1. Omolwetompelo limwe lini Jesus a faathanitha aalanduli ye noonzi?

JESUS okwa li a faathanitha ekwatathano lye naalanduli ye nekwatathano ndyoka hali kala pokati komusita noonzi dhe. (Joh. 10:14) Efaathanitho ndyoka otali opalele. Oonzi ohadhi kala dhi shi ewi lyomusita gwadho nohadhi ningi ngaashi te dhi lombwele. Shoka osha li sha ningilwa omweendi gumwe. Omweendi ngoka okwa ti: “Esiku limwe otwa li twa hala okuthaneka oonzi dhimwe, notwa li twa kambadhala oku dhi hedhitha popepi natse, opo tu dhi thaneke nawa. Ihe kadha li dha hala okuhedha popepi natse, oshoka omawi getu kadhi ga shi. Opo nduno opwe ya omumati gumwe, naasho e dhi ithana nziya odhe mu lamba.”

2-3. (a) Aalanduli yaJesus ohaya ulike ngiini kutya otaya pulakene kewi lye? (b) Oshike tatu ka kundathana moshitopolwa shika naashoka tashi landula ko?

² Oshimoniwa shomweendi ngoka otashi tu dhimbulukitha oohapu dhaJesus kombinga yoonzi dhe, ano aalongwa ye. Jesus okwa ti: ‘Otadhi ka uva ewi lyandje.’ (Joh. 10:16) Ihe Jesus oku li megulu. Otatu vulu ngiini okupulakena kuye nenge tu tye okuuva ewi lye? Omukalo gumwe moka tatu vulu oku shi ninga, omokukala hatu tula miilonga omalongo ge monkalamwenyo yetu. — Mat. 7:24, 25.

³ Moshitopolwa shika, naashoka tashi ka landula ko, otatu ka kundathana kombinga yagamwe gomomalongo gaJesus. Ngaashi tatu ke shi mona, opu na iinima yimwe mbyoka Jesus e tu lombwela tu ethe po okuninga nopu na wo mbyoka e tu lombwela tu kale hatu ningi. Tango otatu ka kundathana kombinga yiinima iyali mbyoka omusita gwetu omwaanawa e tu lombwela tu ethe po okuninga.

4. Shi ikolelela kuLukas 12:29, oshike tashi vulu oku tu ningitha tu kale tu na “oshimpwiyu”?

⁴ Lesha Lukas 12:29. Jesus okwa li a ladhipike aalanduli ye kaaya “kale ye na oshimpwiyu” (NW) shiipumbiwa yawo yakehe esiku.  Otu shi kutya omayele gaJesus ohaga kala aluhe pandunge noge li mondjila. Otwa hala aluhe tu kale hatu ga tula miilonga, ihe omathimbo gamwe otashi vulika tu shi mone oshidhigu okuninga. Omolwashike mbela?

5. Omolwashike yamwe tashi vulika ya kale ye na oshimpwiyu shiipumbiwa yawo yakehe esiku?

 ⁵ Yamwe otashi vulika ya kale ye na oshimpwiyu shiipumbiwa yawo yakehe esiku, ngaashi iikulya, iizalomwa nosho wo ehala lyokukala. Otashi vulika ya kale haya zi moshilongo sha hepa noonkondo moka iilonga ihaayi monika nuupu. Otashi vulika haye shi mono oshidhigu okumona iimaliwa ya gwana ya sile oshimpwiyu omaukwanegumbo gawo. Nenge tashi vulika ngoka a li ha longo a sa, uukwanegumbo we tawu kala kaawu na kutya otawu hupu ngiini. Onkalo ndjoka ye etithwa komukithi gwo-COVID-19 otashi vulika ya ningitha oyendji ya kanithe iilonga yawo. (Omuuv. 9:11) Ngele otwa ningilwa yimwe yomiinima mbyoka twa zi nokutumbula, ongiini tatu vulu okutula miilonga omayele gaJesus kombinga yokwaakala tu na oshimpwiyu?

