1. Manga Jesus inaa sa okwa li a lombwele omukolokoshi ngoka a li popepi naye oohapu dhini? (Lukas 23:39-43)

 JESUS naakolokoshi yaali mboka ya li pamwe naye oya li ya mono iihuna sho ya li ye li pokusa. (Luk. 23:32, 33) Aakolokoshi mboka ayehe oya li ya sheke noonkondo Jesus, onkee osha yela kutya kaya li aalongwa ye. (Mat. 27:44; Mark. 15:32) Ihe gumwe gwomuyo okwa li a lundulula iikala ye. Okwa ti: “Jesus, dhimbulukwa ndje ngele wa thiki mOshilongo shoye.” Jesus okwe mu yamukula a ti: “Ongame tandi ku lombwele nena tuu ndjika, oto ka kala pamwe nangame mOparadisa.” (Lesha Lukas 23:39-43.) Kapu na uumbangi tawu ulike kutya omukolokoshi ngoka, okwa li a taamba ko etumwalaka ndyoka tali ti kutya “Oshilongo shegulu she ya popepi,” ndyoka Jesus a li u uvitha sho a li kombanda yevi. Shimwe ishewe, Jesus ina popya nando kutya omulumentu ngoka ota ka ya mOshilongo nenge mUukwaniilwa womegulu. (Mat. 4:17) Jesus okwa li ta popi kombinga yOparadisa ndjoka tayi ka kala kombanda yevi monakuyiwa. Omolwashike tatu tile ngawo?

2. Oshike tashi ulike kutya omukolokoshi ngoka a li i itedhulula okwa li Omujuda?

² Omukolokoshi ngoka i itedhulula otashi vulika a li Omujuda. Okwa lombwele omukolokoshi omukwawo a ti: “Iho tila Kalunga? Natse otu li megeelo olyo ndyoka.” (Luk. 23:40) Aajuda oya li haya longele Kalunga, ihe aantu yomiigwana, oya li yi itaala miikalunga oyindji. (Eks. 20:2, 3; 1 Kor. 8:5, 6) Onkee aakolokoshi mboka andola oya li yomiigwana, andola ngoka a pula mukwawo ando okwe mu pula a ti, “Iho tila ookalunga?” Shimwe ishewe, Jesus ka li a tumwa kaantu yomiigwana, ihe “okoonzi ndhoka dha kana dhomAaisraeli.” (Mat. 15:24) Kalunga okwa li a hololele Aaisraeli kutya ota ka yumudha oonakusa. Onkee omukolokoshi ngoka i itedhulula, otashi vulika a li e shi oshinima shoka, noohapu dhe  otadhi shi ulike kutya okwa thiki pehulithodhiladhilo kutya Jehova ota ka yumudha Jesus a ka pangele mUukwaniilwa waKalunga. Osha fa shi li ngeyi kutya omulumentu ngoka okwa li e na einekelo kutya Kalunga ote ke mu yumudha.

3. Oshike tashi vulika she ya momadhiladhilo gomukolokoshi ngoka a li i itedhulula, sho Jesus a popi kombinga yOparadisa? Shi yelitha. (Genesis 2:15)

³ Molwaashoka omukolokoshi ngoka a li i itedhulula okwa li Omujuda, otashi vulika a li e shi kombinga yaAdam naEva nosho wo Oparadisa moka Jehova a li e ya tula. Onkee ano, omukolokoshi ngoka otashi vulika a li a itaala kutya Oparadisa ndjoka ya popiwa kuJesus otayi ka kala oshikunino oshiwanawa huka kombanda yevi. — Lesha Genesis 2:15.

4. Oohapu ndhoka Jesus a li a lombwele omukolokoshi gumwe odhi na oku tu inyengitha tu dhiladhila kombinga yashike?

⁴ Oohapu ndhoka Jesus a li a lombwele omukolokoshi, odhi na oku tu inyengitha tu dhiladhile kombinga yankene onkalamwenyo tayi ka kala ya tya mOparadisa. Nokuli otatu vulu okwiilonga sha kombinga yOparadisa kepangelo ndyoka lya li li na ombili lyomukwaniilwa Salomo. Ombiimbeli otayi ti kutya Jesus oku vule Salomo. Onkee otwa tegelela Jesus pamwe naamboka ta ka pangela pamwe nayo, ya ka ninge evi Oparadisa ombwanawa. (Mat. 12:42) Osha yela kutya ‘oonzi dhilwe’ odhi na okukala dhi na ohokwe mwaashoka dha pumbwa okuninga, opo dhi vule okukala dha gwana oku ka kala nomwenyo sigo aluhe mOparadisa. — Joh. 10:16.

