1, 2. Omolwashike shi li pandunge okupulakena kOmushiti gwetu, uuna tatu tokola shoka tatu ka ninga monakuyiwa? (Tala omathano gopetameko.)

NGELE ngoye omugundjuka, otashi vulika wa pewa omayele ogendji kombinga yaashoka to ka ninga monakuyiwa. Aalongi, aagandjimayele yomaithano nenge aantu yalwe, otashi vulika ye ku ladhipika wu lalakanene elongo lyopombanda nenge iilonga hayi futu iimaliwa oyindji. Mepingathano naashono, Jehova ohe ku pe omayele wu ninge sha shilwe. Okwa hala wu kale ho longo nuudhiginini, manga ho yi kosikola, opo wu ka vule okumona iilonga wu ikwathele, ngele wa mana. (Kol. 3:23) Uuna to tokola kombinga yaashoka to ka pititha komeho monkalamwenyo, ohe ku ladhipike wu wilikwe komakotampango ngoka ge li metsokumwe nelalakano lye nonehalo lye, pethimbo ndika lyehulilo. — Mat. 24:14.

² Kaleka wo momadhiladhilo kutya Jehova oha mono ashihe shoka sha kwatelwa mo, oshoka oku shi shoka tashi ka ningilwa uuyuni mbuka monakuyiwa. Oku shi wo kutya uunake ehulilo tali ya. (Jes. 46:10; Mat. 24:3, 36) Oku tu shi nawa noku shi wo shoka hashi tu etele ombili, enyanyu lyashili naashoka hashi tu yemateke. Kutya nduno omayele gaantu oga kale taga monika omawanawa ga fa peni, ihe inagi  ikolelela kOohapu dhaKalunga, kage shi nando gopandunge. — Omayel. 19:21.

3, 4. Sho Adam naEva ya landula omayele omawinayi, osha gumu ngiini oluvalo lwawo?

³ Aantu oya kala nokugandja omayele omawinayi kuyalwe okuza nale. Satana oye gwotango a tameke oku shi ninga. E li omunuuntsa nomugandjimayele ngoka i ilangeka po ye mwene, okwa li a lombwele Eva kutya ye nomusamane gwe otaya ka kala ya nyanyukwa, ngele oya kala kuyo yene. (Gen. 3:1-6) Paushili wo wene, Satana okwa li e shi ningi, molwaashoka okwi ihole mwene. Okwa li a hala Adam naEva nosho wo oluvalo lwawo, ya vulike kuye noye mu longele, pehala lyokulongela Jehova. Ihe mbela okwe ya ningile shike? Jehova oye e ya pe ashihe shoka ya li ye na. Pashiholelwa, oye e ya tula kumwe, okwe ya kaleke moshikunino oshiwanawa shi kale egumbo lyawo nosho wo omalutu ga gwanenena taya vulu okukala nomwenyo sigo aluhe.

⁴ Shiyemateka, Adam naEva oya yono kuKalunga, e taya kala kaaye na we ekwatathano naye. Shoka oshe ya etele iizemo iiwinayi. Oya endele ko taya kulupa sigo ya si, ngaashi owala oongala dha kuthwa koshimeno e tadhi ganya sigo dha si. Shoka ya ningi, osha etele wo oluvalo lwawo okumona iihuna. (Rom. 5:12) Nonando ongawo, aantu oyendji oya hogolola kaaya vulike kuKalunga. Oya hala okukala mondiipangela. (Ef. 2:1-3) Sho ye li monkalo ndjoka, osha ulike kutya ‘kape na owino mokutinda Jehova.’ — Omayel. 21:30.

