OSHITOPOLWA SHOKUKONAKONWA 34
EIMBILO 107 Oshiholelwa shaKalunga shohole
Ungaunga naayoni nohole nonohenda
“Uuwanawa waKalunga ou lile po oku ku hila, wi itedhulule.” — ROM. 2:4.
SHOKA TATU KA ILONGA
Otatu ka ilonga nkene aakuluntugongalo taya vulu okukwathela mboka ya yona omayono ga kwata miiti.
1. Oshike tashi vulu okuningwa po, konima ngele omuntu a yono eyono lya kwata miiti?
MOSHITOPOLWA sha tetekele, otwa mono nkene omuyapostoli Paulus a li a ungaunga nagumwe ngoka a li a yono eyono lya kwata miiti megongalo lyaKorinto. Omuyoni ka li a hala okwiitedhulula, onkee okwa li e na okukuthwa mo megongalo. Ihe ngaashi enyolo lyetu lyoshipalanyolo tali ulike, yamwe mboka ya yona omayono ga kwata miiti, otaya vulu okukwathelwa ya itedhulule. (Rom. 2:4) Ongiini aakuluntugongalo taya vulu oku ya kwathela ya itedhulule?
2-3. Oshike tu na okuninga po, ngele otwa tseya kutya omwiitaali omukwetu okwa yona eyono lya kwata miiti, nomolwashike?
2 Tango manga aakuluntugongalo inaaya kwathela omuntu, oye na okutseya kutya okwa ninga shike. Otu na nduno okuninga po shike, ngele otwa tseya kutya omwiitaali omukwetu okwa yona eyono lya kwata miiti, ndyoka tali vulu oku mu kuthitha mo megongalo? Otu na oku mu ladhipika a ka konge ekwatho kaakuluntugongalo. — Jes. 1:18; Iil. 20:28; 1 Pet. 5:2.
3 Ongiini ngele omuyoni ina hala oku ka popya naakuluntugongalo? Nena otse tu na oku ke ya lombwela, opo omuntu ngoka a pewe ekwatho ndyoka a pumbwa. Ngele otwa ningi ngawo, otatu ulike kutya otu hole omumwatate nenge omumwameme ngoka a yona, molwaashoka otu shi kutya aakuluntugongalo otaye ke mu kwathela. Ngele omuyoni okwa tsikile nokuyona, ota ka yona po ekwatathano lye naJehova. Ota ka nyateka wo edhina lyegongalo. Onkene ohatu katuka onkatu ndjoka nuulaadhi, molwaashoka otu hole Jehova nosho wo omuyoni. — Eps. 27:14.
NKENE AAKULUNTUGONGALO HAYA KWATHELE MBOKA YA YONA OMAYONO GA KWATA MIITI
4. Elalakano lyaakuluntugongalo olini, uuna taya tsakanene nomuntu ngoka a yona eyono lya kwata miiti?
4 Uuna gumwe megongalo a yono eyono lya kwata miiti, olutu lwaakuluntugongalo ohalu hogolola aakuluntugongalo yatatu, mboka ya gwana okuungaunga neyono ndyoka, ya longe ye li okomitiye. a Aalumentu mboka oye na okukala aaifupipiki noye na ondjele. Sho taya kambadhala okukwathela omuyoni a itedhulule, oye na okudhimbulukwa kutya kaye na oku mu kondjitha a ninge omalunduluko. (Deut. 30:19) Aakuluntugongalo oye shi kutya haayoni ayehe haya inyenge momukalo omwaanawa, ngaashi omukwaniilwa David. (2 Sam. 12:13) Aayoni yamwe otashi vulika ya ipwililikile elondodho lyaJehova. (Gen. 4:6-8) Nonando ongawo, elalakano lyaakuluntugongalo okukwathela omuyoni a itedhulule, ngele otashi vulika. Omakotampango geni hage ya wilike, uuna ya tsakanene nomuyoni?
