MAakorinto aatiyali 12:2, 3, Paulus okwa popi kombinga yomulumentu gwontumba ngoka “a akelwa megulu lyopombandaelela.” Mbela olye? Sho Paulus a nyolele egongalo lyaKorinto, okwa tsu omuthindo kutya Kalunga okwa li te mu longitha e li omuyapostoli. (2 Kor. 11:5, 23) Opo nduno, okwa popi kombinga ‘yomamoniko nomahololo ngoka e ga hololelwa kOmuwa.’ Moohapu ndhoka, ina tumbula mo aamwatate yalwe. Pehala lyaashono, okwa li ti ipopi ye mwene kutya oye omulumentu ngoka a hololelwa omamoniko nomahololo. — 2 Kor. 12:1, 5.

Shi ikolelela kwaashono, Paulus oye a li “a akelwa megulu lyopombandaelela” e ta “falwa mOparadisa.” (2 Kor. 12:2-4) Okwa longitha uutumbulilo ‘omahololo,’ mboka tawu holola shoka tashi ka ningwa monakuyiwa.

‘Egulu lyopombandaelela’ ndyoka Paulus a mono oshike?

MOmbiimbeli, ‘egulu’ otali vulu okuukithwa kegulu lyo lyene. (Gen. 11:4; 27:28; Mat. 6:26) Ihe ‘egulu’ olya longithwa wo okuulika kiinima yilwe. Omathimbo gamwe ohali ulike kepangelo lyopantu. (Dan. 4:20-22) Otali vulu wo okuulika kepangalo lyaKalunga. — Eh. 21:1.

Paulus okwa li a mono ‘egulu lyopombandaelela.’ Mbela okwa li a hala okutya shike? Poompito dhi ili nodhi ili, Ombiimbeli oya endulula oshinima shontumba iikando itatu nelalakano lyokutsa omuthindo. (Jes. 6:3; Hes. 21:27; Eh. 4:8) Osha fa shi li ngeyi kutya sho Paulus a popi kombinga ‘yegulu lyopombandaelela,’ okwa li ta tsu omuthindo epangelo ndyoka li vule agehe. Epangelo ndyoka olyo Uukwaniilwa wopaMesiasa, mboka Jesus Kristus oye Omukwaniilwa gwawo pamwe naapangeli ooyakwawo 144 000. (Tala embo lyo-1 lyo-Insight on the Scriptures, ep. 1059, 1062) Ngaashi omuyapostoli Petrus e shi popi, otwa tegelela “egulu epe” ndyoka Kalunga a uvaneka. — 2 Pet. 3:13.

Paulus okwa li a hala okutya ngiini, sho a popi ‘oparadisa’?

Uutumbulilo ‘oparadisa’ otawu vulu okuulika kiinima ya yoolokathana. Shotango, otayi vulu okukala oparadisa yo yeneyene, ndjoka yi li pokuya masiku kombanda yevi. Oshitiyali, otayi vulu okukala oparadisa ombwanawa yopambepo ndjoka tayi ka kala muuyuni uupe. Oshititatu, otashi vulika wo yi kale oonkalo oombwanawa megulu, “mOshikunino shaKalunga” nenge tu tye moparadisa yaKalunga ndjoka ya tumbulwa mEhololo 2:7. — Tala Oshungolangelo yo 15 Juli 2015, ep. 5 okat. 8.

Otashi vulika Paulus a li ta popi kombinga yiinima ayihe itatu mbyoka ya popiwa mAakorinto aatiyali 12:4, sho a li ta popi kombinga yoshimoniwa she.

Oku shi popya paufupi:

‘Egulu lyopombandaelela’ ndyoka lya popiwa mAakorinto aatiyali 12:2, otashi vulika tali ulike kUukwaniilwa wopaMesiasa mboka wu li miikaha yaJesus Kristus naapangeli ye 144 000, ano “egulu epe.” — 2 Pet. 3:13.

Egulu ndyoka, ‘egulu lyopombandaelela,’ oshoka otali thaneke Uukwaniilwa waKalunga mboka wa shiga ko nowu li epangelo ndyoka lya dhenga mbanda.

‘Oparadisa’ ndjoka ya popiwa memoniko, moka mwa li mwa “akelwa” Paulus otashi vulika tayi thaneke iinima tayi landula. Shotango, otayi vulu okukala oparadisa yo yeneyene, ndjoka tayi ka kala kombanda yevi. Oshitiyali, otayi vulu okukala oparadisa yopambepo ndjoka tayi ke ya notayi ka kala yi vule kokule ndjoka yi li ko kunena. Oshititatu, otashi vulika wo yi kale ‘oshikunino shaKalunga’ nenge tu tye oparadisa yaKalunga megulu, ndjoka tayi ka kala ko wo muuyuni uupe.

Uuyuni uupe otawu ka kala wa thikama po megulu epe nevi epe. Otawu ka kala elongekidho epe, lya kwatela mo epangelo lyUukwaniilwa waKalunga womegulu nosho wo aantu taya longele Jehova moparadisa kombanda yevi.