5. Sho to dhiladhila, onkalamwenyo otayi ka kala ya tya ngiini mOparadisa?

⁵ Oshike hashi ya momadhiladhilo goye, uuna to dhiladhila kombinga yonkalamwenyo mOparadisa? Otashi vulika ho kala wa fa wu wete oparka ombwanawa, ya fa oshikunino shaEden. (Gen. 2:7-9) Otashi vulika ho dhimbulukwa ehunganeko ndyoka lya nyolwa kuMika kutya aantu yaKalunga, “kehe gumwe ota ka kala nombili mokati komiviinu nomikwiyu dhe.” (Mika 4:3, 4) Otashi vulika momadhiladhilo goye hamu ya oovelise dhOmbiimbeli ndhoka tadhi ti kutya kombanda yevi otaku ka kala eloolo lyiikulya. (Eps. 72:16; Jes. 65:21, 22) Onkee otashi vulika ho kala wa fa wu iwete wu li moshikunino oshiwanawa, wa kuutumba poshitaafula shu udha iikulya tayi tokola elaka. Otashi vulika ho kala wu uvite ezimba tali nika nawa lyomiti noongala. Otashi vulika wo ho kala wa fa wu uvite omawi gaakwanezimo yoye nokuume koye, mwa kwatela naamboka ya yumudhwa taya yolo notaya nyanyukilwa pamwe. Iinima ayihe mbyoka kayi shi owala ondjodhi. Kapu na omalimbililo kutya onkalamwenyo kombanda yevi, osho tayi ka kala ngaaka. Ihe otatu ka longa wo iilonga iiwanawa mOparadisa.   

6. Oshike tatu ka longa mOparadisa? (Tala ethano.)

⁶ Jehova okwe tu shita hatu vulu okulonga iilonga noku yi nyanyukilwa. (Omuuv. 2:24) Otatu ka kala twa ipyakidhila noonkondo unene tuu pethimbo lyElelo lyOomvula Eyuvi dhaKristus.  Mboka taya ka hupa puudhigu uunene, nosho wo aantu omamiliyona mboka taya ka yumudhwa, otaya ka pumbwa oonguwo, iikulya nosho wo ehala lyokukala. Opo tu ke ya pe iinima mbyoka, otatu ka pumbwa okulonga iilonga oyindji iiwanawa. Ngaashi owala Adam naEva ya li ye na okulonga oshikunino shawo, natse otatu ka kala tu na uuthembahenda wokulonga iilonga iiwanawa yokuninga evi oparadisa. Dhiladhila owala nkene tashi ka kala shi nyanyudha, sho tatu ka longa aantu omamiliyona mboka taya ka yumudhwa, ye shi owala kashona kombinga yaJehova nelalakano lye. Otatu ka kwathela wo aantu aadhiginini mboka ya sile manga Jesus inee ya kombanda yevi, yi ilonge oshindji shoka sha ka ningwa konima sho ya si!

7. Otatu vulu okukala tu na uushili wuni, nomolwashike?

⁷ Otatu vulu okukala tu na uushili kutya sho tatu ka kala mOparadisa, otatu ka kala tu na ombili, tu na kehe shoka twa pumbwa, notwa unganekwa nawa. Omolwashike? Omolwaashoka Jehova okwe tu ulukila nale oshiholelwa shankene onkalamwenyo tayi ka kala kohi yelelo lyOmwana. Shoka otu shi iwetele mehokololo lyelelo lyomukwaniilwa Salomo.

8. Oohapu ndhoka dhi li mEpisalomi 37:10, 11, 29 odha li dha gwanithwa ngiini konima sho omukwaniilwa David e dhi nyola? (Tala oshitopolwa “Omapulo ga za kaaleshi” shi li moshifo shika.)

