Aawe, mOmbiimbeli nomomambo gondjokonona inamu nyolwa nando oshinima sha tya ngawo.

Omukalo moka ovelise ndjoka ya tolokwa mOombiimbeli odhindji, ogwa ningitha aantu yamwe ya dhiladhile kutya Aakriste yamwe yonale oya li haya ninginithwa pehala lyoonakusa. Pashiholelwa, Ombiimbeli yo-New International Version oya ti: “Ano ngele kaku na eyumuko, mboka ya ninginithwa pehala lyoonakusa otaya ka ninga ngiini?”

Ihe ndhindhilika shoka aalongwantu yOmbiimbeli yaali ya ti. Omulongwantu gwOmbiimbeli, omundohotola Gregory Lockwood, okwa ti kutya mOmbiimbeli nomomambo gondjokonona kamu na sha tashi ulike kutya opwa li yamwe ya ningithwa pehala lyoonakusa. Ye omuprofesoli Gordon D. Fee okwa ti: “Momambo gondjokonona nomOmbiimbeli kamu na sha tashi popi kombinga yeninginitho lya fa mpoka.” Okwa ti wo kutya inali popiwa mo mEtestamendi epe nonokutya oshinima shono kasha li hashi ningwa kAakriste yonale nenge koongeleka ndhoka dha ka totwa po konima owala sho aayapostoli ya si.

Ombiimbeli oya ti kutya aalanduli yaJesus oya li ye na ‘okuninga aantu aalongwa ye, oku ya ninginitha noku ya longa okudhiginina ayihe mbyoka e ya lombwela.’ (Mat. 28:19, 20) Manga omuntu inaa ninga omulongwa a ningithwa, oku na okwiilonga, okwiitaala nosho wo okuvulika kuJehova nOmwana. Omuntu ngoka a sa ita vulu okuninga oshinima shoka nenge e shi ningilwe kOmukriste ngoka e na omwenyo. — Omuuv. 9:5, 10; Joh. 4:1; 1 Kor. 1:14-16.

Ano Paulus okwa li a hala okutya shike?

Aakorinto yamwe oya li haya ti kutya oonakusa itaya ka yumuka. (1 Kor. 15:12) Paulus ka li a popile oshinima shoka. Okwe ya lombwele kutya oha kala a “taalelwa keso esiku kehe.” Ihe okwa li e na omwenyo natango. Nonando okwa li a taalela oonkalo dha nika oshiponga, okwa li e na einekelo kutya ngele a si ota ka yumudhwa a ye megulu, ngaashi Jesus. — 1 Kor. 15:30-32, 42-44.

Aakorinto oya li ye na oku shi uva ko kutya okukala Omukriste omugwayekwa okwa kwatela mo okutaalela omashongo esiku kehe nonokutya oya li ye na okusa tango, opo ya vule okuyumudhwa. “[Okuninginithwa, NW] muukumwe naJesus Kristus,” okwa kwatela mo okuya “muukumwe naye meso.” (Rom. 6:3) Shoka otashi ti kutya ngaashi Jesus, nayo oya li ye na okutaalela omashongo nokusa, opo ya vule oku ka yumudhwa ya ye megulu.

Konima yoomvula mbali sho Jesus a ninginithwa momeya, okwa li a lombwele aayapostoli ye yaali a ti: ‘Eninginitho ndyono tandi ninginithwa, nane wo olyo tamu ka ninginithwa nalyo.’ (Mark. 10:38, 39, NW) Jesus ka li ta popi kombinga yokuninginithwa momeya. Ihe okwa li a hala okutya uudhiginini we otawu ke mu fala sigo omeso. Paulus okwa nyola kutya aagwayekwa otaya ka ‘faathana naKristus mokuhepekwa, opo ya vule wo okufaathana naye meadhimo.’ (Rom. 8:16, 17; 2 Kor. 4:17) Onkee ano, oye na okusa, opo ya vule okuyumudhwa ya ye megulu.

Ano oohapu dhaPaulus otadhi vulu okutolokwa ngeyi: “Ngele aasi itaya ka yumudhwa, ano omolwashike ye na okuninginithwa pamukalo ngono?”