KUKU DIANA oku na omimvo 80 nasha. Omusamane gwe okwa kala ta hepekwa komukithi ngoka hagu kutha omadhiladhilo gomuntu pehala (Alzheimer). Sho omusamane gwe te ehama, okwa kala megumbo lyaakulupe uule womimvo dhontumba, manga inaa sa. Kuku Diana okwa silwa wo oyanamati yaali. Ye ota lumbu nokankela yokegundji. Ihe uuna e li pOshinyanga shUukwaniilwa nenge ta uvitha, oha kala aluhe ti imemeha. Enyanyu ndyono kehe gumwe megongalo oha kala e li iwetele.

Omumwatate John okwa kala miilonga yuuyendi omimvo dha konda po 43. Iilonga mbyono okwa li e yi hole tagu pu mo. Ihe ngashingeyi okwa za mo, oshoka ota sile oshimpwiyu omukwanezimo gumwe. Sho tatu popi ngeyi, ota longo pamwe negongalo ndyoka li li moshitopolwa shawo. Mbela okwa kanitha ombili ye? Aawe, mboka ye mu shi, oya ti kutya John oku li owala ngaashi a kala, ina lunduluka. Omutima gwe aluhe otagu hunga owala enyanyu.

Oshike sha kwathele kuku Diana nomumwatate John ya kale ya nyanyukwa? Ngele omuntu ota mono iihuna palutu nopamadhiladhilo, mbela ota vulu ngaa okukala a nyanyukwa? Ongiini omuntu ngoka a kanitha oshinakugwanithwa shoka e hole, ta vulu okukala a nyanyukwa? Ombiimbeli otayi ti: “Aayuuki naa nyanyukilwe Omuwa.” (Eps. 64:10) Oshili ndjika otatu ke yi uva ko owala nawa, uuna tu shi kutya oshike hashi eta enyanyu naashoka ihaashi li eta.

Opu na iinima mbyoka olundji hayi nyanyudha aantu. Ongaashi yini mbela? Okuya mondjokana, oluvalo nenge okupewa uuthembahenda wiilonga mehangano lyaJehova. Iinima mbyoka ohayi tu nyanyudha, oshoka ohayi zi kuJehova. Oye a tota po ondjokana nokwa shita aantu haya valathana. Oye wo ha gandja iinakugwanithwa megongalo lyopaKriste. — Gen. 2:18, 22; Eps. 127:3; 1 Tim. 3:1.

Iinima yimwe ohayi tu etele owala enyanyu pakathimbo. Pashiholelwa, kuume kopandjokana ota vulu okuhondela nenge a se, shono hashi tu yemateke. (Hes. 24:18; Hos. 3:1) Ngaashi tu shi shi nawa, aanona yamwe ihaya vulika kaavali yawo nokuKalunga. Yamwe oya kondwa mo megongalo nokuli. Oyanamati yaSamuel nayo kaya  li haya longele Jehova momukalo ngoka a hokwa. Ye David okwa li i iyadha moshipyu kaantu yaandjawo. (1 Sam. 8:1-3; 2 Sam. 12:11) Iinima mbyono ihayi tu etele enyanyu, ihe oluhodhi owala nokuyona po ombili yetu.

Iilonga yimwe mbyoka tu na mehangano, ohayi vulu okuhula po. Ohashi etithwa kokwaa na uukolele, kiinakugwanithwa yomegumbo nenge komalunduluko ngoka haga ningwa mehangano. Oyendji mboka ya gumwa komalunduluko ngoka, oye shi popya kutya oya yuulukwa enyanyu ndyoka ya li haya mono miilonga yawo.

Otu shi wete kutya iinima yimwe mbyoka hayi tu nyanyudha, ohayi vulu okuhula po. Mbela opu na enyanyu limwe ndyoka tatu vulu okukala tu na, nonando iinima itayi tu endele nawa? Eeno, oshoka Samuel, David nayalwe, oya li muupyakadhi wontumba, ihe oya li ye na enyanyu.

Jesus oku shi kutya oshike hashi eta enyanyu lyashili. Manga inee ya kombanda yevi, iinima ayihe oya li tayi ende nawa. Okwa li a “nyanyudha [Jehova] esiku nesiku” megulu. (Omayel. 8:30) Sho e li kombanda yevi okwa li a palamena omaudhigu ga kindja. Ihe Jesus okwa li a mono enyanyu mokulonga ehalo lyaHe ngoka e mu tumu. (Joh. 4:34) Mbela Jesus okwa li ngaa i idhidhimikile uuwehame, sho ta dhipagwa? Ombiimbeli otayi ti: “Okwi idhidhimikile esheko nokwa si eso” lyokomuti. (Heb. 12:2) Jesus okwa popi lwiikando iyali kutya oshike hashi etele omuntu enyanyu lyashili.

Oshikando shimwe, aalongwa ye 70 oye ya kuye konima sho ya mana okuuvitha. Oya li ya nyanyukwa shimwe to nyengwa, sho ya longo iikumithalonga, mwa kwatelwa okutidha mo oompwidhuli. Jesus okwe ya lombwele a ti: “Inamu nyanyukilwa, oompwidhuli sho tadhi vulika kune; nyanyukilweni, omadhina geni sho ga nyolelwa membo lyomegulu.” (Luk. 10:1-9, 17, 20) Okukala twa hokiwa kuJehova, okwa simanenena, uuna tatu ku yelekanitha nenyanyu ndyoka hali tu zile muuthembahenda wi ikalekelwa. Jehova ota ka dhimbulukwa aalongwa mboka aadhiginini kuye, oshinima shoka hashi tu etele enyanyu.

