko nasha nokutaamba ko omuyoni ngoka a itedhulula, olya ulike kutya olya ‘gwanitha po omalombwelo.’ (2 Kor. 2:9) Omulumentu ngoka okwa li a itedhulula, nonando opwa li owala pwa piti oomwedhi oonshona, okuza sho a kuthwa mo megongalo. Onkene kapwa li pu na sha tashi mu imbi a galulilwe megongalo.
NATU HOLELENI OHENDA NUUYUUKI WAJEHOVA
14-15. Oshike tatu ilongo komukalo moka oshipotha shomegongalo lyaKorinto shonale sha li sha ungaungiwa nasho? (2 Petrus 3:9) (Tala wo ethano.)
14 Ehokololo li na ko nasha nomukalo moka oshipotha shomulumentu gwomuKorinto shonale sha li sha ungaungiwa nasho, olya nyolwa opo ‘lyi tu longe.’ (Rom. 15:4) Mehokololo ndyoka otatu ilongo mo kutya Jehova iha pitike aantu mboka ya yona omayono ga kwata miiti ya kale megongalo, ngele inaya itedhulula. Yamwe otashi vulika ya dhiladhile kutya molwaashoka Jehova omunahenda, ota ka etha omuntu ngoka a yona a kale megongalo, nonando ina itedhulula, ihe Jehova iha ulike ohenda momukalo gwa tya ngaaka. Nonando Jehova omunahenda, iha pitike eihumbato kehe lya nyata. (Jud. 4) Andola Jehova okwa pitikile omuyoni ngoka inaa itedhulula a kale mo megongalo, kungawo ita ulike ohenda, molwaashoka shoka otashi ka tulitha egongalo moshiponga. — Omayel. 13:20; 1 Kor. 15:33.
15 Otwa ilonga wo kutya Jehova ina hala nando ogumwe a ka hanagulwe po. Okwa hala okugamena aantu, mpoka tashi vulika. Jehova oha ulukile ohenda aantu mboka ya itedhulula noya hala okukala ishewe ye na ekwatathano naye. (Hes. 33:11; lesha 2 Petrus 3:9.) Sho omulumentu gwomuKorinto a ikaleke kokule nokuyona, Jehova okwa li a longitha Paulus a yelithile egongalo kutya omulumentu ngoka na dhiminwe po nokutaambiwa ko nomaako agehe megongalo.
Ohatu holele ohole nohenda yaJehova, mokutaamba ko nomutima aguhe mboka ya galulilwa megongalo (Tala okatendo 14-15)
16. Owu uvitile ngiini omukalo moka oshipotha shomulumentu gwomegongalo lyomuKorinto sha li sha ungaungiwa nasho?
16 Okutala kunkene oshipotha shomegongalo lyomuKorinto sha li sha ungaungiwa nasho, oshe tu kwathela tu mone kutya Jehova omunahole nomuyuuki. (Eps. 33:5) Mbela shono itashi tu inyengitha tuu tu tange Jehova, Kalunga ketu? Komeho gaayihe, otwa pumbwa okudhimbulukwa kutya otu li aalunde, nakehe gumwe gwomutse oha yono, onkee otwa pumbwa edhiminopo lye. Onkene kehe gumwe gwomutse oku na omatompelo gokupandula Jehova omolwekulilo, ndyoka lye shi ningitha tashi wapa, opo tu dhiminwe po. Itashi tu hekeleke tuu noku tu shilipaleka kutya Jehova okwa halela shili aapiya ye shoka sha dhenga mbanda!
17. Oshike tatu ka kundathana miitopolwa tayi landula ko?
17 Mbela kunena oshipotha shaangoka a yona eyono lya kwata miiti, ohashi ungaungiwa nasho ngiini? Aakuluntugongalo otaya vulu ngiini okuholela Jehova, uuna taya kwathele omuyoni a itedhulule? Egongalo oli na okwiinyenga ngiini, uuna aakuluntugongalo ya tokola okukutha mo omuntu megongalo nenge oku mu galulila mo? Omapulo ngaka otaga ka yamukulwa miitopolwa tayi landula ko.
EIMBILO 109 Holathaneni lelalela nomwenyo aguhe
