MBELA owi itala ko wu li omuntu ha pandula? Atuheni otwa pumbwa okwiipula epulo ndyoka. Ombiimbeli oya hunganeka kutya pethimbo lyetu, aantu oyendji otaya ka kala “ihaa pandula.” (2 Tim. 3:2) Otashi vulika wa tsakaneka aantu mboka haya kala ya tegelela aluhe okuningilwa sha nenge okupewa sha kuyalwe. Otashi monika sha fa haya kala ye uvite kutya inaya pumbwa okuulika olupandu lwaashoka ya pewa. Mbela oho mono oshidhigu okukala naantu ya tya ngawo?

Mepingathano naashoka, aapiya yaJehova otaya lombwelwa, taku ti: “Hambeleleni.” Otu na okukala hatu ‘pandula aluhe.’ (Kol. 3:15; 1 Tes. 5:18) Odhoshili kutya okukala nombepo yokupandula, oshinima oshiwanawa kutse. Opu na omatompelo ogendji goku shi ninga.

Etompelo limwe lya simana kutya omolwashike tu na okukala aluhe hatu pandula, olyo kutya otashi tu kwathele tu kale tu na etaloko ewanawa li na ko nasha natse yene. Omuntu ngoka ha pandula, ohashi mu uvitha nawa, naangoka a pandulwa oha kala wo e uvite nawa. Omolwashike okupandula haku nyanyudha nakupandula nosho wo nakupandulwa? Natu taleni koshiholelwa shika: Uuna wa mono kutya yalwe oya hala oku ku ningila sha, mbela shoka itashi ulike kutya oye wete wa gwana oku shi ningilwa? Oye na ko nasha nangoye. Uuna wa mono kutya oye na ko nasha nangoye, ohashi ku uvitha nawa. Rut naye otashi vulika osho a li e uvite ngawo. Boas okwa li e mu pe shoka a pumbwa. Kapu na omalimbililo kutya Rut okwa li a nyanyukwa noonkondo, sho a mono kutya opu na gumwe ngoka e na ko nasha naye. — Rut 2:10-13.

Kalunga oye unene a gwana okupandulwa. Osha yela kutya omathimbo gamwe oho dhiladhila komagano ogendji gopambepo nosho wo kiinima yilwe mbyoka e ku pa, naambyoka ta tsikile oku ku pa. (Deut. 8:17, 18; Iil. 14:17) Ihe pehala lyokudhiladhila owala paufupi kombinga yuuwanawa mboka Kalunga e ku ningila, omolwashike itoo kongo ethimbo wu dhiladhile komalalekonuuyamba ngoka e ku pa nosho wo yaandjeni. Okudhiladhila kunkene Omushiti gwoye ha gandja, otashi ka koleka olupandu lwoye notashi ke ku kwathela wu mone kutya oku ku hole shi thike peni nokwe ku pandula wo shi thike peni. — 1 Joh. 4:9.

Ku na owala okudhiladhila kokugandja kwaJehova nokutedhatedha komayambeko ngoka wa mona, ihe mu pandula wo, omolwuuwanawa mboka e ku ningila. (Eps. 100:4, 5) Ohaku tiwa kutya “okupandula yalwe, ohaku nyanyudha omuntu.”

Etompelo limwe kutya omolwashike olupandu lu li oshinima oshiwanawa kungoye, olyo kutya ohalu koleke uukuume. Atuheni otwa pumbwa okukala tu uvite tu niwe natse. Uuna wa pandula gulwe tashi zi komutima omolwoshinima oshiwanawa shoka a ninga, ohashi koleke uukuume weni. (Rom. 16:3, 4) Shimwe ishewe, aantu mboka haya pandula, olundji oye hole okukwathela yalwe. Ohaya kala ye shi wete, uuna yalwe ye ya ningila uuwanawa, naashoka ohashi ya inyengitha wo ye ya ningile uuwanawa. Odhoshili kutya okukwathela yalwe, ohaku eta enyanyu. Shoka oshi li metsokumwe naashoka Jesus a popi, sho a ti: “Okugandja oku na elago ku vule okutaamba.” — Iil. 20:35.

Robert Emmons, omuwiliki gwOuniveesiti yaCalifornia ngoka a konakona shi na ko nasha nokupandula yalwe, okwa ti: “Opo tu kale hatu pandula, otwa pumbwa okuuva ko kutya otwi ikolelela maantu ooyakwetu. Omathimbo gamwe ohatu gandja, omanga omathimbo gamwe hatu pewa.” Odhoshili kutya opo tu pule komeho notu kale twa nyanyukwa monkalamwenyo, otwa pumbwa ekwatho lyayalwe. Pashiholelwa, otashi vulika haye tu pe iikulya nenge ekwatho lyopaunamiti. (1 Kor. 12:21) Omuntu ngoka e na olupandu, oha pandula shoka a ningilwa  kuyalwe. Ngele osho shi li ngawo, mbela oho pandula ngaa yalwe, omolwiinima mbyoka ye ku ningila?