5. Kalunga okwa li e na einekelo kutya aantu otaya ka ninga shike, ihe mbela osho ngaa ya ningi?

⁵ Jehova okwa li e shi kutya aantu yamwe mwa kwatelwa aagundjuka oyendji, otaye ke mu konga e taye mu longele. (Eps. 103:17, 18; 110:3) Jehova ina lenga tuu aagundjuka mboka! Mbela nangoye owu li gumwe gwomuyo? Ngele osho, osha yela kutya owu na okukala to nyanyukilwa ‘uuwanawa’ owundji wa za kuKalunga, mboka hawu ku etele enyanyu. (Lesha Episalomi 103:5; Omayel. 10:22) Ngaashi tatu ke shi kundathana ngashingeyi, ‘uuwanawa’ mboka owa kwatela mo elongo lyopakalunga, ookuume ye li nawa, omalalakano taga ti sha nemanguluko lyashili.

6. Omolwashike wu na okukala ho ilongo kombinga yaJehova, nohe ku longo okupitila mushike?

⁶ Aantu inaya fa iinamwenyo, oshoka oye na ompumbwe yokwiilonga kombinga yOmushiti, ngoka oye owala ta vulu oku yi gwanitha po. (Mat. 4:4) Ngele owa pulakene kuye wi itula mo, oto ka kala wu na oondunge, owino nenyanyu. Jesus okwa ti: “Aanelago oomboka yu uvite oyo oohepele koomwenyo, oshoka Oshilongo shegulu oshawo.” (Mat. 5:3) Kalunga ohe tu longo lela okupitila mOohapu dhe noha longitha wo “omupiya omudhiginini nomunandunge” e tu pe iinyanyangidhwa oyindji ya kankamena kOmbiimbeli. (Mat. 24:45, NW) Jehova ihe tu longo tuu iinima oyindji! — Jes. 65:13, 14.

7. Uuwanawa wumwe wuni tatu ka mona, ngele otwa tsikile okwiilonga kombinga yaKalunga?

⁷ Elongo ndyoka Kalunga he ku pe, ohali ku pe uunongo nowino, iinima mbyoka tayi ke ku gamena momikalo odhindji. (Lesha Omayeletumbulo 2:10-14.) Pashiholelwa, omaukwatya ngoka ohage ku kwathele wu ndhindhilike mo omalongo giifundja, ngaashi ndyoka hali ti kaku na Omushiti. Omaukwatya ngoka ohage ku kwathele kuu itaale iifundja mbyoka tayi ti kutya iimaliwa nomaliko, oyo hayi etele aantu enyanyu. Ohage ku kwathele wo wu ndhindhilike mo omahalo ga puka nowu ga kondjithe nosho wo eihumbato ndyoka tali ku teya po. Onkee ano, tsikila okwiilikolela uunongo nowino yopakalunga noku yi tala ko yi na ongushu. Ngele owi ilikolele omaukwatya ngoka, oto ke shi imonena ko kutya Jehova oku ku hole nokwe ku halela shoka oshiwanawa noonkondo. — Eps. 34:8; Jes. 48:17, 18.

8. Omolwashike wu na okuhedha popepi naKalunga ngashingeyi, notashi ke ku etela uuwanawa wuni monakuyiwa?

 ⁸ Masiku uuyuni waSatana mbuka otawu ka hanagulwa po. Jehova oye owala ta ka kala omugameni gwetu note ke tu pa shoka twa pumbwa, mwa kwatelwa iikulya. (Hab. 3:2, 12-19) Odhoshili kutya ngashingeyi olyo ethimbo lyokuhedha popepi naTate yetu gwomegulu nokukala we mu inekela. (2 Pet. 2:9) Ngele owe shi ningi, kutya nduno owe ki iyadha monkalo yini, oto ka kala wu uvite ngaashi omupisalomi David ngoka a nyola a ti: “Aluhe ondu uvite, Omuwa e li ndje popepi; oku li popepi, nokaku na shoka tashi hindi ndje.” — Eps. 16:8.

9. (a) Shi ikolelela kuJohannes 6:44, Jehova oha ningi shike? (b) Oshike shi ikalekelwa kombinga yokutsakanena nOonzapo oonkweni?

