1. Olundji Jehova oha yamukula ngiini omagalikano gaapiya ye?

 MBELA owu shi ngaa kutya Jehova ota vulu oku ku longitha, a yamukule egalikano tali zi komutima lyomupiya gwe gwontumba? Ota vulu oku ku longitha kutya nduno owu li omukuluntugongalo, omuyakuligongalo, omukokolindjila nenge omuuvithi megongalo. Ota vulu oku ku longitha kutya nduno omugundjuka, omukokele nenge omumwatate nenge omumwameme. Uuna gumwe ngoka e hole Jehova ta pula ekwatho kuye, olundji Kalunga oha longitha aakuluntugongalo naapiya ye yalwe aadhiginini ya kale “ekwatho enene” nenge ya hekeleke omuntu ngoka. (Kol. 4:11) Kawu shi tuu uuthembahenda uunene okulongela Jehova nokukwathela aamwatate naamwameme momukalo ngoka! Otatu vulu oku shi ninga, uuna pwa tukuka omukithi gwontumba, pwa holoka oshiponga nenge omahepeko.

2. Omolwashike hashi kala oshidhigu okukwathela yalwe, uuna pwa tukuka omukithi?

² Uuna pwa tukuka omukithi, otagu vulu oku shi ningitha oshidhigu kutse tu kwathele yalwe. Pashiholelwa, otashi vulika tu kale twa hala oku ka talela po ookuume ketu, ihe itatu vulu oku shi ninga. Otashi vulika tu kale twa hala okuhiya mboka ye na iiniwe iishona komagumbo getu ye ye ya lye pamwe natse, ihe itatu vulu oku shi ninga. Otashi vulika wo tu kale twa hala okukwathela yalwe, ihe otashi vulu shi kale eshongo, ngele yaandjetu otaya mono iihuna. Shimwe ishewe, otwa hala okukwathela aamwatate, na Jehova ota ka kala e tu hokwa, uuna tatu ningi ngaashi tatu vulu tu ya kwathele. (Omayel. 3:27; 19:17) Oshike tatu vulu okuninga?

3. Oshike tatu ilongo koshiholelwa shaakuluntugongalo yomegongalo lyaDesi? (Jeremia 23:4)

³ Shoka aakuluntugongalo taya vulu okuninga. Ngele ngoye omukuluntugongalo, kala wu shi nawa oonzi dhoye. (Lesha Jeremia 23:4.) Omumwameme Desi ngoka a popiwa moshitopolwa sha tetekele, okwa ti: “Aakuluntugongalo yomongundu yetu, oya kala nokulonga  pamwe nangame nosho wo yalwe miilonga yokuuvitha, notwa li wo hatu nyanyukilwa pamwe nayo.” b Oonkambadhala dhaakuluntugongalo mboka ya kala noku talela po Desi, odhe shi ningitha oshipu oku mu kwathela konima, sho pwa tukuka omukithi gwekomba gwo-COVID-19 nokwa silwa aakwanezimo yalwe omolwomukithi ngoka.

4. Omolwashike aakuluntugongalo ya li ya vulu okukwathela Desi, notatu ilongo shike kuyo?

⁴ Desi okwa ti: “Molwaashoka aakuluntugongalo oya li ookuume kandje, osha li oshipu kungaye oku ya lombwela nkene ndi uvite nosho wo kombinga yaashoka tandi ipula nasho.” Oshiilongomwa oshini kaakuluntugongalo? Talela po yalwe manga uudhigu inaawu ya. Ninga ookuume kawo. Ngele opwa tukuka omukithi tashi vulika gu ku imbe wu ya talele po, longitha omikalo dhilwe. Desi okwa gwedha ko a ti: “Omathimbo gamwe, aakuluntugongalo ya yoolokathana, oya li haya dhengele ndje nenge ya tumine ndje omatumwalaka mesiku limwe, omanyolo ngono ya li ya pe ndje, oga li ga gumu ndje nonando onda li ndi ga shi nawa.”