⁸ Omukwaniilwa David okwa li a nwethwa mo a nyole kombinga yankene onkalamwenyo ya li tayi ka kala ya tya, sho omukwaniilwa gumwe omunandunge nomudhiginini a li ta ka pangela. (Lesha Episalomi 37:10, 11, 29.) Olundji ohatu leshele aantu Episalomi 37:11, uuna tatu popi kombinga yOparadisa ndjoka twa tegelela. Otu na etompelo ewanawa lyokuninga ngaaka, molwaashoka Jesus okwa li a totha oohapu ndhoka mEuvitho lye lyokOndundu, tu ulike kutya otashi ka gwanithwa monakuyiwa. (Mat. 5:5) Ihe oohapu dhaDavid odha li wo tadhi ulike kutya onkalamwenyo oya li tayi ka kala ya tya ngiini pethimbo lyomukwaniilwa Salomo. Sho Salomo a li ta lele Israeli, oshigwana shaKalunga osha li shi na lela ombili nosha hepuluka mevi ndyoka tali “tondoka omahini nomagadhi goonyushi.” Kalunga okwa li a popi a ti: “Ngele otamu ende paipango yandje . . . , Otandi mu pe ombili mevi lyeni, notamu ka kotha mwaa  na omahalutho gasha.” (Lev. 20:24; 26:3, 6) Omauvaneko ngoka oga li ga gwanithwa pethimbo lyelelo lyomukwaniilwa Salomo. (1 Ondjal. 22:9; 29:26-28) Jehova okwa li wo a uvaneke kutya aantu aakolokoshi mboka ya li haya longele iikalunga yilwe, oya li ‘taya ka kana po.’ (Eps. 37:10) Onkee oohapu ndhoka dhi li mEpisalomi 37:10, 11, 29, odha li dha gwanithwa monakuziwa notadhi ka gwanithwa po wo monakuyiwa.

9. Omukwaniilwa omukiintu gwokuSheba okwa li a popi shike kombinga yelelo lyomukwaniilwa Salomo?

⁹ Omukwaniilwa omukiintu gwokuSheba okwa li a uvu nkene Aaisraeli ye na ombili yo oya hepuluka, sho taya lelwa komukwaniilwa Salomo. Omukwaniilwakiintu ngoka okwa li a zi koshilongo shokokulekule e tayi kuJerusalem e ki italele ko ye mwene kutya onkalo oyi li lela ngiini. (1 Aak. 10:1) Konima sho a tala ombala yaSalomo, okwa ti: “Netatatata olyo ngaa inaandi uva. . . . Aanyekadhi yoye aanelago ngiini! Aapiya yoye aanelago ngiini, mboka taa kala aluhe koshipala shoye noye na ompolo okuuva, sho to popi uunongo woye!” (1 Aak. 10:6-8) Ihe oonkalo ndhoka dha li kohi yelelo lyaSalomo, odha li owala oshiholelwa shaashoka Jehova ta ka ningila aantu pethimbo lyelelo lyOmwana, Jesus.

10. Omomikalo dhini Jesus e vule kokule Salomo?

¹⁰ Jesus oku vule kokulekule Salomo mukehe shimwe. Salomo okwa li omuntu inaa gwanenena, ngoka a li a ningi omapuko ga kwata miiti noga li ge etela oshigwana shaKalunga omaupyakadhi. Ihe Jesus oku li Omupangeli a gwanenena, ngoka ihaa ningi nando epuko lyasha. (Luk. 1:32; Heb. 4:14, 15) Jesus okwa kala omudhiginini kuKalunga, sho a li ta makelwa kuSatana nomamakelo ga kwata miiti. Kristus okwe shi ulika kutya ye ke na esiku a yone nenge a ninge oshinima shoka tashi etele aalelwa ye uupyakadhi. Oshi li lela uuthembahenda kutse okukala e li Omukwaniilwa gwetu!

11. Oolye taya ka kwathela Jesus sho ta pangele?

¹¹ Jesus ota ka longa pamwe naaleli 144 000 ya ka sile aantu oshimpwiyu notaya ka gwanitha po elalakano lyaJehova li na ko nasha nevi. (Eh. 14:1-3) Aantu mboka ta ka pangela pamwe naye, oya pita momashongo ogendji noya mona iihuna sho ya li kombanda yevi, onkee otaya ka uva ko onkalo yaantu. Aaleli mboka otaya ka dhana onkandangala yini?