6. Hokolola shoka sha li sha ningilwa omuyapostoli Petrus oshikando shimwe.

⁶ Oshikando shimwe omuyapostoli Petrus naayapostoli yalwe oya li ye li mowato mEfuta lyaGalilea moshikungulu shombepo noya mono Jesus te ende kombanda yomeya. Petrus okwa li a ti kuye: “Omuwa, ngele ongoye, lombwela ndje, ndi ye kungoye tandi ende kombanda yomeya.” Konima sho Jesus a ti kuye “ila,” Petrus okwa zi mo mowato e ta yi kuJesus “te ende kombanda yomeya.” Ndhindhilika shoka lwanima sha ka ningwa po. “Sho a mono ombepo yoshikungungulu, okwa haluka nokwa tameke okuningina mo. Oye okwi igidha: ‘Omuwa, hupitha ndje!’” Jesus okwa ganeke mbala oshikaha she nokwe mu kwata e te mu hupitha. Osha simana okutseya kutya petameko Petrus okwa li a vulu okweenda kombanda yefuta lya pindjala sho a kala a tala kuJesus. Ihe sho Petrus a tala kombepo  yoshikungulu, okwa tameke okukala a tila nokwa limbililwa e ta tameke okuningina. — Mat. 14:24-31.

7. Oshike tatu vulu okwiilonga koshiholelwa shaPetrus?

⁷ Otatu vulu okwiilonga sha koshiholelwa shaPetrus. Sho Petrus a zi mo mowato e ta yi mefuta, ka li e shi ngele ota ka kwatwa kuumbanda e ta tameke okuningina. Okwa li a hala okukala te ende kombanda yomeya sigo a thiki kuJesus. Ihe pehala lyokukala ta gandja eitulomo kuJesus, okwa tameke okukala a tila oshikungulu shombepo. Odhoshili kutya tse itatu vulu okweenda kombanda yomeya, ihe ohatu iyadha momamakelo ngoka taga makele eitaalo lyetu. Ngele otwe etha po okukala tu na einekelo muJehova nomomauvaneko ge, eitaalo lyetu otali vulu okunkundipala e tatu tameke okuningina momalimbililo getu pathaneko. Nonando otu kale twa taalela omaupyakadhi ge thike peni, otwa pumbwa okukala tatu gandja eitulomo kuJehova nokunkene ta vulu oku tu kwathela. Ongiini tatu vulu oku shi ninga?

8. Oshike tashi vulu oku tu kwathela tu yande okukala tatu ipula unene niipumbiwa yetu yakehe esiku?

⁸ Pehala lyokukala tatu ipula unene nomaupyakadhi getu, otwa pumbwa okukala twi inekela muJehova. Inatu dhimbwa kutya Tate yetu omunahole, Jehova, okwa uvaneka kutya ote ke tu sila oshimpwiyu palutu ngele otwa kala twa pititha komeho oku mu longela. (Mat. 6:32, 33) Oha gwanitha po aluhe omauvaneko ge. (Deut. 8:4, 15, 16; Eps. 37:25) Ngele Jehova oha sile oshimpwiyu oondhila dhokegulu noongala, kapu na omalimbililo kutya ota ka shilipaleka wo kutya otu na iikulya nosho wo iizalomwa. (Mat. 6:26-30; Fil. 4:6, 7) Ngaashi owala aavali aanahole hayi inyengithwa kohole ya sile oshimpwiyu oyana, ohole ohayi inyengitha wo Jehova e tu sile oshimpwiyu. Eeno, otatu vulu okukala nuushili kutya Jehova ote ke tu sila aluhe oshimpwiyu!

