1. Okutedhatedha keuvaneko lyaJehova lyomwenyo gwaaluhe ohaku tu gumu ngiini?

 JEHOVA oku uvaneka kutya mboka haya vulika kuye otaya ka mona “omwenyo gwaaluhe.” (Rom. 6:23) Uuna tatu tedhatedha kwaashoka Jehova e tu uvanekela, ohole yetu yoku mu hola ohayi kolo. Dhiladhila kwaashika: Tate yetu gwomegulu oku tu hole noonkondo nokatu na siku tu topoke ko kuye.

2. Euvaneko lyomwenyo gwaaluhe ohali tu kwathele ngiini?

² Euvaneko lyaKalunga lyomwenyo gwaaluhe, ohali tu kwathele tu idhidhimikile omaupyakadhi getu ngoka tu na ngashingeyi. Nokuli nonando aatondi yetu oye tu tilithe neso, itatu ka shuna omutse miipeta, ngele tashi ya pokulongela Jehova. Omolwashike mbela? Omolwaashoka otu shi shi kutya ngele otwa si aadhiginini kuJehova, ote ke tu yumudha kuusi notu na uushili kutya itatu ka sa we. (Joh. 5:28, 29; 1 Kor. 15:55-58; Heb. 2:15) Omolwashike tu na uushili kutya otatu ka kala nomwenyo sigo aluhe? Natu tale komatompelo taga landula.

3. Omolwashike tatu vulu okukala tu na uushili kutya Jehova ota vulu oku tu kaleka nomwenyo sigo aluhe? (Episalomi 102:12, 24, 27)

³ Otu shi shi kutya Jehova ota ka vula oku tu kaleka nomwenyo sigo aluhe, molwaashoka oye Oluthithiya lwomwenyo, nota kala ko aluhe. (Eps. 36:9) Ndhindhilika oovelise dhontumba mOmbiimbeli ndhoka tadhi ulike kutya Jehova okwa kala ko aluhe nota ka kala ko. Episalomi 90:2 otali popi Jehova tali ti: “Oko wa li noto ka kala aluhe sigo aluhe.” Episalomi 102, nalyo wo olya popya oshinima sha faathana. (Lesha Episalomi 102:12, 24, 27.) Omuhunganeki Habakuk okwa nyola kombinga  yaTate yetu gwomegulu a ti: “Omuwa, ongoye Kalunga okuza konale. Ongoye Kalunga kandje, omuyapuki nomukwaaluhe.” — Hab. 1:12.

4. Mbela otu na okukala nomaipulo ngele oshidhigu kutse okuuva ko edhiladhilo kutya Jehova oko a kala aluhe? Shi yelitha.

⁴ Mbela oho shi mono oshidhigu okuuva ko edhiladhilo ndyoka kutya Jehova oko a kala ‘aluhe’? (Jes. 40:28) Ngele osho, hangoye awike. Aantu oyendji ohaye shi mono oshidhigu oku shi uva ko. Elihu okwa popi Kalunga a ti: “Omwaalu gwoomvula dhe itatu vulu oku gu yalula.” (Job 36:26) Ihe okukala kaatu uvite ko oshinima shontumba, shoka itashi ti kutya kashi shi shoshili nenge kashi ko. Pashiholelwa, otashi vulika kaatu shi naanaa nkene olusheno halu longo, ihe mbela shika osha hala okutya olusheno kalu shi oshinima shoshili? Hasho nando! Sha faathana, natse aantu otashi vulika kaatu uvite ko naanaa kutya ongiini Jehova a kala ko aluhe nota ka kala ko sigo aluhe. Ihe shoka itashi ti kutya Kalunga ina kala ko aluhe. Okutseya Omushiti inaku ngambekwa kwaashoka hatu vulu nenge ihaatu vulu okuuva ko. (Rom. 11:33-36) Kalunga oko a kala nale manga kaapwa li ewangandjo, mwa kwatelwa etango noonyothi. Otu na uushili kutya Jehova oye a “shiti evi koonkondo dhe,” noko a kala nale manga inaa ‘alela omagulu.’ (Jer. 51:15; Iil. 17:24) Etompelo ekwawo olini, tali vulu oku tu kwathela tu mone kutya omolwashike tatu vulu okukala nuushili kutya otatu vulu oku ka kala nomwenyo sigo aluhe?