5. Aakuluntugongalo otaya vulu ngiini okutseya shoka aamwatate naamwameme ya pumbwa noku ya kwathela?

⁵ Omukalo gumwe to vulu okutseya kutya aamwaho naamwanyoko oya pumbwa shike, omo ku ya pula omapulo nuukeka. (Omayel. 20:5) Mbela oye na ngaa iikulya ya gwana, omiti nosho wo iinima yilwe? Mbela oya kanitha iilonga nenge omagumbo gawo? Mbela oya pumbwa tu ya kwathele ya mone ekwatho okuza kepangelo? Desi okwa li a kwathelwa kooitaali ooyakwawo painiwe. Ihe unene okwa li a pumbwa ekwatho pamaiyuvo nopambepo okuza kaakuluntugongalo, shoka she mu kwathele lela i idhidhimikile onkalo ye. Okwa ti: “Aakuluntugongalo oya galikana pamwe nangame. Nonando itandi dhimbulukwa naanaa kutya oshike ya li ya popi, shoka tandi dhimbulukwa onkene nda li ndu uvite. Jehova okwa fa a li ta lombwele ndje ta ti, ‘Ku li ongoye awike.’” — Jes. 41:10, 13.

6. Oshike oyendji megongalo taya vulu okuninga ya kwathele yalwe? (Tala ethano.)

⁶ Shoka yalwe taya vulu okuninga. Ohatu kala twa tegelela aakuluntugongalo ya sile oshimpwiyu aamwatate naamwameme megongalo. Ihe Jehova ote tu hiya atuheni tu tsaathane omukumo nokukwathathana. (Gal. 6:10) Kutya nduno otwa ningi owala oshinima shoka oshishona tu kwathele gumwe ngoka te ehama, otashi ke mu tsa omukumo lela. Okanona otaka vulu okuningila omumwatate okakalata nenge ke mu thanekele ethano, shono tashi vulu oku mu tsa omukumo. Omugundjuka ota vulu okukwathela omumwameme moku ke mu landela iipumbiwa ye nenge moku mu  ningila sha shilwe shi ili. Ongiini shi na ko nasha nokulongekidhila gumwe ngoka te ehama iikulya noku mu faalela kegumbo lye? Odhoshili kutya uuna pu na omukithi gwa taandela meendelelo, kehe gumwe megongalo okwa pumbwa okutsuwa omukumo. Otatu vulu okuninga ngaaka, uuna twa kala hatu kala po konima yokugongala tu popye naamwatate naamwameme kutya nduno okomagumbo gawo nenge okupitila pavidio. Aakuluntugongalo nayo oya pumbwa okutsuwa omukumo. Oonzapo dhilwe ohadhi tumine aakuluntugongalo mboka haya kala yi ipyakidhila unene, pethimbo lyetukuko lyomukithi uukalata wolupandu. Oshiwanawa lela okuninga ngaashi tatu vulu tu “kumagidhathaneni notu kwathathane”! — 1 Tes. 5:11.

7. Oshike tashi vulu okukala eshongo konima yoshiponga?

⁷ Oshiponga ohashi vulu okuguma noonkondo onkalamwenyo yomuntu. Mboka ya ninga iihakanwa otashi vulika ya kanithe omaliko gawo, omagumbo gawo nenge nokuli aantu mboka ye hole. Aamwatate naamwameme nayo ohaya adhika kiiningwanima mbyoka iiwinayi. Oshike tatu vulu okuninga tu ya kwathele?

8. Aakuluntugongalo nosho wo omitse dhomagumbo otadhi vulu okuninga shike, manga inaapu holoka oshiponga?

⁸ Shoka aakuluntugongalo taya vulu okuninga. Aakuluntugongalo kwatheleni aamwatate ya kale yi ilongekidha manga inaapu holoka oshiponga. Shilipalekeni kutya ayehe megongalo oye shi shoka ye na okuninga, opo ya kale ya gamenwa noye na uuyelele hoka taya vulu okukwatathana nane. Margaret ngoka a popiwa moshitopolwa sha tetekele, okwa ti: “Aakuluntugongalo oya li ye tu londodha moshitopolwa shoompumbwe dhegongalo kutya otashi vulika pu ka holoke omulilo moshitopolwa shetu. Oya ti kutya ngele aanambelewa oye tu lombwele tu ze mo moshitopolwa nenge onkalo ya tameke okukala ya nika oshiponga noonkondo, natu ze mo nziyanziya moshitopolwa.” Uuyelele mboka owa li wu li pethimbo, molwaashoka opwa ka holoka omulilo gwa nika oshiponga konima yiiwike itano. Pelongelokalunga lyuukwanegumbo, omitse dhomagumbo otadhi vulu okutalulula shoka kehe gumwe megumbo ta ka ninga. Ngele ne naanona yeni omwi ilongekidha, otashi vulika mu ka kale mwa ngungumana, uuna pwa holoka oshiponga.

