Omuhindadhi ka li a lombwele Eva kutya ngele okwa li oshiyimati shoka Kalunga a indika, ota ka sa owala palutu, ihe oshitopolwa she shilwe sholutu shoka ihaashi monika (shoka aantu yamwe kunena haya ti omwenyo ihaagu si) otashi ka tsikila okukala nomwenyo palwe pwi ili. Pehala lyaashono, okwa li a lombwele Eva okupitila meyoka kutya ngele okwa li komuti ngoka, ‘ita si shili.’ Okwa li ta ti kutya ota ka tsikila okukala nomwenyo nota ka tsikila okunyanyukilwa onkalamwenyo kombanda yevi yi vulithe pwaandjoka e na, ano a manguluka ko kokupangelwa kuKalunga. — Gen. 2:17; 3:3-5.

Ngele elongo ndyoka lyiifundja kombinga yomwenyo ihaagu si inali tamekela muEden, ano olya tamekela peni? Katu na lela uushili waashono. Shoka tu shi osho kutya omalongelokalunga giifundja agehe oga li ga hanagulwa po kEyelu lyopethimbo lyaNoa. Konima yEyelu kapwa li omalongo giifundja, molwaashoka Noa nuukwanegumbo we, aalongelikalunga yashili, oyo owala ya li ya hupu.

Elongo ndyoka hali longwa kunena kutya omwenyo ihagu si, oli na okukala lya tameka konima yEyelu. Sho Kalunga a vundakanitha omalaka puBabel naasho aantu ya halakanene “evi alihe,” osha yela kutya oya tsikile okwiitaala kutya omuntu oku na omwenyo ihaagu si. (Gen. 11:8, 9) Kashi na nduno mbudhi kutya elongo ndyoka lyiifundja olya tameka uunake, otatu vulu okukala nuushili kutya ‘he yiifundja ayihe,’ Satana Omuhindadhi, oye a li e shi kwatela komeho, nokwa li a nyanyukwa sho a tala elongo ndyoka lyiifundja tali taandele apuhe. — Joh. 8:44.