⁹ Jehova oha nanene mboka a pitike ya ninge aalongeli ye, ano aanamitima omiwanawa, melongelokalunga lyashili. (Lesha Johannes 6:44.) Ngele wa tsakanene nomuntu ngoka kee li moshili, mbela oho kala wu shi shike kombinga ye? Otashi vulika owala wu kale wu shi edhina lye neholokopo lye. Shoka hasho shi li ngaaka, ngele wa tsakanene nomuntu ngoka e shi noku hole Jehova. Kutya nduno omuntu ngoka okwa za meputuko lini, omoshilongo shini nomomuhoko guni, owu shi nale oshindji kombinga ye. Naye oha kala wo e shi oshindji kombinga yoye.

10, 11. Oonzapo dhaJehova odhi ikalekelwa ngiini, naashika ohashi tu etele uuwanawa ngiini?

¹⁰ Ngele wa tsakanene nOnzapo onkweni, oho shi ndhindhilike mo nziya kutya amuhe ohamu popi “elaka” limwe, ano “elaka lya yogoka” lyoshili. (Sef. 3:9, NW) Onkene amuhe ohamu kala mu shi kutya omwi itaala muKalunga, ohamu kala metsokumwe nomithikampango dhe nomu na etegameno limwe, okutumbula po owala yimwe. Iinima mbyoka oyo unene ya simana wa pumbwa okutseya kombinga yomuntu, oshoka ohayi mu kwathele mu kale mwi inekelathana. Ohayi mu kwathele wo mu pange uukuume tawu kalelele.

¹¹ Wu li omulongeli gwaJehova, oto vulu shi li okutya owu na ookuume ye li nawa muuyuni awuhe. Nonando ongawo, oyendji yomuyo opo natango wa pumbwa okutsakanena nayo. Kakele kaapiya yaJehova, oolye ishewe haya nyanyukilwa uuthembahenda mbuka?

12. Omalalakano omawanawa geni to vulu okwiitulila po?

¹² Lesha Omuuvithi 11:9–12:1. Mbela owu na ngaa elalakano lyasha ewanawa nenge ogendji wa hala okwaadha? Otashi vulika wi itulila po elalakano lyokulesha Ombiimbeli esiku kehe. Nenge tashi vulika to kambadhala okuhwepopaleka omukalo gwoye gwokupopya nogwokulonga aantu. Kutya nduno oto kambadhala okuninga shike, oho kala wu uvite ngiini, uuna wa mono kutya oto shi enditha nawa nenge uuna yalwe ye shi mono e taye ku pandula? Kapu na omalimbililo kutya oho kala wu uvite wa ninga sha shomupondo nohashi ku nyanyudha. Odhoshili kutya osho wu na okukala wu uvite ngaaka, oshoka owa pititha Jehova komeho, mokuholela Jesus. — Eps. 40:8; Omayel. 27:11.

13. Omolwashike okulongela Jehova itaaku vulu okuyelekanithwa nokulalakanena iinima yomuuyuni?

¹³ Ngele owa gandja eitulomo kokulongela Jehova, oto longo oshilonga shoka tashi nyanyudha noonkondo, molwaashoka kashi shi osima yowala. Omuyapostoli Paulus okwa nyola a ti: “Kaleni mwi ikolelela, mwaa tenguke. Kaleni mwi ipyakidhila aluhe niilonga yOmuwa, oshoka omu shi shi kutya ashihe shoka tamu ningile Omuwa, otashi tompola sha.” (1 Kor. 15:58) Mepingathano naashono, uuna aantu taya gandja eitulomo komalalakano gomuuyuni, ngaashi okwiikongela oshimaliwa oshindji nokwiiningila edhina, shoka ihashi ya etele enyanyu lyashili. Nonando oya kale ya pondola, olundji ohaya kala ya yemata. (Luk. 9:25) Shoka otatu shi ilongo koshiholelwa shomukwaniilwa Salomo ngoka naye a li e shi imonene ko. — Rom. 15:4.