9. Ongiini aakuluntugongalo taya vulu okwiilongekidha manga oshiponga inaashi holoka nokonima ngele sha holoka?

⁹ Ngele owu li omutonateli gwongundu yeni yiilonga yomomapya, ino tegelela pu holoke oshiponga, opo wu shilipaleke kutya owu na uuyelele wu li mondjila, hoka to vulu okukwatathana naamwatate naamwameme yomongundu yeni. Ninga omusholondondo nokukala ho shilipaleke ethimbo nethimbo kutya owu na uuyelele wu li pethimbo. Opo ngele pwa holoka oshiponga, oto ka vula okukwatathana nomuuvithi kehe wu tale kutya okwa pumbwa shike. Uuyelele mboka wu tumina nziya komuunganeki gwolutu lwaakuluntugongalo, opo a kwatathane nomutonatelishikandjo. Uuna aamwatate mbaka taya longele kumwe, otaya ka vula okukwathela ngaashi tashi vulika. Konima yomulilo ngoka gwa tukuka moshitopolwa shaMargaret, omutonatelishikandjo okwa li a kala uule woowili 36 inaa kotha tu unganeke aakuluntugongalo ya kambadhale okukwatathana nokukwathela aamwatate naamwameme ye thike 450 lwaampono, mboka ya li ya thigi po omagumbo gawo. (2 Kor. 11:27) Momukalo ngono, oya li ya vulu okukwathela nakehe gumwe ngoka a li a pumbwa ehala lyokukala okwa li a silwa oshimpwiyu.

10. Omolwashike aakuluntugongalo ya tala ko etalelopo lyuusita li li oshinima sha simana? (Johannes 21:15)

¹⁰ Aakuluntugongalo oye na oshinakugwanithwa, sho ku tsa aamwatate naamwameme omukumo noohapu okuza mOmbiimbeli nokukwathela mboka ya gwililwa po. (1 Pet. 5:2) Uuna pwa holoka oshiponga, aakuluntugongalo oye na okushilipaleka kutya omumwatate nenge omumwameme kehe oku na iikulya, oonguwo nosho wo tuu ehala lyokukala. Ihe konima ngele pwa  piti oomwedhi odhindji, mboka ya hupa moshiponga ohashi vulika ya kale ya pumbwa okutsuwa omukumo nokukwathelwa pamaiyuvo. (Lesha Johannes 21:15.) Omumwatate Harold, ngoka e li oshilyo shOkomitiye yOshitayimbelewa, okwa ti: “Okwa li a tsakanene naamwatate naamwameme oyendji mboka ya gumwa kiiponga. Ohashi pula ethimbo opo omuntu a dhimbwe shoka a ningilwa. Onkalamwenyo ye ohashi vulika yi tameke yi kale ngaashi ya li nale. Ihe iiningwanima mbyoka a ningilwa ngaashi okukanitha ngoka e hole, omaliko ge gondilo nenge nokuli oonkalo oondhigu ndhoka a pita mudho, ohashi kala oshidhigu oku dhi dhimbwa. Omadhiladhilo gokukala u uvite nayi, otashi vulika ga kale tage ya muye omathimbo nomathimbo. Ihe shoka itashi ti kutya ke na eitaalo, ihe otashi ulike owala kutya omuntu gwonyama nombinzi osho e na okukala e na omaipulo ga tya ngaaka.”

11. Omaukwanegumbo gamwe otashi vulika ge na oompumbwe dhini?

¹¹ Aakuluntugongalo tuleni miilonga omayele, “lileni pamwe naamboka taa lili.” (Rom. 12:15) Aamwatate naamwameme mboka ya hupa moshiponga shontumba, oya pumbwa okushilipalekwa kutya Jehova natango oku ya hole nosho wo ooitaali ooyakwawo. Aakuluntugongalo otaya ka kwathela omaukwanegumbo ga ninge iinima ngaashi okugalikana, okukonakona Ombiimbeli, okuya kokugongala nokuuvitha. Aakuluntugongalo tseni wo omukumo aavali ya kwathele oyana ya gandje eitulomo kiinima mbyoka itayi vulu okuyonwa po koshiponga sha sha. Aavali dhimbulukitheni aanona yeni kutya Jehova ota kala aluhe Kuume kawo nosho wo kutya ota kala aluhe noku ya kwathela. Ya yelithileni wo kutya otaya vulu okukala oshitopolwa shuukwanegumbo womuuyuni awuhe waamwatate naamwameme, mboka yi ilongekidha oku ya kwathela. — 1 Pet. 2:17.