9. Oshike to vulu okwiilonga koshimoniwa shaaihokani yamwe?

⁹ Natu taleni koshimoniwa shoka tashi ulike nkene Jehova he tu sile oshimpwiyu. Esiku limwe aaihokani yamwe mboka ye li miilonga yethimbo lyu udha oya li ya yi nohauto yawo ya kulupa ya ka pitule aamwameme yamwe mboka haya zi kehala hoka haku zi oontauki ya ye kokugongala. Omumwatate okwa ti: “Konima yokugongala, otwa hiya aamwameme mboka tu ka lye omwiha pamwe nayo kaandjetu, ihe manga inaatu thika, otwa dhimbulula kutya iikulya yetu oya pwa po.” Mbela aaihokani mboka oya li taya ka ninga po shike? Omumwatate okwa ti: “Sho twa thiki pegumbo, posheelo shetu otwa adha po oondjato mbali oonene dhiikulya. Katwa li tu shi kutya olye e dhi eta po. Jehova okwa li shili e tu sile oshimpwiyu.” Lwanima, ohauto yaaihokani mboka oya teka. Oya li ye yi pumbwa, oshoka oyo ya li haya longitha muukalele, ihe kaya li ye na iimaliwa ye yi pangelithe. Manga ya li yi li pongalashe yimwe popepi negumbo lyawo, omulumentu gumwe okwe ya e ta pula ta ti: “Ohauto ndjino oya lye?” Omumwatate okwa ti kutya ohauto oye noya pumbwa okupangelwa. Omulumentu ngoka okwe mu yamukula a ti: “Shoka kashi na sha. Omukulukadhi gwandje okwa hala ohauto ya fa ndjika, yolwaala nokuli ndwoka. Oto pula ingapi ndi yi lande po?” Omumwatate okwe yi landitha po komulumentu ngoka, nokwe mu pe iimaliwa ya gwana oku ka landa ohauto yimwe. Omumwatate ngoka okwa ti: “Esiku ndyoka otwa li twa nyanyukwa noonkondo. Otwa li tu shi kutya oshinima shoka inashi tu ningilwa owala ngeya, ihe Jehova oye a yi mo olunyala.”

10. Episalomi 37:5 otali tu ladhipike ngiini kaatu kale tatu ipula unene niipumbiwa yetu yakehe esiku?

¹⁰ Ngele otwa kala hatu pulakene komusita gwetu omwaanawa e tatu yanda okukala hatu ipula unene niipumbiwa yetu yakehe esiku, otatu vulu okukala nuushili kutya Jehova ote ke tu sila oshimpwiyu. (Lesha Episalomi 37:5; 1 Pet. 5:7) Dhiladhila kombinga yoonkalo ndhoka dha popiwa  mokatendo 5. Sigo ongashingeyi, Jehova otashi vulika a kala ta longitha omutse gwuukwanegumbo nenge omuhona gwontumba tu vule  okumona iipumbiwa yakehe esiku. Ngele omutse gwuukwanegumbo ogwa kala itaagu vulu we oku shi ninga nenge gwa kanitha iilonga yagwo, Jehova ota ka shilipaleka kutya otu na ashihe shoka twa pumbwa. Otatu vulu okukala nuushili kutya ote ke shi ninga. Ngashingeyi natu ka kundathaneni kombinga yoshinima shimwe shoka omusita gwetu omwaanawa e tu lombwela tu ethe po okuninga.

11. Shi ikolelela kuMateus 7:1, 2, oshike shoka Jesus e tu lombwela tu yande okuninga, nomolwashike tashi vulika shi kale oshidhigu okuninga?

¹¹ Lesha Mateus 7:1, 2. Jesus okwa li e shi kutya aapulakeni ye oya li ye na egamo lyokupangula yalwe nenge lyokupopila yalwe muuwinayi. Ndhindhilika kutya okwa ti: “Inamu pangula yakweni.” Otashi vulika hatu kambadhala okuyanda okupangula ooitaali ooyakwetu. Ihe molwaashoka inatu gwanenena, otashi vulika tu iyadhe tatu shi ningi. Oshike tu na okuninga, ngele otwi iyadha tatu popile gumwe muuwinayi? Pulakena kuJesus, e to longo nuudhiginini kuu kale ho pangula yalwe.