12. Iilonga yini Jehova ta ka pa aagwayekwa 144 000?

¹² Oshinakugwanithwa shoka sha pewa Jesus naamboka ta ka lela pamwe nayo, oshinene shi vule kokulekule shoka sha li sha pewa Salomo. Omukwaniilwa ngoka gwaIsraeli okwa li e na okutonatela aantu omamiliyona yomoshilongo owala shimwe. Ihe mboka taya ka pangela mUukwaniilwa waKalunga, otaya ka kwathela mokutonatela aantu omabiliyona kongonga yevi alihe. Jehova ina pa tuu aagwayekwa 144 000 oshinakugwanithwa oshikumithi!

13. Mboka taya ka pangela pamwe naJesus otaya ka kala ye na oshinakugwanithwa shi ikalekelwa shini?

¹³ Ngaashi Jesus, aagwayekwa 144 000 otaya ka longa ye li aakwaniilwa naayambi. (Eh. 5:10) Kohi yOmpango yaMoses, aayambi oya li unene ye na oshinakugwanithwa shokukwathela oshigwana shaKalunga shi kale shi na uukolele palutu, noshi na ekwatathano lya kola naJehova. Ompango ndjoka oya li “efano lya dhimeya lyiinima iiwanawa tayi ke ya.” Onkee oshi li pandunge okuthika pehulithodhiladhilo kutya Jesus naamboka ta ka pangela pamwe nayo, otaya kutha ombinga moshilonga shi ikalekelwa shokukwathela oshigwana shaKalunga shi kale shi na uukolele palutu, noshi na ekwatathano lyopothingo naJehova. (Heb. 10:1) Ngashingeyi katu shi kutya aakwaniilwa mboka naayambi otaya ka popya ngiini naalelwa yomUukwaniilwa waKalunga kombanda yevi. Kutya nduno elongekidho lyaJehova olini, otatu vulu okukala tu na omukumo kutya mOparadisa ndjoka twa tegelela, aantu mboka taya ka kala kombanda yevi otaya ka mona ewiliko ndyoka ya pumbwa. — Eh. 21:3, 4.

14. Ekwatathano lini li li pokati ‘koonzi dhilwe’ naamwahe yaKristus?

¹⁴ Jesus okwa li a ithana mboka ta ka pangela pamwe nayo “oshigunda oshishona.” (Luk. 12:32) Okwa popi wo ongundu yimwe ontiyali, ndjoka e yi ithana kutya ‘oonzi dhilwe.’ Oongundu ndhika mbali odhi li oshigunda shimwe sha hangana. (Joh. 10:16) Otadhi longele nale kumwe kunena, notadhi ka tsikila okuninga ngaaka sho evi lya ninga Oparadisa. Odhoshili kutya pethimbo ndyoka mboka ye li “oshigunda oshishona” otaya ka kala ye li megulu, naamboka ye li ‘oonzi dhilwe’ otaya ka kala netegameno lyokukala nomwenyo sigo aluhe kombanda yevi. Ihe natango opu na iinima mbyoka ‘oonzi dhilwe’ dha pumbwa okuninga, opo dhi kale dha gwana oku ka kala mOparadisa.

15. (a) ‘Oonzi dhilwe’ ohadhi longele ngiini kumwe naamwahe yaKristus? (b) Ongiini to vulu okuholela omumwatate ngoka e li mositola? (Tala ethano.)

¹⁵ Omukolokoshi ngoka i itedhulula okwa li a si inaa mona ompito yokuulika kutya okwa pandula shoka Kristus e mu ningila. Mepingathano naashoka, tse ‘oonzi dhilwe’ otu na oompito odhindji ngashingeyi dhokuulika kutya otu uvitile ngiini Jesus. Pashiholelwa, ohatu ulike kutya otu mu hole momukalo moka hatu ungaunga naamwahe aagwayekwa. Jesus okwa ti ota ka pangula oonzi dhilwe shi ikolelela kunkene hadhi ungaunga naamwahe. (Mat. 25:31-40) Otatu vulu okuyambidhidha aamwahe yaKristus, moku ya kwathela nuulaadhi miilonga yokuuvitha noyokuninga aantu aalongwa. (Mat. 28:18-20) Nomolwaashoka twa hala okulongitha nawa iileshomwa ya kankamena kOmbiimbeli mbyoka ye tu pa, ngaashi embo Kala nonkalamwenyo ombwanawa sigo aluhe. Ngele iho konakona natango Ombiimbeli nomuntu gwontumba, omolwashike itoo itulile po elalakano lyokutameka omakonakonombiimbeli naantu oyendji ngaashi tashi vulika?