14. Oshike to vulu okwiilonga kelolelo ndyoka Salomo a ningi?

¹⁴ Salomo ngoka a li omuyambeelela noku na oonkondo, okwa li a ningi elolelo ‘mokumakela enyanyu, nokutala ngele ota nyanyukilwa uuwanawa.’ (Omuuv. 2:1-10) Okwa li i itungile omagumbo, i ikunine omapya niikunino nokwa ningi kehe shimwe a hala. Lwanima okwa kala e uvite ngiini? Mbela okwa li a gwanenwa? Mbela okwa li e uvite a pondola sha? Nenge okwa li e uvite ombili? Inatu pumbwa okuthimbula, oshoka Salomo ye mwene okwe shi tu lombwela. Okwa ti: “Sho nda tala iilonga yandje ayihe mbyoka ye etwa po kiikaha yandje . . . , ayihe oya li osima yowala . . . nokaku na sha shomupondo.” (Omuuv. 2:11) Shoka kashi shi tuu oshiilongomwa sha simana! Mbela ito vulu okwiilonga mo sha?

15. Omolwashike eitaalo lya simana, notali vulu oku ku etela uuwanawa wuni, ngaashi sha popiwa mEpisalomi 32:8?

¹⁵ Jehova ina hala wu endulule epuko ndyoka lya ningilwe kuSalomo. Pehala lyaashono, okwa hala wu kale wu na eitaalo, opo wu vulike kuye nowu kale wa pititha komeho ehalo lye. Eitaalo ndyoka oli na ongushu nokali na esiku li ku yemateke. Eeno, Jehova ke na siku a dhimbwe ‘ohole yoye mokusimanekitha edhina lye.’ (Heb. 6:10) Onkee ano, longa nuudhiginini wu kokeke eitaalo lyoye noto ke shi imonena ko kutya Tate gwoye gwomegulu, okwe ku halela shoka oshiwanaweelela. — Lesha Episalomi 32:8.

16. Omolwashike tu na okukala twa lenga emanguluko noku li longitha pandunge?

¹⁶ Paulus okwa nyola a ti: “Mpoka pu na [ombepo] yOmuwa, opu na emanguluko.” (2 Kor. 3:17) Odhoshili kutya Jehova oku hole emanguluko, nokwe ku shita wu kale wu li hole. Pompito opo tuu mpoka, okwa hala wu longithe emanguluko lyoye pandunge, oshoka otashi ke ku gamena. Otashi vulika wu shi aagundjuka yamwe mboka haya tala omathano giipala, haya yi moluhondelo, haya kutha ombinga momaudhano ga nika oshiponga, haya longitha iingangamithi nohaya nu omalovu sha pitilila. Petameko, iinima mbyoka ohayi monika ya fa iiwanawa notayi nyanyudha. Ihe olundji ohayi ya etele iizemo  tayi yemateke ngaashi okukala ya pikwa kuyo, omikithi neso. (Gal. 6:7, 8) Osha yela kutya “emanguluko” lyawo ohali ya fundjaleke owala. — Tit. 3:3.

17, 18. (a) Ongiini okuvulika kuKalunga haku tu kwathele tu kale twa manguluka shili? (b) Ongiini emanguluko ndyoka lya li li niwe kuAdam naEva itaali vulu okuyelekanithwa nolyaantu kunena?

¹⁷ Mepingathano naashono, aantu yangapi wa uva ye ehama, molwaashoka ya vulika komithikampango dhOmbiimbeli? Osha yela kutya okuvulika kuJehova, ohaku tu kwathele tu kale tu na uukolele notu kale twa manguluka shili. (Eps. 19:7-11) Ngele owa longitha emanguluko lyoye pandunge, ano okuvulika koompango nokomakotampango gaKalunga, kungawo oto ka ulukila Kalunga nosho wo aavali yoye kutya owu shi okwiinekelwa. Odhoshili kutya Kalunga okwa uvaneka kutya masiku ota ka pa aapiya ye ayehe aadhiginini emanguluko lya dhenga mbanda, ndyoka lya popiwa mOmbiimbeli kutya ‘emanguluko neadhimo lyaana yaKalunga.’ — Rom. 8:21.