12. Oshike yalwe taya vulu okuninga, ya kwathele mboka ya gumwa koshiponga? (Tala ethano.)

¹² Shoka yalwe taya vulu okuninga. Ngele oshiponga osha holoka popepi noshitopolwa sheni, pula aakuluntugongalo nkene to vulu okukwathela. Oto vulu okukwathela moku edhilila megumbo lyoye mboka haya kwathele mokugandja iikwatha, uuna pwa holoka oshiponga. Oto vulu wo okufaalela aauvithi mboka ye li mompumbwe iikulya nosho wo iipumbiwa yilwe. Ngele oshiponga osha holoka koshitopolwa shi li kokule noshitopolwa sheni, natango oto vulu okukwathela. Ngiini mbela? Omokukwatela momagalikano goye mboka ya gumwa koshiponga. (2 Kor. 1:8-11) Oto vulu okukwathela iilonga yokugandja iikwatha mokuyambidhidha pashimaliwa iilonga yomuuyuni awuhe. (2 Kor. 8:2-5) Ngele oto vulu ku ya kehala hoka kwa holoka oshiponga wu ka kwathele, pula aakuluntugongalo kutya ongiini to  vulu okukwathela. Ngele owa hiywa wu ke shi ninge, oto ka pewa edheulo, opo wu vule oku ka longithwa hoka kwa holoka oshiponga nuuna sha pumbiwa.

13. Omashongo geni aamwatate ye na miilongo moka iilonga yetu yi indikwa?

¹³ Miilongo moka iilonga yetu yi indikwa, omahepeko ohaga ningitha onkalamwenyo yi kale ondhigu noonkondo. Aamwatate miilongo mbyono ohaya hupu shokadhila, ohaya kwatwa komikithi nohaya silwa aaholike yawo. Ihe omolwoondjindikila ndhono, aakuluntugongalo otashi vulika ya kale itaya vulu okuya, ya manguluka noku ka talela po mboka ya pumbwa okutsuwa omukumo. Shoka osho sha li sha ningilwa Andrei, ngoka a popiwa moshitopolwa sha tetekele. Omumwameme gumwe gwomongundu yawo yiilonga yomomapya, okwa li ta hupu shokadhila. Shimwe ishewe, okwa li a yi moshiponga shohauto. Okwa li a pumbwa okutandwa noka li ta vulu okulonga. Nonando opwa li omangambeko ngoka nomukithi gwekomba, aamwatate oya ningi ngaashi taya vulu ye mu kwathele, na Jehova okwa li e wete shoka tashi ningwa.

14. Aakuluntugongalo otaya vulu ngiini oku tula po oshiholelwa shokwiinekela muJehova?

¹⁴ Shoka aakuluntugongalo taya vulu okuninga. Andrei okwa li a galikana nokwa ningi shoka ta vulu. Jehova okwa li e mu yamukula ngiini? Okwa li i inyengitha ooitaali megongalo ya ninge ngaashi taya vulu ya kwathele omumwameme. Yamwe oya li haya fala omumwameme koshipangelo. Yalwe oya li haye mu pe oshimaliwa shoku mu kwathela. Jehova okwa li e yi inyengitha ya ninge ngaashi taya vulu, nokwa li a shilipaleke kutya oonkambadhala dhaamwatate naamwameme megongalo, odha gwanitha po ashihe shoka omumwameme a li a pumbwa. (Heb. 13:16) Aakuluntugongalo, uuna iilonga yetu yi indikwa, puleni yalwe ya kwathele. (Jer. 36:5, 6) Komeho yaayihe, inekeleni muJehova. Ota vulu oku mu kwathela, opo mu sile oshimpwiyu aamwatate naamwameme.