5. Aaihokani yotango oya li ye na etegameno lini?

⁵ Iinima ayihe mbyoka yi na omwenyo Jehova a shitila kombanda yevi ine yi shita yi kale nomwenyo sigo aluhe, kakele owala kaantu. Okwe ya pa etimaumbwile ekumithi lyokwaahasa. Nonando ongawo, Jehova okwa li a londodha Adam a ti: “Kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.” (Gen. 2:17) Ando Adam naEva oya vulikile kuJehova, andola inaya sa. Oshi li pandunge okuthika pehulithodhiladhilo kutya Jehova ando okwe ya pitika pompito yimwe ya lye “[komuti] gwomwenyo.” Shika otashi ti kutya ando oya ka vula okukala ye na “omwenyo sigo aluhe.” b — Gen. 3:22.

6-7. (a) Oshike tashi ulike kutya aantu kaya li ya shitwa nelalakano ya se? (b) Iinima yini iihokithi wa hala oku ka ninga? (Tala omathano.)

⁶ Oshihokithi okutseya kutya aakonakoni yamwe, oya mona uumbangi tawu ulike kutya uuluyi wetu otawu vulu okupungula omauyelele ogendji noonkondo, ge vulithe pwaangoka hatu kala tu na sho tu li momwenyo.  Mo 2010 moshifo sho-Scientific American Mind, omwa li mu na oshitopolwa tashi popi kutya ompungulilo yuunene wuuluyi wetu, otayi vulu okupungula uuyelele wu thike lwopoomiliyona 2,5. Ihe otashi vulika uuluyi wetu wu pungule uuyelele owundji lela wu vule pwaamboka. Otashi ulike kutya uuluyi wetu otawu vulu okupungula uuyelele wu vulithe po mpoka nokuli. Shika otashi ulike wo kutya Jehova okwa shita uuluyi wetu hawu vulu okuhumbata uuyelele owundji noonkondo, shi vulithe puuyelele mboka hatu mono muule womimvo 70 nenge 80. — Eps. 90:10.

⁷ Jehova okwa shitila mutse ehalo lyokukala nomwenyo sigo aluhe. Ombiimbeli otayi ti kutya Kalunga “okwa tula uukwaaluhe moomwenyo dhaantu.” (Omuuv. 3:11) Ndyoka olyo etompelo limwe kutya omolwashike twa tala ko eso li li omutondi gwetu. (1 Kor. 15:26) Ngele otwa kwatwa kuuvu wa kwata miiti, mbela ohatu taamba ko owala onkalo nokukala twa mwena twa tegelela owala tu se? Hasho nando. Olundji ohatu yi koondohotola nomathimbo gamwe ohatu longitha omiti ndhoka tadhi panga omukithi ngoka. Nokuli, ohatu ningi ashihe shoka tatu vulu, tu keelele eso. Uuna omukwanezimo nenge kuume ketu a sa, kutya nduno omushona nenge omukuluntu, mbela ihatu kala twa yemata notwa nika uuthigwa ethimbo ele? (Joh. 11:32, 33) Odhoshili kutya Omushiti gwetu omunahole andola okwa li inee tu shita nelalakano lyokukala sigo aluhe, ando ine tu shita nehalo lyokukala nomwenyo sigo aluhe. Ihe opu na wo omatompelo ogendji, okwiitala kutya otatu vulu oku ka kala nomwenyo kaagu na ehulilo. Otatu ka kundathaneni shoka Jehova a ninga monakuziwa naashoka ta ningi ngashingeyi, shoka tashi ulike kutya elalakano lye lyopetameko inali lunduluka.

8. Eshilipaleko lini tatu adha muJesaja 55:11, kombinga yelalakano lyaKalunga li na ko nasha natse?

⁸ Nonando Adam naEva oya yona, noye etela oluvalo lwawo eso, Jehova ina lundulula elalakano lye. (Lesha Jesaja 55:11.) Elalakano lye olyo kutya okwa hala aantu aadhiginini ya kale nomwenyo sigo aluhe. Oshinima shoka otu shi iwetele, ngele tatu tala miinima mbyoka Jehova a popya nokwa ninga, opo a gwanithe po elalakano lye ndyoka.

