1. Jehova okwa pa aavali oshinakugwanithwa shashike?

JEHOVA okwa shita aaihokani yotango ye na ehalo lyokumona aanona. Ombiimbeli otayi ti: “Aanona oyo omagano ga za kOmuwa.” (Eps. 127:3) Shoka otashi ti shike? Natu tye andola kuume koye kopothingo okwe ku pula wu mu kwatele iimaliwa oyindji. Oto ka kala wu uvite ngiini? Otashi vulika wu kale wu uvite kutya okwe ku inekela. Ihe otashi vulika wu kale to ipula kombinga yankene to ka kwata nawa iimaliwa mbyoka. Jehova, Kuume ketu kopothingo, okwa pa aavali oshinakugwanithwa shokusila oshimpwiyu oyana, mboka ye na ongushu yi vule yiimaliwa kokulekule. Okwe ya pa oshinakugwanithwa shoku ya putudha momukalo omwaanawa noya kale ya nyanyukwa.

2. Omapulo geni tatu ka kundathana?

² Olye e na okutokolela aaihokani ya mone aanona nonokutya naye shi ninge uunake? Oshike aavali ye na okuninga, opo aanona yawo ya kale ye na onkalamwenyo ombwanawa? Natu ka taleni komakotampango gamwe gopaMbiimbeli ngoka taga vulu okukwathela Aakriste aaihokani ya ninge omatokolo gopandunge.

3. (a) Olye e na okutokolela aaihokani ya mone aanona? (b) Omakotampango gopaMbiimbeli geni, ookuume naakwanezimo yaaihokani ye na okukaleka momadhiladhilo?

³ Momithigululwakalo dhimwe, aaihokani ohaya kala ya tegelelwa ya mone aanona mbala konima yokuhokana. Otashi vulika wo ya kale taya thiminikwa kaakwanezimo nenge kuyalwe, ya landule omukalondjigilile ngoka. Omumwatate Jethro gwokoAsia, ota ti: “Yamwe megongalo mboka ye na aanona, ohaya thiminike aaihokani mboka kaaye na aanona, ya mone aanona.” Omumwatate Jeffrey, ngoka naye a za koAsia ota ti: “Yamwe  ohaya lombwele aaihokani mboka kaaye na aanona kutya itaya ka kala ye na ngoka te ya sile oshimpwiyu, ngele ya kulupa.” Ihe aaihokani oyo yene ye na okutokola ngele oya hala okumona aanona. Shoka oshi li oshinakugwanithwa shawo. (Gal. 6:5) Odhoshili kutya ookuume naakwanezimo ohaya kala ya hala aaihokani ya kale ya nyanyukwa. Ihe oye na okudhimbulukwa kutya aaihokani oyo yene ye na okutokola ngele oye na okumona aanona nenge hasho. — 1 Tes. 4:11.

4-5. Omapulo gaali geni aaihokani ye na okukundathana, nuunake ye na oku shi ninga? Shi yelitha.

⁴ Otashi ka kala pandunge aaihokani mboka ya tokola ya mone aanona, ya kundathane omapulo ngaka gaali ga simana: Lyotango, uunake ya hala ya mone aanona? Etiyali, oya hala aanona yangapi? Uunake ye na okukundathana omapulo ngoka? Omolwashike omapulo ngoka gaali ga simanenena?

⁵ Olundji, manga inaaya hokana, ohashi kala pandunge ya kundathane kombinga yokumona aanona. Omolwashike? Etompelo limwe ewanawa olyo kutya osha simana ya tse kumwe moshinima shoka. Shimwe ishewe, oye na okukundathana ngele oyi ilongekidhila ngaa oshinakugwanithwa shoka. Konima yohango, aaihokani yamwe, ohaya tokola pu pite omvula yimwe nenge mbali, opo nawa ya mone aanona, molwaashoka okukala omuvali ohaku pula ethimbo noonkondo odhindji. Ohaya ti kutya okutegelela pu pite ethimbo lyontumba, ohashi ya kwathela ya igilile okukala pamwe ye li aaihokani noya kale ookuume kopothingo. — Ef. 5:33.

6. Omolwomathimbo omadhigu ngaka tu li mugo, aaihokani yamwe oya tokola okuninga shike?

⁶ Aaihokani yamwe oya tokola ya landule oshiholelwa shoyanamati yaNoa yatatu naakulukadhi yawo. Aaihokani mboka yatatu, kaya li ya thikile taya mono aanona, sho ya hokana. (Gen. 6:18; 9:18, 19; 10:1; 2 Pet. 2:5) Jesus okwa faathanitha ethimbo lyetu ‘nethimbo lyaNoa,’ nokapu na omalimbililo kutya otu li ‘momathimbo omadhigu okukaliwa mugo.’ (Mat. 24:37; 2 Tim. 3:1) Omolwetompelo ndyoka, aaihokani yamwe oya tokola kaaya mone aanona, opo ya gandje eitulomo olindji kiilonga yaJehova.