16. Oshike tatu vulu okuninga ngashingeyi tu ilongekidhile oku ka kala aalelwa yUukwaniilwa waKalunga?

¹⁶ Inatu pumbwa okutegelela sigo twa thiki mOparadisa, opo tu vule okukala aantu mboka Jehova a hala ya kale mo. Ngashingeyi otatu vulu okwiilonga okukala aanashili mokupopya kwetu nomeihumbato lyetu, nokukala tu na ondjele monkalamwenyo. Otatu vulu wo okukala aadhiginini kuJehova, kookuume ketu kopandjokana nosho wo kAakriste ooyakwetu. Ngele ohatu vulika komithikampango  dhaJehova ngashingeyi muuyuni mbuka wa kolokosha, nena otashi ka kala oshipu kutse okuvulika kudho mOparadisa. Otatu vulu wo okwiilonga uunkulungu nokukokeka omaukwatya tu ulike kutya otatu ilongekidhile oku ka kala mo. Tala oshitopolwa “Oto ilongekidhile ngaa ‘oku ka thigulula evi’?” shi li moshifo shika.

17. Mbela otu na okukala tu uvite twa gwililwa po komayono getu gomonakuziwa? Shi yelitha.

¹⁷ Otu na wo okukambadhala okweetha po okukala tu uvite ondjo, omolwomayono ga kwata miiti ngoka twa ninga monakuziwa. Odhoshili kutya itatu ka tala ko nando ekuliloyambo kutya oli li eipopilo ‘lyokuyonena owina.’ (Heb. 10:26-31) Ihe otatu vulu okukala tu na uushili kutya ngele otwa itedhulula shili, omolwomayono ga kwata miiti, twa konga ekwatho kaakuluntugongalo, notwa lundulula eihumbato lyetu, nena Jehova okwe tu dhimina po thiluthilu. (Jes. 55:7; Iil. 3:19) Dhimbulukwa oohapu ndhoka Jesus a li a lombwele Aafarisayi a ti: “Inandi ya okwiithana mboka yi iwete aayuuki, ihe aalunde tuu.” (Mat. 9:13) Ekuliloyambo oli na lela oonkondo dha gwana okusiikila omayono getu agehe.

18. Oshike wa hala oku ka popya nomukolokoshi ngoka a li a sile pooha naJesus?

¹⁸ Mbela owu iwete ngaa wu li mOparadisa to popi nomukolokoshi ngoka a li a popi naJesus? Kapu na omalimbililo kutya amuhe otamu ka popya nkene mwa pandula ekuliloyambo lyaJesus. Otashi vulika wo wu ke mu pule e ku lombwele oshindji kombinga yaashoka sha li sha ningwa po, momukokomoko gwoowili oonshona dhahugunina dhonkalamwenyo yaJesus kombanda yevi nankene a li e uvite, sho Jesus e mu yamukula. Shimwe ishewe, omukolokoshi ngoka otashi vulika e ku pule kutya onkalamwenyo oya li ya tya ngiini pethimbo lyomasiku gahugunina guuyuni waSatana. Kashi shi tuu uuthembahenda uunene oku ka konakona Oohapu dhaKalunga naantu ngaashi omulumentu ngoka! — Ef. 4:22-24.

19. Omolwashike onkalamwenyo itaayi ka kala tayi sitha uuza mOparadisa? (Tala ethano lyokombanda.)

¹⁹ Onkalamwenyo mOparadisa itayi ka kala tayi sitha uuza. Otatu ka tsakaneka aluhe aantu aahokithi notatu ka longa iilonga tayi ti sha. Shoka sha dhenga mbanda, esiku kehe otatu ka vula okwiilonga kombinga yaTate gwetu gwomegulu tu mu tseye nawa notatu ka tyapula iinima mbyoka e tu pa. Ota pu ka kala aluhe iinima oyindji ta tu ka ilonga kombinga ye nosho wo kombinga yeshito lye. Shi thike ngaa pethimbo ndyoka tatu ka kala momwenyo, opo ngaa tapu ka kala pu thike ohole yetu yokuhola Kalunga. Inatu pandula tuu Jehova naJesus sho ye tu pa euvaneko ndyoka kutya otatu ka vula oku ka kala nomwenyo sigo aluhe mOparadisa!