Oshikando oshikwawo, Jesus okwa li ta uvithile ongundu yaantu. Omukiintu gumwe Omujuda okwa li a popi kutya nakuvala Jesus, oku na elago. Ihe Jesus okwe mu pukulula a ti: “Eeno, ihe  aanelago oomboka taa uvu oohapu dhaKalunga e taye dhi dhiginine.” (Luk. 11:27, 28) Odhoshili kutya okukala omuvali oshinima itoo shi pewa lwaali. Ihe okukala tu na ekwatathano naJehova, ohashi eta enyanyu li vule ndyoka kokulekule.

Osha yela kutya okukala wa hokiwa kuJehova oko haku etele omuntu enyanyu lyashili. Nonando otwi iyadhe momahepeko, ihaga kutha po enyanyu ndyoka. Pehala lyaashono, ohatu ga idhidhimikile sigo twa sindana. (Rom. 5:3-5) Shimwe ishewe, Jehova oha pe mboka ye mu inekela ombepo ondjapuki. Lyo enyanyu oli li oshitopolwa shoshiyimati shombepo ye. (Gal. 5:22) Shono otashi tu kwathele tu uve ko oohapu dhEpisalomi 64:10, ndhoka tadhi ti: “Aayuuki naa nyanyukilwe Omuwa.”

Shino otashi tu kwathele tu uve ko kutya omolwashike kuku Diana nomumwatate John mboka ya tumbulwa metetekelo ya nyanyukwa, nonando oye li moonkalo oondhigu. Kuku Diana okwa ti: “Jehova oye egameno lyandje, ngaashi owala okanona haka kala ki inekela megameno lyaavali yako.” Ohe shi mono ngiini kutya Jehova okwe mu hokwa? Ota ti: “Ondi wete kutya okwa yambeka ndje, sho a pa ndje oonkondo ndi tsikile okuuvitha aluhe tandi imemeha.” Omumwatate John, okwa popi shoka she mu kwathele a kale ta uvitha a mana mo, konima sho a zi miilonga yuuyendi. Okwa ti: “Okuza mo 1998, sho nda pewa oshinakugwanithwa shokulonga Osikola yOkudheula Aakalele, onda kala handi konakona paumwene, shi vulithe nale.” Okwa gwedha ko ta popi a kwatela mo nekulu lye, a ti: “Osha li oshipu kutse okuninga elunduluko ndika, oshoka otwa kala tu na ehalo lyokulongela Jehova ethimbo nuule moshilonga kehe. Inatu ipa uusama washa, sho twa kala tatu longele Jehova.”

Oohapu dhEpisalomi 64:10, odha gwanithilwa aantu oyendji. Oshiholelwa shimwe, oshaaihokani mboka ya longa omimvo dha konda po 30 moBetel, moAmerika. Oya li ya pulwa ya ka ninge aakokolindjila yi ikalekelwa. Oya zimine ya ti: “Ngele omuntu owa kuthwa oshinima shoka wu hole, oho kala wa nika oluhodhi.” Oya tsikile ko taya ti: “Ito vulu okukala owala to lili nakemufaalele.” Nziya konima sho ya tumwa, oya waiyimine egongalo muukalele. Oya popi ya ti: “Otwa kala hatu galikana tatu pula iinima yokondandalunde. Sho tu wete omagalikano getu taga yamukulwa, oshe tu tsu omukumo noshe tu etele enyanyu. Konima owala sho twa thiki megongalo, yamwe oya tameke okukokola ondjila. Otwa li wo twa lalekwa nuuyamba, sho twa mono aakonakonimbiimbeli yaali mboka taya humu komeho.”

Odhoshili kutya omuntu haaluhe ho kala wa nyanyukwa, opu na ngaa okukala siku nawa siku nayi. Uuna twa teka omukumo, otu na okukala nuushili kutya ngele otwa kala “aayuuki,” mokukala aadhiginini kuJehova, nonando oonkalo dhetu odhi lunduluke, otatu ka kala twa ‘nyanyukwa.’ Eshilipaleko ndyoka otatu li adha moohapu dhEpisalomi 64:10. Otwa tegelela natango egwanitho lyoohapu ndhoka tadhi ti kutya “otandi shiti egulu epe nevi epe.” Konima yaashono, okwaagwanenena otaku ka fulilwa okalambo. Oshigwana shaKalunga ashihe otashi ka gwanithilwa oohapu ndhoka tadhi ti, “nyanyukweni nokuligola pombanda” sigo aluhe, omolwiinima ayihe mbyoka a shita. — Jes. 65:17, 18.

Shino otashi ti kutya kehe gumwe ota ka kala e na uundjolowele wi ihwa po noku na oonkondo esiku kehe. Kutya nduno otwa li twa dhengwa twa lila shi thike peni monakuziwa, uuwehame mboka itatu ke wu dhimbulukwa we. Ombiimbeli otayi tu shilipaleke tayi ti: “Iiningwanima yonale otayi ka dhimbiwa thiluthilu.” Otatu ka mona sho aantu taya ka yumudhwa. Aantu oyendji otaya ka kala ye uvite ngaashi aavali yokakadhona komimvo 12, hoka ka li ka yumudhwa kuJesus. Sho okakadhona hoka ka yumudhwa, “aantu oya kwatwa kehaluko enene.” (Mark. 5:42) Hugunina, aantu ayehe kombanda yevi otaya ka kala aayuuki, ya gwanenena notaya ka kala sigo aluhe taya ‘nyanyukilwa Omuwa.’