Owa leshele ngaa nawa Ooshungolangelo opo dha piti? Tala ngele oto vulu okuyamukula omapulo taga landula:

Omanyolo geni taga ulike kutya Kalunga oku tu nine olukeno?

Sho Aaisraeli yopethimbo lyonale ya li aapika muEgipiti, Kalunga okwa li e wete okumona iihuna kwawo nankene ye uvite. (Eks. 3:7; Jes. 63:9) Otwa shitwa oshifetha shaKalunga, nomolwaashono tatu vulu okuulukila yalwe olukeno. Kalunga ohe tu kenukile, nokuli nonando otu kale tu uvite kutya itatu vulu okukala tu holike kuye. — wp18.3, ep. 8-9.

Omalongo gaJesus oga li ga kwathele ngiini aantu ya sinde okatongo?

Aajuda oyendji yopethimbo lyaJesus oya li ye na okatongo. Kristus okwa li a tsu omuthindo aantu ya kale ye na eifupipiko nokaaya kale ye na uuntsa. Okwa li a ladhipike aalongwa ye ya kale yi itala ko ye li aamwayinathana. — w18.06, ep. 9-10.

Sho Kalunga inaa ethela Moses mEvi lyEuvaneko, otashi tu longo shike?

Moses okwa li e na ekwatathano lyopothingo naJehova. (Deut. 34:10) Lwopehulilo lyomimvo 40 ndhoka Aaisraeli ya kala mombuga, oya li ya nyenyeta oshikando oshitiyali, sho kaaye na omeya gokunwa. Kalunga okwa li a lombwele Moses a lombwele emanya li ze omeya. Pehala lyaashono, Moses okwe li dhenge. Jehova otashi vulika a li a geya, sho Moses inaa landula omalombwelo Ge nenge sho inaa gandja esimano kuye, omolwoshikumithalonga shoka. (Num. 20:6-12) Shika otashi tu longo kutya okuvulika kuKalunga noku mu simanekitha, okwa simana. — w18.07, ep. 13-14.

Ongiini tatu vulu okuthika pehulithodhiladhilo lya puka nuupu, ngele otwa pangula omuntu shi ikolelela keholokopo lye?

Opu na iinima itatu, mbyoka hayi nwetha mo aantu ya pangule yalwe shi ikolelela keholokopo lyawo. Iinima mbyoka oyo: omuhoko, uuyamba nosho wo omimvo dhawo. Osha simana tu kale hatu tala ko yalwe ngaashi Kalunga ngoka kee na okatongo, he ya tala ko. (Iil. 10:34, 35) — w18.08, ep. 8-12.

Omomikalo dhimwe dhini Aakriste aakokele taya vulu okukwathela yalwe?

Omumwatate omukokele ngoka oshinakugwanithwa she sha lunduluka, Kalunga okwe mu lenga natango nota vulu okuninga oshindji a kwathele yalwe. Ota vulu okuuvithila aasamane mboka kaaye shi ooitaali, okukwathela mboka inaayi ipyakidhila nokulongela Jehova, okuninga omakonakonombiimbeli nokutamununa mo uukalele we. — w18.09, ep. 8-11.

Aakriste oye na iilongitho yini yokulonga aantu?

Opu na okakalata kokufala aantu kepandja lyetu lyokointaneta nokafo kehiyo. Opu na wo uufo uhetatu mboka tatu vulu okulongitha nosho wo Oshungolangelo no-Awake! Mokaketha kiilongitho yokulonga aantu, omu na natango uumbo wontumba, omambo gaali gokukonakonwa nosho wo uuvidio une, mwa kwatelwa kamwe kedhina Omolwashike wa pumbwa okukonakona Ombiimbeli? — w18.10, ep. 16.

Ongiini Aakriste taya vulu ‘okwiilandela oshili’ ngaashi sha popiwa mOmayeletumbulo 23:23?

Oshili ihatu yi landa niimaliwa. Nonando ongawo, otwa pumbwa ethimbo nosho wo okuninga oonkambadhala, opo tu yi ilandele. — w18.11, ep. 4.

Oshike tatu ilongo ko kunkene Hosea a li a ungaunga nomukulukadhi gwe Gomer?

Gomer okwa kala nokuhondela, ihe Hosea okwa kala noku mu dhimina po nokutsikila nondjokana yawo. Ngele Omukriste ngoka e li mondjokana okwa yi moluhondelo, kuume ke kopandjokana ota vulu oku mu dhimina po. Ngele okwa tsikile okuya momilalo naye, kungawo ota vulu okukala inee mu henga po. — w18.12, ep. 13.