12-13. Okutedhatedha kunkene Jehova a li a tala ko omukwaniilwa David otaku vulu ngiini oku tu kwathela kaatu kale hatu pangula yalwe?

¹² Okutedhatedha koshiholelwa shaJehova otaku vulu oku tu etela uuwanawa. Oha gandja eitulomo komaukwatya getu omawanawa. Shoka oshi iwetikile mokutala kunkene a li a ungaunga nomukwaniilwa David, ngoka a li a ningi omapuko ogendji ga kwata miiti. Pashiholelwa, okwa li a hondele naBatseba nokwa dhipagitha nokuli omusamane gwe. (2 Sam. 11:2-4, 14, 15, 24) Omolwoshinima shoka a ningi, David okwi iyetele omaupyakadhi nosho wo yaandjawo, mwa kwatelwa wo aakulukadhi ye yalwe. (2 Sam. 12:10, 11) Pompito yimwe, David ka li a ulike einekelo muJehova, sho a yalula aakwiita yometangakwiita lyaIsraeli, oshinima shoka Jehova inee mu lombwela a ninge. David otashi vulika oshinima shoka e shi ningi, molwaashoka okwa li ti itangele uunene wetangakwiita lye nokwa li i inekela megameno lyalyo. Shoka oshe etitha oshizemo shini? Aaisraeli 70 000 oya si kelega. — 2 Sam. 24:1-4, 10-15.

¹³ Andola owa li ho zi muIsraeli pethimbo ndyono, David otashi vulika wu kale we mu tala ko ngiini? Mbela andola oto kala we mu tala ko inaa gwana okuulukilwa ohenda kuJehova? Jehova hasho a li e mu tala ko ngawo. Jehova okwa gandja eitulomo kunkene David a kala omudhiginini monakuziwa nokokwiiyela ombedhi kwe. Shoka osha ningitha Jehova a dhimine po David omayono ge ga kwata miiti. Jehova okwa li e shi kutya David oku mu hole noonkondo nokwa hala okuninga shoka shi li mondjila. Mbela ino pandula sho Kalunga ketu ha gandja eitulomo kuuwanawa mboka hatu longo? — 1 Aak. 9:4; 1 Ondjal. 29:10, 17.

14. Oshike tashi vulu oku tu kwathela kaatu kale hatu pangula yalwe?

¹⁴ Ngele Jehova iha kala a tegelela tu kale twa gwanenena, natse wo katu na okukala twa tegelela yalwe kaaya ninge omapuko, ihe otu na okukala hatu gandja eitulomo komaukwatya gawo omawanawa. Olundji ohashi kala oshipu okundhindhilika mo omaunkundi nenge tu tye okwaagwanenena kwayalwe, noku ya popila muuwinayi. Nonando ongawo, omuntu ngoka ha holele omaukwatya gaJehova oha longo pamwe nayalwe, nonando otashi vulika e shi omaunkundi gawo. Okawe hoka inaaka kweywa otashi vulika ka kale itaaka monika nawa, ihe omuntu omunandunge oha kala e shi kutya ngele oka kweywa otaka vulu okukala taka monika nawa noke na ongushu. Ngaashi Jehova naJesus, otwa pumbwa okukala hatu gandja eitulomo komaukwatya omawanawa gayalwe, ihe hakomaunkundi gawo.

15. Okwiitula moongaku dhayalwe otaku vulu ngiini oku tu kwathela kaatu ya pangule nonyanya?

¹⁵ Kakele kokukala hatu gandja eitulomo komaukwatya gayalwe omawanawa, oshike ishewe tashi vulu oku tu kwathela kaatu kale hatu  pangula yalwe nonyanya? Kala ho itula moongaku dhayalwe. Natu taleni koshiholelwa tashi landula. Esiku limwe sho Jesus a li kotempeli, okwa mono omuselekadhi a hepa ta imbile uupeni uyali mboka kaawu na naanaa ongushu moshiketha shomayambidhidho. Jesus ina pula kutya: “Omolwashike inaa tula mo oshindji shi vulithe po mpoka?” Pehala lyokugandja eitulomo kuuwindji wiimaliwa mbyoka omuselekadhi a gandja, Jesus okwi itula moongaku dhe, nokwi ipula kombinga yeinyengotompelo lye, e te mu pandula sho a gandja ashihe shoka a li e na. — Luk. 21:1-4.

