Jehova okwa li a lombwele oshigwana she Israeli shi kale oshiyapuki. Metsokumwe naashono, okwe shi lombwele a ti: “Omutotolombo tagu popi mukweni, inamu gu taandelitha. [Ino tula omwenyo gwamukweni moshiponga, NW]. Ongame Omuwa.” — Lev. 19:2, 16.

Uutumbulilo “Ino tula omwenyo gwamukweni moshiponga” owu li omupopyofano gwOshihebeli, ihe otagu ti shike mbela? Embo limwe lyOshijuda lyuuyelele kombinga yembo lyaLevitikus olya ti: “Oshintoko shovelise ndjoka . . . oshidhigu okuyelitha, molwaashoka kapu na uushili kutya uutumbulilo ‘ino tula’ mOshihebeli otawu ti shike naanaa.”

Aalongwantu yamwe ohaya kwatakanitha etumbulo ndjoka novelise ndjoka ya landula ko, ndjoka tayi ti: “Inamu goyokitha oohapu moompangu. Inamu popila ohepele nenge mu game komuyamba; utheni eutho lyu uka.” (Lev. 19:15) Onkee ano, ompango ndjoka tayi adhika movelise 16 kombinga ‘yokwaatula oomwenyo dhayalwe moshiponga’ oya hala okutya Omuisraeli ka li e na okweehameka gumwe ngoka e na oshipotha naye sho ye li mompangu, ngele tashi ya kongeshefa, megumbo nenge a pilike oshili omolwuuwanawa we mwene. Odhoshili kutya katu na okuninga iinima mbyoka, ihe opu na wo omukalo gulwe moka tatu vulu okuuva ko etumbulo ndyoka tali adhika movelise 16.

Ndhindhilika shoka sha popiwa petameko lyovelise ndjoka. Kalunga okwa li a gandja elombwelo oshigwana she kaashi taandeleke omitotolombo nenge tu tye iifundja. Dhimbulukwa kutya okulundila kaku shi okuhokola, nonando okuhokola nako ohaku vulu okweeta iizemo iiwinayi. (Omayel. 10:19; Omuuv. 10:12-14; 1 Tim. 5:11-15; Jak. 3:6) Olundji omuntu ngoka ha lundile nenge ha popi iifundja kombinga yamukwawo ohe shi ningi, opo a nyateke edhina lye. Gumwe otashi vulika a popye iifundja kombinga yamukwawo, nonando okuninga ngawo otaku tula omwenyo gwomuntu ngoka moshiponga. Dhimbulukwa kutya aalumentu yamwe aafundja oya li ya popi iifundja kombinga yaNabot, shoka sha ningitha a dhipagwe nomamanya. (1 Aak. 21:8-13) Eeno, ngaashi sha popiwa muLevitikus 19:16, omulundili nenge tu tye ngoka ta popi iifundja kombinga yagumwe okwa li ta vulu okutula omwenyo gwamukwawo moshiponga.

Shimwe ishewe, gumwe otashi vulika a popye iifundja kombinga yamukwawo, molwaashoka owala e mu tonde. Johannes gwotango 3:15, ota ti: “Kehe ngoka e tonde mukwawo, oye omudhipagi. One omu shi shi kutya omudhipagi ke na omwenyo gwaaluhe.” Oshindhindhilikwedhi sho Kalunga a landulitha ko oohapu ndhoka tadhi adhika movelise 16, tadhi ti: “Inamu tonda omumwanyoko koomwenyo dheni.” — Lev. 19:17.

Onkee ano, etumbulo tali limbilike ndyoka tali adhika muLevitikus 19:16 oli na omayele omawanawa kAakriste. Otwa pumbwa okuyanda omadhiladhilo ga puka nosho wo okupopya iifundja kombinga yayalwe. Osha yela kutya ngele otwa kala hatu ‘tula omwenyo gwagulwe moshiponga,’ molwaashoka owala kaatu mu hole nenge twe mu tsila ondumbo, kungawo otashi ulike kutya otu mu tonde. Aakriste oye na okuyanda oshinima shoka thiluthilu. — Mat. 12:36, 37.