5. Aakuluntugongalo oye na okukala ye na etaloko lini, uuna ya tsakanene nomuyoni? (2 Timoteus 2:24-26) (Tala wo ethano.)
5 Aakuluntugongalo ohaya tala ko omuyoni e li onzi yaJehova ya kana, yi na ondilo. (Luk. 15:4, 6) Onkee ano uuna ya tsakanene nomuyoni, ihaye mu haula noihaya ungaunga naye nonyanya. Shimwe ishewe, ihaya tsakanene naye nelalakano owala lyoku mu pula omapulo nokumona omayamukulo. Pehala lyaashono, ohaya ulike omaukwatya ngoka ge li muTimoteus omutiyali 2:24-26. (Lesha.) Sho aakuluntugongalo taya kambadhala okwaadha omutima gwomuyoni, ohaya ungaunga naye nombili, nolukeno nonohenda.
Ngaashi owala aasita yoonzi yopethimbo lyonale, aakuluntugongalo ohaya kambadhala okukwathela onzi ndjoka ya kana (Tala okatendo 5)
6. Ongiini aakuluntugongalo taya vulu okulongekidha omitima dhawo, manga inaaya tsakanena nomuyoni? (Aaroma 2:4)
6 Aakuluntugongalo ohaya longekidha omitima dhawo. Ohaya kambadhala okuholela Jehova sho taya ungaunga nomuyoni, nokudhimbulukwa oohapu dhaPaulus ndhoka tadhi ti: “Uuwanawa waKalunga ou lile po oku ku hila, wi itedhulule.” (Lesha Aaroma 2:4.) Aakuluntugongalo oye na okudhimbulukwa kutya oye li aasita yoonzi, taya wilikwa kuKristus. (Jes. 11:3, 4; Mat. 18:18-20) Manga aakuluntugongalo inaaya tsakanena nomuyoni, ohaya galikana kombinga yelalakano lyawo, ano okukwathela omuyoni a itedhulule. Ohaya ningi omapekapeko mOmanyolo nosho wo miileshomwa yetu, nohaya galikana ya pewe oondunge dhokuyoolola. Ohaya tala kutya oshike ya pumbwa okutseya kombinga yaashoka she mu inyengitha a kwatwe komadhiladhilo nokiikala mbyoka ye mu ningitha a yone. — Omayel. 20:5.
7-8. Ongiini aakuluntugongalo taya vulu okuholela eidhidhimiko lyaJehova, uuna taya tsakanene nomuyoni?
7 Aakuluntugongalo ohaya holele eidhidhimiko lyaJehova. Ohaya kaleke momadhiladhilo nkene Jehova a li a ungaunga naayoni monakuziwa. Pashiholelwa, Jehova okwa li a tompathana naKain neidhidhimiko, noku mu londodha kombinga yiilanduliko yokuyona. Okwe mu lombwele wo uuwanawa mboka ta ka mona, ngele okwa itedhulula. (Gen. 4:6, 7) Jehova okwa li a pukulula David okupitila momuhunganeki Natan, ngoka a longitha ethaneko, ndyoka lya li lya gumu omutima gwomukwaniilwa ngoka. (2 Sam. 12:1-7) Jehova okwa ‘tsikile okutuma’ lwiikando aahunganeki ye koshigwana shaIsraeli. (Jer. 7:24, 25) Ka li a tegelele aapiya ye yi itedhulule, opo e ya kwathele. Pehala lyaashono, okwa li e ya ladhipike ye shi ninge.
8 Aakuluntugongalo ohaya landula oshiholelwa shaJehova, uuna taya kambadhala okukwathela mboka ya yona omayono ga kwata miiti. Uuna taya ungaunga nomwiitaali omukwawo ngoka a yona, ohaya tompathana naye “neidhidhimiko alihe,” ngaashi sha popiwa muTimoteus omutiyali 4:2. Onkee omukuluntugongalo oku na aluhe okukala a ngungumana nomwiidhidhimiki, opo a vule okukwathela omuyoni a kale e na ehalo lyokuninga shoka shi li mondjila. Ngele omukuluntugongalo okwa geye nenge a kenyanane, nena omuyoni ita ka pulakena komayele ngoka ta pewa, notashi vulika kaa itedhulule.