¹⁸ Emanguluko ndyoka olyo Adam naEva ya li ye na. Moshikunino shaEden, iipango ingapi Kalunga a li e ya pe? Shimwe owala. Kaya li ye na okulya iiyimati yomuti gumwe. (Gen. 2:9, 17) Mbela sho to tala oshipango shoka osha li oshidhigu? Hasho nando! Shi faathanitha owala noompango odhindji ndhoka dha totwa po kaantu nohadhi thiminikilwa aantu ye dhi ilonge noya vulike kudho.

19. Omomikalo dhini hatu longwa tu kale twa manguluka shili?

¹⁹ Jehova oha ungaunga lela naapiya ye pandunge. Pehala lyoku tu tulila po oompango odhindjidhindji, ohe tu longo neidhidhimiko ompango ndjoka tayi popi kombinga yohole. Okwa hala tu kale metsokumwe nomakotampango ge nokutonda shoka oshiwinayi. (Rom. 12:9) Euvitho lyokOndundu oli li oshiholelwa oshiwanawa, oshoka Jesus okwe tu kwathele tu mone kutya omolwashike aantu haya longo iinima iiwinayi. (Mat. 5:27, 28) E li Omukwaniilwa gwUukwaniilwa waKalunga, Kristus ota ka tsikila natango oku tu longa muuyuni uupe, opo tu kale hatu tala ko shoka shu uka naashoka sha puka ngaashi ye. (Heb. 1:9) Ote ke tu kwathela wo tu ka kale twa gwanenena palutu nopamadhiladhilo. Dhiladhila nkene to ka kala wu uvite, sho itoo ka kala we to makelwa wu longe shoka sha puka nenge itoo ka adhika kiilanduliko iiwinayi, mbyoka hayi etithwa kuulunde. Hugunina, oto ka nyanyukilwa okukala “memanguluko nomeadhimo” ndyoka Jehova a uvaneka.

20. (a) Jehova oha longitha ngiini emanguluko lye? (b) Ongiini to vulu okumona mo uuwanawa moku mu holela?

²⁰ Emanguluko lyetu otali ka kala aluhe lya ngambekwa. Otatu ki inyengithwa aluhe kohole yokuhola Kalunga naantu ooyakwetu. Jehova ote tu lombwele tu mu holele. Emanguluko lye inali ngambekwa. Okwa hogolola wo ohole oyo yi mu wilike, sho ta ungaunga niishitwa ye iinandunge. (1 Joh. 4:7, 8) Onkee ano, odhoshili kutya otatu ka kala owala tu na emanguluko lyashili lela, sho tatu ka wilikwa kohole yopakalunga.

21. (a) Mbela David okwa li e uvitile ngiini Jehova? (b) Otatu ka kundathana shike moshitopolwa tashi landula?

²¹ Mbela owa pandula ngaa ‘uuwanawa’ owundji mboka Jehova e ku pa, ngaashi elongo lyopaMbiimbeli, ookuume ye li nawa, omalalakano taga ti sha netegameno lyoku ka kala twa manguluka shili? (Eps. 103:5) Ngele osho, otashi vulika wu uvite ngaashi David ngoka a galikana mEpisalomi 16:11, a ti: “Ongoye to tseyithile ndje ondjila yomwenyo; pungoye opu na enyanyu lyandje nuunelago wandje sigo aluhe.” Moshitopolwa tashi landula, otatu ka kundathana kombinga yooshili dhilwe ndhoka dhi li mEpisalomi 16. Uuyelele mboka otawu ke tu kwathela natango tu kale nonkalamwenyo ombwanawa lela.