Ehokololo lyomuDeuteronomium 22:25-27, itali popi unene kombinga yokukoleka kutya omulumentu oku na ondjo, molwaashoka shoka osha li sha talika ko shi li nale ondjo. Ihe ompango ndjoka, oya li hayi gandja eitulomo kokwaa na ondjo kwomukiintu. Tala kwaashoka sha li sha kwatelwa mo.

Oovelise dha tetekele, otadhi popi kombinga yomulumentu a lala nomukadhona “moshilando” ngoka a yalekwa. Omolwoshinima shoka, omulumentu ngoka okwa li e na ondjo yoluhondelo, molwaashoka omukadhona ngoka a yalekwa, okwa li a talika ko a hokanwa. Ongiini kombinga yomukadhona? Ina ‘kuga onkugo moshilando.’ Ando okwe shi ningile, ando yalwe otashi vulika ye mu uvu, e taye mu kwathele. Ihe ka li a kugu. Kungawo, naye okwa li e na ondjo yoluhondelo, onkee ano, ayehe yaali oya li ye na ondjo. — Deut. 22:23, 24.

Ompango oya ka popya onkalo yi ili, tayi ti: “Ngele oku na omulumentu ta adha omukadhona a yalekwa e li melundu, e te mu kwata nokulala naye, omulumentu ngoka a lala naye, oye awike na se. Ihe omukadhona ina ningwa sha, ke na ondjo yokusa. Shika osha fa owala omuntu a ponokelwa kumukwawo e te mu dhipaga. Omulumentu okwe mu tsakaneke melundu, omukadhona omuyalekwa okwa kugu, ihe kakwa li ngoka a tondoka onkugo ye.” — Deut. 22:25-27.

Monkalo ndjoka, aapanguli oya li hayi itaale shoka tashi popiwa komukiintu. Omeityo lini? Okwa li haku tiwa kutya omukadhona “okwa kugu, ihe kakwa li ngoka a tondoka onkugo ye.” Onkee ano, ka li a hondela. Ihe omulumentu okwa li e na ondjo yekwatonkonga noyoluhondelo, molwaashoka okwa “kwata nokulala” nomukadhona omuyalekwa.

Nonando ompango ndjoka oya li hayi gandja eitulomo kokwaahe na ondjo kwomukiintu, ehokololo otali popi sha yela kutya omulumentu okwa li ha kala e na ondjo yekwatonkonga noyoluhondelo. Otatu vulu okukala neinekelo kutya aapanguli oya li haye shi “konakona nawa,” e taya ningi etokolo shi ikolelela komuthikampango ngoka Kalunga a tula po nokwe gu endulula lwiikando. — Deut. 13:14; 17:4; Eks. 20:14.