Etompelo limwe lyokukala tu na olupandu, olyo kutya ohalu tu kwathele tu gandje eitulomo kuuwanawa pehala lyokugandja eitulomo kuuwinayi. Oku shi popya pathaneko, uuluyi woye ohawu longo wa fa oshidhinditho. Ngele owu hole okupandula, ohashi ku kwathele wu gandje eitulomo kokudhiladhila unene kiinima iiwanawa pehala lyiinima iiwinayi. Shika ohashi ku kwathele wu kale wu wete iinima iiwanawa nowu gandje eitulomo eshona komaupyakadhi. Mpoka ngaa pu thike okupandula kwoye, opo ngaa pu thike okukala wu wete iinima iiwanawa, mbyoka lwanima tayi ke ku ningitha wu kale ho pandula shi vulithe shito. Ngele owa kala ho pandula monkalamwenyo yoye, otashi ke ku kwathela wu ninge shoka twa ladhipikilwa komuyapostoli Paulus. Okwa ti: “Kaleni aluhe mwa nyanyukwa mokukala mOmuwa.” — Fil. 4:4.

Okukala ho pandula otaku ku kwathele kuu kale ho dhiladhila iinima iiwinayi. Mbela oto vulu ngaa okukala wu uvite olupandu, nopethimbo opo tuu mpoka owa sa efupa, owa yemata nenge wa geya? Aantu mboka haya pandula, olundji ihaya gandja eitulomo kiinima yopamaliko. Ohaya kala ya pandula shoka ye na, noihaya gandja eitulomo kokumona oshindji. — Fil. 4:12.

Wu li Omukriste, owu shi kutya Satana okwa hala wu kale wu uvite wa gwililwa po nowa kanitha einekelo, omolwomashongo ngoka ho tsakaneke momasiku ngaka gahugunina. Ota ka kala e shi panda, ngele owa kala wu na ombepo ombwinayi noyokungungutula. Wu li omuuvithi gwonkundana ombwanawa, ombepo ndjoka otayi vulu oku shi ningitha oshidhigu kungoye wu pondole miilonga mbyoka. Uushili owo kutya, okupandula ohaku endele pamwe niiyimati yombepo yaKalunga, mwa kwatelwa enyanyu ndyoka hatu kala tu na, omolwuuwanawa mboka Kalunga e tu pa nosho wo eitaalo momauvaneko agehe ngoka e tu uvanekela. — Gal. 5:22, 23.

Wu li omupiya gwaJehova, otashi vulika to tsu kumwe naashoka sha kundathanwa moshitopolwa shika kombinga yokupandula. Nonando ongawo, owe shi mona kutya haaluhe hashi kala oshipu okupandula nokukala wu na etaloko ewanawa. Ihe ino etha shoka shi ku teye omukumo. Oto vulu okukala ho pandula nokutsikila oku shi ninga. Ngiini mbela? Kehe esiku, kala ho kutha ethimbo wu dhiladhile kiinima yimwe mbyoka wa ningilwa monkalamwenyo yoye, mbyoka to vulu okupandula. Ngele owa kala ho shi ningi, oto ka kala ho pandula shi vulithe nale. Shoka otashi ke ku kwathela wu kale wa nyanyukwa wu vule kokule mboka haya gandja eitulomo komaupyakadhi gonkalamwenyo. Kala ho dhiladhila kiinima iiwanawa mbyoka Kalunga nosho wo aantu yalwe ye ku ningila, mbyoka hayi ku tsu omukumo nohayi ku etele enyanyu. Iinima mbyoka oto vulu okukala ho yi nyola. Esiku kehe, oto vulu okunyola iinima iyali nenge itatu, mbyoka wa pandula esiku ndyoka.

Aapekapeki yamwe oye shi mona kutya “okupandula yalwe pandjigilile, otaku vulu okulundulula omukalo moka uuluyi wetu hawu longo nohaku vulu oku shi ningitha oshipu tu kale tu na etaloko ewanawa kombinga yonkalamwenyo.” Omuntu ngoka ha pandula, oha kala a nyanyukwa. Onkee ano, kala ho dhiladhila komayambeko ngoka wa mona, nyanyukilwa iinima iiwanawa mbyoka wa ningilwa ngoye kala wo ho pandula aluhe! Pehala lyokukala kaatu na olupandu lwiinima iiwanawa, natu “hambeleleni Omuwa, oshoka oye omwaanawa.” Eeno, natu “panduleni aluhe.” — 1 Ondjal. 16:34; 1 Tes. 5:18.