15. Oshike tatu vulu okuninga, opo tu kale twa hangana naamwatate naamwameme, uuna tatu hepekwa?

¹⁵ Shoka yalwe taya vulu okuninga. Uuna iilonga yetu yi indikwa, otashi vulika owala tu gongale pamwe naamwatate muungundu uushona. Onkee osha simana shi vulithe nale tu kale tu na ekwatathano ewanawa mokati ketu. Inatu kondjithathana, ihe natu kondjithe Satana. Natu kale hatu dhimine po aamwatate, nokupongolola po uupyakadhi nziya pokati ketu. (Omayel. 19:11; Ef. 4:26) Kaleni mu na ehalo lyokukwathelathana. (Tit. 3:14) Ekwatho ndyoka yalwe ya pe omumwameme gumwe gwomongundu yawo yiilonga yomomapya, olya li lye mu etele uuwanawa. Oya tameke lela ye  na ekwatathano lya kola ongaanegumbo. — Eps. 133:1.

16. Shi ikolelela kAakolossa 4:3, 18, ongiini tatu vulu okukwathela aamwatate naamwameme mboka taya hepekwa?

¹⁶ Aamwatate naamwameme omayovi omilongo otaya longele Jehova kutya nduno, opu na omangambeko ga tulwa po komapangelo. Yamwe oya tulwa moondjedhililo, omolweitaalo lyawo. Otatu vulu oku ya galikanena nosho wo yaandjawo, otatu vulu wo okugalikanena mboka ye na uulaadhi wokuyambidhidha aamwatate naamwameme mboka ya tulwa moondholongo kutya nduno oshi kale sha nika oshiponga kuyo. Ohaya tsu wo omukumo aamwatate mboka ya kale yi inekela muJehova, nohaye ya pe iinima mbyoka ya pumbwa noku ya popila wo mompangu. c (Lesha Aakolossa 4:3, 18.) Ino dhimbwa kutya omagalikano goye otaga vulu okukwathela aamwatate naamwameme ayehe! — 2 Tes. 3:1, 2; 1 Tim. 2:1, 2.

17. Ongiini to vulu okwiilongekidhila omahepeko ngashingeyi?

¹⁷ Ngoye nuukwanegumbo woye otamu vulu okwiilongekidhila ngashingeyi omahepeko. (Iil. 14:22) Ino kambadhala okudhiladhila iinima ayihe iiwinayi mbyoka tashi vulika yi holoke. Pehala lyaashono, koleka ekwatathano lyoye naJehova nokukwathela aanona yoye ya ninge sha faathana. Ihe ngele omathimbo gamwe otatu ipula unene, mbumbulila Kalunga omutima gwoye. (Eps. 62:7, 8) Kundathaneni pamwe mu li uukwanegumbo kutya omolwashike tamu vulu okwiinekela muKalunga. d Uuna pwa holoka oshiponga, okwiilongekidha kwoye ohaku kwathele aanona yoye yi ilongekidhile iiponga yopaunshitwe, notashi ke ya kwathela ya kale ye na uulaadhi noya ngungumana.

18. Otwa tegelela onakuyiwa ya tya ngiini?

¹⁸ Ombili yaKalunga ohayi tu ningitha tu kale tu uvite twa gamenwa. (Fil. 4:6, 7) Jehova ohe tu pe ombili ye e tu ngungumaneke nonando opu na omikithi, iiponga nomahepeko ngoka taga vulu oku tu guma kunena. Oha longitha aakuluntugongalo ye tu tonatele. Okwe tu pa wo atuhe uuthembahenda wokukwathelathana. Ombili ndjoka tu na ngashingeyi, otayi tu kwathele tu ilongekidhile omashongo omanene ngoka tage ke tu adha, nokuli “nuudhigu uunene.” (Mat. 24:21) Pethimbo ndyoka, otatu ka pumbwa okukaleka po ombili yetu nokukwathela yalwe nayo ya ninge sha faathana. Ihe konima yoshiningwanima shoka, itatu ka kala we tu na omaupyakadhi ga kwata miiti ngoka tage tu ningitha tu kale tu na omaipulo. Otatu ka kala tu na shoka Jehova a kala e tu halela, ano twa gwanenena notu na ombili ndjoka tayi kala sigo aluhe. — Jes. 26:3, 4.