7. Omakotampango ngoka taga adhika muLukas 14:28, 29 nomOmayeletumbulo 21:5, otaga vulu ngiini okukwathela aaihokani?

⁷ Ngele tashi ya petokolo lyokumona aanona nosho wo kutya oye na okumona yangapi, aaihokani aanandunge, tango ohaya ‘yalula kutya otashi ka pula shi thike peni.’ (Lesha Lukas 14:28, 29.) Aaihokani mboka ya putudha nale aanona, ohaye shi koleke kutya okuputudha  aanona, ihashi pula owala iimaliwa, ihe ohashi pula wo ethimbo noonkondo. Onkene, osha simana aaihokani yi ipule omapulo taga landula: ‘Mbela atuhe otatu ka pumbwa okulonga, opo tu gwanithe po oompumbwe dhuukwanegumbo wetu? Mbela otwa tsa ngaa kumwe kutya “oompumbwe” dhetu odhini? Ngele atuhe otwa tameke okulonga, olye ta ka sila oshimpwiyu aanona yetu? Olye ta ka nwetha mo okudhiladhila kwawo neihumbato lyawo?’ Aaihokani mboka haya kundathana ya ngungumana omapulo ngoka, ohaya tula miilonga shoka sha popiwa mOmayeletumbulo 21:5. — Lesha.

8. Aaihokani Aakriste oye na okukala ya tegelela ya tsakaneke omashongo geni, noshike omusamane omunahole ta ka ninga po?

⁸ Omuvali kehe okwa pumbwa okulongitha ethimbo noonkondo dhe, a kale nokanona ke. Onkee ano, ngele aaihokani oye na aanona ya landulilathana po, otashi vulika shi kale oshidhigu kuyo ya kale ye na ethimbo lya gwana nokanona kehe. Aavali yamwe mboka ye na aanona oyendji, oye shi popya kutya ohaya kala ye uvite ya gwililwa po. Otashi vulika omukulukadhi a kale aluhe e uvite a vulwa palutu nopamaiyuvo. Mbela shoka otashi vulu okupiyaganeka okukonakona kwe paumwene Ombiimbeli, okugalikana nokukutha ombinga muukalele pandjigilile? Otashi vulika wo shi kale oshidhigu kuye a gandje eitulomo pokugongala kwopaKriste nokumona mo uuwanawa. Odhoshili kutya omusamane omunahole ota ka ninga ngaashi ta vulu a kwathele omukadhi, uuna aanona yawo ya pumbwa okupewa eitulomo kutya nduno okokugongala nenge omegumbo. Pashiholelwa, ota vulu okukwathela omukadhi niilonga yomegumbo. Ota ka longa nuudhiginini a shilipaleke kutya uukwanegumbo we awuhe, ohawu mono mo uuwanawa mElongelokalunga lyUukwanegumbo. Oha yi wo nuukwanegumbo we muukalele pandjigilile.

9-10. Aavali mboka ya hala okuputudha oyana nawa, oye na okuninga shike sha simanenena?

⁹ Iinima yimwe yini aavali taya vulu okuninga, ya longe oyana ya kale ye hole Jehova? Ongiini taya vulu okugamena oyana komikalo omiwinayi? Natu ka taleni kuyimwe yomiinima mbyoka aavali taya vulu okuninga.

¹⁰ Pula ekwatho kuJehova. Natu taleni koshiholelwa shaManoak nomukadhi, aavali yaSimson. Sho Manoak a uvu kutya ye nomukadhi otaya ka mona okanona kokamati, okwa pula ewiliko kuJehova okupitila megalikano nkene ye na oku ka putudha.

11. Aavali otaya vulu ngiini okuholela oshiholelwa shaManoak, ngaashi sha popiwa mAatokolihapu 13:8?

¹¹ Nihad naAlma mboka ya za koBosnia nokoHerzegovina, oya li yi ilongo koshiholelwa shaManoak.  Oya ti: “Ngaashi Manoak, otwa galikana Jehova e tu longe nkene tu na okukala aavali aawanawa. Jehova okwa yamukula omagalikano getu momikalo dha yoolokathana, ngaashi okupitila mOmanyolo, miileshomwa yopaMbiimbeli, pomakugongala nopiigongi.” — Lesha Aatokolihapu 13:8.

