1-2. Ngaashi twe shi mona moshimoniwa shaAngelito, kehe gumwe gwomutse oku na okuninga shike?

MBELA owa putudhwa kaavali mboka ye li Oonzapo dhaJehova? Ngele osho, kaleka momadhiladhilo kutya ekwatathano lyoye naJehova ito vulu oku li thigulula kuyo. Kutya nduno aavali yetu ohaya longele Kalunga nenge hasho, kehe gumwe oye e na okukokeka ekwatathano lye naJehova.

² Natu tale koshimoniwa shomumwatate Angelito. Okwa putudhwa muukwanegumbo wOonzapo. Nonando ongawo, pethimbo omugundjuka ka li e uvite e li popepyeelela naKalunga. Ota ti: “Onda li tandi longele Jehova, molwaashoka owala nda li nda hala okuninga shoka tashi ningwa kaantu yaandjetu.” Nonando ongawo, lwanima Angelito okwa li a tokola a longithe ethimbo olindji mokulesha Oohapu dhaKalunga nokutedhatedha kudho, nokwa tameke nokuli okugalikana kuJehova pandjigilile. Oshizemo? Angelito okwa ti: “Ondi ilongo kutya omukalo owala moka tandi vulu okuhedha popepi naTate yetu Jehova, omoku mu tseya ngame mwene.” Oshimoniwa shaAngelito osha pendutha omapulo gamwe ga simana, ngaashi: Eyooloko lini li li pokati kokutseya owala Jehova kashona noku mu tseya nawa? Oshike tu na okuninga, opo tu mu tseye nawa?

3. Eyooloko lini li li pokati kokutseya kombinga yaJehova noku mu tseya nawa?

³ Otashi vulika tu dhiladhile kutya ngele otu shi edhina lyaKalunga nenge yimwe yomiinima mbyoka a popya nenge a ninga, kungawo otu mu shi. Ihe okukala tu shi Jehova nawa, okwa  kwatela mo oshindji. Otwa pumbwa okulongitha ethimbo tu ilonge kombinga ye noyomaukwatya ge omawanawa. Kungawo, opo owala tatu ka tameka okuuva ko kutya omolwashike ha popi noha ningi iinima yontumba. Shoka otashi ke tu kwathela tu mone ngele Jehova okwa hokwa shoka tatu dhiladhila, tatu tokola naashoka tatu ningi. Uuna twa mono kutya Jehova okwa hala tu ninge shike, otwa pumbwa okukatuka metsokumwe naashoka twi ilonga.   

4. Iiholelwa yomOmbiimbeli mbyoka tatu ka kundathana, otayi tu kwathele ngiini?

⁴ Aantu yamwe otashi vulika ye tu sheke, sho twa hala okulongela Jehova, notashi vulika ye tu pataneke nokuli unene, uuna twa tameke okweendathana noshigwana she. Ihe ngele otwa kala twi inekela muJehova, ke na esiku e ke tu ethe. Otatu ka tameka okukala tu na uukuume naKalunga mboka tawu kalelele. Otatu vulu ngaa shili okutseya Jehova nawa? Eeno, otatu vulu! Iiholelwa mbyoka twa tulilwa po kaalumentu inaaya gwanenena, ngaashi Moses nomukwaniilwa David, oye shi ulika kutya otatu vulu okutseya Jehova nawa. Sho tatu kundathana shoka ya ningi, otatu ka yamukula omapulo ngaka gaali: Oye shi ende ngiini ya tseye Jehova? Oshike tatu vulu okwiilonga kiiholelwa yawo?

5. Moses okwa li a hogolola a ninge shike?

⁵ Moses okwa li a katuka metsokumwe naashoka i ilongo. Sho Moses a li e na omimvo 40 lwaampono, okwa li a hogolola okweendathana noshigwana shaKalunga, Aahebeli, pehala lyokukala e shiwike e li “omuna gwomukadhona omuna gwaFarao.” (Heb. 11:24) Moses okwa li a etha po ondondo ya simana. Sho a gama kombinga yAahebeli, mboka ya li aapika muEgipiti, okwa li e shi kutya shoka otashi ka geyitha Farao, omupangeli omunankondo ngoka a li a talika ko e li kalunga. Moses ka li tuu e na eitaalo lya kola! Okwa li i inekela muJehova. Einekelo ndyoka olyo ekankameno lya kola lyuukuume tawu kalelele. — Omayel. 3:5.