9. Kalunga oku uvaneka shike? (Daniel 12:2, 13)

⁹ Jehova oku uvaneka kutya ota ka yumudha mboka ya sa noya ka kale nomwenyo sigo aluhe. (Iil. 24:15; Tit. 1:1, 2) Omulumentu omudhiginini Job, okwa li e na uushili kutya Jehova okwa yuulukwa oku ka yumudha mboka ya sa. (Job 14:14, 15) Omuhunganeki Daniel okwa li e shi kutya aantu otaya ka yumudhwa, notaya ka kala nomwenyo sigo aluhe. (Eps. 37:29; lesha Daniel 12:2, 13.) Aajuda yopethimbo lyaJesus, nayo oya li ye shi kutya Jehova ota vulu okupa aapiya ye aadhiginini “omwenyo gwaaluhe.” (Luk. 10:25; 18:18) Jesus okwa li a popi lwiikando kombinga yeuvaneko ndyoka, molwaashoka naye okwa li a yumudhwa kuHe. — Mat. 19:29; 22:31, 32; Luk. 18:30; Joh. 11:25.

10. Omayumuko ngoka ga ningwa monakuziwa otagu ulike shike? (Tala ethano.)

¹⁰ Jehova oye Omugandji gwomwenyo noku na oonkondo dhokugalulila aantu momwenyo. Okwa li a pe omuhunganeki Elia oonkondo dhokuyumudha okamwanamati komuselekadhi gwokuSarefat. (1 Aak. 17:21-23) Lwanima, Kalunga okwa li a kwathele omuhunganeki Elisa a galulile momwenyo okamwanamati komukulukadhi gwokuShunem. (2 Aak. 4:18-20, 34-37) Omayumuko ngoka nosho wo galwe, ogu ulika kutya Jehova oku na oonkondo dhokugalulila aantu momwenyo. Sho Jesus a li kombanda yevi, oku ulike kutya He, okwe mu pa oonkondo ndhoka. (Joh. 11:23-25, 43, 44) Ngashingeyi Jesus oku li megulu nokwa pewa “epangelo alihe megulu nokombanda yevi.” Onkee ota vulu okugwanitha po euvaneko ndyoka kutya “ayehe mboka ye li moombila” otaya ka yumudhwa, ya ka kale nomwenyo sigo aluhe. — Mat. 28:18; Joh. 5:25-29.

11. Ekuliloyambo olye shi ningitha ngiini tashi wapa, opo tu ka kale nomwenyo sigo aluhe?

¹¹ Omolwashike Jehova e etha Omwana omuholike, a se eso enyanyalithi? Jesus okwa li a gandja eyamukulo kepulo ndyoka a ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Joh. 3:16) Sho a gandja Omwana gwe e li ekuliloyambo, opo tu dhiminwe po oondjo dhetu, Kalunga okwe shi ningitha tashi wapa, opo tu ka mone omwenyo gwaaluhe. (Mat. 20:28) Omuyapostoli Paulus okwa yelitha oshitopolwa sha simana kombinga yelalakano lyaKalunga, sho a nyola a ti: “Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe. Oshoka ngaashi aantu ayehe ye na okusa omolwuukumwe wawo naAdam, osho wo aantu ayehe otaa ka yumudhwa omolwuukumwe wawo naKristus.” — 1 Kor. 15:21, 22.

12. Uukwaniilwa otawu ka gwanitha po ngiini elalakano lyaJehova li na ko nasha natse?

¹² Jesus okwa longa aalanduli ye ya galikane Uukwaniilwa waKalunga wu ye nehalo lyaKalunga li gwanithwe kombanda yevi. (Mat. 6:9, 10) Oshitopolwa shimwe shelalakano lyaKalunga, aantu ya ka kale nomwenyo sigo aluhe kombanda yevi. Opo shoka shi gwanithwe po, Jehova okwa langeka po Omwana, e li Omukwaniilwa gwUukwaniilwa wopaMesiasa. Kalunga okwa kala nokugongela aantu 144 000 kombanda yevi, ya ka longe pamwe naJesus  mokugwanitha po elalakano lyaKalunga. — Eh. 5:9, 10.