9-10. Ongiini aakuluntugongalo taya vulu okukwathela omuyoni a dhiladhile kombinga yeyono lye?
9 Aakuluntugongalo ohaya kambadhala okuuva ko kutya oshike sha ningitha omuntu a yone. Pashiholelwa, mbela Omukriste ngoka okwa ende ta nkundipala pambepo, molwaashoka ihaa ningi we ekonakono lyopaumwene nenge ihaa yi we miilonga yokuuvitha? Mbela okwa kala ihaa galikana we kuJehova pandjigilile, nenge ihaa galikana we neitulomo? Mbela okwa etha omahalo ga puka ge mu nwethe mo? Mbela okwa kala ta endathana naantu ya puka nenge a hogolola omainyanyudho ga puka? Ongiini omatokolo ngoka a ningi ga nwetha mo omutima gwe? Mbela oku uvite ko ngaa nkene omatokolo ge noonkatu dhe dha guma He, Jehova?
10 Aakuluntugongalo otaya vulu oku mu pula omapulo, ngoka tage mu kwathele a dhiladhile kiinima mbyoka ya nkundipaleke ekwatathano lye naJehova, noye mu ningitha a yone, taye shi ningi nokaapu na okwiidhopa miinima ye yopaumwene. (Omayel. 20:5) Shimwe ishewe, otaya vulu okulongitha omathaneko ya kwathele omuyoni a dhiladhile muule kombinga yaashoka a ninga, ngaashi Natan a li a ningi naDavid. Otashi vulika petalelopo lyawo lyotango, omuntu a kale e uvitile nayi shoka a ninga. Otashi vulika nokuli a itedhulule.
11. Jesus okwa li a ungaunga ngiini naayoni?
11 Aakuluntugongalo ohaya kambadhala okulandula Jesus. Jesus okwa li a pula Saulus gwokuTarsus, epulo ndyoka lya li lye mu ningitha a dhiladhile, sho a ti: “Saulus, Saulus, omolwashike to tidhagana ndje?” Kungawo, Jesus okwa li e mu kwathele a mone kutya shoka ta ningi osha puka. (Iil. 9:3-6) Shi na ko nasha ‘nomukiintu Isebel,’ Jesus okwa ti: “Onde mu pe ethimbo lyokwiitedhulula.” — Eh. 2:20, 21.
12-13. Ongiini aakuluntugongalo taya vulu okupa omuyoni ethimbo a itedhulule? (Tala wo ethano.)
12 Aakuluntugongalo ohaya holele Jesus, noihaya thiki nziya pehulithodhiladhilo kutya omuyoni ite ki itedhulula. Nonando yamwe otashi vulika ya itedhulule sho aakuluntugongalo ye ya talele po oshikando shotango, yalwe otashi vulika ya kale ya pumbwa ethimbo olindji. Onkee aakuluntugongalo otaya vulu okuninga omalongekidho, ya talele po omuyoni iikando yi vulithe pushimwe. Otashi vulika konima sho ya tsakanene oshikando shotango nOmukriste ngoka a yona, a tameke okudhiladhila muule kombinga yaashoka ya popile naye. Otashi vulika a galikane kuJehova neifupipiko. (Eps. 32:5; 38:18) Onkee sho taya ka shuna kuye oshikando sha landula ko, otashi vulika ya adhe a lundulula iikala ye.
13 Opo aakuluntugongalo ya kwathele omuyoni a itedhulule, ohaye mu ulukile uukwawo wanankali nosho wo oku mu sila ohenda. Ohaya galikana nohaya kala ye na etegameno kutya Jehova ota ka yambeka oonkambadhala dhawo, nohaya kala wo ye na einekelo kutya Omukriste ngoka ote ki itedhulula. — 2 Tim. 2:25, 26.