6. Oshike tatu vulu okwiilonga koshiholelwa shaMoses?

⁶ Shika otashi tu longo shike? Ngaashi Moses, atuheni otu na okuninga etokolo kombinga yaashika: Mbela otatu ka hogolola okulongela Kalunga nokweendathana noshigwana she? Otashi vulika tu kale twa pumbwa okuninga omaiyambo, opo tu longele Kalunga, notashi vulika tu patanekwe kwaamboka kaaye mu shi. Ihe ngele otwa kala twi inekela muTate yetu gwomegulu, otatu vulu okukala nuushili kutya ote ke tu ambidhidha!

7-8. Moses okwa li a tsikile okwiilonga shike?

⁷ Moses okwa li a tsikile okwiilonga kombinga yomaukwatya gaJehova nokokulonga ehalo Lye. Pashiholelwa, sho Moses a li a pulwa a pitithe mo oshigwana shaIsraeli muupika, ka li e wete te shi vulu, e ta lombwele Jehova kutya oku uvite inaa gwana oku shi ninga. Jehova okwa li e mu yamukula shili nolukeno, e te mu kwathele. (Eks. 4:10-16) Oshizemo, Moses okwa li a vulu okuthikitha kuFarao omatumwalaka gepangulo ge na oonkondo. Opo nduno, Moses okwa mono nkene Jehova a longitha oonkondo dhe, sho a hupitha Aaisraeli, nokuhanagula po Farao nomatangakwiita ge, mEfuta Etiligane. — Eks. 14:26-31; Eps. 136:15.

⁸ Konima sho Moses a pititha mo Aaisraeli muEgipiti, Aaisraeli oya li ya tameke okunyenyeta kombinga yiinima yontumba. Nonando ongawo, Moses okwa li a mono kutya Jehova oku na eidhidhimiko enene, mokutala komukalo moka a ungaunga noshigwana shoka a mangulula muupika. (Eps. 78:40-43) Moses okwa li wo a mono kutya Jehova oku na eifupipiko endhindhilikwedhi, sho a ningi shoka Moses e mu pula a ninge. — Eks. 32:9-14.

9. Shi ikolelela kAahebeli 11:27, uukuume waMoses naJehova owa li wa kola shi thike peni?

 ⁹ Konima sho Moses ya tembuka mo muEgipiti, okwa kala e na ekwatathano lyopothingo lela naJehova, Tate gwe gwomegulu, nokwa li a fa e mu wete. (Lesha Aahebeli 11:27.) Ombiimbeli oye shi ulika nkene ekwatathano lyawo lya li lya kola, sho ya ti: “Omuwa okwa li ha popi naMoses koshipala noshipala, naanaa ngaashi omuntu ta popi nakuume ke.” — Eks. 33:11.

10. Opo tu tseye Jehova nawa, otu na okuninga shike?

¹⁰ Shoka otashi tu longo shike? Opo tu tseye Jehova nawa, katu na owala okukala tu shi omaukwatya ge, ihe otu na wo okulonga ehalo lye. Jehova kunena okwa hala “aantu ayehe ya hupithwe noya tseye oshili.” (1 Tim. 2:3, 4) Omukalo gumwe moka hatu longo ehalo lyaJehova, omokulonga yalwe kombinga ye.

11. Sho tatu longo yalwe kombinga yaJehova, ohashi tu kwathele ngiini tu mu tseye nawa?

¹¹ Olundji uuna tatu longo yalwe kombinga yaJehova, ohashi tu kwathele tu mu tseye nawa. Pashiholelwa, ohatu mono uumbangi wa yela wolukeno ndwoka Jehova e nine aantu, uuna te tu kwathele tu mone mboka aanamitima omiwanawa. (Joh. 6:44; Iil. 13:48) Ohatu mono wo kutya Oohapu dhaKalunga odhi na oonkondo, molwaashono ohadhi kwathele aakonakonimbiimbeli yetu ya ethe po omikalondjigilile omiwinayi e taya zala omuntu omupe. (Kol. 3:9, 10) Ohatu mono natango kutya Kalunga omwiidhidhimiki, sho ha pe aantu oyendji yomoshitopolwa shetu oompito odhindji yi ilonge kombinga ye noya vule okuhupithwa. — Rom. 10:13-15.

12. Ngaashi sha popiwa muEksodus 33:13, Moses okwa li a pula shike, nomolwashike?

¹² Moses okwa li a lenga ekwatathano lye naJehova. Nokuli nokonima sho a longo iilongankondo oyindji medhina lyaKalunga, Moses okwa li a pula Jehova nesimaneko e mu kwathele, opo e mu tseye nawa. (Lesha Eksodus 33:13.) Moses okwa li e na omimvo 80 nasha, sho a ningi eindilo ndyoka, ihe okwa li e shi kutya okwa pumbwa natango okwiilonga oshindji kombinga yaHe gwomegulu omunahole.