13. Ngashingeyi Jehova ota ningi shike, noshike wu na okuninga?

¹³ Jehova ngashingeyi ota gongele engathithi lyaantu noku ya dheula, ya kale oshitopolwa shUukwaniilwa we. (Eh. 7:9, 10; Jak. 2:8) Kutya nduno aantu oyendji muuyuni kunena oya topoka omoluutondwe niita, engathithi ndyoka lyaantu ohali longo nuudhiginini li kuthe po uutondwe mokati kawo. Olye shi ulika sho li ilongekidha okuhambula omagonga galyo omatemo pathaneko. (Mika 4:3) Ihe pehala lyokukutha ombinga miita, mbyoka hayi etitha omaso gaantu oyendji, otali kwathele aantu ya mone okukalamwenyo kwashili, moku ya longa kombinga yaKalunga kashili nosho wo omalalakano ge. (1 Tim. 6:19) Aakwanezimo otashi vulika ye ya pataneke nenge ya kale kaaye na iiniwe, molwaasho taya yambidhidha Uukwaniilwa waKalunga, ihe Jehova oha shilipaleke kutya oye na iinima mbyoka ya pumbwa. (Mat. 6:25, 30-33; Luk. 18:29, 30) Iinima ayihe mbyono otayi ulike kutya Uukwaniilwa waKalunga owolela notawu tsikile okugwanitha po elalakano lyaJehova.

14-15. Euvaneko lyaJehova lyokuhulitha po eso sigo aluhe, otali ka gwanithwa po ngiini?

¹⁴ Ngashingeyi Jesus oku li Omukwaniilwa gwUukwaniilwa waKalunga megulu, nota ka  gwanitha po omauvaneko agehe ngoka Jehova a ninga. (2 Kor. 1:20) Okuza mo 1914, Jesus okwa kala nokupangela aatondi ye. (Eps. 110:1, 2) Jesus nosho wo mboka taya ka pangela pamwe naye, masiku otaya ka sinda nokuhanagula po thiluthilu aantu ayehe aakolokoshi. — Eh. 6:2.

¹⁵ Pethimbo lyElelo lyOomvula Eyuvi dhaJesus, aasi otaya ka yumudhwa, naantu mboka aavuliki otaya ka thika megwaneneno. Konima yemakelo lyahugunina, mboka Jehova a pangula, ye li aayuuki “otaa ka thigulula evi e taa kala mo sigo aluhe. (Eps. 37:10, 11, 29) Shinyanyudha, “omutondi gwahugunina,” ano eso, ‘ota ka sindwa.’ — 1 Kor. 15:26.

16. Etompelo lini lya simanenena ndyoka tu na lyokulongela Jehova?

¹⁶ Ngaashi twe shi mona moshitopolwa shika, etegameno lyetu lyoku ka kala nomwenyo sigo aluhe, olya kankamena kOohapu dhaKalunga. Etegameno ndyono otali vulu oku tu kwathela tu tsikile okukala aadhiginini sho tu li momasiku ngaka gahugunina omadhigu okukaliwa mugo. Ihe opo tu kale twa hokiwa kuJehova, otwa pumbwa okukala twa tompwa shi vulithe pokukala twa hala okukala tu na omwenyo. Etompelo lya simanenena lyokukala aadhiginini kuJehova nosho wo kuJesus, olyo kutya otu ya hole noonkondo. (2 Kor. 5:14, 15) Ohole ohayi tu inyengitha tu ya holele notu kwathele yalwe, ya kale ye na etegameno ndyoka tu na. (Rom. 10:13-15) Sho tatu ilongo okukala kaatu ihole tse yene nokukala hatu gandja, otatu ka kala aantu mboka Jehova a hala ya ninge ookuume ke sigo aluhe. — Heb. 13:16.

17. Otu na oshinakugwanithwa shini? (Mateus 7:13, 14)

¹⁷ Mbela otatu ka kala ngaa yamwe yomwaamboka taya ka mona omwenyo gwaaluhe? Jehova okwe tu pa ompito ndjoka. Ngashingeyi otwa pumbwa okuhogolola okukala mondjila ndjoka tayi fala komwenyo gwaaluhe. (Lesha Mateus 7:13, 14.) Mbela onkalamwenyo otayi ka kala ya tya ngiini, sho tatu ka kala nomwenyo sigo aluhe? Eyamukulo lyepulo ndyono, otatu ke li mona moshitopolwa tashi landula ko.