Aakuluntugongalo otaya vulu okutsakanena nomuyoni iikando yi vulithe pushimwe, opo ye mu pe ethimbo a itedhulule (Tala okatendo 12)
14. Olye lela e na okupandulwa, uuna omuyoni a itedhulula, nomolwashike?
14 Ohashi nyanyudha, uuna omuyoni a itedhulula. (Luk. 15:7, 10) Olye lela e na okupandulwa? Mbela aakuluntugongalo? Dhimbulukwa shoka Paulus a nyola kombinga yaayoni sho a ti: “Oshoka Kalunga ota vulu oku ya pa ompito yokwiitedhulula.” (2 Tim. 2:25) Onkee ano Jehova, oye ha kwathele Omukriste a lundulule okudhiladhila niikala ye, ihe hamuntu gwontumba. Paulus okwa yelitha kombinga yuuwanawa mboka omuntu ta ka mona konima ngele a itedhulula. Omuntu ngoka oha kala e uvite ko nawa oshili, oha kala ta dhiladhila pandunge noha zi mo moomwigo dhaSatana. — 2 Tim. 2:26.
15. Ongiini aakuluntugongalo taya vulu okutsikila okukwathela omuyoni ngoka a itedhulula?
15 Uuna omuyoni a itedhulula, okomitiye yaakuluntugongalo otayi ka ninga omalongekidho yi mu ningile omatalelopo guusita, opo ya tsikile oku mu kwathela a kondjithe oomwigo dhaSatana noku ninge shoka shu uka. (Heb. 12:12, 13) Aakuluntugongalo ihaya lombwele nando yalwe kombinga yaashoka omuyoni a ninga. Ihe mbela oshike ye na okutseyithila egongalo?
“YA GANDA MONTANEHO YEGONGALO”
16. Sha ikolelela kuTimoteus gwotango 5:20, Paulus okwa li a hala okutya shike, sho a ti kutya “montaneho yegongalo”?
16 Lesha Timoteus gwotango 5:20. Paulus okwa li a nyolele omukuluntugongalo omukwawo, Timoteus, oohapu ndhoka dhi na ko nasha nokuungaunga ‘naamboka taya yono.’ Mbela okwa li a hala okutya shike? Sho a ti kutya “montaneho yegongalo,” itashi ti kutya ayehe megongalo oye shi kombinga yeyono ndyoka. Pehala lyaashono, okwa li ta popi kombinga yaamboka ye shi nale kombinga yeyono lyaangoka a yona. Otashi vulika ye mu mona sho ta yono, nenge omuyoni e ya lombwela shoka a ninga. Aantu mboka, oyo owala aakuluntugongalo taya ka tseyithila kutya oya ungaunga noshipotha shomuyoni ngoka nokwa pukululwa.
17. Ngele omuntu okwa yona eyono lya kwata miiti noyendji megongalo oye shi shi, nenge shi na uupu ye ke shi tseye, etseyitho lini li na okuningwa, nomolwashike?
17 Poompito dhimwe, oyendji megongalo otashi vulika ya kale ye shi nale kutya gumwe okwa yona eyono lya kwata miiti, nenge shi na uupu ye shi tseye. Monkalo ya tya ngawo, uutumbulilo “montaneho yegongalo” owa kwatela mo egongalo alihe. Onkee omukuluntugongalo ota ka tseyithila egongalo kutya omumwatate nenge omumwameme okwa geelwa. Omolwashike mbela? Paulus okwa ti: “Opo yakwawo ya tile okuyona.”