12. Josef naMaria oya li ya tulila po oyana oshiholelwa shini?

¹² Longa aamwoye okupitila moshiholelwa shoye. Shoka to popi osha simana, ihe shoka to ningi osho unene tashi vulika shi ka nwethe mo okanona koye. Otatu vulu okukala nuushili kutya Josef naMaria oya li ya tulile po oyana oshiholelwa oshiwanawa, mwa kwatelwa Jesus. Josef okwa li ha longo nuudhiginini a ambidhidhe uukwanegumbo we. Shimwe ishewe, okwa li e ya ladhipike ya kale ye hole okulongela Jehova. (Deut. 4:9, 10) Nonando Josef ka li a tegelelwa paMpango a fale aanegumbo lye kuJerusalem “omumvo kehe” ya ka dhane Opaasa, okwa li he shi ningi. (Luk. 2:41, 42) Aasamane yamwe yopethimbo lye, otashi vulika ya li ya tala ko olweendo ndwoka kutya kalu shi olupu, ohalu kutha ethimbo olindji nolu na ondilo. Nonando ongawo, Josef okwa li a lenga okulongela Jehova nokwa li a longo oyana ya ninge sha faathana. Maria naye okwa li wo e shi Omanyolo nawa. Osha yela kutya okwa li a longo oyana ya kale ye hole Oohapu dhaKalunga, okupitila moohapu nomiilonga ye.

13. Aaihokani yamwe oya li ya landula ngiini oshiholelwa shaJosef naMaria?

¹³ Nihad naAlma mboka ya popiwa metetekelo, oya li ya hala ya landule oshiholelwa shaJosef naMaria. Shoka osha li she ya kwathele ngiini ya putudhe omwanamati a kale e hole Kalunga noku mu longele? Oya ti: “Monkalamwenyo yetu, otwa kambadhala okuulukila omwanamati gwetu nkene oshiwanawa okukala metsokumwe nomakotampango gaJehova.” Nihad okwa gwedha ko a ti: “Kala omuntu ngoka wa hala okanona koye ka kale.”

14. Omolwashike aavali ya pumbwa okukala ye shi mboka haya endathana noyana?

¹⁴ Kwathela aamwoye ya hogolole ookuume aawanawa. Omusamane nomukulukadhi, ayehe oya pumbwa ya kale ye shi kutya oyana ohaya endathana noolye nohaya ningi shike. Shoka osha kwatela mo aavali ya kale ye shi kutya oyana ohaya popi noolye komakwatathano gopaintaneta nosho wo moongodhi dhawo. Eendathano ndyoka otali vulu okunwetha mo okudhiladhila neihumbato lyaanona. — 1 Kor. 15:33.

15. Aavali otaya vulu okwiilonga shike koshiholelwa shomumwatate Jessie?

¹⁵ Aavali otaya vulu okuninga shike, ngele kaye shi naanaa oshindji kombinga yiikwaelektronika? Omumwatate Jessie gwokoFilipine, ngoka e li omuvali, ota ti: “Otwa li tu shi owala kashona kombinga yuuteknolohi. Ihe shoka kasha li she tu imbi tu longe aanona yetu kombinga yankene iikwaelektronika ya nika oshiponga.” Nonando ongawo, Jessie ka li a indike oyana ya longithe iikwaelektronika molwaashoka owala kee yi shi. Okwa ti: “Onda li nda ladhipike aamwandje ya longithe iikwaelektronika yawo, opo ya vule okwiilonga elaka epe, yi ilongekidhile okugongala noya leshe Ombiimbeli esiku kehe.” Ngele ngoye omuvali, mbela owa lesha nokukundathana naamwoye omayele ge li pandjele ngoka taga adhika kohi yoshitopolwa “Teenagers” kepandja lyetu lyokointaneta, jw.org^®, kombinga yokutuma omatumwalaka nokutula omathano kointaneta? Mbela owa talulula ngaa nayo okavidio Owu na ngaa eipangelo nenge oho pangelwa kiikwaelektronika yoye? nosho wo Kotokela omakwatathano gopaintaneta? * Iilongitho mbyoka otayi vulu okukala yi li  ekwatho enene, sho to longo aamwoye nkene ye na okulongitha iikwaelektronika pandunge. — Omayel. 13:20.

16. Aavali oyendji oya ninga shike, noshe ya etela iizemo yini?

¹⁶ Aavali oyendji ohaya ningi ngaashi taya vulu ya ninge omalongekidho, opo oyana ya vule okweendathana naamboka ye li oshiholelwa oshiwanawa shokulongela Kalunga. Pashiholelwa, aaihokani yamwe moIvory coast, N’Déni naBomine, olundji ohaya hiya omutonatelishikandjo a kale ha zi maandjawo. Omumwatate N’Déni ota ti: “Shika osha nwetha mo nawa omwanamati gwetu. Okwa tameke okukokola ondjila, nongashingeyi oku li omupeha gwomutonatelishikandjo.” Mbela nangoye ito vulu okuninga omalongekidho ga faathana kombinga yeendathano lyaamwoye?