16. Oshike to ilongo koshimoniwa shomumwameme Veronica?

¹⁶ Oshimoniwa shomumwameme Veronica otashi tu ulukile kutya omolwashike okukala hatu itula moongaku dhayalwe kwa simana. Megongalo lyawo omwa li mu na omumwameme inaa hokanwa e na okanona kokamati. Omumwameme Veronica okwa ti: “Omumwameme ngoka nokamwanamati kaya li naanaa haye ya pandjigilile kokugongala nenge muukalele. Omolwoshinima shoka, onda kala nde ya tala ko nayi. Ihe esiku limwe onda longo pamwe nomumwameme ngoka muukalele. Okwa lombwele ndje omaupyakadhi agehe ngoka ye nomwanamati ngoka e na uuvu wopamadhiladhilo haya taalele. Onda mono kutya oha ningi ashihe shoka ta vulu, opo yi isile oshimpwiyu palutu nopambepo. Omathimbo gamwe, omolwuuvu wokamwanamati, ohaya ka gongala kegongalo lilwe.” Pehulilo omumwameme Veronica okwa ti: “Kanda li ndi shi omaupyakadhi agehe ngoka omumwameme ngoka ha taalele. Ngashingeyi onde mu simaneka nonde mu  pandula sho ha ningi ashihe shoka ta vulu a longele Jehova.”

17. Jakob 2:8 ote tu lombwele tu ninge shike, nongiini tatu vulu oku shi ninga?

¹⁷ Oshike tu na okuninga, ngele otwa mono kutya otwa pangula omumwatate nenge omumwameme gwontumba? Otu na okudhimbulukwa kutya otu na okukala tu hole ooitaali ooyakwetu. (Lesha Jakob 2:8.) Shimwe ishewe, otu na okugalikana Jehova twa mana mo, tatu mu pula e tu kwathele tu ethe po okupangula yalwe. Otatu vulu okukatuka metsokumwe negalikano lyetu, mokupopya naangoka twa popila muuwinayi. Shoka otashi ke tu kwathela tu mu tseye nawa. Otatu vulu wo oku mu pula tu longe pamwe naye muukalele nenge tu mu hiye a lye pamwe natse omwiha nenge uulalelo. Sho tatu ende tatu mu tseya nawa, otatu vulu okuholela oshiholelwa shaJehova naJesus, mokugandja eitulomo komaukwatya ge omawanawa. Kungawo otatu ka ulika kutya otatu pulakene kelombwelo lyomusita gwetu omwaanawa kombinga yokwaapangula yalwe.

18. Ongiini tatu vulu okuulika kutya otatu pulakene kewi lyomusita gwetu omwaanawa?

¹⁸ Ngaashi owala oonzi dho dhene hadhi pulakene kewi lyomusita gwadho, aalanduli yaJesus ohaya pulakene kewi lye. Ngele otwa kala tatu longo nuudhiginini kaatu kale tatu ipula unene niipumbiwa yetu yakehe esiku nokuyanda okupangula yalwe, Jehova naJesus otaya ka yambeka oonkambadhala dhetu. Kutya nduno otu li yamwe ‘yomoshigunda oshishona’ nenge ‘oyomoonzi dhilwe,’ natu tsikile okupulakena nokuvulika kewi lyomusita gwetu omwaanawa. (Luk. 12:32; Joh. 10:11, 14, 16) Moshitopolwa tashi landula, otatu ka kundathana kombinga yiinima iyali mbyoka Jesus a lombwela aalanduli ye ya kale haya ningi.