18. Aakuluntugongalo oye na okuungaunga ngiini niipotha yaanona mboka ya ninginithwa? (Tala wo ethano.)
18 Ongiini ngele aanona mboka ye li kohi yomimvo 18, mboka ya ninginithwa, oya yono eyono lya kwata miiti? Olutu lwaakuluntugongalo otalu ka ninga omalongekidho, opo aakuluntugongalo yaali ya tsakanene nomugundjuka ngoka, pamwe naavali ye Aakriste. b Aakuluntugongalo otaya ka pula aavali kutya oonkatu dhini ya katuka nale, ya kwathele omwana a itedhulule. Ngele okanona hoka ohaka pulakene komayele ngoka taka pewa kaavali yako, notaka ningi omalunduluko mokudhiladhila nomeihumbato lyako, nena aakuluntugongalo mboka yaali otaya vulu okulombwela aavali yako kutya oyo naya tsikile oku ka kwathela. Oshoka paulela, aavali oya pewa oshinakugwanithwa kuKalunga shokupukulula oyana pahole. (Deut. 6:6, 7; Omayel. 6:20; 22:6; Ef. 6:2-4) Aakuluntugongalo otaya kala haya kwatathana naavali omalupita, ya shilipaleke ngele omugundjuka ota mono ngaa ekwatho ndyoka a pumbwa. Ihe ongiini ngele okanona hoka ka ninginithwa, otaka tsikile okuyona nokaapu na okwiitedhulula? Monkalo ya tya ngawo, aakuluntugongalo yatatu otaya ka tsakanena nako, pamwe naavali yako Aakriste nenge naangoka te ka putudha.
Uuna okanona ka yono eyono lya kwata miiti, aakuluntugongalo yaali otaya ka tsakanena nako, pamwe naavali yako Aakriste (Tala okatendo 18)
“OMUWA OYE OMUNESILOHENDA NOMUNALUKENO”
19. Aakuluntugongalo ohaya kambadhala okuholela ngiini Jehova, uuna taya ungaunga naayoni?
19 Jehova okwa tegelela iilyo yokomitiye yaakuluntugongalo, yi kaleke egongalo lya yogoka. (1 Kor. 5:7) Ihe aakuluntugongalo oye na wo okuninga ngaashi taya vulu ya kwathele aayoni ya itedhulule. Sho taye shi ningi, ohaya kala ye na einekelo kutya omuyoni ota ka lundulula iikala ye. Omolwashike mbela? Oshoka oya hala okuholela Jehova ngoka “omunesilohenda nomunalukeno.” (Jak. 5:11) Ndhindhilika nkene omuyapostoli omunamimvo, Johannes, a li a ulike uukwatya mboka. Okwa nyola a ti: “Aamwandje, otandi mu nyolele oohapu ndhika, opo mwaa yone. Ihe ngele ku na ngoka a yono, nena otu na Omupopili Kristus, omuyuuki ngoka te tu galikanene puTate.” — 1 Joh. 2:1.
20. Oshike tatu ka kundathana moshitopolwa shahugunina shomiitopolwa mbika ya pambathana?
20 Shiyemateka, omathimbo gamwe Omukriste otashi vulika a kale inaa hala okwiitedhulula. Ngele shoka osha ningwa, oku na okukuthwa mo megongalo. Aakuluntugongalo ohaya ungaunga ngiini niipotha mbyoka ya kwata miiti? Shoka otatu ke shi kundathana moshitopolwa shahugunina shomiitopolwa mbika ya pambathana.
EIMBILO 103 Aakuluntugongalo oye li omagano
a Monakuziwa, aakuluntugongalo mboka yatatu ya hogololwa ya kwathele omuyoni, oya li haya ithanwa okomitiye yopampangu. Ihe molwaashoka iilonga yawo inayi kwatela mo owala okupangula, ihatu longitha we uutumbulilo mboka. Onkee ano ngashingeyi aakuluntugongalo mboka ohaya ithanwa okomitiye yaakuluntugongalo.
b Shoka sha popiwa kombinga yaavali, otashi longo wo kaakuluntu, mboka taya sile oshimpwiyu okanona hoka ka ninga kawo paveta nenge mboka taye ka putudha.