13. Omomukalo gumwe guni tatu vulu okuulika kutya otwa lenga uukuume wetu naKalunga?

¹³ Shoka otashi tu longo shike? Kutya nduno otwa longela Jehova uule wethimbo li thike peni, katu na okukala twa tala ko uukuume wetu naye wu li oshinima shanathangwa. Omukalo gumwe moka tatu vulu okuulika kutya otwa lenga uukuume wetu naKalunga, omokukala hatu popi naye megalikano.

14. Omolwashike egalikano lya simana, ngele tashi ya pokutseya nawa Kalunga?

¹⁴ Ngele owa hala wu kale wu na uukuume wa kola nagumwe, owa pumbwa okukala ho popi naye pandjigilile. Onkee ano, hedha popepi naKalunga mokukala ho mu galikana pandjigilile, ngoye ino kala wa tila oku mu lombwela shoka to dhiladhila nankene wu uvite. (Ef. 6:18) Omumwameme Krista, gwokoTurkey, ota ti: “Ethimbo kehe tandi lombwele Jehova megalikano nkene ndi uvite, ohashi koleke ohole yandje yoku mu hola neinekelo lyandje muye, nohandi mono nkene ta kwathele ndje. Okumona nkene Jehova ta yamukula omagalikano gandje, osha kwathela ndje ndi mu tale ko e li Tate naKuume kandje.”

15. Jehova okwa popi David e li omulumentu a tya ngiini?

¹⁵ Omukwaniilwa David okwa valelwa moshigwana shoka sha li shi iyapulila Jehova Kalunga. Ihe ka li a longele Jehova, molwaashoka owala tashi ningwa kaantu yaandjawo. Okwa tokola ye mwene a kale e na ekwatathano naKalunga, nokwa li e holike kuJehova noonkondo. Jehova okwa popi David kutya oku li ‘omulumentu ngoka a hokwa.’ (Iil. 13:22)  David okwe shi ende ngiini a kale e na uukuume wopothingo naJehova?

16. David okwa li i ilongo shike kombinga yaJehova okupitila meshito?

¹⁶ David okwa li i ilongo kombinga yaJehova okupitila meshito. Sho David a li omugundjuka, okwa li ha kala melundu oowili odhindji ta litha oonzi dhahe. Otashi vulika pethimbo ndyoka opo a li a tameke okutedhatedha kombinga yiinima mbyoka Jehova a shita. Pashiholelwa, sho David a li ha tala pombanda uusiku, ka li owala ha mono oonyothi odhindjidhindji, ihe okwa li wo hi ipula kombinga yomaukwatya gaaNgoka e dhi shita. David okwa li a nwethwa mo a nyole ta ti: “Eyalelo otali holola esimano lyaKalunga; Ewangandjo otali eta puuyelele iilonga ye!” (Eps. 19:1, 2) Sho David a li i ipula kombinga yankene aantu ya shitwa, okwa mono kutya Jehova oku na uunongo uukumithi. (Eps. 139:14) Sho a li ha tedhatedha kombinga yeshito lyaJehova, okwa li hi itala ko omushona lela okuyelekanitha naJehova. — Eps. 139:6.

17. Oshike tatu vulu okwiilonga, ngele otwa kala hatu tedhatedha kombinga yeshito?

¹⁷ Shoka otashi tu longo shike? Kala wu na ohokwe meshito. Kutha ethimbo wu tale keshito lyaJehova ewanawa nokukala we li kuminwa! Esiku kehe, kala ho tedhatedha kunkene eshito ndyoka lye ku kundukidha, ngaashi iimeno, iinamwenyo naantu, tayi ku longo kombinga yaJehova. Ngele owe shi ningi, kehe esiku oto ki ilonga oshindji kombinga yaTate gwoye omunahole. (Rom. 1:20) Oto ka mona wo kutya ohole yoye yoku mu hola otayi ende tayi koko esiku nesiku.

18. Ngaashi sha popiwa mEpisalomi 18, David okwa li a ndhindhilike shike?

¹⁸ David okwa li e shi mono kutya Jehova ote mu kwathele. Pashiholelwa, oshikando shimwe sho David a li a gamene oonzi dhahe konkoshi nokemwanka, okwa li e shi mono kutya Jehova oye e mu kwathele a vule okudhipaga iilikama mbyoka iinankondo. Sho a li a sindi omutongolume Goliat, okwe shi mono sha yela kutya Jehova oye a li te mu wilike. (1 Sam. 17:37) Natango sho a li a yi ontuku omukwaniilwa Saul ngoka a li e mu sila ondumbo, okwa mono kutya Jehova oye e mu hupitha. (Eps. 18, enyolo lyopombanda) Ando David okwa li omwiinenepeki, ando okwa dhiladhila kutya poompito adhihe ndhoka, okwa pondola koonkondo dhe mwene. Ihe David okwa li omwiifupipiki, nokwa li e shi ndhindhilike kutya Jehova oye a li te mu kwathele monkalamwenyo ye. — Eps. 138:6.