17-18. Uunake aavali ye na okutameka okudheula oyana?

¹⁷ Tameka okudheula aamwoye manga kuyele ngaashi tashi vulika. Ngele aavali oya tameke okudheula oyana manga kuyele, otashi ka eta iizemo iiwanawa. (Omayel. 22:6) Natu taleni kuTimoteus, ngoka mokweendela ko kwethimbo a li a ningi omweendi pamwe nomuyapostoli Paulus. Okwa li a dheulwa kuyina Eunike nokuyinakulu Loide “okuza kuunona.” — 2 Tim. 1:5; 3:15.

¹⁸ Aaihokani yalwe moIvory coast, Jean-Claude naPeace, oya li ya vulu okuputudha oyana ayehe yahamano ya kale ye hole Jehova noku mu longela. Oshike she ya kwathele ya pondole? Oya landula oshiholelwa shaEunike naLoide. Oya ti: “Aanona yetu otwa li twe ya nongeke Oohapu dhaKalunga okuza sho aashona, konima owala sho ya valwa.” — Deut. 6:6, 7.

19. Okunongeka Oohapu dhaKalunga maanona yoye, otashi ti shike?

¹⁹ “Okunongeka” Oohapu dhaJehova maanona yoye, otashi ti shike? “Okunongeka” otashi ti “okulonga nokudhimbulukitha lwiikando.” Opo aavali ye shi ninge, oya pumbwa okukonga ethimbo ya kale noyana, taye shi ningi pandjigilile. Omathimbo gamwe, okulombwela aanona iinima yontumba lwiikando, ohaku teya aavali omukumo. Ihe aavali otaya vulu okutala ko oshinima shoka shi li omukalo moka taya vulu okukwathela oyana, ya uve ko Oohapu dhaKalunga noye dhi tule miilonga.

20. Yelitha nkene Episalomi 127:4 tayi vulu okukwathela mokuputudha aanona.

 ²⁰ Kala wu shi okuyoolola. MEpisalomi 127, aanona oya yelekanithwa niikuti. (Lesha Episalomi 127:4.) Ngaashi owala iikuti hayi hongwa miiti ya yoolokathana nohayi vulu okukala yi vulathane muunene, naanona inaya faathana. Onkee ano, aavali oya pumbwa okutokola nkene ye na okudheula okanona kawo kehe. Aaihokani yamwe yokuIsraeli shokunena mboka ya pondola mokuputudha oyana ya longele Jehova, oya popi shoka ya mona hashi kwathele, ya ti: “Kehe gumwe otwa konakona naye oye awike.” Odhoshili kutya omutse gwuukwanegumbo otagu ka tokola ngele okukonakona momukalo moka okwa pumbiwa notaku vulika.

21. Ekwatho lini Jehova ha pe aavali?

²¹ Omathimbo gamwe, aavali otashi vulika ya kale ye uvite ya gwililwa po komashongo ngoka taya tsakaneke, ihe oye na okudhimbulukwa kutya aanona oye li omagano ga za kuJehova. Okwi ilongekidha aluhe oku ya kwathela. Oha kala e na ehalo lyokupulakena komagalikano gaavali. Oha yamukula omagalikano gawo okupitila mOmbiimbeli, miileshomwa, miiholelwa iiwanawa yaavali yalwe megongalo nomomayele gawo.

22. Yimwe yomiinima dhingi mbyoka aavali taya vulu okupa oyana oyini?

²² Aantu yamwe ohaya ti kutya okuputudha aanona ohaku pula owala omimvo 20, ihe paushili wo wene, okukala omuvali ihaku hulu nando. Yimwe yomiinima dhingi mbyoka aavali taya vulu okupa oyana, ongaashi ohole, ethimbo lyawo nosho wo edheulo lya kankamena kOmbiimbeli. Okanona kehe otake ki inyenga momukalo gwi ili kedheulo ndyoka. Nonando ongawo, aanona oyendji oya putudhwa kaavali mboka ye hole Jehova. Oye uvite ngaashi Joanna Mae, omumwameme gwokoAsia, ngoka a ti: “Onda pandula lela kedheulo ndyoka nda pewa kaavali yandje, oshoka oya dheula ndje noya longa ndje ndi kale ndi hole Jehova. Inaya vala ndje owala, ihe oya kwathela ndje wo ndi kale ndi na onkalamwenyo yi na eityo.” (Omayel. 23:24, 25) Aamwatate naamwameme omamiliyona nayo osho ye uvite ngaaka.