19. Oshike tatu ilongo koshiholelwa shaDavid?

¹⁹ Shoka otashi tu longo shike? Otashi tu longo kutya otwa pumbwa okuninga oshindji, shi vulithe owala pokupula Jehova e tu kwathele. Natu kale wo hatu kaleke momadhiladhilo ethimbo ndyoka e tu kwathela nosho wo omukalo moka e shi ninga. Ngele otwa kala hatu zimine omangambeko getu, otatu ke shi mona kutya Jehova ohe tu ambidhidha mpoka tatu nyengwa. Ethimbo kehe tu wete Jehova te tu kwathele, ekwatathano lyetu naye otali ka enda tali kolo. Shoka osho naanaa sha ningilwa omumwatate Isaac, gwokoFiji, ngoka a kala nokulongela Jehova omimvo odhindji. Okwa ti: “Okutala konakuziwa yandje, ondi wete nkene Jehova a li a kwathele ndje okuza ngaa sho nda tameke okukonakona Ombiimbeli sigo okunena. Shoka osha ningitha ndje ndi kale nda tala ko Jehova e li omuntu gwolela kungame.”

20. Oshike tatu ilongo kekwatathano ndyoka David a li e na naKalunga?

²⁰ David okwa li a holele omaukwatya gaJehova. Jehova okwe tu shita momukalo moka tatu vulu okuholela omaukwatya ge. (Gen. 1:26) Mpoka pu thike okwiilonga kwetu kombinga yomaukwatya gaJehova, opo ngaa tapu ka kala pu thike oku mu holela kwetu. David okwa li a  vulu okutseya nawa He gwomegulu, onkene okwa li a vulu oku mu holela, uuna ta ungaunga nayalwe. Natu tale koshiholelwa shimwe. David okwa li a yono kuJehova, sho a hondele naBatseba e ta dhipagitha wo omusamane gwe. (2 Sam. 11:1-4, 15) Ihe Jehova okwa li a tokola a sile ohenda David, omulumentu ngoka a li wo a ulukile yalwe ohenda. Molwaashoka David okwa li e na ekwatathano ewanawa naJehova, okwa ningi gumwe gwomaakwaniilwa yaIsraeli mboka ya li ye holike, na Jehova okwa li e mu tala ko e li oshiholelwa oshiwanawa shaakwaniilwa yalwe yaIsraeli. — 1 Aak. 15:11; 2 Aak. 14:1-3.

21. Metsokumwe nAaefeso 4:24 nosho wo 5:1, “okuholela Kalunga” otaku tu etele iizemo yini?

²¹ Shoka otashi tu longo shike? Otashi tu longo kutya otwa pumbwa “okuholela Kalunga.” Oku shi ninga, ihashi tu etele owala uuwanawa, ihe ohashi tu kwathele wo tu mu tseya nawa. Uuna tatu holele omaukwatya ge, ohatu shi ulike kutya tse oyana. — Lesha Aaefeso 4:24; 5:1.

22-23. Oshike tashi ke tu ningilwa, ngele otwa tula miilonga shoka tatu ilongo kombinga yaJehova?

²² Ngaashi twe shi mona, ohatu ilongo kombinga yaJehova okupitila meshito nomOohapu dhe, Ombiimbeli. Embo ndyoka lyi ikalekelwa, oli na iiholelwa oyindji yaapiya yaKalunga aadhiginini mboka tatu vulu okuholela, ngaashi Moses naDavid. Jehova okwa longa ko nale ombinga ye. Sha thigala ko oshetu tu ilonge oshindji kombinga ye ngaashi tatu vulu.   

²³ Katu na esiku tu ka mane okwiilonga kombinga yaJehova. (Omuuv. 3:11) Shoka sha simanenena, kashi shi kutya otu mu shi shi thike peni, ihe okutula miilonga ontseyo ndjoka. Ngele otwa tula miilonga shoka tatu ilongo nokukambadhala okuholela Tate yetu omunahole, ota ka tsikila okuhedha popepi natse. (Jak. 4:8) Okwe tu shilipaleka kutya ke na esiku a ethe mboka ye mu shi nawa, okupitila mOohapu dhe.